Babylon. Cipilibula icimfulunganya.
Nyina no Mwana.
William Branham.Belengeni ili buku...
Inshita ya Lukuta Lwa Pergamo.Babele e shina ilya ntendekelo ilya Babylon. Cipilibula icimfulunganya. Wena mucine watampile na Kushi, umwana wakwa Ham, lelo waletelwe ku bufumu bwa maka no kuyemba ukupitila mu mwana wakwe, Nimrod, umulunshi umukalamba. Nimrod, ukulingana ne lyashi ilya mu Kutendeka ikumi na cimo e lyo nakabili ukulingana ne lyashi ilyakale ilya bukapepa, apangile ukufikilisha ifintu fitatu. Alefwaya ukukula inko iya kosa, cilya alicitile. Alefwaya ukuipangila bukapepa bwakwe umwine, cilya alicitile. Alefwaya ukuipangila ishina umwine, ico naco alibombele. Ukubomba kwakwe kwalilundulwike nganshi ica kutila ubufumu bwa Babylon bwaitilwe umutwe wa golide pa mabuteko yonse aye sonde. Ukutila bukapepa bwakwe bwaishile sende cifulo ica ntanshi icashininkishiwa ku cishinka ica kutila Amalembo yalabushininkisha pamo na Satana umupwilapo muli Esaya Icipandwa 14 na mu Kusokolola Icipandwa 17-18. Kabili kwi lyashi lya kale kuti twashininkisho kutila bwasanshile isonde lyonse kabili e shinte ku mibombele yonse iya kupepo tulubi, kabili ifunde lya tushimi, nangula amashina ya milungu yalipusana mu fiputulwa ifyalekana lekana ifya calo ukulingana no lulimi lwa bantu. Ukutila aliipangile ishina umwine na bamukonkele tekuti cibe ukwabulo kulandwapo, cikulu fye ino nshita iya nomba ile twalilila (mpaka Yesu aisokolola Umwine kuli ba Munyina) akulashinshimunwa no kucindikwa, nangula cingaba mwi shina limbi kunse kakwa Nimrod, kabili mwi tempile ilya pusanako panono ukufuma kuli umo ilyo aleshinshimunwa mu ntendekelo.
Apo Baibele tayakwata ifya kucita na malyashi ayakale aya nko shimbi umwashika, cili no kube cikankala ukufwaya ifyalembwa ifya bukapepa ifya nshita ya kale ukusanga ubwasuko bwesu musango nshi Pergamo yaishileba icipuna ca bukapepa bwakwa Satana ubwa Babylon. Intulo ine ine iye lyashi lili no kuba mu fyalembwa ifya mu ntambi sha mu Egupti na Grecian. Umulandu wa ici wakutila Egupti apokelele science yakwe ne nsamushi ukufuma ku bena Kalde e lyo mukubwekesha Greece afipokelele ukufuma ku Egupti.
Nomba apo bashimapepo bali ni ntungulushi ukusambilisha iyi science, kabili apo iyi science yalebomfiwa nge ciputulwa ca bukapepa, natwishiba kale ulufungulo umusango bukapepa bwa ci Babylon bwakwete amaka ya buko mu fyalo ifi fibili. Kabili ne ci naco cishinka ukutila ilyo lyonse inko yali iyalinga ukucimfya inko ibiye, mu nshita yalinga bukapepa bwa bacimfya bwaishileba bukapepa bwa bacimfiwe. Calishibikwa bwino bwino ukutila aba Greek balikwete ifishibilo fimo fine ifya Zodiac nge fyo bacitile abena Babylon; kabili calisangwa mu fyalembwa ifya kale ifya bena Egupti ukutila abena Egupti bapele ama Greeks amano yabo aya milungu iingi. E ico inkama sha Babylon shasalangenye ukufuma ku nko ukuya ku nko mpaka sha monekele mu Rome, mu China, India kabili nangula ni konse kubili ku North na ku South America tulesanga ukupepa kumo kwine.
Ilyashi lya kale lilasuminishanya na Baibele ukutila ubu bukapepa bwa ci Babylon tabwali mucine bukapepa ubwa ntendekelo ubwa bantu aba kubalilapo pe sonde. Bwali ubwa kubalilapo ukutaluka ukufuma ku citetekelo ica ntendekelo; lelo ubwine tabwali ubwa ntendekelo. Bakalemba be lyashi lya kale abapala nga Wilkinson na Mallett bali shininkisha umupwilapo ku nkalata isha kale ukutila pa nshita imo abantu bonse aba pe sonde bacetekele muli LESA UMO, uwapulamo, uwa muyayaya, ushimoneka, Uo ku Cebo ca kukanwa Kakwe alandile ifintu fyonse ukubapo, kabili ukutila mu mibele Yakwe Ali uwa citemwiko kabili umusuma kabili uwa kaele.
Lelo nge fyo Satana ali no kubifya lyonse conse ico enga cita, tulemusango kubifya amano ne mitima ya bantu pakutila bengakana icine. Nge fyo lyonse afwaya ukupokelela ukushinshimunwa kwati fye ena ali ni Lesa kabili te mubomfi kabili icibumbwa cakwa Lesa, atalwishe ukushinshimuna ukufuma kuli Lesa ku kulekelesha pa kutila enga kuleta ku mwine e ico no kusansabikwa. Mucine ena alifikilishe ukukabila kwakwe ukusalanganya bukapepa bwakwe mwi sonde lyonse. Ici calishininkishiwa na Lesa mwi Buku lya Bena Roma, “Pantu pakwishiba Lesa, taba Mucindike nga Lesa, mpaka basangwike abafye mu matontonkanyo yabo, ne mitima yabo iya fita basumine bukapepa ubwa bifishiwa ica kutila baishile shinshimuna ifibumbwa ukucila Kalenga.”
Ibukisheni, Satana ali cibumbwa cakwa Lesa (Umwana wa Macaca). E ico tulesango kutila ilyo inshita imo icine casabankanishiwe pakati ka bantu, kabili bonse baikatilile kuli cilya icine cimo, kulya pa ntanshi kwaishile ubushiku ilyo ibumba ilikulu lya pilibwike ukufuma kuli Lesa no kusalanganya imisango ya kushinshimuna iya bipisha isonde lyonse. Ilyashi lya kale lilacishimiko bunte ukutila balya aba mutundu wakwa Shemu abo abaiminine pa cine icishipilibulwa bali aba kususha na maka kuli balya abakwa Hamu abo abapilibwike ukufuma ku cine ukuya kubufi bwakwa ciwa. Takuli inshita nangu imo iya kwingila mukulanshanya ukwa ici; ciletelwe fye pa kutila mwinga mona kwali bukapepa bubili kabili bubili fye, kabili ubwa mubifi bwaishileba isonde lyonse.
Ukupepa Lesa umo kwa pilibwile ku milungu iingi mu Babylon. Ubufi bwakwa ciwa ne nkama shakwa ciwa shaile ima no kukanye cine ca kwa Lesa ne nkama shakwa Lesa muli ulyo musumba. Satana mucine aishileba umulungu uwa ili isonde kabili aishile pokelela ukushinshimunwa ukufuma kuli balya abo abepele, ukubalenga ukucetekela ukutila ena ali icine cine Shikulu.
Bukapepa ubwa milungu iingi ubwa mulwani bwatendeke ne sambilisho ilya bene batatu. Cali kunuma kulya akale nganshi ukutila ilyano ilya “Lesa umo mu bantu batatu” ilyano lyaishile monekela. Ifyo cabe cakupapusha ukutila bakasambilila wafya bulesa wesu abapya tabamona ici; lelo mu cine nganshi ababepwa fye na Satana nge fyo ifikolwe fyabo fyali, bena na nomba balicetekela mu bantu batatu mu mutwe wa Bulesa. Lekeni batulangishe icifulo fye cimo mu Malembo apo apaba insambu ishili shonse kuli lilye sambilisho. Bushe tacabe ceni ukutila ilyo aba bufyashi bwakwa Hamu baile mu nshila yabo mu kushinshimuna kwa kwa Satana uko ukwakwetemo itontonkanyo ilikankala ilya milungu itatu ukutila takwaba nangu pamo epo twingamona aba bufyashi bwakwa Shemu ukucetekele cintu ica musango filya atemwa ukukwata ukupepa ukwa lutambi ukuli konse uko kwa palene nga cena? Bushe tacabe ceni ukutila AbaHebere bacetekele, “Umfwa, We Israele, Shikulu Lesa obe ni Lesa UMO”, nga kwali abantu batatu mu mutwe wa Bulesa? Abraham, ubufyashi wakwa Shemu, mu Kutendeka 18 amwene fye Lesa UMO na ba malaika babili.
Nomba inga ici ica bene batatu calelangishiwa shani? Calelangishiwa mu cintu ica fifutu fitatu nge fyo cilangishiwa mu Rome ilelo. Iceni, AbaHebere tabatalile ukukwata itontonkanyo lya musango ifi. Nomba ni bani abalungama? Bushe BaHebere atemwa ama Babylonias? Mu Asia ilyano ilya bengi ilya milungu itatu muli umo lyaishile monekela mu cimpashanya ica mitwe itatu pa mubili umo. Alangishiwa nga mano yatatu. Mu India, bacisangile mu mitima yabo ku kumulangisha ngo mulungu umo mu misango itatu. Nomba lilya mucine cine lisambilisho ilya fya bulesa ilya nshiku shipya. Mu Japan mwaba Buddha umukalamba ne mitwe itatu nga ulya wine twacilondolola pa kubala.
Lelo icisokolola nganshi pali fyonse ni cilya icilangisha itontonkanyo lya bene batatu pali Lesa mu musango uwa fitatu ifya: 1. Umutwe wa mwaume umukote ukwimininako Lesa Tata, 2. Icishilwa ico mufya nkama calangishe “Imbuto” ico mukubwekesha cipilibula Umwana. 3. Amapindo no mucila wa cuni (inkunda). Ili lyali lisambilisho ilya kwa Tata, Mwana na Mupashi wa Mushilo, abantu batatu mu mutwe wa Bulesa, ica bene batatu icapwililika. Kuti mwamona icintu cimo cine mu Rome. Nomba lekeni njipushe umuku naumbi, bushe tacili ceni ukutila ciwa na baka shinshimuna bakwe mucine bakwete icine ica cilamo ukusokololwa ukucila wishi uwa citetekelo, (Abraham) kabili naba bufyashi bakwe? Bushe tacili ceni ukutila bakashinshimuna bakwa Satana, balishibe nganshi palwa kwa Lesa ukucila abana bakwa Lesa? Nomba cilya eco bakasambilila ba fya Bulesa aba nshiku shipya besho kutweba ilyo balelanda palwa bene batatu. Ibukisheni fye ici cintu cimo ukufuma ino nshita ukuya pa ntanshi: aya malyashi fishinka kabili ici cishinka_Satana ni kabepa wa bufi kabili wishi uwa bufi, kabili lyonse ilyo aisa no lubuuto ululi lonse nalyo line bufi. Ena cipondo. Kabili isambilisho lyakwe ilya bene batatu lya lyonaula amabumba kabili lya kulaonaula mpaka Yesu akese.
Ukulingana ne lyashi lya kale tacasendele nshite itali ukukwata ukupilibula muli ili tontonkanyo ilyakwa Tata kabili Umwana kabili Umupashi wa Mushilo. Satana asendele ulutampulo lumo pa nshita ukutaluka ukufuma ku cine. Itontonkanyo ilyaishile ilya Bulesa nomba lyali: 1. Tata uwa muyayaya, 2. Umupashi wakwa Lesa ukwikala muli nyina uwa BUNTUNSE. (Bushe cilya cilamilenga ukutontonkanya?) 3. Umwana uwa Bulesa, icisabo ca kulyo kubamo, (Ubufyashi bwa mwanakashi).
Lelo ciwa tekushiwa. Ali talafikilisha ukupepa ukwa kuli ena na nomba, kano fye munshila imbi. E ico asendele abantu ukubatalusha ukufuma ku cine ukuya pantanshi. Ukupitila mu nkama shakwe asokolwele ku bantu ukutila apo Lesa Tata umukalamba ushimoneka taposako amano umwine mu fya bwikashi bwa bantu, lelo ekala tondolo palwa bena, kanshi icilekonkapo cakutila ena kuti ashinshimunwa fye tondolo. Mucine cipilibula ukumusula umusango onse nge fyo cinga citwa, nga teifyo icintu fye conse. Ili sambilisho lyasalangene sonde lyonse nalyo, kabili ilelo line mu India kuti mwamona yalya ma tempile kuli kalenga umukalamba, umulungu uwa batondolo, yaba mukumoneka mu mpendwa iinono.
Apo tacali icikankala ku kushinshimuna kalenga tata, cali fye ica cifyalilwa ukutila ukupepa kwaile kuli “Nyina no Mwana” nge fibumbwa ifya kushinshimuna. Mu Egupti kwali ukwampana kumo kwine ukwa nyina no mwana ukwaleitwa Isisi na Osiris. Mu India cali Isi na Iswara. (Moneni ukupalana kwa mashina nangu cibe fyo.) Mu Asia cali Cybele na Deoius. Mu Rome kabili mu Greece fyali cimo cine. Kabili na mu China. Cisuma, elenganyeni ukupapa ukwa ba mishoni aba mu Roman Catholic ilyo baingile mu China no kusanga mulya Madonna no Mwana ne myengelele ya lubuuto ukushinguluka umutwe wa kanya. Icimpashanya nga cali lingilwe ukukabushanya kuli cilya icali mu Vatican kano fye pa mulandu wa bupusano ubwa mimonekele ya pa menso imo.
Nomba naciyana kuli ifwe ku kusanga nyina uwa ntendekelo no mwana. Uwantendekelo umulungu uwa nakashi nyina wa Babylon ali ni Semiramis uyo waleitwa Rhea mu fyalo ifya ku kabanga. Mu minwe yakwe afukatile umwana, uyo nangu ali akanya, alondolwelwe ukubo mutali, uwa maka, umusuma kabili maka maka uwa kutemuna abanakashi. Muli Esekiele 8:14 aleitwa Tammuz. Pakati ka bakalemba abaishibisha aleitwa Bacchus. Ku bena Babylon ali ni Ninus. Ico cilangisha icishinka ica kutila aleimininwako nga kanya mu minwe lelo nomba ukulondololwa ngo mukalamba umuntu impalume caba cakutila eshibikwa nga “Umulume-Umwana”. Icakulumbwilako cimo cali “Umulume wakwa Nyina”, kabili mu India uko babili baishibikwa nga Iswara na Isi, ena (umulume) e mininwako nga kanya pa mabele ya mukashi wakwe wine.
Belengeni ili buku...
Inshita ya Lukuta Lwa Pergamo.
