Bwire bw'emperu.

Aka niko kamanyiso k’emperu, sebo?


  Bwire bw'emperu.

Kibiina Baamaraika.


William Branham.

Read the full account in...
Aka niko kamanyiso k’emperu, sebo?

Okushuuruurirwa 10:7,
7 Kwonka omu biro ebi maraika owa mushanju ariteereramu enzamba ye, enaama ya Ruhanga eryahikiirizibwa, nk'ebigambo ebirungi oku biri ebi yaagambiire abaheereza be baanabi.

Hati, obwire bwona, omu rugyendo rwona, hariho ebintu ebyabaireho, ebi ntarabaasize kwetegyereza. Kandi kimwe aha bintu ebi ntarabaasize kwetegyereza, n'obu naabaire ndi omwojo muto kandi okwo kworekwa kukaba kunyizira. Kandi nkaba mbireeba kandi ngambira abazaire bangye ebintu ebyabaire nibiza kubaho. Bakaba bateekateeka ngu naayekanga kwonka. Kwonka, ekintu ekirikutangaaza, bikaba bibaho omu muringo ogu Kwabaire kugamba ngu nibiza kubaho. Noobuuza oti, “Ekyo kikaba kibaho otakajunirwe?” Eego. “Ebiconco n'okwetwa tibiine akakwate n'okweteisa,” Baiburi nikwo erikugira. Okazaarwa omu nsi egi ahabw'ekigyendererwa nanka. Kandi tori... Okweteisa kwawe tikureeta biconco; okabiheebwa ira otakazairwe. Hati, omu rugyendo, obu naabaire ndi omwojo muto, ekyetengo kyangye kikaba kiri... nkaba ntakamarwaga omu itware eri naabaire ntwiremu. Nkaba nyine ekihika, omu buryo bumwe, ky'okuza Burengyerwa-izooba.

-----
Niziteekwa kuba zaabaire ziri shaaha ina z'akasheeshe, obu omukazi wangye yaabaire naagyezaho kutaaha omu kishengye, reero kyabaho. Nkantaaha omu kworekwa akasheeshe ako, kandi omu buryo bumwe nka... Hati, oijukye, kikaba kitari kirooto. Hariho entaaniso rwagati y'ebirooto n'okworekwa. Ebirooto n'obu orikugwejegyera. Okworekwa, n'obu oba nooreeba. Tuzaarwa omu muringo ogwo. Omuntu w'obutoosha, ku aroota, kiba kiri omu muntu we w'omunda. Kandi omuntu we w'omunda aba ari hare munonga nawe. Ebihurikizo bye by'omubiri biba nibikora, obu aba ari omu muntu we w'okubanza. Omu muntu we w'aharuguru ogu, no, nooba ori nka buriijo; nooreeba, nooroza, noohuririra mu mubiri, nookaga, noohurira. Kwonka ku orikuba ori omu muntu waawe ow'omunda, ogwejegyeire, tokaabaasa kureeba, kuroza, kuhuririra mu mubiri, kukaga, nari kuhurira. Kwonka hariho ekintu, ku oroota, kikugarura omu muntu w'aharuguru ogu. Hariho okwijuka, okutuma waijuka ekintu eki waarootsire, emyaka mingi eyaahweire. Omuntu w'obutoosha nikwo ari. Kwonka Ruhanga ku amanya ira ekintu kitakabaireho, ogu muntu w'omunda tari hare munonga kuruga hanu, aha muhanuuzi, kureka aba bantu bombi bari hamwe buzima. Kandi omuhanuuzi, omu kworekwa, tagwejegyera. Aguma ari omu bihurikizo bye, kwonka akireeba.

-----
Hati, omu kworekwa oku, nari nk'oku naaba ningamba, nkaranzya kandi naareeba ekintu ekitari kya buriijo. Hati, kikaba nikireebeka orikushusha ngu mutabani wangye omuto, Joseph, akaba ari aha rubaju rwangye. Nkaba ningamba nawe. Hati, ku oraareebe okwo kworekwa oteireho omutima, noija kwetegyereza ahabw'enki Joseph yaabaire ayemereireho. Reero naaranzya, kandi hakaba hariho orushaka ruhango. Kandi omu rushaka oru, omu-omu kibiina ky'enyonyi, obunyonyi bukye munonga, nk'obureingwa bw'ekicweka kya inci, n'obwemi bw'ekicweka kya inci. Bukaba buri bwa kahonaho bukye. Amooya gabwo makye gakaba garuhire gagwire. Kandi aha itaagi ry'aha mutwe hakaba hariho nka bubiri nari bushatu, mukaaga nari munaana aha itaagi erindi, kandi ikumi na butaano nari makumi abiri aha itaagi erindi; nibushuuma omu nshusha ya piramid. Kandi obwo buntu bukye, entumwa nkye, kandi bukaba buruhiire kimwe. Kandi bukaba nibureeba obuturukwa-izooba. Kandi nkaba ndi Tucson, Arizona, omu kworekwa okwo, ahakuba kikakorwa kigyendereirwe ngu Akaba atarikwenda ngu ndemwe kureeba ahi naabaire ndi. Nkaba niinyeihaho akakurura, k'omu ihamba. Reero naagira nti, “Hati, nimmanya ngu oku n'okworekwa, kandi nimmanya ngu ndi Tucson. Kandi nimmanya ngu obwo bunyonyi bukye aho bwine eki burikujwekyera.” Kandi bukaba nibureeba obuturukwa-izooba. Kandi ahonaaho bwatunga ekiteekateeko ky'okuguruka, butyo bwagyenda, bwatoora obuturukwa-izooba.

Kandi ahonaaho ku bwarugireho, ekibiina ky'enyonyi mpango kyaija. Zikaba nizishushana nk'enkombe, amapapa gashongoize munonga, g'erangi ya kisa, erangi etarikumurinkana munonga nk'ei entumwa ezi ekye z'okubanza zaabaire ziine. Kandi zikaba niziza obuturukawa-izooba, n'obwira. Kandi ahonaaho ku zaarugire omu maisho gangye, nkahinduka ogundi omurundi kureeba burengyerwaizooba, reero aho kyabaho. Hakabaho okubaruka okwatengyeitse ensi yoona buzima. Hati, otafeerwa eki. Kandi imwe, abahurikiize orutambi rw'amaraka, muhamize kimwe kutunga eki kurungi. Okubanza, okubaruka. Kandi nkateekateeka ngu kwahurirwa nk'obwaku, oku oraakyete kwona obu endegye ziguruka zikacwekanisa ahu eiraka ritarenga, reero eiraka rikagaruka aha nsi. Kukatengyetsa, nka, okutsinda, buri kintu. Reero, nikibaasa kuba kyabaire nk'o-o-okuhinda kw'amaani munonga kw'enkuba, n'omurabyo, nka; tindareebire omurabyo. Nkahurira okwo kubaruka kw'amaani munonga okwabaireho, okwahuriirwe nk'okwabaire nikuruga bukiizi bwa bumosho, kuruga ahi naabaire ndi, orikutoora Mexico.

Kwonka, kukatengyetsa ensi. Kandi ku kwagitengyeitse, nkaba ninkireeba burengyerwa-izooba. Kandi okwo hare omu Butahwaho, naareeba ekibiina ky'ekintu nikiija. Kikaba nikireebeka nk'obutoonyezi bukye. Nibubaasa kuba bwabaire butari ahansi ya butaano, kandi butarengire ahari mushanju. Kwonka, Bukaba buri omu nshusha ya piramidi, nk'ezi ntumwa ezirikwija. Kandi ku kyabaireho, Amaani ga Ruhanga Ow'obushoboorozi bwona gakankiriza ahaiguru Kubabugana. Kandi nimbaasa Kukireeba. Tikikandugireho. Ebiro munaana birabireho, kwonka tindikubaasa kukyebwa, nabwo. Tinkagirahoga kintu kyona ekiranteganiise nk'eki. Eka yangye neija kubagambira.

Nkabaasa kureeba abo Baamaraika, ago mapapa nigareeba enyima, nibagyenda n'obwira bwingi munonga okukira oku eiraka rigyenda. Bakaruga omu Butahwaho, ahonaaho, nk'okuhumbya eriisho. Hatariho obwire oburikugasha kwita eriisho ryawe, okuhumbya kwonka, Bakaba baahikire aho. Tindatungire obwire bw'okubara. Tindatungire obwire kureka okureeba kwonka. Ab'amaani munonga, bakuru, Baamaraika b'amaani, nibeera nk'orubaare; amapapa geeteekateekire, n'emitwe. Kandi Bakaba bari, “Hyu-hyu!” Kandi ku kyabaireho, nkabakurirwa omuri piramidi egi, omuri eki kibiina. Kandi naateekateeka nti, “Hati, nikyo eki.” Naashanyarara weena. Naagira nti, “Oo, mugyenzi! Eki nikimanyisa ngu nihaza kubaho okubaruka okuraanyite. Naahika aha muheru gw'orugyendo rwangye hati. Tinshemereire kugambira abantu bangye, okworekwa oku ku kuraahweho. Tindikwenda ngu bakimanye. Kwonka, Tata ow'omu Iguru yaamanyisa hati ku obwire bwangye buhweireyo. Kandi tindikwija kugambira eka yangye, nikwo bateemereza omutima ahabwangye bati, 'Ahabw'okuba, yaaza kugyenda.' Kandi Baamaraika aba baizire kuntwara, n'ahabw'ekyo ninza kwitwa juba hati omu kubaruka kw'omuringo nanka.

Reero kyanyizira, ku naabaire ndi omuri eki kibiina, “Ngaaha, tikyo ekyo. Kuri kikwitsire, kikaitsire na Joseph.” Kandi nkaba nimbaasa kuhurira Joseph naanyeta. Mpaho, reero naagaruka naahinduka. Naateekateeka nti, “Mukama Ruhanga, okworekwa oku nikumanyisa ki?” Reero naayebuuza. Bwanyima kyanyizira, (ritari iraka) kyanyizira. “Oo! Abo ni Baamaraika ba Mukama, baizire kuntuma busya.” Kandi ku naateekateekire ekyo, naimutsya emikono yangye ahaiguru, naagira nti, “Ai Mukama Yesu, Nooyenda ngu nkore ki?” Reero naaruga omu kworekwa. Okumara haihi nk'eshaaha, nkaba nshanyaraire.

Hati, bantu 'mwe nimumanya emigisha ya Mukama oku eri. Kwonka, Amaani ga Mukama n'ag'omutaano kyarimwe, Amaani ga Mukama omu myanya nk'egyo. Ngahuriire, emirundi mingi, mingi munonga, enyimaho, omu kworekwa, kwonka gatari nk'aga. Nigahurirwa gari nk'okworoba okurimu okutiina. Nkagira obwoba bwingi okuhitsya obu naashanyaraire, omu maisho g'Ebihangirwe ebi. Ningamba Amazima. Nk'oku Paulo yaagambire ati, “Tindikubeiha.” Timukankwataga ningamba ekintu kyona ekigwire aha kintu nk'ekyo. Hariho ekirikwenda kubaho. Reero, ahanyima y'akaire kakye, naagira nti, “Mukama Yesu, ku ndaabe ninza kwitwa, kimmanyise, nikwo ndekye kukigambira abantu bangye. Kwonka ku kiraabe kiri ekindi kintu, kimmanyise.” Kwonka, tihaine ekyagarukirwemu.

Omwoyo ku yandugireho, nk'okumara ekicweka ky'eshaaha, ninteekateeka, nari n'okukiraho, nkagira nti, “Mukama, ku kiraabe nikwo kiri, obwo, ngu ninza kwitwa, kandi Orikureeba ngu mperize emirimo omu nsi, kandi-kandi naaza kutwarwa Omuka hati; kandi, kyaba nikwo kiri, ekyo ni kirungi. Ekyo tikiine nshonga. N'ahabw'ekyo,” naagira nti, “ku kiraabe kirikyo, kimmanyise. Garuka Oyohereze Amaani Gaawe ahariinye, reero ku ndaakimanye tindikwija kugambira abantu bangye nari omuntu weena, ahabw'okuba Ori haihi kwija kuntwara.” Reero na... Kwonka tihaine ekyabaireho. Reero naategyerezaho kakye. Bwanyima naagira nti, “Mukama Yesu, ku kiraabe kibaire kitarikumanyisa ekyo, kandi kirikumanyisa ngu Onyiniire ekintu ky'okukora, kandi ndikwija kukishuuruurirwa bwanyima, obwo yoohereza Amaani Gaawe.” Haihi Gankirize ganyihe omuri ekyo kishengye!

Nkeeshanga, ahantu, okwo omu nshonda. Nkaba nimpurira omukazi wangye, ahantu hamwe, naagyezaho kuzunguza orwigi. Orwigi rw'omu kishengye ky'okuraaramu rukaba rutsibire. Kandi nkaba nyine Baiburi ebiikwirwe, kandi e... Nkaba ninshoma, tindikumanya, kwonka hakaba hari, niinyikiriza, omu Barooma eshuura ya 9, omushororongo gw'aha muheru. ...Reeba, ninta omuri Saayuuni eibaare ry'obuhamizo bw'enju, eibaare eririkuteeza entsibo, eibaare ry'obuhamizo bw'enju ery'obuguzi bwingi, kandi orikumwikiriza tarikwatwa nshoni. Kandi naateekateeka nti, “Nikitangaaza kushanga ninshoma ekyo.” Omwoyo akaba akinkwatiire, omuri ekyo kishengye! Nkashweka Baiburi naayemerera aho.

Naaza aha dirisa. Zikaba ziri nka shaaha ina z'akasheeshe, nari okukiraho. Reero naimutsya emikono yangye, naagira nti, “Mukama Ruhanga, tindikwetegyereza. Eri n'eizooba ry'omutaano, ahariinye. Kandi ndi nk'ogwire eiraro.” Naagira nti, “Mukama, ekyo nikimanyisa ki? Ka ngarukye nshome, ku araabe Ariiwe.” Hati, eki nikihurirwa nk'eky'obwana. Ntyo naakwata Baiburi, naagibiikuura. Niho kyabaire kiri omurundi ogundi, omu mwanya nigwo gumwe, Paulo naagambira Abayudaaya ngu bakagyezaho ku... naagambira Abarooma ngu Abayudaaya bakagyezaho Kukwakiira ahabw'emirimo, kwonka nitukwikiriza ahabw'okwikiriza.

-----
Niinyikiriza ngu “ogwo maraika wa mushanju” w'omu Kushuuruurwa 10 n'entumwa aha busingye bwa mushanju bw'ekanisa w'omu Kushuuruurwa 3:14. Mwijukye. Hati ka nshome. Reeba ahu ndikubaasa kushoma. Hati, ogu akaba ari maraika wa mushanju. Kwonka omu biro ebi maraika owa mushanju (omushororongo gwa 7) ariteereramu enzamba ye, enaama ya Ruhanga eryahikiirizibwa, nk'ebigambo ebirungi oku biri ebi yaagambiire abaheereza be baanabi. Hati, nooreeba, ogu akaba ari maraika. Kandi ni maraika w'obusingye bwa mushanju bw'ekanisa, ahabw'okuba hanu nikigira ngu, ni “maraika owa mushanju,” w'obusingye bwa mushanju bw'ekanisa. Nooreeba ngu, ku oraabe nooyenda kureeba ogwo... ahu ogwo maraika ari, Okushuuruurwa 3:14, ni, “Maraika w'ekanisa ya Laodikea.”

-----
Yetegyereze, ogwo maraika wa mushanju akaba ari ow'okukabukira ekanisa ya Laodikea, ekanisa entungi. “'Ndi omutungi, ntungire bingi, tiinyine ki nkyenire.'” Akagira ati, “Ori enshoberwa y'okusaasirwa, omworo, empumi, ojwaire busha, kandi torikukimanya.” Obwo nibwo bwabaire buri Obutumwa bwe. Ai Ruhanga, twoherereze nabi otaine bwoba oine OKU NIKWO MUKAMA ARIKUGIRA, ou Ekigambo kya Ruhanga ekihamiibwe kiraakoreremu, kikahamya ku atumirwe Ruhanga. Kandi ku araije, naija kukabukira obwo busingye. Buzima naija kukikora. Naija kutuma egyo kanisa ya Laodikea yaamwanga. Buzima, naija kutuma yaamwanga. Bakakikora omuri buri busingye. Tikirikuza kuhinduka omuri obu. Nikiteekwa kuba kityo.

Read the full account in...
Aka niko kamanyiso k’emperu, sebo?

Kureeba... Kicu.