Melekizedeki Ogu N’oha?

William Branham.

Read the full account in...
Melekizedeki Ogu N’oha?

Abaheburaayo 7:1-3,
1 Ahakuba Melekizedeki ogwo, omugabe wa Salemu, omunyamurwa wa Ruhanga Rukira-boona, akabugana Abrahamu, naatabaaruka omu rugamba kwita abagabe, yaamuha omugisha;
2 Kandi niwe Abrahamu yaahaire kimwe kya ikumi ekya byona. Melekizedeki ogwo okubanza n'omugabe w'okuhikiirira, nk'eiziina rye oku ririkushoboororwa, ekya kabiri n'omugabe wa Salemu, ekirikushoboororwa ngu omugabe w'obusingye.
3 Taine ishe, taine nyina, n'obu baakuba baishenkuru;... taine butandikiro bw'amagara ge, kandi taine bugarukiro, kureka naashushanisibwa nk'Omwana wa Ruhanga, atuura ari omunyamurwa ebiro byona.

Teekateeka aha Muntu mukuru ogu, Omuntu ogu ka ni mukuru! Kandi hati, ekibuuzo ni ngu, “Omuntu ogu n'oha?” Abatendekirwe omu by'ediini baataaha baine ebiteekateeko ebitarikushushana. Kwonka okuruga obu Obumanyiso Mushanju bwabambuurwa, Ekitabo ky'enaama ekitaaha kiri enaama ahariitwe... Okurugiirira omu kitabo ky'Okushuuruurwa 10:1 okuhitsya ahari 7, enaama zoona ezihandiikirwe omu Kitabo eki, ezitaaha zisherekirwe omu busingye bw'abahunduuzi, zishemereire kureetwa omu rwatu na maraika w'ekanisa y'obusingye obw'aha muheru. Nibangahi abarikumanya ku ekyo kihikire? [Abateeraine baagira bati, “Amiina.” -Omur.] Ekyo kihikire, zishemereire kureetwa. Enaama zoona ez'Ekitabo ky'enaama niziza kushuuruurirwa entumwa ya Laodikea y'obusingye obwo. Obu hariho okuhakana kwingi aha Muntu ogu kandi n'eishomo eri, ninteekateeka ngu kitushemereire okukicondooza, okumanya Ou ari. Hati, hariho enyegyesa nyingi Ahariwe. Emwe ahari ezo nyegyesa, neegira ngu, “Akaba ari ekitebyo ekigunzirwe kwonka. Akaba atari omuntu buzima.” Kandi ezindi zigira ngu, obwo, “Bukaba buri obunyamurwa. Obwo bukaba buri obunyamurwa bwa Melekizedeki.” Egyo niyo erikureebeka nk'ehikire, einemu amazima okukira ey'okubanza, ahabw'okuba nibagamba ngu bukaba buri obunyamurwa. Terikubaasa kuba egyo, ahabw'okuba omu mushororongo gwa 4 nihagira ngu Akaba ari Omuntu, “Omushaija.” N'ahabw'ekyo, okugira ngu abe Omuntu, ashemereire kugira ebikozire omuntu, “Omuntu.” Gutari omuringo gw'obunyamurwa; kureka Omuntu! N'ahabw'ekyo Akaba atari omuringo gw'obunyamurwa kwonka, kandi Atari ekitebyo ekigunzirwe. Akaba ari Omuntu.

Kandi Omuntu ogu n'Otahwaho. Ku oraayetegyereze, “Taine ishe. Taine nyina. Taine butandikiro bw'obwire. Taine bugarukiro bw'obwire.” Kandi Ou yaabaire ari weena na hati akiri ohuriire ekiro eki, ahabw'okuba Baiburi ekagira hanu, ngu, “Taine n'obu yaakuba ishe, nari nyina, taine butandikiro bw'amagara, nari obugarukiro bw'amagara. N'ahabw'ekyo naateekwa kuba ari Omuntu Otahwaho. Ekyo kihikire? [Abateeraine baagira bati, ”Amiina“ -Omur.] Omuntu Otahwaho! N'ahabw'ekyo naateekwa kuba ari Omuntu omwe wenka, ogwo ni Ruhanga, 'habw'okuba Niwe wenka Omwe Otahwaho. Ruhanga! Hati, omuri Timoseo ey'Okubaanza 6:15 na 16, ku muraabe nimwenda kukishoma obwire obundi, niinyenda ngu mukishome. Hati, ekintu eki ndikuhamya, ngu, Akaba ari Ruhanga, n'ahabw'okuba Niwe Muntu wenka otafa. Kandi hati, Ruhanga Naayehindura We wenka Omuntu; ekyo nikyo Yaabaire ari, “Taine ishe, taine nyina, taine butandikiro bw'amagara, taine bugarukiro bw'ebiro.”

Hati nitushanga omu Byahandiikirwe ngu abantu baingi beegyesa ngu, “harimu abaperesona bashatu omu Bwaruhanga.” N'ahabw'ekyo, torikubaasa kugira ebikozire omuntu haza otari omuntu. Nooteekwa kuba omuntu kugira ebikozire omuntu. Omuheereza w'Omubaputisiti, saabiiti nkye ezihingwire, akaija, owangye omuka, yaagira ati, “Niinyenda nkugorore aha Bwaruhanga obwire bumwe ku oraabone obwire.” Akanteerera esimu, nimmanyisa. Naagira nti, “Nyine obwire hati hati, 'hakuba niinyenda ngororokye, kandi ebindi byona tubite aha rubaju, tukore eki.” Kandi akaija, yaagira ati, “Ow'eishe-emwe Branham, oyegyesa ngu hariho Ruhanga omwe wenka.” Naagira nti, “Eego, sebo.” Yaagira ati, “Mbwenu,” yaagira ati, “niinyikiriza hariho Ruhanga omwe, kwonka Ruhanga omwe omu Baperesona bashatu.” Naagira nti, “Sebo, ekyo kigarukyemu omurundi ogundi,” Yaagira ati, “Ruhanga omwe, omu Baperesona bashatu.” Naagira nti, “Okashomera nkahi?” Mwareeba? Kandi yangambira e-eitendekyero rya Baiburi. Naagira nti, “Nimbaasa kukiikiriza. Torikubaasa kuba omuntu haza otaine ebikozire omuntu. Kandi ku oraabe ori omuntu, ori omuntu omwe iwe wenka. Ori omuntu okwawe, oyetongoire.” Kandi yaagira ati, “Mpaho, abatendekirwe omu by'ediini tibarikubaasa nangwa n'okushoboorora ekyo.” Naagira nti, “N'ahabw'okushuuruurirwa.” Kandi yaagira ati, “Tindikubaasa kwakiira okushuuruurirwa.” Naagira nti, “Obwo tihariho omuhanda ogu Ruhanga arikuhikaho, ahabw'okuba, 'Bisherekirwe amaisho g'abanyabwengye n'abarikwetegyereza, byashuuruurirwa abaana bato,' byashuuruurirwa, okushuuruurirwa, 'byashuuruurirwa abaana bato abo abarikubyakiira, abarikwega.'” Naagira nti, “Tihariho omuhanda gwona ogu Ruhanga arikuhikaho; Omwecwireho.” Baiburi yoona n'okushuuruurwa kwa Ruhanga. Ekanisa yoona eyombekirwe aha kushuuruurwa kwa Ruhanga. Tihariho omuhanda ogundi ogw'okumanyiramu Ruhanga, kureka ahabw'okushuuruurirwa kwonka. “N'omuntu weena ou Omwana aikiriza Kumushuuruurira.” Okushuuruurirwa; buri kintu n'okushuuruurirwa. N'ahabw'ekyo, oku-... Okwanga okushuuruurirwa, obwo nooba ori otendekirwe omu by'ediini orikufuka, kandi nooba otaine matsiko.

Hati, hati, nitureeba ngu Omuntu ogu “taine ishe, taine nyina, taine obutandikiro bw'amagara ge nari obugarukiro bw'amagara.”Akaba ari Ruhanga, en morphe. Hati, ensi, ekigambo ekyo nikiruga, omu kigambo ky'Orugriika, ekirikumanyisa “okuhinduka” kikakozesibwa. Okwehindura We wenka, en morphe, omuntu omwe kwehindura... Omuntu omwe; ekigambo ky'Orugriika aho, en morphe, nikimanyisa... Kikaruga aha muzaano gwa katemba, oku omuntu omwe arikuhindura ekyetwekyerero kye, kugira ngu ahindukye omuntu ondiijo. Nk'omu-omu ishomero, ijweriho aha, niinyikiriza, Rebeka, atakaherize emishomo ye, bakagiraho gumwe aha mizaano ya Shakespeare. Kandi omutsigazi omwe muto akahindura ebijwaro bye emirundi mingi, ahabw'okuba akazaana ebicweka bibiri nari bishatu ebitarikushushana; kwonka, ari omuntu omwe. Akarugayo, omurundi gumwe, ari ekyatsire; kandi ku yaarugireyo omurundi ogwakuratsireho, akaba ari omuntu ondiijo. Kandi hati ekigambo ky'Orugriika, en morphe, nikimanyisa ngu “akahindura ekyetwekyerero kye.”

Kandi ekyo nikyo Ruhanga yaakozire. Ni Ruhanga ogwo omwe obwire bwona. Ruhanga omu nshusha y'Isheboona, O-Omwoyo, Enyomyo y'Omuriro. Ruhanga ogwo omwe yaaba omuntu yaatuura naitwe, en morphe, yaarugayo kugira ngu Abaase kureebwa. Kandi hati ogwo omwe Ruhanga niwe Mwoyo Orikwera. Isheboona, Omwana, Orikwera... ti Baaruhanga bashatu; ofiisi ishatu, ebikorwa bishatu bya Ruhanga omwe. Baiburi ekagira ngu, “Hariho Ruhanga omwe,” ti bashatu. Kwonka okwo nikwo batarabaasize... Torikubaasa kugorora eki reeru okatunga Baaruhanga bashatu. Ekyo toribaasa kukiikiririsa Omuyudaaya na kakye. Ekyo ninkikugambira. Ogwo orikukyetegyereza gye, naamanya ku hariho Ruhanga omwe wenka.

Yetegyereze, nk'ekishushani ekisharwirwe, ashereka, akishweka n'e-n'ekishwekyeso. Ekyo nikyo Ruhanga akozire aha busingye obu. Bitaaha bisherekirwe. Ebintu ebi byona bitaaha bisherekirwe, kandi bishemereire kushuuruurwa omu busingye obu. Hati, Baiburi neegira ngu nibiza kushuuruurwa omu bwire bw'aha muheru. Ni nk'omusharuzi w'ebishushani naashereka eki-eki akozire okuhitsya obwire obu arikwihaho ekishwekyeso reero kikareebeka. Kandi okwo nikwo Baiburi etwire eri. Etuura eri omurimo gwa Ruhanga ogutwire gushwekirwe. Kandi etwire esherekirwe okuruga aha kuhangwa kw'ensi, kandi n'Enaama Yaayo eyekubiremu emirundi mushanju. Kandi Ruhanga akaraganisa omu biro ebi, omu busingye bw'ekanisa egi eya Laodikea, ngu Naija kwihaho ekishwekyeso ahari byona reero tubaase Kukireeba. Ka n'ekintu ky'ekitiinisa! Ruhanga, en morphe, ashwekirwe omu Nyomyo y'Omuriro. Ruhanga, en morphe, omu Muntu orikwetwa Yesu. Ruhanga, en morphe, omu Kanisa Ye. Ruhanga ahaiguru yaitu, Ruhanga arinaitwe, Ruhanga omuriitwe; okwegarura ahansi kwa Ruhanga.

Okwo haiguru, n'orikwera, tihaine owaabaire naabaasa Kumukwataho. Akashuuma aha rushozi; nangwa n'enyamaishwa ku yaakuhikire aha rushozi, ekaba neeteekwa kufa. Reero bwanyima Ruhanga akashuuma yaahindura eihema Rye, reero yaashuuma yaatuura naitwe, yaaba omwe naitwe. “Kandi Twamukwataho,” Baiburi ekagamba. Timoseo ey'okubanza 3:16, “Kandi tihariho kubanganisa, enaama y'Obwaruhanga ni nkuru buzima; Ahakuba Ruhanga akoorekwa omu mubiri, yaakwatwaho n'engaro.” Ruhanga akarya eby'okurya. Ruhanga yaanywa amaizi. Ruhanga yaabyama. Ruhanga yaarira. Yaaba omwe naitwe. Ni kirungi, nikishushanisibwa omuri Baiburi! Ogwo akaba ari Ruhanga ahaiguru yaitu; Ruhanga arinaitwe; hati ni Ruhanga omuriitwe, Omwoyo Orikwera. Tari Omuperesona wa kashatu; Omuntu niwe omwe!

Ruhanga akashuuma yaaba omuntu, kandi yaafa orufu, omuri Kristo; nikwo Abaase kushemeza Ekanisa, ngu abone kugitaahamu, ahabw'okukwatanisa. Ruhanga akunda okukwatanisa. Ekyo nikyo yaahangiire omuntu omurundi gw'okubanza, n'ahabw'okukwatanisa; Ruhanga atuura wenka, hamwe na Baakerubi. Kandi yetegyereze hati, Akahanga omuntu, kandi omuntu yaagwa. N'ahabw'ekyo Akashuuma kandi yaacungura omuntu, ahabw'okuba Ruhanga akunda okuramibwa. Ekigambo ruhanga kyo kyonyini nikimanyisa “ekintu ekirikuramibwa.” Kandi eki ekiija omuriitwe, nk'Enyomyo y'Omuriro, nk'ekintu ekirikuhindura emitima yaitu, niwe Ruhanga omwe owaagizire ati, “Habeho omushana,” kandi omushana gwabaho. Tahinduka oku abaire ari nyomwabazyo, n'eriizooba nikwo ari, kandi nikwo ariguma ebiro byona.

Hati, omu kutandika Ruhanga akaba atuura wenka, n'Ebimurimu Bye, nk'oku ngambire akasheeshe aka. Ebyo n'ebiteekateeko Bye. Hakaba hatariho kintu kyona, kwihaho Ruhanga wenka, kwonka Akaba aine ebiteekateeko. Nk'oku omwombeki mukuru arikubaasa kushutama, akateera puraani omu biteekateeko bye, e k i arikuteekateeka ngu naaza kwo-okwombeka. Okuhanga, hati, tarikubaasa kuhanga. Naabaasa kukwata ekintu ekyahangirwe kandi akikore omu nshusha endiijo; 'habw'okuba Ruhanga niwe muhanda gwonka... niwe Wenka orikubaasa kuhanga. Kwonka ata omu biteekateeko bye eki arikuza kukora, kandi ebyo n'ebi arikuteekateeka, ebyo n'ebi arikwetenga. Hati n'ekiteekateeko, reero bwanyima akigamba, kandi obwo kiba ekigambo. Kandi eekigambo ni... Ekiteekateeko, ku kigambwa, kiba ekigambo. Ekiteekateeko ekyagambwa kiba ekigambo, kwonka kibanza kuba ekiteekateeko. N'ahabw'ekyo, n'ebiri omuri Ruhanga; reero biba ekiteekateeko, bwanyima biba ekigambo.

Yetegyereze. Abo abaine, Amagara Agatahwaho, ekiro eki, bakaba bari hamwe Nawe kandi bari Omuriwe, omu kuteekateeka Kwe, hatakabaireho na Maraika, enyonyoozi, Kerubi, nari ekindi kyona. Obwo n'Obutahwaho. Kandi ku oraabe oine Amagara Agatahwaho, okaba otuuraho obutwire bwona. Kutari okubaho kwawe hanu, kureka ekyemerero n'enshusha ei Ruhanga otaine bugarukiro... Kandi ku araabe Aine obugarukiro, biri Tari Ruhanga. Ruhanga naateekwa kuba ataine bugarukiro. Itwe tugira obugarukiro; We tagira bugarukiro. Akaba ari hoona hoona omu bwire bumwe, naamanya byona, kandi aine obushoboorozi bwona. Ku Araabe atarikwo ari, obwo Tabaasa kuba Ruhanga. Naamanya ebintu byona, emyanya yoona, ahabw'okuba hoona hoona omu bwire bumwe. Okumanya byona Kumuhindura okuba ori hoona hoona omu bwire bumwe. We n'Oriho; Tari nk'omuyaga. We n'Oriho; Atuura omu nju. Kwonka ahabw'okuba orikumanya byona, naamanya ebintu byona, Kimuhindura ori hoona hoona omu bwire, ahabw'okuba Amanya byona ebirikubaho. Tihaine omura ogurikubaasa kuhumbya eriisho Atakimanyire. Kandi Akakimanya ensi etakabaireho, emirundi ei gurihumbya amaisho, kandi n'ebishaju ebi gwine oku birikwingana, n'ensi etakabaireho. Ekyo n'okutagira obugarukiro. Titurikubaasa kukyetegyereza omu biteekateeko byaitu, kwonka ogwo niwe Ruhanga. Ruhanga, otagira bugarukiro!

Read the full account in...
Melekizedeki Ogu N’oha?

aryazaara omwana w'omwojo, kandi oryamweta Yesu, ahabw'okuba niwe arijuna abantu be omu bibi byabo.

Ebyo byona bikabaho ahabw'okuhikiiriza ebi Mukama yaagambire naaraba omuri nabi, naagira ati:

Reeba, omwishiki oshugaineAryagira enda, azaare omwana w'omwojo, Eiziina rye aryayetwa Emanueli, amakuru ngu Ruhanga ari hamwe naitwe.

Matayo 1:21-23