Emibonano ya Babulooni.
Obusingye bwÉkanisa ya Perugamo.
William Branham.Read the full account in...
Obusingye bwÉkanisa ya Perugamo.Babeeli niryo eiziina ry'okubanza rya Babulooni. Babeeli nikimanyisa akajagararo. Buzima ekatandikwa Kuushi, mutabani wa Haamu, kwonka yaakuzibwa kuba obugabe bw'amaani kandi obw'ekitiinisa omu butegyeki bwa mutabani we, Nimuroodi, omuhiigi rugambwa. Nimuroodi, kurugiirira aha birikugambwa omu kitabo ky'Okutandika eshuura ya ikumi n'emwe kandi n'okurugiirira omu byafaayo by'ensi, akamariirira kuhikiiriza ebintu bishatu. Akaba naayenda kwombeka eihanga ry'amaani, eki yaakozire. Akaba naayenda kujanjaaza ediini ye, eki yaakozire. Akaba naayenda kwekorera eiziina, kandi nakyo eki yaahikiriize. Ebi yaakozire bikaba bikuru munonga okuhitsya obu obugabe bwa Babulooni bwayetsirwe omutwe gw'ezaabu omuri zaagavumenti zoona ez'ensi. Kugira ngu ediini ye ekaba nkuru nikihamibwa n'ekirikugira ngu Ebyahandiikirwe nibigyorekyera kimwe eine akakwate na Sitaane omuri Isaaya Eshuura ya 14 kandi n'omu Kushuuruurwa Eshuura ya 17-18. Kandi turikukoresa ebyafaayo nitubaasa kuhamya ku yaataahiriire ensi yoona kandi ku niyo musingye gwa buri ntwaza y'okuramya ebishushani, kandi n'eishomo ry'eby'emigane egunzirwe, n'obu amaziina ga baaruhanga baayo gatarikushushana omu bicweka bitari bimwe by'ensi kurugiirira aha rurimi rw'abantu. Eky'okugira ngu akeekorera eiziina hamwe n'abakuratsi be nikyeyoreka ahakuba obusingye obu turimu obu ku buraagumizemu (okuhitsya obu Yesu araayeshuuruurire Beene-ishe) naija kuramibwa kandi aheebwe ekitiinisa, n'obu arikwija kuba aine eiziina rihindukire aha rya Nimuroodi, kandi ari omuri hekalu ehindukireho kakye ahari egyo ei omu kubanza yaabaire naaramibwamu.
Obu Baiburi etashoboorora ebyafaayo by'agandi mahanga munonga, nikiza kwetaagisa kusherura omu bihandiiko by'ensi ebya ira kuzoora eky'okutumanyisa nk'oku Perugamo yaahindukire ekitebe ky'ediini ya Sitaane ya Babulooni. Oburugo bukuru bw'okutumanyisa nibwija kuba omu bihandiiko by'emitwarize y'Abanyamisri n'Abagriika. Enshonga y'eki eri ngu Misri ekatunga sayansa na kubara kuruga aha Bakaludaaya kandi bwanyima Bugriika yo yaabitunga kuruga Misri. Hati obu abanyamurwa baabaire bakuriire eby'okwegyesa zaasayansa ezi, kandi obu zaasayansa ezi zaabaire nizikoresibwa nk'ekicweka ky'ediini, obwo nitumanya ekishumuruzo nk'oku ediini ya Babulooni yaatungire amaani gaayo omuri aga mahanga abiri. Nabwo n'eky'amazima ngu eihanga eryabaire riba niribaasa kusingura erindi ihanga, omu bwire obuhikire ediini y'eihanga eryasingura ekaba eba ediini y'eihanga eryasingurwa. Nikimanywa gye ku Abagriika baabaire baine obumanyiso oburikushushana obwa Zodiac nk'Abanyababulooni; kandi kizoirwe omu bihandiiko by'Abanyamisri ebya ira ku Abanyamisri baahaire Abagriika obwengye bwabo bw'okuramya baaruhanga baingi. N'ahabw'ekyo emibonano ya Babulooni ekajanjaara kuruga omu ihanga kuza omu rindi kuhitsya obu yaareebekire omuri Rooma, omuri China, India kandi nangwa n'omuri Bukiizi-bwa-bumosho n'obwa Buryo bwa Amerika nitushangayo ebikuru by'emibonano y'okuramya okwo ebirikushushana.
Ebyafaayo ebya ira nibiikirizana na Baiburi ngu ediini ya Babulooni egi ekaba buzima etari diini y'okubanza y'abantu b'ensi aba ira. Ekaba ey'okubanza kuteishuka aha kwikiriza okwabandize; kwonka yo yonka tiyo yaabandize. Ab'ebyafaayo nka Wilkinson na Mallett bakakihamya bamaririire okuruga omu bihandiiko ebya ira ku omurundi gumwe abantu boona b'omu nsi baabaire nibaikiririza omuri RUHANGA OMWE, omukuru munonga, otahwaho, otareebwa, ahabw'Ekigambo ky'omu kanwa Ke Owaagambire ebintu byona bikabaho, kandi ngu omu mitwarize Ye Akaba naakunda ari murungi kandi omuringaaniza. Kwonka nk'oku Sitaane ariguma naashiisha eki arikubaasa kyona, nitumushanga naashiisha ebiteekateeko n'emitima y'abantu kugira ngu bangye amazima. Nk'oku atuura naagyezaho kutunga okuramibwa orikushusha oti ni Ruhanga kwonka atari muhuuku kandi ekihangirwe kya Ruhanga, akaiha okuramya ahari Ruhanga kugira ngu abaase kukwegarurira nikwo atyo atunguurwe. Buzima akahikiiriza ekyetengo kye ky'okujanjaaza ediini ye akagibuzya ensi yoona. Eki Ruhanga naakihamya omu Kitabo ky'Abarooma. “N'obu baraabe baamanyire Ruhanga, kwonka Tibaramuhimbiise nka Ruhanga, okuhitsya obu baahabisiibwe ebiteekateeko byabo, kandi n'emitima eshwekirwe omwirima bakaakiira ediini esiisikaire okuhitsya obu baaramize ebihangirwe kwonka atari Omuhangi.” Ijuka, Sitaane akaba ari ekihangirwe kya Ruhanga (Omwana w'Obusheeshe). N'ahabw'ekyo nitushanga ngu ahu amazima gaabaire gajanjaire omu bantu, kandi boona baabaire baramatiire ahari ago mazima gamwe, bwanyima ekiro kikahika obu ekibiina kihango munonga kyarugire ahari Ruhanga kikajanjaaza omuringo gw'okuramya gwa Sitaane okwehinguririza ensi. Ebyafaayo nibihamya ku aboab'oruganda rwa Sheemu abaagumire n'amazima agatarikuhinduka bakaba nibahakanisibwa n'amaani abo aba Haamu abaarugire aha mazima bakaza aha kishuba kya sitaane. Tihariho bwire bw'okugaaniira ahari eki; nikyanjurwa kwonka ngu okaabaasa kureeba ku haabaire hariho ediini ibiri kandi ibiri zonka, kandi embi egyo ekabuga ensi yoona.
Okuramya Ruhanga omwe kukahinduka okuramya baaruhanga baingi omuri Babulooni. Ekishuba kya sitaane n'enaama za sitaane bikaimuka byarwanisa amazima ga Ruhanga n'enaama za Ruhanga omu rurembo orwo. Sitaane buzima akahinduka ruhanga w'ensi egi kandi yaagyema abo abu yaabaire abeihabeihire, yaabaikiririsa ngu buzima akaba ari Mukama.
Ediini y'okuramya baaruhanga baingi y'omuzigu ekatandika n'enyegyesa ya tiriniiti. Kikabaho omu bwire obwo okwo omu biro bya ira obu ekiteekateeko kya “Ruhanga omwe omu baperesona bashatu” kyatandika. Ka nikitangaaza ngu abashomire eby'ediini baitu ab'omurembe eki tibakakyetegyereize; nikireebeka gye nk'oku baishenkurubo baabeihabeihirwe Sitaane, nabo nibakiikiririza omu baperesona bashatu omu Bwaruhanga. Ka tworekwe omwanya gumwe gwonka omu Byahandiikirwe ogurikwikiriza enyegyesa egyo. T'eky'okutangaaza ngu obu abakomookire ahari Haamu baatoire omu muhanda gwabo gw'okuramya Sitaane okwabaire kurimu enteekateeka nkuru ya baaruhanga bashatu ngu tihariho n'omwe omuri abo abaakomookire ahari Sheemu orikwikiriza ekintu ekyo nari oine omugyenzo gw'okuramya ogurimu n'obu kyakuba ekishushani kyakwo? T'eky'okutangaaza ku Abaheburaayo baabaire baikiriza ngu, “Hurira, Israeli! Mukama Ruhanga waawe n'OMWE wenka,” ku haraabe haabaire hariho abaperesona bashatu omu Bwaruhanga? Abrahamu, omwijukuru wa Sheemu, omu Kutandika 18 akareeba Ruhanga OMWE wenka na baamaraika babiri.
Hati tiriniiti egi ekaba neeyorekwa eta? Ekaba neeyorekwa omu kiine enshonda ishatu ezirikwingana nk'oku erikworekwa omuri Rooma ebiro ebi. N'eky'okutangaaza, Abaheburaayo bakaba bataine kiteekateeko nk'ekyo. Hati ohikire n'oha? N'Abaheburaayo nari Abanyababulooni? Omuri Asia ekiteekateeko ky'okuramya baaruhanga baingi ekya baaruhanga bashatu omuri omwe kikoorekwa omu kishushani ekibumbirwe kiine emitwe eshatu aha mubiri gumwe. Naayorekwa nk'abantu bashatu. Omuri India, bakakishanga omu mitima yaabo okumworeka nka ruhanga omwe omu miringo eshatu. Hati ebyo n'eby'ediini by'omurembe ebirungi. Omuri Japan hariyo Budha mukuru oine emitwe eshatu eri nk'ogu twaheza kushoboorora. Kwonka ekirikukirayo kushuuruura omuri byona n'ekyo ekirikworeka ekiteekateeko ky'obushatu bwa Ruhanga omu miringo eshatu: 1. Omutwe gw'omugurusi ogurikushushaniriza Ruhanga Isheboona. 2. Okwebumburika oku omuri ezo naama kwabaire nikumanyisa “Oruzaaro” kandi narwo orwabaire nirumanyisa Omwana ogwo. 3. Amapapa n'omukira gw'enyonyi (enkombe). Egi niyo yaabaire eri enyegyesa ya Isheboona, Omwana n'Omwoyo Orikwera, abaperesona bashatu omu Bwaruhanga, tiriniiti yonyini. Noobaasa kureeba ekintu ekyo kimwe omuri Rooma.
Hati ka ngarukye mbuuze ogundi murundi, t'eky'okutangaaza ngu Sitaane n'abe abarikumuramya buzima bakaba baine amazima maingi agashuurwirwe okukira ishe w'okwikiriza, (Abrahamu) hamwe n'abaijukuru be? T'eky'okutangaaza ngu abo abaramya Sitaane, bakaba nibamanya bingi ebirikukwata ahari Ruhanga okukira abaana ba Ruhanga? Hati ekyo nikyo abatendekirwe omu by'ediini ab'omurembe bagyezaho kutugambira obu batugambira ahari tiriniiti. Oijukye ekintu kimwe eki kyonka kwiha hati n'okugumizamu: ebihandiiko ebi bihikire kandi n'eki nakyo kihikire - Sitaane n'omunyabishuba kandi ishe w'ebishuba, kandi obwire bwona obu aija aine omushana oku guri kwona guba guri ekishuba. N'omwitsi. Kandi enyegyesa ye ya tiriniiti ecwekyereize emitwe y'abantu baingi kandi neija kucwekyereza kuhitsya obu Yesu ariija.
Nk'oku ebyafaayo birikugira tikiratwaire bwire buraingwa empinduka kuteebwaho omu kiteekateeko eki kya Isheboona n'Omwana n'Omwoyo Orikwera. Sitaane akabatwara entambo aha ntambo kubaiha aha mazima. Ekiteekateeko ky'Obwaruhanga ekyazaarukiremu hati kikaba kiri: 1. Isheboona otahwaho, 2. Omwoyo wa Ruhanga ojwaire omubiri omu MUNTU omukazi omuzaire. (Ekyo nikikureetera okuteekateeka?) 3. Omwana w'Obwaruhanga, ekijuma ky'okwo kujwara omubiri. (Oruzaaro rw'omukazi).
Kwonka Sitaane tamazirwe. We wenka takatungire okuramibwa, kureka akwine omu muhanda ogutatereire. N'ahabw'ekyo naakyeyongyera kwiha abantu aha mazima naabatwara hare. Kurabira omu mibonano ye naashuuruurira abantu ngu obu Ruhanga isheboona mukuru otareebwa ateeta omu nshonga z'abantu, kureka akaguma abeetsirize, mbwenu omu mazima Ruhanga naabaasa kuramibwa omu kaceceko. Buzima nikimanyisa okumwehuzya nk'oku kirikubaasika, kwaba kutari okumurugiraho kimwe. Enyegyesa egi nabwo ekabuga ensi yoona, kandi na hati omuri India noobaasa kureeba ngu zaahekalu z'omuhangi mukuru, ruhanga ocecekire, ni nkye munonga omu muringo ogurikutangaaza.
Obu kyabaire kitarikwetaagisa kuramya tata omuhangi, kikaba kiri eky'obuhangwa ngu okuramya kuhindukire “Omwana na Nyina” nk'ebintu by'okuramya. Omuri Misri hakaba hariyo okwegaita nk'okwo okw'omwana na nyina nikwetwa Isis na Osiris. Omuri India kukaba nikwetwa Isi na Iswara. (Yetegyereze okwo kushushana kw'amaziina nakwo). Omuri Asia kukaba kuri Cybele na Deoius. Omuri Rooma na Bugriika nikwo kyabaire kiri. Kandi n'omuri China. Mbwenu, teekateeka aha kutangaara kwa bamwe aha bamiishani b'Abakatoriki Abaarooma ku baagiire omuri China haza bakashangayo Madonna n'Omwana n'amaranzi g'eizooba nigaruga aha mutwe gw'omwereere. Ekishushani ekyo kikaabaire nikibaasa gye kuhingaanisibwa n'ekyo ekiri omuri Vatikani okwihaho ahabw'entaaniso y'ebintu bimwe by'enshusha y'ahamaisho.
Hati kitushemereire kujumbura nyina owaabandize kandi n'omwana. Ruhangakazi nyina wa Babulooni owaabandize akaba ari Semiramisi owaabaire naayetwa Rhea omu mahanga ga burugwa-izooba. Akaba akiikiire omwana w'omwojo omu mikono ye, n'obu araabe yaabaire ari omwereere, akaba naagambwaho kuba muraingwa, w'amaani, murungi kandi kukira munonga naarigirwa abakazi. Omuri Ezekieli 8:14 akaba naayetwa Tamuzi. Omu bahandiiki abashongokire akaba naayetwa Bacchus. Aha bantu ba Babulooni akaba naayetwa Ninus. Enshonga erikutuma yaayorekwa nk'omwereere ori omu mikono kandi akashuba akashoboororwa nk'omuntu mukuru kandi w'amaani maingi n'okugira ngu naamanywa nka “Iba - Omwana.” Kimwe aha byeterero bye kikaba kiri “Iba wa Nyina,” kandi omuri India ei ababiri abo barikumanywa nka Iswara na Isi, we (iba) naayorekwa nk'omwereere aha ibeere ry'omukazi we.
Read the full account in...
Obusingye bwÉkanisa ya Perugamo.
Obushwere n’Okushenda.
