Yesu Krist oni Ruhanga.

William Branham.

Read the full account in...
Okushuuruurwa kwa Yesu Kristo.

Okushuuruurwa 1:5,
5. Kandi ebirikuruga ahari Yesu Kristo Kareebi Omwesigwa, Omujigaijo Omu Kuzooka, kandi Omutegyeki w'Abagabe b'Ensi. Ogwo otukunda, kandi owaatukomoroire omu bibi byaitu n'Eshagama Ye,

Okushuuruurwa 1:8,
8. Niinye Alufa na Omega; (obutandikiro kandi obugarukiro), nikwo Mukama arikugira, Oriho, kandi Owaabaire Ariho, kandi Oribaho, Ow'obushoboorozi Bwona.

Hati ebigambo ebi byona, “Ogwo Oriho,” na “Ogwo Owaabaire Ariho,” na “Ogwo Oribaho,” na “Kareebi Omwesigwa,” na “Omujigaijo kuruga omu Bafu,” na “Omutegyeki w'Abagabe b'Ensi,” na “Alufa na Omega,” na “Ow'obushoboorozi bwona,” n'ebitiinisa kandi okugamba aha MUNTU OMWE KANDI OMWE OGWO, Niwe Mukama Yesu Kristo, Owaatwogyizeho ebibi byaitu n'eshagama Ye.

Omwoyo wa Ruhanga omuri Yohaana naayoreka atyo okwenda ngu ayorekye Obukuru Oburikukirayo bw'Obwaruhanga obwa Yesu Kristo n'okushuuruura Obwaruhanga ku ni Ruhanga OMWE. Ebiro ebi hariho obuhabe bw'amaani. Buri ngu hariho Baruhanga bashatu omu mwanya gw'omwe. Okushuuruurirwa oku oku Yesu, We wenka, yaahaire Yohaana, nikugorora obwo buhabe. Tikugira ngu hariho Baruhanga bashatu, kureka ni Ruhanga omwe omu ofiisi ishatu. Hariho Ruhanga OMWE oine ebyeterero bishatu, Isheboona, Omwana, kandi n'Omwoyo Orikwera. Okushuuruurirwa oku okukuru nikwo ekanisa y'okubanza yaabaire eine, kandi kushemereire kugarurwa busya omu biro ebi eby'aha muheru hamwe n'enkora ehikire ey'okubatiza omu maizi.

Hati abatendekirwe omu by'ediini ab'omurembe tibarikwikirizana naanye ahakuba hanu hariho ekyahandiikirwe omu katabo k'amahurire kakuru k'Ekikristaayo. “Egyo nyegyesa (ahari Tiriniiti) eri aha ntango y'omutima gw'Endagaano eya Ira. Nikwo eri n'aha ntango y'omutima gw'Endagaano Ensya. Endagaano Ensya n'Endagaano eya Ira byona nibihakanisa ekiteekateeko ekirikugira ngu hariho Baaruhanga abarikurenga ahari omwe. Kwonka Endagaano Ensya neeyegyesa bwerure ku Isheboona ari Ruhanga, n'Omwana ari Ruhanga, n'Omwoyo Orikwera ku ari Ruhanga, kandi ngu ebi bishatu TIBIRIKUGAMBA aha Muntu ogwo omwe, kureka n'abantu bashatu abakwataniise hamwe. Aho niho twiniire enyegyesa nkuru y'Abaperesona Bashatu kwonka ari Ruhanga omwe.”

Nibagaruka bagira ngu, “Okurugiirira omuri Baiburi, Ruhanga tari muperesona omwe wenka, kureka n'abaperesona bashatu omuri Ruhanga omwe. Egyo niyo naama nkuru ya Tiriniiti.”

Buzima nikwo kiri. Abaperesona bashatu nibabaasa bata kuba omuri Ruhanga omwe? Oihireho okutaba na Baiburi erikukishagika, nikyoreka okubura obwengye bw'okuteekateeka. Abaperesona bashatu buri omwe okwe, n'obu baine ebirikubashushanisa, nibakora baaruhanga bashatu, kitari ekyo orurimi niruba rwaburira kimwe amakuru.

Garuka ohurikize ebigambo ebi, “Niinye Alufa na Omega, Ow'okubanza kandi Ow'aha muheru, nikwo Mukama arikugira, Ogwo Oriho, Ogwo Owaabaire Ariho, kandi Ogwo Oribaho, Ow'obushoboorozi Bwona.” Obu n'Obwaruhanga. Ogu tari nabi kwonka, omuntu. Ogu ni Ruhanga. Oku ti kushuuruurirwa kwa Baaruhanga bashatu, kureka n'okwa Ruhanga OMWE, Ow'obushoboorozi bwona.

Omu kutandika kw'ekanisa bakaba batarikwikiririza omuri Baaruhanga bashatu. Torikubaasa kushanga okwikiriza nk'okwo omu ntumwa. Enyegyesa egyo ekataahamu ahanyima y'obusingye bw'entumwa kandi buzima yaaba entsibuko y'okutaikirizana kandi enyegyesa nkuru omu Rukiiko rwa Niika. Enyegyesa y'Obwaruhanga ekareeta okwecwamu ebicweka bibiri ahari Niika. Kandi kuruga omu kwecwamu oku hakarugamu ebibiina bibiri ebyabaire bitarikubaasa kwikirizana. Ekibiina kimwe omu mazima kikaikiririza omuri baaruhanga baingi, baikiririza omuri Baaruhanga bashatu, abandi baikiririza omuri Ruhanga omwe. Hatariho kubanganisa eki kikaija kubaho bwanyima y'obwire bukye, kwonka kikabaho, kandi tukiine n'eriizooba. Kwonka Okushuuruurirwa ahabw'Omwoyo okurabira omuri Yohaana aha makanisa kukaba kuri ngu, “Niinye Mukama Yesu Kristo, kandi Niinye BYONA. Tihariho Ruhanga ondiijo.” Kandi akata akamanyiso Ke aha Kushuuruurwa oku.

Teekateeka ahari eki: Ishe wa Yesu akaba ari oha? Matayo 1:18 naagira ngu, “Yaareebwa aine enda y'Omwoyo Orikwera.” Kwonka Yesu, We wenka, akagira ngu Ruhanga niwe Ishe. Ruhanga Isheboona na Ruhanga Omwoyo Orikwera, nk'oku turikukoresa ebigambo ebi, nibikora Isheboona n'Omwoyo kuba OMWE. Kandi buzima nikwo bari, kitari kityo Yesu akaba aine ba Ishe babiri. Kwonka yetegyereze ku Yesu yaagizire ngu We na Ishe bakaba bari OMWE - batari babiri. Ekyo nikikora Ruhanga OMWE.

Obu eki omu byafaayo kandi n'omu Byahandiikirwe kiri amazima, abantu nibeebuuza ahu abashatu baarugire. Ekaba omusingye gw'enyegyesa omu Rukiiko rwa Niika omu mwaka gwa 325 A.D. Tiriniiti egi (ekigambo ekitarikwikirizana n'ebyahandiikirwe) ekaba eyegamiire baaruhanga baingi ba Rooma. Abarooma bakaba baine baaruhanga baingi abu baabaire bashaba. Bakaba bashaba baishenkurubo nk'abatonganirizi. Ekaba eri entambo y'okuheereza amaziina masya ahari baaruhanga aba ira, n'ahabw'ekyo twine abarikwera kugira ngu kireebekye kiri nk'ekya Baiburi. Mpaho, omu mwanya gwa baaruhanga b'Abarooma nka Jupiter, Venice, Mars, n'abandi twine Paulo, Petero, Fatima, Kristoofa n'abandi. Ediini yaabo y'obupagaani ekaba etarikubaasa kukora na Ruhanga omwe wenka, n'ahabw'ekyo Ruhanga bakamucwamu bashatu, batyo baakora abarikwera abatonganirizi nk'oku baabaire baakozire baishenkurubo abatonganirizi.

Okuruga obwo abantu bakaremwa kwetegyereza ku hariho Ruhanga omwe wenka oine ofiisi ishatu nari shi okweyoreka kw'emiringo eshatu. Nibamanya ku hariho Ruhanga omwe kurugiirira omu Byahandiikirwe, kwonka nibagyezaho kukikoramu ekiteekateeko kikuru ngu Ruhanga ni nk'omutsitsa gw'omuzaabibu; abaperesona bashatu barikubagana Obwaruhanga bumwe oburikwingana. Kwonka hanu omu Kushuuruurwa nikigamba butunu ku Yesu ari “OgwoOriho,” “Ogwo Owaabaire Ariho,” kandi “Ogwo Oribaho.” Niwe “Alufa na Omega,” ekirikumanyisa ngu Niwe, “A kuhika ahari Z” nari shi BYONA OMURI BYONA. Niwe byona - Ow'obushoboorozi bwona. Niwe Kimuri kya Rooza ekya Shaaroni, Irebe ry'omu ruhanga, Enyonyoozi y'omu kasheeshe Erikumurinkana, Eitaagi Erihikiriire, Isheboona, Omwana, kandi n'Omwoyo Orikwera. Ni Ruhanga, Ruhanga Ow'obushoboorozi bwona. RUHANGA OMWE.

Timoseo 3:16 neegira ngu,
“Kandi tihariho kubanganisa, enaama (y'Obwaruhanga ni) nkuru buzima, erikugira eti: (Ruhanga) akoorekwa aine omubiri, yaahamibwa Omwoyo, yaareebwa baamaraika, yaabuurirwa omu mahanga, yaikirizibwa ab'omu nsi, yaatwarwa omu iguru kutaaha omu kitiinisa.”
Eki nikyo Baiburi erikugamba. Hanu tihaine eki erikugamba aha muperesona ow'okubanza nari owa kabiri nari owa kashatu. Neegamba ngu Ruhanga akeeyoreka omu mubiri. Ruhanga Omwe. RUHANGA OMWE ogwo akeeyoreka omu mubiri. Ekyo kishemereire kumara. Ruhanga akaija omu muringo gw'omuntu. Ekyo tikiramukozire RUHANGA ONDIIJO. AKABA ARI RUHANGA, RUHANGA OGWO OMWE. Kukaba kuri okushuuruurirwa buriya, kandi n'okushuuruurirwa na hati. Ruhanga Omwe.

Ka tugarukye enyima omuri Baiburi tureebe oku Yaabaire ari omu kutandika kurugiirira aha kushuuruurirwa oku Yaahaire We wenka. Yehova omukuru akeeyorekyera Israeli omu nyomyo y'omuriro. Nka Maraika w'Endagaano Akatuura omu nyomyo y'omuriro kandi yaayebembera Israeli buriizooba. Ahari hekalu Akarangirira okwija Kwe n'ekicu kihango. Reero eizooba rimwe Akeeyorekyera omu mubiri ogwazairwe oshugaine ogwabaire Gumutebeekaniisiibwe. Ruhanga owaabaire atuura ahaiguru y'amahema g'Abaisraeli Akeetaho eihema ry'omubiri yaatuura nk'omuntu omu bantu. Kwonka akaba ari RUHANGA OGWO OMWE. Baiburi neeyegyesa ngu RUHANGA AKABA ARI OMURI KRISTO. OMUBIRI gukaba guri Yesu. Omuriwe Obwaruhanga bwona nimwo bwabaire buri, OMU MUBIRI. Tihaine ekirikubaasa kwetegyerezibwa okurenga aho. N'enaama, eego. Kwonka amazima gonyini - tikirikubaasa kwetegyerezibwa kukira aho. Mbwenu ku Araabe yaabaire atari bantu bashatu obwo, na hati Taabaasa kuba bashatu. RUHANGA OMWE: Kandi Ruhanga ogwo omwe akaba omuntu.

Yesu akagira ati, “Nkaruga ahari Ruhanga kandi Ningyenda ahari Ruhanga.” Yohaana 16:27-28. Buzima ekyo nikyo kyabaireho. Akaruga omu nsi omu muringo gw'okufa Kwe, okuziikwa, okuzooka, n'okutemba omu iguru. Bwanyima Paulo Yaamubugana omu muhanda ogurikuza Damasiko kandi Yaagambira Paulo naagira ati, “Saulo, Saulo, Ompiigira ki?” Paulo yaagarukamu ati, “Ori Oha, Mukama wangye?” Yaamugarukamu ati, “Ndi Yesu.” Akaba ari enyomyo y'omuriro, omushana ogurikuhumya. Akaba yaahindukire, buzima nk'oku Yaagambire ngu Naija kuba. Kugaruka omu nshusha egyo ei Yaabaire arimu Atakajwaire orusiisira rw'omubiri. Okwo nikwo buzima Yohaana yaakireebire. Yohaana 1:18, “Okuruga iranaira tihariho orareebire Ruhanga; Omwana We omwe nyamunegyere, ori omu kifuba kya Ishe, niwe Yaamumanyiise.” Yetegyereze ahu Yohaana arikugira ngu Yesu ARI. Ari OMU kifuba kya Ishe.

Luka 2:11 nihagira hati,
“Ahabw'okuba eki kiro Omujuni yaabazaarirwa omu rurembo rwa Daudi, niwe Kristo Mukama waitu.”
Akazaarwa ari Kristo, kandi ahanyima y'ebiro munaana obu Yaasharwa Akeetwa Yesu, nk'oku maraika yaabagambiire. Nkazaarwa omu kika kya Branham. Obu naazaarwa bakaanyeta iziina William. Akaba ari KRISTO kwonka Akaheebwa iziina ahansi hanu omu bantu. Orusiisira orwo orw'aheeru oru abantu baabaire nibareeba rukaba nirwetwa Yesu. Akaba ari Mukama w'Ekitiinisa, Ow'obushoboorozi bwona owaayeyorekyeire omu mubiri. Ni Ruhanga Isheboona, Omwana, kandi Omwoyo Orikwera. Niwe ebyo byona.

Read the full account in...
Okushuuruurwa kwa Yesu Kristo.

Download (PDF English)...  Godhead Explained

Hurira, iwe Israeli! MUKAMA Ruhanga waitu n'omwe;

Eky'Ebiragiro 6:4