Akimunono ngina a Babilon.
Babilon. Apolou keng erai egurias.
William Branham.Tosiomete alo akirot...
Aturi ngina a Perigamo.Babel inges ekiro ngolo esiakinan a Babilon. Apolou keng erai egurias. Erai Kuc kolong ageuni inges, lokoku a Kam nai abu todolu napukan ngina ka apedor ka apolou alotoma lokoku keng, Nimrod. Ekamijan ngolo ationon nooi. Abu Nimrod ikwapei eyiakar alotoma ageun ngitomon-ke-epei ka dang alotoma ngiemuto ngulu epasak kitemoki akirikakin ngiboro ngiuni. Eitanit inges adukun ebuku ngolo agogogngon, ngolo nai abu inges kitemoki. Acamit inges akielar edin keng a elope, abu inges kirikak nguna dang. Acamit inges akitopol ekiro keng, ido abu kitodolik ngun dang. Abu apaki ngina ka akitodolikin ngakiro nu daadang yaik inges apaki ngina ationon nooi akitodol ngina aponere tonyaraere ebuku ngolo a Babilon ngol ebe akou ngina a egolit alotoma ngapukanisia ngunace nguna ka akwap. Ebe abu edin keng topoloyo nooi ikwapei itogogongitotor ngakigiret inges cut erai ngolo a Satan alotoma Isaia 14 ka alotoma Apukokino 18. Ido alotoma ngiemuto ngulu ngorok, ikiriamuni iwon atemar abu edin lo kikama akwap daadang ka erai ageunet a ibore a ngini erai ngaputosia, ka neni irworore ngakiro nguna taman, ata kesibit agelakina ngirorwa ngulu a ngakujo alotoma ngakiboisio nguna gelagela alotoma akwap ikwapei eyiakatar ngangajepa a ngitunga. Abu inges kitopolo ekiro keng ido ngikewapak keng dang mam nyelimito inges, nai ikwapei eyiakar aturi na elosi ngaren (akitodol ngina itodikinor Yesu neni a ngikaitotoi Keng) erubakini inges erai ngolo ilipio ka tokeraritetei dang, atabo kerai alotoma ekiro ece ngolo egelaana aneni a Nimrod, ka egelaana dang iwadio alotoma eyekalu alopite a ngolo kolong esiakinere akerit inges.
Ikwapei nyirworor Ebaibul ka acukulul nooi nguna ikamunito ngiemuto ngulu ngorok ngulu a ngakwapin a nguna gelayek, iitanio iwon oyenutu nguna iteyenunito ngiemuto ngulu ngorok ikotere ikiriamuni iwon abongokinet ngina itoodiarit epite ngolo araunia Perigamo akibois ngina ke edin a Satan a ngolo a Babilon. Ikiriamuni iwon ngun alotoma nguna igirito ngitunga ngulu a Misiri ka alotoma ngitalio ngulu a Ngigirik. Alosikinet a ngakiro a nu ikes nu ebe ariamuni Misiri aosou keng ka emara dang alotoma Ngicaldin, ido ekau apotu Ngigirik dang toriamut a neni a Ngimisirian.
Tokona ikwapei arakatar ngisacaradoti ekamunit akitatam aosou na ka ikwapei esitiyatere aosou na ikwa atiaket ngina ka edin,ikiyeni sek iwon ekipuguwo ikwa epone ngolo kebunio edin ngolo angitunga a Babilon toriamunia agogongu keng alotooma ngibukui ngarei lu. iyookino nabo nugu dang ebe ngina ilounia ebuku epei ebuku ngoloce, torauni edin ngolo a ngulu ekamasi nguluce edin a ngulu ekamar. Eyenen kojokan atemar ayiakatar Ngigirik dang epite ngolo isiemere ngitopon alopite a ngolo ekwaan ka ngulu a Babilon ka dang aponi toriamunae alotoma nguna ngorok alo Misiri ebe apotu Ngimisirian inakis Ngigirik aosou kec ngina a ngakujo a nguna alalak. Abu nait akimunono ngina a Babilon kielakin lobukui ka lobukui paka ngina apeleunio alo Roma, alo Caina, India, kuju ka kwap America ikiriamuni iwon anen ekilipe epei ngolo ikwaan.
Ecamuna ngiemuto ngulu ngorok kapei ke Ebaibul atemar ebe edin ngolo a Babilon lo, pa arai edin ngolo sek ngorot ngolo kolong ayiakatar sek ngitunga ngulu ngorok ka akwap. Inges esiakini aoliyor anakiyiun a ngina ngorot, pa nait arai inges edin ngolo esiaunan. Ecamuna kaapei ngikegirak ngiemuto ngulu ngorok ikwa Wilkinson ka Mallett itogogongito ikes alotoma nguna keriamunete ikes aloemuto a ngulu ngorok nooi atemar kenupito kolong ngitunga daadang ngulu ka akwap tooma AKUJ APEI, ngina epol, ngina nyetwani, ngina nyetakani, ngolo abu alotoma Akirot ngina ka akituk keng tolimu tema toyiakaun nginibore, ka dang ebe erai Inges Akuj ngina eyiakatar ngipitesio ngulu ikote amina, ajokis ka torai Akuj ngina ajokan. Nait ikwa eyakar satan jwijwi akitoronit ediopone adaadang, ikirimauni iwon inges emunaari ngatameta ka ngitai angitunga ikotere ikes engerete akiyookino. Ikwapei sek ikatakiniotr inges ariamun akukonokinio ikwapei ibiikar Akuj ka mere eketiyan ka isubuna (asubio) ka Akuj, abu inges kiriya akukonokinio nawae aneni ka akuj paka nasalunet ikotere inges epedori akiriyar tooma nakuwan keng ka angun torau ngolo etopolorio. Ka abu inges kire kirikak akiitanit keng akiyalar edin keng tooma nakwap daadang. Itoodiarit Akuj nu erae nguna akire alotooma Ekitaabo ngolo a Ngiromayon, “ngina ayeniata ikes Akuj, emamu pa apotu ikes kitopolosi Inges ikwa Akuj, paka ngina arauniata ikes ngikonginae alotooma ngatameta kec, ka acamut ikes edin ngolo emunaara alotooma akirionut ngina angitaikec paka ngina egeuniata ikes akukonokin ngisubuna ka mere Ekasubunan.”
Totamunite, ebe arae Satan isubuna ka Akuj (Lokoku ka ataparacu). Angun ikiriamuni iwon neni aponere apak apei tokorarere akiyookino alokiding ngitunga, ka ikes daadang apotu kirica akiyookino apei ngin, anen kelunyar apak abu akolongit todolu ngina abunio atukot ngina apolon tomulenio Akuj ka apotu tokorasi akukonokin ngina aronon nakwap daadang. Elimorito ngiemuto ngun kinga ebe ikes ngulu ka ateker a Shem ngulu apotu towaa ka akiyookino ngina emamu nyiloconokin ayakasi tooma naremakino ngina gogong neni angulu Ham ngulu apotu toesikis akiyookino toloto naliokon ngina a Satan. Emamu esaa ngolo ebeitor alomaria tooma lokiyan ngol; erae akitoodiun nenikus ikotere iyees ingolikinete ebe keyakasi ngidinio ngiarei ka ngiarei bon, ka ngolo aronon abu toyakaun nakwap daadang.
Abu edin ngolo ke emoit ngolo barar a ngakujo lo kisiakinite alotoma akitatam ngina a ngakujo a ngauni. Erai jik ameun ka ama anakisiakinet inges ageunor atametait ngina ka “Akuj ka apei araut ngakujo ngauni” ayiakaun. Epite ngolo ikitubulioto nu ebe emam ngikasiomitok yok ngulu a ngirwa a lu nyeripunito nu. Nai nguna ileerete ikes nu ebe alopite a ngolo amodikinia kolong Satan atapapa kec, eroko ikes enupito atemar ebe eyiakasi ngakujo erai ngauni.
Ikitodik iwon itunganan idio adiokiding alotoma Ngakigiret neni eyiai apedor ngina ka akitatam a ngin. Mere mono erai ibore ngini ka aumokin ebe ngina aponiata ngidwe ngulu a Kam torotokinioto a lorot kec a ngolo ka akilip Satan torai ekilipe ngolo adolito ngakujo keng ngauni ebe mam adio kolongit apei dang ngina ekatokinioto ngitatae a Cem akinup ibore ngini ikoni neni kori ayiakaunor ikes adio kilip ngina iitunitere ngakiro nguna ngorok kori edio kabila a ekilipe a ngol? Mam nyerai aumokinet aneni a Ngisirael anerai anupito ikes atemar, “Tokupok iyong, Okoe Israel, Ekapolon Akuj kon erai Akuj APEI,” eyiakasi kire ngakujo erai ngauni a? Abraham lotatait keng a Cem, alotoma Ageun18, abu kingolik Akuj apei bon ka ngimalaikan ngiarei.
Tokona etodiunitae mono ngakujo nguna uni nu alopite ka ali? Etodiunitae inges alopite a ngolo ka ageri a ngina enyaritae a ngamusungui (equilateral triangle) lopite ngolo idodiyiaritere alo Roma tar napakana. Agelana nooi amamukatar Ngiburanian enupitene ngolo ikoni ngol. Tokona, ngae co iyokinit? Erai mono Ngiburanian kori Ngibabiloniae? Alotoma akwap ngina a Asia atametait ngina a ngakujo a ngauni alotoma apei, abu toyiakaun alotoma aputo ngina ayiakasi ngakies ngauni alotoma aputo apei. Itodiaritae inges a nen erai ngaosisio ngauni. Alo India apotu ikes toriamut alotai kec atemar ejok akitodiar inges erai Akuj apei alotoma ngiyekaunitenei keng ngiuni. Tokona erai ngun nguna itatami aosou ngina a ngirwa a lu. Alo Japan eyiai Buda ngolo apolon ka ngakies keng ngauni alopite a ngolo sek aroko iwon itamere.
Ekabila ngolo etubulon inges ayiakau ikes natametait ngina a ngakujo a ngauni alopite a lo ebe: 1. Akou ngina a ekasikout ngina ewoikinit Akuj Papa. 2. Ager ngina elulung ngina co ewoikinit anakimunono “Ekinyomit” ngolo co erai apolou keng Lokoku. 3. Ngakabenuk ka enguberu ngolo a ikeny (akuri). Nege nai eyiai akitatam ngina a Papa, Lokoku, ka Ekuwam ngolo akwangan, ngakujo ngauni alotoma ngakujo ngauni nguna iyokino. Kingolik ibore nipei ngini alo Roma dang. Tokona kimieki mono ekengit ne, nyerai mono ibore ngini ka aumokin atemar ayiakatar Satan ka ngikelipak keng apukokino ngina iyokino akilo tar papa ngolo ka akiyiun (Abraham) ka ngitatae keng a? Nyerai mono ibore ngini ka aumokin atemar ayenete ngikelipak a Satan Akuj akilo ngidwe ka Akuj a? Ngakiro co nguna ikes ikatokinito ngikasiomitok Ebaibul ngulu a ngirwa alu alimokin iwon apaki ngina irworotor ikes nguna ikamunito ngakujo ngauni alotoma apei. Kiitu ane ibore ipei ageun nakwarina: iyokino ngakiro nu ka akiyookino na - erai Satan papa ngolo ka alioko, tar kelomunia inges idio kica dang erubakini akica ngin erai alioko. Erai inges ekaaran. Ido akitatam keng ngina a ngakujo a ngauni adau amunyar ngasepico ido iyiatakini amunyanar akitodol ngina ebunio Yesu.
Alotoma ngiemuto ngulu ngorok pa abu yaik apaki ngina aoyian eringa akilocokinet nyeyiakauna lonupitene ngolo a Papa ka Lokoku ka Ekuwam ngolo Akuangan. Abu Satan yaa adoketait alotoma apaki adio alo kinga akiyookino. Tolomuni nai enupitene Akuj erai ngina ebekoi: 1. Papa ngolo a ngikaru a daadang. 2. Abunore Ekuwam ka Akuj akiboikin neni a toto a ngina erai ITUNGANAN ngini erai aberu. (Ikiinakini mono iyong nen adio kitam a?) 3. Lokoku ngolo erai Akuj, arait ngina ka Akuj akiboi alotooma aberu, (Ekinyomit ka aberu).
Nai emam nyimwonikina Satan. Eroko inges nyerukauna akilipio neni keng, mati ca alorotin a ngice a ngulu egelaaka. Aso eroko inges iriarit ngitunga anakiyookino neni alwanan. Alotoma akimunono keng epukonokini inges ngitunga ebe ikwapei nyemisitor Akuj Papa ngolo apolon ngakiro nguna a ngitunga, nai torubakinite erai ngolo ililingi, inges atemar ebeit inges kilipae ekililingat. Apolou keng atemar ajemakin inges cut. Abu akitatam dang na topetakin akwap daadang, ka tokona alo India iriamuni iyong atemar ebe ngiyekalui ngulu edukokinitae Ekasuban ngolo apolon, Akuj ngina ililingi ebe ekudok nooi.
Ikwangina pa eitanitere akilip Ekasuban - Papa. Abu nai akilip torii lowae ngolo a “Toto ka Ikoku” ikwa ngiboro ngulu erai tokeraritetei. Alo Misiri dang ayiai epite ngolopei a toto ka ikoku ngolo anyaritae Isis ka Osiris. Alo India arai Isi ka Iswara. (kingolik nai iyong akikwaanu ngina a ngirorwa dang.) alo Asia arai Saibele ka Deos. Alo Roma abu totupaki ekoni nepei nen ka alo Caina. Kire, totamaki mono iyong aumokinet ngina a ngisacardoti a ngulu erai ngikalimonokinak a Roman Katolik ikwapei aponiata tolomariata Caina ido Madona ka ikoku ngini ayiai ibore ngini ekoni akica ka akolong elomunit a nakou a ikoku. Apedorio aputo ngin akiloc ka ngina eyiai Lobatikan (neni iboyoo papa ngolo Roma) mati ca anguna ka agelanut ka adio a ngina cici.
Itemokino tokona aneni yok ayenun ageunet ngina a toto ka ikoku. Akuj ngina beru ngina kolong arai ngina esiaunan alo Babilon arai Semiramis ngina anyarito ngibukui ngulu alokide ebe Rea. Atunit inges lokoku anakan keng, ngolo asibit ani ebekoi kode ikoku dang, kitametei nabo erai ngolo aoyian, ngolo agogogngon, ka ngolo ebusan ngolo anirit ngaberu. Alotoma Ezekiel 8:14 enyaritae inges anen ebe Tamus. Alotoma ngikegirak ngulu alalak anyaritae inges ebe Bakas. Ido nabo aneni a Ngibabilon anyaritae inges ebe Ninas. Nai epite ngolo itodiunitere inges ikwa ikoku ngini edakitae a ngakan ido kitametei nabo inges erai ekile ngolo apolon ka dang torai “Lokoku ngolo erai ekile” ekiro ece ngolo ayiakatar inges arai “Ekile a toto keng.” Ka alo India neni eyenere ngulu arei ngul ikwa Iswara ka Isi, itodiunitae (ekile) ikoni ikoku alokisin ka aberu keng.
Tosiomete alo akirot... Aturi ngina a Perigamo.
