Mitolohia iti Biblia.
Genesis.
Ti sao a “Genesis” ket kayatna a sawen “Pangrugian”. Amin a banag ket matunton agingga iti libro ti Genesis. Idi damo ti lubong ket addaan iti gagangay (Monoteistiko) a relihion. Nangrugi ti politeismo idi Genesis 11, babaen ti pannakaibangon ti Babilonia.
Ti Gubuayan - Babilonia.
William Branham.Naipatarus manipud...
Pergamean Church Age (PDF Ingles)Ti Babel ti orihinal a nagan ti Babilonia. Kaipapananna ti pannakariro. Literal nga inrugi dayta ni Cus, nga anak ni Ham, ngem naiyeg iti pagarian ti pannakabalin ken kinatan-ok iti sidong ti anakna a ni Nimrod, ti mannakabalin a mangnganup. Ni Nimrod, sigun iti salaysay ti Genesis sangapulo ket maysa ken sigun met iti historia, inkeddengna nga itungpal ti tallo a banag. Kayatna ti mangbangon iti napigsa a nasion, nga inaramidna. Kayatna nga isaknap ti bukodna a relihion, nga inaramidna. Kayatna ti agaramid iti nagan, a naaramidna met. Monumental unay dagiti gapuananna isu a naawagan ti pagarian ti Babilonia kas ulo ti balitok kadagiti amin a gobierno ti lubong.
Ti kinalatak ti relihionna ket napaneknekan babaen ti kinapudno a naan-anay nga ilasin dayta ti Kasuratan ken Satanas iti Isaias Kapitulo 14 ken iti Apocalipsis Kapitulo 17-18. Ket babaen ti historia mapaneknekantayo a rinautna ti intero a lubong ken isu ti nakaibatayan ti tunggal sistema ti idolatria, ken ti tema ti mitolohia, nupay agduduma ti nagan dagiti didiosen iti nadumaduma a benneg ti daga sigun iti pagsasao dagiti tattao. Saan a masapul a sawen a nangaramid iti nagan para iti bagina ken kadagiti pasurotna, ta no la ketdi agtultuloy daytoy agdama a panawen (agingga nga ipalgak ni Jesus ti bagina kadagiti kakabsatna) isu ket madaydayaw ken mapadayawan, nupay iti sidong ti naiduma a nagan manipud ken Nimrod, ken iti templo a naiduma bassit iti templo a nakaidaydayawanna idi damo.
Yantangay saan a detalyado ti panangtaming ti Biblia kadagiti pakasaritaan ti dadduma a nasion, kasapulan a sukimatentayo dagiti nagkauna a rekord tapno masarakantayo ti sungbattayo no kasano a nagbalin ti Pergamos a tugaw ti Satanas a relihion ti Babilonia. Dagiti kangrunaan a gubuayan ti impormasion ket addanto kadagiti rekord ti kultura ti Egipto ken Griego. Ti makagapu iti daytoy ket inawat ti Egipto ti siensia ken matematikana manipud kadagiti Caldeo ket iti kasumbangirna inawat ti Grecia dagitoy manipud Egipto. Ita yantangay dagiti papadi ti mangimaton iti panangisuro kadagitoy a siensia, ken yantangay nausar dagitoy a siensia kas paset ti relihion, ammotayon ti tulbek no kasano a nagun-od ti relihion ti Babilonia ti pigsana kadagitoy dua a pagilian.
Pudno met a tunggal kabaelan ti maysa a nasion a parmeken ti sabali a nasion, iti umiso a tiempo ti relihion ti nangparmek nagbalin a relihion dagiti naparmek. Pagaammo unay a dagiti Griego addaanda kadagiti isu met laeng a pagilasinan ti Zodiac a kas kadagiti taga Babilonia; ket nasarakan kadagiti nagkauna a rekord dagiti Egipcio nga inted dagiti Egipcio kadagiti Griego ti pannakaammoda maipapan iti politeismo. Iti kasta nagsaknap dagiti misterio ti Babilonia manipud iti nasion iti nasion agingga a nagparang dayta idiay Roma, idiay China, India ken uray agpadpada iti Amianan ken Abagatan nga America masarakantayo ti agpapada unay a kangrunaan a panagdayaw.
Dagiti nagkauna a pakasaritaan ket umanamong iti Biblia a daytoy a relihion ti Babilonia ket sigurado unay a saan a ti orihinal a relihion dagiti immuna a tattao ditoy daga. Dayta ti immuna a naiyadayo manipud iti orihinal a pammati; ngem saan a dayta a mismo ti orihinal a pammati. Dagiti historiador a kas kada Wilkinson ken Mallett napaneknekanda a konklusion manipud kadagiti nagkauna a dokumento nga iti maysa a panawen amin dagiti tattao iti daga ket namatida iti MAYSA a DIOS, katan-okan, agnanayon, di makita, A babaen ti Sao ti ngiwatna insaona amin a banag nga adda, ken nga iti kababalinna Isu ket naayat ken naimbag ken nalinteg. Ngem kas kanayon a dadaelen ni Satanas ti aniaman a kabaelanna, masarakantayo a dadaelenna ti panunot ken puso dagiti tattao isu a laksidenda ti kinapudno. Kas iti kanayon a panangpadasna nga umawat iti panagdayaw a kasla isu ket Dios ken saan nga adipen ken parsua ti Dios, inyadayona ti panagdayaw manipud iti Dios agingga iti panungpalan tapno maallukoyna dayta iti bagina ket iti kasta maitan-ok. Sigurado a natungpalna ti tarigagayna a mangisaknap iti relihionna iti intero a lubong. Daytoy ket pinaneknekan ti Dios iti Libro ti Roma (Roma 1:21-23), “Idi ammoda ti Dios, indaydayawda Isuna saan a kas Dios, agingga a nagbalinda nga awan mamaayna kadagiti imahinasionda, ken babaen ti sipnget ti puso inawatda ti nadadael a relihion agingga a nagdaydayawda kadagiti parsua ken saan a ti Namarsua.” Laglagipem, ni Satanas ket maysa a parsua ti Dios (Anak ti Agsapa). Iti kasta masarakantayo nga iti maysa a panawen, naiwaras ti kinapudno kadagiti tattao, ket amin ket natengngel iti dayta maymaysa a kinapudno, kalpasanna idi agangay dimteng ti aldaw a ti nalawa a grupo ti nagtallikud manipud iti Dios ket insaknapda ti diaboliko a kita ti panagdayaw iti intero a lubong. Ipaneknek ti historia a dagidiay iti tribu ni Sem a nagtakder a kadua ti di agbaliw a kinapudno ket natibker a bumusbusor kadagidiay ni Ham a timmallikud manipud iti kinapudno nga agturong iti kinaulbod ti diablo. Awan ti tiempo a makipaset iti diskusion maipapan iti daytoy; naiyam-ammo laeng dayta tapno makitayo nga adda dua a relihion ken dua laeng, ket nagbalin ti dakes a relihion iti intero a lubong.
Ti monoteismo ket nagbalin a politeismo idiay Babilonia. Ti kinaulbod ti sairo ken dagiti misterio ti sairo ket timmakder a maibusor iti kinapudno ti Dios ken dagiti misterio ti Dios iti dayta a siudad. Pudno a nagbalin ni Satanas a dios daytoy a lubong ket inkalikagumanna ti panagdayaw kadagidiay inallilawna, a nangpati kadakuada a pudno nga isu ti Apo.
Nangrugi ti politeistiko a relihion ti kabusor iti trinitario a doktrina. Idi pay laeng idi un-unana a ti “maysa a Dios iti tallo a persona” nga ideya ket timmaud. Anian a karkarna ta saan a nasipdutan daytoy dagiti moderno a teologotayo; ngem nabatad a kas iti panangallilaw ni Satanas a kas kadagiti kapuonanda, mamatida pay laeng iti tallo a persona iti Kinadios. Ipakita kadatayo ti maysa a lugar iti Nasantoan a Surat nga ayan ti aniaman nga autoridad para iti dayta a doktrina. Saan kadi a karkarna a bayat a dagiti kaputotan ni Ham ket nagtultuloyda iti dalanda iti panagdayaw ni Satanas a nakairamanan ti kangrunaan a konsepto ti tallo a didiosen nga awan uray maysa a tugot dagiti kaputotan ni Sem a mamati iti kasta a banag wenno addaan iti aniaman a seremonial a panagdayaw a nakairamanan uray maysa a kita dayta? Saan a karkarna a dagiti Hebreo ket namatida, “Denggem, O Israel, ti Apo a Diosmo ket MAYMAYSA a Dios”, no adda tallo a persona iti Kinadios? Ni Abraham, ti kaputotan ni Sem, iti Genesis 18 ket nakitana ti MAYSA laeng a Dios nga addaan iti dua nga anghel.
Ita kasano a naiyebkas daytoy a trinidad? Naiyebkas dayta babaen ti equilateral a trianggulo uray isu met laeng ti mayebkas idiay Roma ita. Karkarna, dagiti Hebreo awan ti kasta a konsepto. Ita, siasino ti husto? Dagiti kadi Hebreo wenno dagiti taga Babilonia? Idiay Asia ti politeistiko nga ideya ti tallo a didiosen iti maysa ket rimmuar iti maysa a ladawan nga addaan iti tallo nga ulo iti maysa a bagi. Isu ket naiyebkas a kas tallo a kinasaririt. Idiay India, nasarakanda iti pusoda nga iyebkasda isuna kas maymaysa a dios iti tallo a porma. Ita dayta ket talaga a nasayaat a moderno nga aldaw a teolohia. Idiay Japan adda naindaklan a Buddha nga addaan iti tallo nga ulo a kas iti daydiay immun-una a dineskribirtayo. Ngem ti mangipalgak unay kadagiti amin ket daydiay mangikeddeng iti trinitario a konsepto ti Dios iti trinidad a porma ti: 1. Ti ulo ti maysa a lakay a mangisimbolo iti Dios Ama, 2. Maysa a sirkulo nga kadagiti misterio ket mangipasimudaag iti “Bin-i” a daytoy ket kayatna a sawen ti Anak. 3. Dagiti payak ken ipus ti tumatayab (kalapati). Adtoy ti doktrina ti Ama, Anak ken Espiritu Santo, tallo a persona iti Kinadios, maysa a pudno a trinidad.
Kasta met laeng ti makitam idiay Roma. Ita bay-anyo a saludsodek manen, saan kadi a karkarna a ti diablo ken dagiti agdaydayaw kenkuana ket talaga nga ad-adu ti kinapudno a naipalgak ngem ti ama ti pammati, (Abraham) ken dagiti kaputotanna? Saan kadi a karkarna a dagiti agdaydayaw ken Satanas, ad-adu ti ammoda maipapan iti Dios ngem dagiti annak ti Dios? Ita dayta ti padpadasen nga ibaga kadatayo dagiti moderno a teologo no pagsasaritaanda ti maipapan iti maysa a trinidad. Laglagipem laeng daytoy maysa a banag manipud ita: dagitoy a rekord ket kinapudno ken daytoy ket kinapudno - ni Satanas ket ulbod ken ama ti kinaulbod, ken tunggal umay nga addaan iti aniaman a lawag ket kinaulbod latta. Isu ket mammapatay. Ket ti doktrinana maipapan iti trinidad dinadaelna dagiti bunggoy ket dadaelenna agingga nga umay ni Jesus.
Sigun iti historia saan a nagbayag sakbay a naaramid ti panagbalbaliw iti daytoy a konsepto ti Ama ken Anak ken Espiritu Santo. Inyadayo ida ni Satanas iti saggaysa manipud iti kinapudno. Ti nagbalbaliw a konsepto ti Kinadios ket ita: 1. Ti agnanayon nga ama, 2. Ti Espiritu ti Dios a naglasag iti maysa a NATAO nga ina. (Saan kadi a dayta ti mamagpanunot kenka?) 3. Maysa a Nadiosan nga Anak, ti bunga dayta nga inkarnasion, (Bi-i ti babai).
Ngem saan a mapnek ti diablo. Saanna pay a nagun-od ti panagdayaw iti bagina, malaksid iti saan a direkta a wagas. Kalpasanna, alaenna dagiti tattao ad-adda pay nga adayo iti kinapudno. Babaen kadagiti misteriona ipalgakna kadagiti tattao a yantangay ti naindaklan a di makita nga ama (Dios) ket saan a maseknan iti bagina kadagiti aramid dagiti tattao, no di ket agtalinaed a naulimek a mainaig kadakuada, kalpasanna sumaruno dayta tapno isu ket madaydayaw a siuulimek. Kinapudnona kaipapananna ti panangilaksid kenkuana agingga a mabalin, no saan nga interamente. Nagsaknap met daytoy a doktrina iti intero a lubong, ket ita nga aldaw idiay India makitam a dagiti templo iti naindaklan a namarsua, ti naulimek a dios, ket nakadkadlaw a bassit ti bilangda.
Gapu ta saan a kasapulan ti agdayaw iti namarsua-ama, natural laeng a ti panagdayaw ket nagtayyek iti “Ina ken Ubing” kas dagiti banag ti panagdayaw. Idiay Egipto adda isu met laeng a kombinasion ti ina ken anak a naawagan Isis ken Osiris. Idiay India da Isi ken Iswara dayta. (Paliiwenyo ti panagpapada dagiti nagan uray.) Idiay Asia isu da Cybele ken Deoius. Idiay Roma ken idiay Grecia simmaruno dayta. Ket idiay China: Bueno, panunotem ti pannakaklaat ti sumagmamano a misionero a Romano Katoliko bayat a simrekda idiay China ket nakasarakda sadiay iti Madonna ken Ubing nga addaan kadagiti sinamar ti lawag nga agtaud iti ulo ti maladaga. Mabalin koma a nasukatan ti estatua iti maysa idiay Vatican malaksid iti nagdumaan ti sumagmamano a langa ti rupa..
Maitutop itan a matakuatantayo ti orihinal nga ina ken ubing. Ti orihinal a diosa-ina ti Babilonia ket ni Semiramis a naawagan Rea kadagiti makindaya a pagilian. Iti takiagna ket nakaiggem iti maysa nga anak a lalaki, a nupay maladaga, nadeskribir a natayag, napigsa, guapo ken nangnangruna a makaawis kadagiti babbai. Iti Ezequiel 8:14 isu ket naawagan iti Tammuz. Kadagiti klasiko a mannurat isu ket naawagan iti Bacchus. Kadagiti taga-Babilonia isu ni Ninus. Ti makagapu ti kinapudno nga isu ket naibagbaga a kas maysa a maladaga iti takiag ti ina, ken kaskasdi a nailadawan a kas maysa a naindaklan ken mannakabalin a tao ket isu ket naamammuan a kas ti “Lalaki-Anak”. Maysa kadagiti titulona ket “Lalaki ti Ina”, ken idiay India a sadiay dagiti dua ket naamammuan a kas da Iswara ken Isi, isu (ti asawa a lalaki) ket naibagbaga a kas ti maladaga iti suso ti bukodna nga asawa.
Naipatarus manipud...
Pergamean Church Age (PDF Ingles)
