Ekitoi loka Aijar. Ageun Adiakaret.
(Aur naka Emun.)

William Branham.

Naka oitabo...
Atur naka Ekanisa loka Epeso.

Apukokinio 2:7,
“...Ngin yenipikori ainakini nges ainyam araito nuka Ekitoi loka Aijar, Loejai paradais loka Edeke.”

Erai lo eropit lokoingaren mama ejaasi ikepikorok luka aturio kere. Kedaun akutakin anyarario nakawasia kanu alosit ojie, kedaun da aiperikin lujiis wok kwap kiyenguni do konyet oni kotoma paradais loka Edeke ido akorakinetewok eraun Ekitoi Loka Aijar, ikar kere.

“Ekitoi Loka Aijar.” Mam kereka ngin erai eipone lokeiner loibus? Elimunitai irwan auni kotoma Oitabo loka Ageun kosodi irwan auni kotoma Oitabo loka Apukokinio. Kotoma aiboisio ngun akanyikape kere erai ekitoi ngol nges ngopengol ido ebwoikinit cuticut ibore ngipengin.

Konye inyobo Ekitoi Loka Aijar? Eebo, nasodit kakere ti ber ibusakinit oni kajenutu inyo ebwoikinit ekitoi. Kotoma Mar. 24:6, kwape etetemio Balaam Isirael, abala ngesi ebe araasi kesi “iluan luera Ejakait.” Ikito kotoma Kanuiwadikatai Obaibuli itodiaritosi itunga, kwape kotoma Esabuli 1. Apolouke ebe ibusakinit Ekitoi Loka Aijar korai Etunganan Loka Aijar, ido Ngol nges Yesu.

Aso kokiding Omanikor loka Eden ajaasi ikito iarei ebwoete. Arai ediopet Ekitoi Loka Aijar, loce arai Ekitoi loka Ajenun Nuejok ka Nueroko. Arai ti etunganan ajarenen kanuka Ekitoi Loka Aijar; konye mam nges abeit atiror loce je ekitoi; arai ketiro ti nges, atwanare. Konye abu etunganan konyam nuka ekitoi kaje, ido nakiswamaunia ngesi ngun, koloma atwanare tomake kanuka adiakarike, koraun do nges loatiakara kanejai Edeke.

Aso Ekitoi ngol sek kangina koEden, Ekitoi ngol loarai alibunet naka aijar, kerai Yesu. Kotoma Yokana osula lokikanyetekape kiton lokikanyetekauni, itodiara Yesu Elopet, kwape alibunet naka aijar namam edaun. Konyaraikin Elopet ebe arai Ngesi Inyamat lukepote kotoma akuj. Abu kiner nu Nges Elopet ainakin bon ido ebe arai kenyam itunganan Nges mam cut ti ketwana. Abu Ngesi kolimo ebe ajeni Ngesi Aburaam, ido ebe eroko Aburaam AJAI Ngesi. Abu Ngesi kodwar ebe arai Ngesi Elopet abuni ainakin kes akipi nukajarak ebe arai kemat itunganan mam cut akure abuni aijak bobo, konye abuni aijar ikar lumam edaunos. Abu kitodiar Elopet kwape AJAI LOKAPOLON. Erai Ngesi Inyamat Luka Aijar, Atan Naka Aijar, Ediopet Loemamei Ageunet karaida Esange, EKITOI LOKA AIJAR- Ajai Ngesi sek ngina Eden kiding Omanikor kwape da ebunio Ngesi ajaunor kiding ka paradais loka Edeke.

Ejaasi ice kaomisioit ebe ikito luarei kotoma omanikor, araasi ikito ice iarei luaputosi kaluce kere luebwaikinit Edeke ngina. Konye ikesisiak luecoitos ejenete ebe mam nu ikote nen. Neworo Yokana Lokebatisan ebe eperikinitai aep atoromin nuka ikito kere, mam nges kaitebeikin enera nuka luesubunitai eraasi ikito, konye nuka apolousio nukomoyo. Aso kotoma 1 Yokana 5:11, ebala ebe,
“Na nges AITEJENUNET ebe, abu Edeke koinak oni aijar naka ikar kere, ejai da aijar ngin toma Okokuke.”
Abala Yesu kotoma Yokana 5:40 ebe,
“Kwabo ingerete aponare mamakang tetere ijaunete kaijar.”
Ngesi atemar ebe aitejenunet; Akirot naka Edeke elimorit kailerer ido kocae da ebe AIJAR, AIJAR NAMAM EDAUN, ejai toma Okoku. Mam erai aibois bobo ace. 1 Yokana 5:12,
“Yenejai Okoku, ejai da AIJAR; yenemamei Okoku loka Edeke, EMAMEI Aijar.”
Aso do kwape mam epedoria aitejenunet aijulakin, alemario kamake karaida aiyatakinio mamake, apolouke ebwoi do aitejenunet ebe AIJAR NGIN EJAI TOMA OKOKU... Kwape eraar na kwangin, IBUSAKINIT EKITOI LOKOMANIKOR KORAI YESU.

Ejokuna kere. Arai erai Ekitoi Loka Aijar etunganan, iburai bodo Ekitoi loka Ajenun Nuejok ka Nueroko korai NGESIDA itunganan. Mam epedori araut koipone ece. Kwangin apotu Ngol Lokadoliton ka Ngol Lokaronon kobwaata idunyanara kangina kokiding Omanikor loka Eden. Esk. 28:13a,
“Ijai (Satan) kolo toma Eden, emanikor loka Edeke.”

Ne nges kidumunia apukokinio nakabeit naka 'aur naka Emun.' Eenita ibore ilopet yen abu kiswamaun kotoma Omanikor loka Eden. Ebala Akirot ebe emun nges abu kijodijod Keba. Kaitebeikin abu emun kisup nges. Kotoma Age. 3:1, ebala ebe,
“Kepiiriana emun aitelekarit itiang kere luka ais lukesubi Ejakait Edeke.”
Arai etiang lo loaputosi noi ka etunganan (konye kerai cut etiang) ebe da epedori aomoom ka einer da. Kerai ngesi isubat yenitenara ido ajai bala ti kiding kechimpanzee (ecom loapolon) ka etunganan, konye koapiasi noi ka etunganan. Arai loapie kaneejai etunganan aitodol ikekinyomit araut yenapedori ido abu kimorikikinos ka ngin yenikaberu kosodi ainakin ya epotuni. Naeswamaunor na, abu Edeke kiken emun. Abu Ngesi kijulak nginikoit naka akuan naka emun, kwangin koraun do nges ailia koipone lo elosio emun. Epedori sayans aitam kere nuekoto konye mam ebuni adumun arucokinet naengopit. Abu Edeke kocoik ngin. Erai etunganan loeco ido epedorit ngesi aanyun arucokina naka etunganan kede etiang etamit da ngesi aitogogong ngin kakiro nuka aituluor (evolution). Emamei adioituluor. Konye ca apotu etunganan ka etiang kinyopakinos. Ngin nges adiopet kotoma nukaiyeiyea nuka Edeke naesalit ibwaara, konye epukoritai ngesi kane. Etakanunit kokau kangina cut kokiding naka Eden ne ebelokinor Keba awai kanejai Aijar acamun Atwanare.

Koany nuabu Edeke kolimok kes komanikor. Age. 3:15,
“Ebwaikini asurup kidingikon ka aberu, ido kiding aurikon ka Aurike da; idecidecenenei akonikou ka jo da idecidecenenei Aketitibat.”
Arai kicamu oni nuebala Akirot ebe abu aberu kojaunotor Kaur, nges bo do atemar ibusakinit cut abu emun da kojaunotor kaur. Arai kerai Aur naka aberu ikoku-yenisapat komamei ekiliokit aur bo do da naka emun ebusakinit korai nakepiteni kanengopekangol, ido nges atemar ebe, ekiliokit ece ebusakinit aurio komamei eiswamae loka ekiliokit lotunganan. Emamet ikesisian yenimam ejeni ebe Aur naka aberu arai Kristo Lo da abum koiswamae loka Edeke, komamei aijen aberu koipone loka itunga. Erai da bobo naejena noi ebe aidecidecio naalimontai sek naka akou naka emun arai kaitebeikin adwarasit naekamunit nuabuni Kristo aitodolikin komusalaba asurokinia Satan. Kangina komusalaba abuni Kristo aidecidec akou naka Satan, kojai Satan aidecidec atitibat naka Ejakait.

Atutubet na naka Nuiwadikatai Obaibuli erai apukokinio naka eipone loaweikinor aur obe naka emun tom akwap, kwape da kijaar kaitejenunet naka Luka 1:26-35, ne da ijaikinitere aitejenunet na bee naka epone loabunio Aur naka aberu kitodiaror kakuan komamei eiswamae loka ekiliokit lotunganan.
“Kolap kalokikanyetekape aponi kijukunai emalaika Gaburiel kama ejai Edeke alosit Galilaya ore Nasaret, Mama ejai abekot nakisinerit ekiliokit ekekiror Yosep, lokokek loka Daudi; ekiror loka abekot nges Mariam. Koloma emalaika mama ejai, kotema atiar, Yoga, naisirerengioi noi, ejai Ejakait kajo! Konye kiyalongong ngesi noi kanuka akiroke, koomoom kotauke ebe ikoni bo ai ayogan na. Kotema emalaika nges atiar, Sirikiyong, Mariam, naarai idum asianut kama Ejai Edeke. Ido koany, ipotuuni, idouni ikoku yenitelepat, imaikini Ekekiror YESU. Eraun Ngol Lokapolon, enyarao Okoku loka Je Loejai kuju kakuj; Ejakait Edeke einakini Nges eicolong loka Daudi papaake, Irumi ekek loka Yakob ikar kere; Akejakanut da mam enangi. Kotema Mariam emalaika atiar, Ikwaikinete bo ai ngun, naarai mam ajeni ekiliokit? Kobongok emalaika nges ebe, Kidoikini jo Emoyo Lokalaunan, kirapiari agogong naka Je Loejai kuju kakuj; kanukangun yeneuruunio enyarao yenikalaunan, Okoku loka Edeke.“
Kwape araar Aur naka aberu Edeke obe auruun Elopet kakuan naka etunganane, aso aur naka emun erai erot obe loabu Satan kodum ebe apedoria ngesi angaaria ekek kanukeng alomaria ateker naka itunga. Arai namam epedor Satan (naarai erai ngesi yenejari-yenimoyo YENESUBUNITAI) auruun elopet koipone loabu Edeke kourunor Elopet, aso aitejenunet naka Ageun itetemi eipone loetolomunia ngesi akeuri kosodi ngesi elopet alomun araibo abelun toma ateker naka etunganane. Bobo da kiitu ebe Satan enyaritai 'emun'. Erai akeuri araibo akebelun toma ateker naka etunganane nges kinera oni nuke.

Eroko Adam kiira ajenun akuan naka Keba, abu emun kobeberikin.. Ido ngol loaponi kouruunai kanuka ngin kerai Kain. Kerai Kain loka (loauriei, euriat loka) “Lokaronon.” 1 Yokana 3:12. Emoyo Lokalaunan kotoma Yokana mam cut apedori ti anyara Adam kaibois adiopet “Lokaronon” (naarai ti nges erai ngol arai korai ngesi eurit Kain) kosodi konyet kaibois ace anyara Adam “Okoku loka Edeke” lo da kerai ngesi kanuka asubunio. Luka 3:38. Abu Kain kideleleu kotoma oponesio bala papake, ekayangaunan atwanare, ekaaran. Eipone loabu ngesi komwangia cut Edeke neatereikinor Lokapedor kere nges kotoma Ageun. 4:5, 9, 13, 14, itodunit nges cut erai lomam erai itunganan kotoma oponesio, esubit da bala edeparit aitejenunet adio nakijaar kotoma Nuiwadikatai Obaibuli naikamunit Edeke itereikin neejai Satan.
“Konye mam abu kocam Kain ka akesubanit. Konyunyurikin noi Kain, konyorididoto akekonyen. Kotema Ejakait Kain atiar, Ali bo onacekon Abel? Kotema atiar, Mam eong ajeni: arai do eong ekedaran loka onaceka? Kotema Kain Ejakait atiar, Akaiticanet mam epedor atitingikinio. Koany, kirenge lolo eong kotoma akwap, ido angopikini akonikonyen; araun eong ekasian epasoit da kakwap, ido yenikadumuni eong kaari.“

Koany eipone loijaikinitor cuticut aitejenunet naka Edeke ajenanut naka aurio naka Kain, Abel ka Set. Age.4:1,2,
“Kojenu Adam akeberu Keba; kopotuu, kouru Kain, kotema atiar, Kainakin eong ekes kama ejai Ejakait. Kourunai bobo onaceke Abel.”
Age. 4:25,
“Kojenu bobo Adam akeberu; kouru ikoku yenitelepat, komaik ekekiror Set...”
Ejaasi itelepai IUNI euritai kamaka aswamisio AAREI nuka ajenun naka Adam akeberu. Kwape eraaar Ebaibuli Akirot naka Edeke naibecokino ido kitekoro da, mam na erai aibucaret konye erai aitejenunet kanuka aitacaikiniowok. Kwape aponere kourunere itelepai IUNI kamaka aswamisio AAREI nuka Adam, ijeni bo do ijo KAITEBEIKIN ebe EDIOPET kangul iuni MAM ARAI okoku loka Adam. Iwadikat Edeke nu kibecokino koipone kalo kanu aitodikinia oni icebore. Abeit naka akiro kanu erai ebe ajaatar Keba kotoma akoikike odwe IAREI (imu) kamaka apotikineta NUAGELEGELA. Apotiei ngesi imu, ido korai apotuunio naka Kain nakegeikinit naka Abel.

Naka oitabo... Atur naka Ekanisa loka Epeso.

Aanyun... Aur naka Emun.

Kana ŋes etakanuniata idwe luka Edeke ka idwe luka Satan; ŋin kere yenimam iswamai nukadolit mam erai yenika Edeke, karaida yenimam emin onaceke,

Naarai na ŋes aitejenunet naipotu kopuput ameun kageunet, ebe, kaminanaros.

Mere kwape Kain, lokerai loka lokaronon, koar da onaceke: Ido kanukinyo kearia ŋes? Naarai keroko akeswamisio, kwabo kedolito nuka onaceke.

1 Yokana 3:10-12