Enyabwengye Enjoka.

William Branham.

Read the full account in...
Oruzaaro Rw’enjoka.

Okutandika 3:1-7,
1 Kandi enjoka ekaba eri enyabwengye okukira enyamaishwa zoona ezi MUKAMA Ruhanga yaahangire. Yaabuuza omukazi eti: N'eky'amazima, Ruhanga akagira ngu mutarirya aha muti gwona ogw'omuri eki kibanja?
2 ...omukazi yaagarukamu enjoka ati: Nitwikirizibwa kurya ebijuma by'emiti y'omu kibanja:
3 Kureka ebijuma by'omuti... ahagati y'ekibanja; nibyo Ruhanga yaagizire ati: Mutaribiryaho, n'obu kwakuba okubikoraho, mutakaafa.
4 Enjoka yaagambira omukazi eti: Okufa kwo, buzima timurifa;
5 Ahabw'okuba Ruhanga naamanya ngu eizooba eri muriguryaho, amaisho gaanyu garyaiguka, (mwareeba, kusherura Omushana musya), naimwe mube nka Ruhanga, mumanye oburungi n'obubi.

Nimureeba abantu aba oku bari ebiro ebi, nibagyezaho kucwaho omuri Baiburi? “Ahabw'enki, ti kyanguhi munonga kushukaho, nari kumiisiira, nari omuringo ogu, nari omuringo guri?” Ngaaha, sebo. Ruhanga akataho puroguraamu, kandi egyo niyo tushemereire kukuratira, Egi.

6 Omukazi ku yaareebire omuti guri murungi kurya, nigushemeza amaisho, kandi omuti gw'okutuma... nigwetengwa ahabw'okuha omuntu obwengye, yaacwa aha bijuma byagwo, yaarya yaahaho na iba, nawe yaarya.
7 Ahonaaho amaisho gaabo bombi gaiguka, baamanya... bajwaire busha, baayebaziirira amababi g'omutiini g'okwekingaho.

Yetegyereze hati, nkiki hanu ekyabaireho. Niinyikiriza, kandi nimbaasa kukishagika na Baiburi, ngu n'enjoka eyaakikozire. Enjoka niwe ogwo muntu owaabuzireho rwagati y'empundu n'omuntu. Habw'okuba, hurikiza, yetegyereze eki hati, ngu enjoka ekaba etari kikooko ekirikwekurura ahansi. Ekaba eri “enyabwengye” munonga okukira enyamaishwa zoona ez'omu ishwa. Hati, ngyenzire naakwata ebishoboorozo, eriizooba, kuruga ahantu hoona, kusherura ekigambo eki, amakuru g'ekigambo eki omunyabwengye. Nikimanyisa “okurabuka, okuba endyarya,” kandi, okushoboorora okurikukirayo oburungi okw'o-okw'Oruheburaayo (kuruga omu kigambo m-a-h-a-h, mahah) nikimanyisa “okugira obwengye buhikire bw'engyenderwaho z'amagara.”

Hati ka turebe eki ahabw'akaanya kakye. N'orabukire, endyarya, kwonka nabwo naayetwa “enjoka.” Kwonka, mwijukye, niwe yaabaire ari orabukire okukirayo owaabaire ariho, kandi orikushushanira kimwe n'omuntu okukira ekindi kintu kyona ekyabaire kiri omu kibanja; naashushana munonga n'omuntu. Akaba atari kikooko ekirikwekurura ahansi. Omukyeeno nigwo gwamuhindwire ekikooko ekirikwekurura ahansi. Kandi akaba ari... Baiburi neegira ngu akaba aboneire munonga okukira boona. Kandi nangwa n'omukyeeno tiguramazireho oburungi bwe bwona; na hati erangi nungi munonga z'enjoka nizishemeza, okwecwendeeka kwayo n'oburyarya bwayo. Nangwa n'ogwo mukyeeno tigurabiihireho. Kwonka, mwijukye, Ruhanga akamugambira ngu amaguru ge nigaza kurugaho kandi agyendese enda. Kandi torikubaasa kubona eigufa na rimwe omu njoka eririkushushana n'ery'omuntu, kandi egyo niyo nshonga etumire sayansa yaabura. Kwonka ngigyo aho.

Ruhanga akakishereka abanyabwengye n'abarikwetegyereza, kandi yaaraganisa kukishuuruurira abaana ba Ruhanga, omu biro by'aha muheru obu abaana ba Ruhanga barishuuruurwa, obu, “Abaana ba Ruhanga abaashemereirwe nangwa n'ensi etakahangirwe.” Obu okushuuruurwa kukuru kw'Obwaruhanga n'ebindi birireetwa omu biro by'aha muheru, Aryashuuruura ebintu ebi kurabira omu baana ba Ruhanga. Nimumanya ekyo Ebyahandikirwe nibikyegyesa. Mbwenu turi hanu. Egyo niyo nshonga ahabw'enki Ruhanga naatushuuruurira ebintu ebi. Ruhanga naareeta abaana Be omu kushuuruurwa. Naagyenda arenga ah'obwengye bwona bw'abantu bugarukira, hare okwo omu kushuuruurirwa kw'omwoyo, reero Akureeta ahansi. Titutwire nitwegyesa, omuri Baiburi egi tuti, “Okukishoborokyerwa nikwetenga oine obwengye”? T'ebi yaashomire omuri seminaariyo; kureka eki yaayegyeire aha maju ge omu maisho ga Ruhanga, kandi n'eki Ruhanga yaasiimire kumuha. Abaana ba Ruhanga, kushuuruurwa!

Ngigi hanu enjoka, hati nkiki hanu eki enjoka yaabaire eri; naaza kubaha enshoboorora eyangye eki eri. Twine e... nitushuuma, kuruga aha kikyere, tugumizamu kuza aha kaana k'ekikyere, tugumizamu ahansi n'okugumizamu, n'ebindi n'ebindi, okuhitsya obu aha muheru orikuhika aha nkyende, kuza aha mpundu. Kandi okuruga aha mpundu, hati nituguruka turuga aha mpundu tuza aha muntu, reero twebuuza ahabw'enki. “Mpaho,” sayansa neegira eti, “hati rindaho! Nitubaasa kuteerana omu by'omubonano omukazi n'enkyende, hamwe n'empundu, reero omu bundi buryo, omushaija azaare aha mpundu.” Tikirikukora. Kugiteerana omu by'omubonano n'endiijo nyamaishwa yoona; tikirikukora. Eshagama terikujwanga; reeba eshagama yaawe, n'eshagama y'omutaano buzima, kyarimwe. Hariho eshagama ahagati aha, kandi tibarikubaasa kubona egyo nyamaishwa. Oo, haleluya, naahurira naaheebwa omugisha hati hati.

Yetegyereze. Ahabw'enki? Ruhanga akakibashereka. Tihariho eigufa omu njoka eririkushushana n'eigufa ry'omuntu. Ekintu ekyo akakita hare munonga kugira ngu kitakaabaasa kujumburwa abanyabwengye. Kandi naaza kubooreka ahu omuntu ogwo orabukire arikuruga, ahu-ah'ari, n'obu kiraabe. Mwareeba, tarikubaasa kwija kurabira omuri ekyo. Nikiteekwa kwija kurabira omu kushuuruurirwa, “Ori Kristo Omwana wa...” “Naanye Ndyayombeka Ekanisa Yangye aha rukiri oru; n'amarembe g'okuzimu tigarigibaasa,” okushuuruurirwa kw'omwoyo. Abeeli akaa kamanya ata kuhayo omwana gw'entaama, omu mwanya gwaKaini kuhayo ebijuma by'omu musiri? Kikamushuuruurirwa omu buryo bw'omwoyo. Torikukutunga kuruga omu seminaariyo. Torikukutunga kurabira omu bigombe by'amadiini. Nookutunga kuruga omu Iguru.

Hati mureebe egyo njoka, enjoka egi eyaabaireho okubanza. Ka tuteere ekishushani kyayo hati. N'omuntu muhango w'amaani. Ari rwagati y'empundu n'omuntu. Kandi, egyo njoka; sitaane, Rusafeeri, akaba naamanya ngu egyo niyo shagama yonka eyaabaire neebaasa kujwanga n'egi shagama y'omuntu, niwe muntu wenka ou yaabaire naabaasa kukoragana nawe. Akaba atarikubaasa kukoragana n'empundu, egyo shagama ekaba etarikubaasa kujwanga. Akaba atarikubaasa kukoragana n'ebintu ebitari bimwe. Akaba atarikubaasa kukoragana n'entaama. Akaba atarikubaasa kukoragana n'embaraasi. Akaba atarikubaasa kukoragana n'endiijo nyamaishwa yoona; akaba naateekwa kukoragana n'egi njoka. Ka tumwegyeho hati haza tureebe oku arikushusha. N'omuntu muhango munonga, ekikaaka ekya ira munonga. Okwo niyo barikushanga ago magufa mahango, kandi eki ninza kukibooreka omuri Baiburi. Hati mwetegyereze kurungi n'obwegyendesereza. Kare. Ogu muntu muhango munonga, ka tugire ngu a-akaba aine oburaingwa bwa fuuti ikumi, aine amabega mahango g'amaani; akaba naashusha nk'omuntu. Kandi eshagama ye; bwanyima y'okushuuma akaija, kwikirizana n'enyamaishwa emwe n'endiijo.

Noobaasa kwemesa enyamaishwa. Kandi ekaguma neeba eshagama y'omutindo gw'ahaiguru okukiraho, amagara g'omutindo gw'ahaiguru kukiraho, omutindo gw'ahaiguru okukiraho, okuhitsya obu erikutemba ekahika ahaiguru omu kyanga ky'omuntu. Kwonka akakwate k'aha muheru hanu, rwagati hanu, kakasharwa kaihwaho. Ni bangahi abarikumanya ngu sayansa terikubaasa kuzoora obuzaare obwabuzireho? Mwena nimukimanya. Ahabw'enki? Ngigi hanu, egyo njoka. Akaba ari hanu, ogwo muntu muhango w'amaani. Reero sitaane yaashuuma yaija, hati, yagira ati, “Nimbaasa kuha omuhimbo.” Hati, waatandika kureeba abakazi, kandi okazaana n'abakazi, ijuka, oshukirweho omwoyo gwa sitaane; ti mukazi waawe. Yetegyereze, hati, sitaane akashuuma yaataaha omu njoka. Atyo yaashanga Haawa omu kibanja kya Edeni, ajwaire busha, reero yaagamba aha kijuma ekiri rwagati. Rwagati nikimanyisa “ekicweka ky'ahagati,” hamwe n'ebindi; nimwetegyereza, omu bateeraine b'orujwangye. Reero yaagira ati, “Hati, nikishemeza. Ni kirungi aha maisho.”

Yaakora ki? Yaatandika kukorera Haawa ebya rukundo, yaabyama nawe, nk'omushaija we. Kandi Haawa akareeba ngu gukaba nigushemeza, n'ahabw'ekyo yaagyenda yaagambira iba, kwonka Sitaane akaba yaaherize kumutweka. Bwanyima yaazaara omwana we w'okubanza w'omwojo, owaabaire naayetwa Kaini, omwana wa Sitaane. Nimugira muti, “Hati, ekyo kigwire.” Kare, twaza kureeba yaaba kigwire nari kitagwire. “Kandi ndyata obuzigu ahagati y'Oruzaaro rwawe n'oruzaaro rw'enjoka.” Ngu ki? Oruzaaro rw'enjoka! Haawa akaba aine Oruzaaro, n'enjoka ekaba eine oruzaaro. “Kandi Aryakuteera omutwe, naiwe Oryamuteera ekitsintsiino.” Kandi okuteera, aho, nikimanyisa “Okurihiirira.” Hati ndurwo aho “oruzaaro” rwawe rw'enjoka. Hati, mwetegyereze, mbaba hanu baarugayo abantu aba babiri. Hati, enjoka egi, ku yaayemereire aho, eki kikaaka kihango munonga kikeemerera aho, kikaba kikozire omushango gw'okushambana na muka Adamu. Ekibi kiri nkahi eriigyenda? N'enki ekirikutuma ebintu byaba nk'oku biri ebiro ebi? Hati, nyowe-nyowe... Buzima nimubaasa kwetegyereza eki ndikugambaho.

Kandi okwo nikwo kyabaire. Kandi ku yaakikozire, Ruhanga yaagamba, Yaatandika kweta Haawa na Adamu. Reero Adamu yaagira ati, “Njwaire busha.” Reero Ruhanga yaagira ati, “N'oha okugambiire ku ojwaire busha?” Reero baatandika, omuringo gw'ekiserukare, kucwererana emanja. Ati, “Mbwenu, omukazi ou Wampaire, niwe akikozire. Niwe ansoonasoonire.” Reero omukazi yaagira ati, “Enjoka empaire ekijuma kya apo”? Kare, mubuurizi 'we, yetonde. Omukazi yaagira ati, “Enjoka niyo yambeihabeiha.” Nimumanya okubeihabeiha eki kirikumanyisa? Nikimanyisa “kushiisha.” Kandi akaba asiisikaire. Sitaane taramuhaire ekijuma kya apo. “Enjoka niyo yambeihabeiha.” Reero omukyeeno gwaija.

Yaagira ati, “Ahabw'okuba waahurikiza enjoka omu mwanya gwa baro, waiha Amagara omu nsi. Kandi oryaoryakanyisa obusaasi bwawe; n'okuzaara kwawe kuryaba ahari baro,” n'ebindi. “Kandi ahabw'okuhurikiza omukazi waawe, omu mwanya gw'Okumpurikiza (Nkakwiha omu mucuucu; ekihangirwe ekirikukirayo kuba eky'omutindo gw'ahaiguru), omu mucuucu nimwo origaruka.” “Kandi, enjoka, ahabw'okuba okozire ekyo, amaguru gaawe gaakwihwaho. Oryagyendese enda, ebiro byona by'amagara gaawe. Kandi noija kwangwa. Kandi omucuucu guryaba eby'okurya byawe.” Nikyo ekyo. Obwo nibwo buzaare obwabuzireho.

Hati ngugu hanu Kaini yaija. Ka tureebe obwo buhangwa. Ngugu hanu Kaini yaija. Ni muntu ki? N'omushuubuzi w'omushwashumi. Naahinga emisiri. Arabukire, omunyabwengye; omunyadiini, omunyadiini munonga; reeba-reeba ebimukozire hati. Tugyendane ahabw'edakiika nkyeho. Ngugu hanu yaija. Naamanya ngu n'ow'engyesho nungi. Naayenda kuza aha kanisa. Yaayombeka ekanisa, yaatamba ekitambo. Yaareeta eitambiro, na buri kimwe. Yaayombeka eitambiro, yaaritaho ebimuri bye. Yaataho omusiri, ebijuma by'omu misiri, yaabitoijera Ruhanga. Yaagira ati, “Nibyo ebyo, Mukama. Nimmanya ngu tukarya ebijuma bya apo, ekyo nikyo kyakireetsire.” Bamwe aha baana be baine ekiteekateeko ky'omuringo nigwo gumwe. Nikyoreka ei kyarugire. Yaareeta ebijuma bya apo bye, naabiiha omu musiri, yaabita aho, yaagira ati, “Ebi nibiza kuba eky'okurihiirira.” Ruhanga yaagira ngu, “Bikaba bitari bijuma bya apo.” Kwonka, ahabw'okushuuruurirwa kw'omwoyo, Abeeli akamanya ngu ekaba eri eshagama. N'ahabw'ekyo yaareeta omwana gw'entaama, yaagushara amaraka, gwafa. Reero Ruhanga yaagira ati, “Ekyo kihikire. Ekyo nikyo kyakikozire. Ekaba eri eshagama.” Nimumanya eshagama ei ndikugambaho. Kare. “Eshagama niyo yaakikozire.” Hati reeba.

Reero Kaini ku yaareebire omurumuna orikwera oyekuringa ahansi yaikirizibwa omu maisho ga Ruhanga, kandi obumanyiso n'eby'okutangaaza bikaba nibikorwa eifo okwo, yaamugirira eihari. Yaagira ati, “Twaza kuzibira ekintu eki hati hati.” Reeba beene ishe, reeba abaana be, ebiro ebi. “Hati, ndabukire munonga okumukira,” n'ahabw'ekyo yaagira ekiniga. Ekiniga kikaruga hi? Noobaasa kugira ngu ekiniga ekyo... Akaita omurumuna. Akaba ari omwitsi. Noobaasa kweta Ruhanga omwitsi? Kandi Adamu akaba ari omwana wa Ruhanga. Baiburi neegira, ngu, “Adamu akaba ari omwana wa Ruhanga,” okwo kutandika okushemeire enyima okwo. Adamu akaba ari omwana wa Ruhanga. Kandi eryo eitima n'eihari, n'ebindi byona, bikaba bitarikubaasa kuruga omuri ako kagyera akashemeire. Bukaba nibuteekwa kurabira omu mwanya ogundi. Mbwenu bukarabira omuri Sitaane, owaabaire ari omwitsi, okubanza kwa byona. Baiburi neegira ngu, “Akaba ari omubeihi kandi omwitsi, okubanza kwa byona.” Nikyo ekyo. Kandi akaita omurumuna. Kandi ekyo kikaba kiri ekirikushushanisa okufa kwa Kristo. Reero, kuruga omuri ekyo, tihariho kubanganisa, Akaimutsya Seezi kuza omu mwanya gwe. Okufa, okuziikwa, n'okuzooka kwa Kristo.

Kandi reeba, bwanyima, hanu haija ebikaaka byawe. Reero Kaini yaaza omu nsi ya Noodi. Ishe ku araabe yaabaire ari omuntu w'amaani muhango ekikaaka, Kaini akaashushaine ata? Akaashushaine ishe. Kandi akaza omu nsi ya Noodi, yaatwara omwe ahari banyaanya. Nigwo muringo gwonka ogu yaabaire naabaasa kukikoramu. Tihariho obundi buryo obu abakazi baakubaasize kuboneka, kureka okurabira omuri Haawa wenka. Nibagira ngu bakaba baine abatabani n'abahara makumi mushanju. Ku-ku haraabe haabaire hatariho bakazi... Baiburi tehandiika abaishiki ku bazaarwa, n'abashaija bonka. Kandi obu, ku haraabe haabaire hatariho abakazi abandi kureka Haawa wenka, ku yaafiire, oruganda rw'abantu rukahwaho. Naateekwa kuba yaabaire aine abahara. N'ahabw'ekyo akaba naateekwa kutaasya munyaanya wenyini. Akaza omu nsi ya Noodi ya-yaashwera omukazi we. Kandi ku yaamutaahiize okwo, okwo niyo baashangire abo bantu bahango munonga b'ebikaaka, abaabaire bari abaana ba Ruhanga abaagwire; abaizire kurabira omuri ishebo, sitaane, kurabira omuri Kaini. Mbubwo aho obuzaare bwawe obwabuzire.

Read the full account in...
Oruzaaro Rw’enjoka.

Nikwo n'emitwarize y'omukazi enshambani eba. Arya, ayeragaza aha minwa, agira ati: Tiinyine ki naashobya.

Enfumu 30:20