Awaragasia - naka Babulon.

William Branham.

Naka oitabo...
Atur naka Ekanisa loka Perugamo.

Babel nges ekiror logeunet loka Babulon. Apolouke aitolitoluna. Kerai kaitebeikin lokepwakuni Kus, okoku loka Kam, konye aponi kitaraunai ajakanut naka agogong ka aibuses kakan naka okokuke, Numurod, ekamejan lokagogong. Nimurod, kwape ineritere kotoma Ageun esula itomon kadiop kosodi bobo kwape ejaar kotoma akiro nueswamas kolosek nuiwadikatos lumam eyongito Edeke abu kokapakin aitodolikin iboro iuni. Abu ngesi kokoto adukun ateker naegogong, na abu ngesi kiswama. Abu ngesi kokoto aisiarakin edinike elopet, na abu ngesi kiswama. Abu ngesi kokoto adukun ekiror kanukeng, na da abu ngesi kitodolik. Nuabu ngesi kitodolinik araasi numam emurworos neda aponi komaikinere ajakanut naka Babulon akou naka esabu kaneejaasi apugasinei nuka akwapin kere. Ebe abu ekedini kodum ajenun noi, erai naitogogongoro kabeit na ebe itejenarito Nuiwadikatai Obaibuli nges nepepe ka Satan cut kotoma Isa. esula 14, kosodi kotoma Apu. isulai 17-18. Ido kede kakiro nueswamas kolosek kipedori oni aitogogong ebe abu kolomak akwapin kere ido nges erai esusut kanuka ngoliswamae loka aima aputosia, ka nuinerasi awaragasia nuka ikapirin, karaida egelegela ikiroria luka idekesio kotoma atutubeta nuegelegela nuka akwap kwape ejaar angajep naka itunga. Ebe abu ngesi koduk ekiror kanukeng ka ikatupitokoke erai naejena, naarai nape ejaar atur nakwana elosi ingaren (aitodol Yesu apukokin Elopet neejaasi iinacanaKe) eponio nges aima ka aitopoloor, karaida kerai kokiror ece mere Nimurod, ido kotoma oyekalu loitegelikina mot kaneejai je losek amaere nges kageunet.

Kwape mam Ebaibuli ijaikinitor akiro nukiswamas kolosek nuka atekerin nuce kotoma aidules, ebuni araut naibusakinit aingic aiwadikaeta nukolosek nuka lumam kiyuunitos Edeke tetere kidumuni abongokinetewok naka eipone lokeraunor Perugamo aibois naka edini loko Babulon loka Satan. Neepol needumakina akiro ebuni noi araut toma aitejenuneta nuka apirianuto nuka Imisirian ka Iyonanin. Erai na naarai abu Misiri kodum esayans ka aimarake kaneejaasi Ikaludian kosodi kanen Yonan aikopun ngun ko Misiri.

Aso kwape keraar isasedotin kes lukeyaitosi acoasinei nuka aisisianakin nuka sayans ido kwape etwasamaere acoasinei nuka sayans kwape atutubet naka edini, kidaunit bo sek oni ajenun elacet lokeipone lokedumunia edini loka Babulon aicatunet kotoma akwapin nu nuarei. Erai da bobo abeit ebe ne duc apedoria ateker aipikor nace ateker, kotoma apak naetupakini edini loka nakepikoron abuni araun edini loka naipikoritai. Erai naejena noi ebe ajaatar Iyonanin da ka aanyuneta nuka Zodiac nuaputosi kwape nukejaatar Ibabulonin; ido edumunitai kotoma aiwadikaeta nukolosek nuko Misiri ebe apotu Imisirian koinakisi Iyonanin aijenekec naka aiyuunit idekesio luipu. Koipone kangol, abu aiyeiyea naka Babulon kisiarakin anyoun kateker kiton ateker aitodol naatakanunia kotoma Rome, kotoma China, India ido karaida kotoma North Amerika ka South Amerika kidumuni oni esusut loeputo jepeje loka aima.

Ecamanara akiro nukiswamas kolosek nepepe kEbabuli ebe edini lo loko Babulon mam kotenan cut kerai edini loka itunga luka akwap lusek noi. Kerai nges losodit aikaleleor awai kaneejai aiyuun nageunet; konye mere nges elopet kerai logeunet. Ikajenak akiro nukiswamas kolosek kwape nat Wilkinson ka Mallet adaut aitogogong ka agolokinet kaneejaas aiwadikaeta nukolosek ebe kapak ediopet itungasinei kere luka akwap eyuunitos EDEKE EDIOPET, Lokapolon, lomam ageunet karaida esange, lomam etakani, Lo da kanuka Akirot naka akitukuKe abu kicorak iboro kere ajaun, ido ebe kotoma oponesioKe kerai Ngesi loeminana ido kojok ka adolite da. Konye kwape due Satan ejai nges amunaar imodiobore kere yenepedori ngesi, kidumuni oni nges emunamunae aomisio ka itauon luka itunga tetere kes engerete abeit. Kwape due adaunia ngesi atamanakin adumun amayo kosubite bala erai ngesi Edeke ido mere ebulesit ka isubat yenika Edeke, abu ngesi kiriya aima na abeit Edeke tetere ebe motoko arai kiriya ngesi ngin mamakeng kangetakinet kosodi kwangin aikiario. Abu ngesi teni bo cut kitodolik eipudike loka aisiarakin edinike anatar akwap kere. Erai na naitogogongorit Edeke cut kotoma Oitabo loka Iromayon, “Naarai apotu kojenut Edeke, mam kes kitubusikinito Nges kwape Edeke, dimarai kooliosi kotoma aomisiokec, ido kotoma aitumutonio naka etau apotu kocamutu edini loebosit aitodol angetakinet na amaiata isuban ido mere Ekasuban.”

Kiitu ebe Satan arai isubat yenika Edeke (Okoku loka Acilakide). Kwangin kidumuni oni ebe ne sek esiarakinar abeit otunga, ido kere atingitos abeit ngin adiopet, kanepekanen ekaulo abu apaaran kodol na abu ekodet loepol kibeloror awai kaneejai Edeke kosodete aisiarakin eipone loka aima naebunit kaneejai Satan anatar akwap. Itejenunitos akiro nukiswamas kolo sek ebe ngul lukateker naka Sem luapotu kobwata kede abeit ngin na mam ijulanakin ajaasi itepegitos kagogong noi ngul luka Kam luapotu kibelooros awai kaneejai abeit toma aingal naka Satan. Emamei apak tetere ti alomar toma aitetem naka anu; erai na bon aitejenaret tetere jo iwanyuni ebe ajaasi idinin iarei ido iarei bon, kosodi ediopet lokaronon araun loka akwap kere.

Abu aiyuunit Edeke ediopet kibelokin araun aiyuunit idekesio luipu kotoma Babulon. Abu aingal naka Satan ka nukaiyeiyea nuka Satan apotu do konyout asurokin abeit naka Edeke ka aiyeiyea da naka Edeke kotoma otaun kangol. Abu Satan kaitebeikin koraun edeke loka akwapin kanu ido abu kibura amayo kaneejaasi ngul luadaunit ngesi aimod, aiduporite kes iyuunete ebe arai ngesi kabeit Ejakait.

Edini loka aiyuunit idekesio luipu loka lokasurup abu kogeun kakisisianakin naka teriniti. Kerai kokau kangina kotoma apakio nuka asonya ne abu aomisioit naka “Edeke ediopet kotoma itunga iuni” kopwakunor. Eipone loisumokinia ebe ikesisiakawok luka akiro nuka acoa naka edini lukakwana mam egiparitos na; konye idelelete cut kwape luemodit Satan kwape ajaatar lukegeikinete kes, eroko kesi iyuunito itunga iuni kotoma Eidekeone. Aso cani ber kitodikin oni ewai kotoma kaNuiwadikatai Obaibuli neejai amodiopedor kanuka aisisianakin kangin. Mam kereka erai nakaumokin ebe nakelosioto itatai luka Kam korotokec toma aima naka Satan neajai esusut loka aomisioit naka idekesio iuni ebe kemamei nepetai da idiotunganan kotoma otatai luka Sem yenikuyuunit ibore kwa kangin karaida ber ajakut kamodio aima naka ainapeta nakejaatar da ber ka aitupuset naka ngin? Mam kereka erai nakaumokin ebe Iburanian eyuunitos, “Kopupok, Wu Isirael, Ejakait Ekonideke erai EDEKE EDIOPET,” arai kejaas itunga iuni toma Eidekeone? Abu Aburaam, etatait loka Sem, kotoma Age. 18 koany Edeke EDIOPET bon kede kimalaikan iare.

Aso biai bo etetemere teriniti na? Etetemitai kede kalukat naka isodai iuni lueriakas kwape da itetemitere ko Rome lolo. Itegelikina, mam Iburanian kejaatar kaomisioit nakeipone kangol. Kwana ingai bo do edolit? Erai kereka Iburanian arai bo Ibabulonin? Kotoma Asia aomisioit naka aiyuunit idekesio iuni kotoma ediope abu kolom kotoma aputo naajaasi akwes auni kakuan adiope. Itetemitai nuke kwape lukacoa iuni. Kotoma India apotu kesi kodumutu kotauonokec aitetem nuka ngol kwape edeke ediopet kotoma aputosia auni. Aso erai ngin teni cut aijen akiro nuka edini naejok naka apaaran nakalolo. Ko Japan ejai Buddha lopeti kede akwes auni bala je losek kitetemit oni.

Konye lokipukokinit aitelekar kere nges ngol loijaikinit aomisioit naka teriniti naka Edeke kotoma aputo nakauni: 1. Akou naka etunganan lomojong naebwoikinit Edeke Papa, 2. Alukumet na da kaiyeiyea etodiarit “Aur” na da bobo erai apolouke Okoku. 3. Abebenoka ka ekori loka akwenyit (ajele). Ajai ne aisisianakin naka Papa, Okoku ka Emoyo Lokalaunan, itunga iuni kotoma Eidekeone, luenyaritai teriniti. Ipedori jo aanyun ibore ngipengin ko Rome. Kwana akoto eong aingit irwan atipet bobo, mam kereka erai naitegelikina ebe Satan ka lukamaak nges kotenan kejaasi epukokina abeit nakiyatakina itia papa loka aiyuun, (Aburaam) ka itataike? Mam kereka erai naitegelikina ebe ikamaak luka Satan, ajenete nuipu nuekamunitos Edeke itia idwe luka Edeke? Aso ngin nges naetamitos ikesisiak akiro nuka acoa naka edini lukakwana alimokin oni naineratar kesi nuikamunitos teriniti. Bon kiitu ibore yen idiopet agear kwana: eraas aiwadikaeta nu nuka abeit ido erai na naka abeit. Erai Satan ekengalan ido papa da loka aingalanut, ido duc neebunio ngesi kamodio aica eroko erai aingal. Erai ngesi ekaaran. Ido aisisianakinike naka teriniti adau amudiar ikodeta ido ebuni aiyatakit amudianar kiton Yesu abunore.

Kwape ejaar kotoma akiro nueswamas kolosek mam abu koyangaik aojau kanu aijulakinet aiswamaunio kotoma aomisioit na naka Papa ka Okoku ka Emoyo Lokalaunan. Abu Satan koyanga kes isukunyi awai motimot kaneejai abeit. Aomisioit naabu kopolou naka Eidekeone arai kwanata: 1. Papa lomam ageunet karaida esange, 2. Emoyo loka Edeke iboie kotoma toto NATUNGANAN. (kereka ngin kiinak jo aomoom?) 3. Okoku loerai Edeke, araitoit naka aiboi kangin, (aur naka aberu).

Konye mam Satan isimonikina. Mam ber nges edumunit amayo cut ngesi elopet, kilema koipone lornam itereikina. Kanukangun iyatakini do ngesi aitonyoun itunga awai kama ejai abeit. Kotoma nukaiyeiyeake, epukokini ngesi itunga ebe kwape mam Edeke Papa lopeti lomam etakani epodunitor elopet akiro nuka itunga, konye esalakinit ililingi kanuikamunitos kes, etupakini do ebe adolit ti do nges komai eililinga. Kaitebeikin ngin apolouke ebe aisac nges kwape epedoror kere, arai bo ainac cut. Abu aisisianakin na da kisiarakin airimokin akwapin, ido lolo cut ko India ipedori jo aanyun ebe iyekalun kanuka ekasuban lopeti, edeke loililingi, eraasi luikidioko.

Kwape mam ebusakinitor aima papa-lokasuban, arai bon naatakani ebe abu aima kibelor neejai “Toto ka Ikoku” kwape iboro luemayo. Kotoma Misiri ajai aimorikikina ngipengin naka toto ka okoku luanyaritai Isis ka Osiris. Ko India arai Isi ka Iswara (koany ber aputonoro da naka ikiroria.) Ko Asia arai Cybele ka Deoius. Ko Rome ka Yonan da ekoni eiswamae nepenen. Kosodi ko China. Ee, kinomaa ber ijo ariengun naka missionaris luka Roman Catholic kwape alomariata kesi China kosodete adumun kangina aputo naka Madonna ka Ikoku kojaasi amorokin nuka aica elomunitos kakou naka imukeru. Apedori ti cut aput ngin aisiecakinio ka adiope nakotoma Vatican kilema kanu agelakina naka atutubeta ace nuka ereet.

Erai kwana nailosikino oni angicun toto ka ikoku lukegeete. Adeke nageunet toto nako Babulon kerai Semiramis naanyaritai Rhea kotoma akwapin nukokide. Kotoma akaninike adakit ngesi okoku, lo karaida erai imukeru, arai loetetemitai kwape ekososo, loagogong, loetemelel ido kaitelekarit korai loeriarit angor. Kotoma Esk. 8:14 anyaritai nges Tamus. Kaneejaasi ikewadikak luajenas anyaritai ngol Bacchus. Kaneajaasi Ibabulonin anyaritai ngol Ninus. Naebeit alimun kanuka abeit kangin ebe erai ngesi loetodiaritai kwape imukeru ido kitetemitete ber kwape etunganan lopeti ido lokagogong erai ebe ejenio nges kwape “Okilenike - Okoku” Adiopet kotoma aitejenunetake kerai “Okilenike kaToto”, ido ko India neejenatar luarei kwape Iswara ka Isi, erai nges (okilenike) loitodiaritai kwape imukeru yenejai okising loka aberuke obe.

Naka oitabo...
Atur naka Ekanisa loka Perugamo.

Kouri Kus Nimurod: kogeu araun lokagogon kotoma akwap.

Kerai ekamejan lokagogon kakonyen nuka EJAKAIT: ŋes enerare ebe, “Kwape ka Nimurod ekamejan lokagogon kakonyen nuka EJAKAIT.”

Ageunet naka ajakanutuke arai Babel, ka Erec, ka Akad, ka Kalune, toma akwap Sinar.

Ageun 10:8-10