Ekyo kiro ahari Gologosa.
Ekyo kiro ahari Gologosa.
William Branham.
Read the full account in...
Ekyo kiro ahari Gologosa.Luka 23:33,
Ku baahikire aha mwanya ogurikwetwa Empanga y'omutwe, aho niho baamubambire hamwe n'ezo nkozi z'ebibi, omwe aha rubaju rwe rwa buryo, n'ondiijo aha rwa bumosho.Kandi ku eraabe eri nkuru munonga aha ruganda rw'abantu, Gologosa, ninteekateeka ngu ni kirungi ahariitwe kugaruka enyima tukagishwijuma, tukareeba eki erikumanyisa ahariitwe. Ahakuba, nimpamya, omu shaaha egi eya bwanyima ei tutwiremu, nitusherura buri bukuru bwona bwa Ruhanga obu turikubaasa kumanya. Kandi bwona obu turikubaasa kubona, turi hanu kubwegaho, kureeba obwaitu nibuuha, kandi n'ebi Ruhanga atukoreire, kandi tureebe n'ebi Araganiise kutukorera. Kandi ekyo nikyo kitureeta aha kanisa.
Egyo niyo nshonga etuma omubuurizi yaaburiira, egyo niyo nshonga etuma yaashoma kandi akeecumiitiriza omu Byahandiikirwe, kandi akasherura okwebemberwa kw'Omwoyo, n'ahabw'okuba n'omuheereza w'abantu ba Ruhanga. Kandi naagyezaho kusherura ekintu ekiraije... eki Ruhanga arikwenda kugambira abantu Be, ekintu ekyakubaasa kubahwera. Obundi, nikibaasa kuba, kubashinja omu bibibyabo, kwonka kikabahwera okubaimutsya, kugira ngu babaase kureka ebibi byabo reero baimukye baheereze Mukama. Kandi abaheereza bashemereire kusherura ebintu ebi.
Kandi ekiro eki, ahabw'okuba eky'omugasho munonga, kimwe aha biro ebirikukirayo obukuru, ka tureebe ebintu bishatu ebitarikushushana ebi ekyo kiro kyamanyiise ahariitwe. Tukaabaasize kukwata amagana n'amagana. Kwonka, akasheeshe aka, naatooranamu ebintu bishatu ebitarikushushana, by'omugasho gw'amaani ebi turikwenda kureeba, ahabw'omwanya mukye ogwaza kukurataho, eki Gologosa yaamanyiise ahariitwe. Kandi ninshaba ngu kisingise orubanja buri musiisi ori hanu; kireetere orikwera weena kuza aha amaju; kireetere buri murwaire kwimutsya okwikiriza kwe ahari Ruhanga, reero agyende, akizire; buri musiisi, ajunwe; buri muntu ogarukire enyima agarukye, kandi akwatwe enshoni; n'orikwera weena, ashemererwe, atungye amaani masya n'amatsiko masya.
Ekintu kimwe kikuru, eky'omugasho eki Gologosa erikumanyisa ahariitwe hamwe n'aha nsi, ni, ekamaraho ekibuuzo ky'ekibi, kyarimwe. Omuntu akaba asingirwe orubanja rw'ekibi. Kandi ekibi kikaba kiri ekiheneso eki omuntu weena yaabaire atarikubaasa kushashurira. Ekiheneso kikaba kiri eky'amaani munonga okuhitsya obu haabaire hatariho muntu weena owaakubaasize kushashurira ekiheneso ekyo. Buzima niinyikiririza kimwe ngu Ruhanga akaikiriza ngu kibe kityo, ngu ekiheneso kibaase kuba eky'amaani munonga kugira ngu hatabaho omuntu weena owaabaasa kukishashurira, nikwo Abaase kukikora We wenka. Hati, ekiheneso ky'ekibi kikaba kiri okufa. Kandi omu kibi twena nimwo twazaariirwe, twahangirwa omu kutahikiirira, twaija omu nsi, nitugamba ebishuba. N'ahabw'ekyo hakaba hatariho n'omwe ahariitwe owaabaire ashemereire, nari, bakaba batarikubaasa kubona omuntu weena omu nsi owaabaire ashemereire.
Kandi ekibi tikiratandikiire omu nsi. Ekibi kikatandikira omu Iguru. Lusafeeri aka... Lusafeeri, Sitaane, akaba ari ekihangirwe ekyakyeenirwe, ahabw'obugomi bwe, atakabaire n'okwija omu nsi. Ekibi kikatandikira omu Iguru, ahu Ruhanga yaateire Baamaraika, n'ebindi, aha musingye gumwe ogu Yaateireho abantu; okumanya, omuti gw'okumanya, omuti gw'Amagara n'omuti gw'okumanya, ahu omuntu yaabaire naabaasa kwetooraniramu. Kandi Lusafeeri ku yaahairwe obushoboorozi bw'okubanza, kutoorana, akenda ekintu kirungi ekirikukira ahari ekyo eki Ruhanga yaabaire aine. Ekyo kikatandikaho omurabanamu.
Kandi hakaba hariho ekirikuragiirwa ahabw'ekibi. Ekirikuragiirwa kikaba kiri okufa. Okufa nikyo kyabaire kiri ekiheneso. Kandi, ekyo n'okugira ngu, eki nitubaasa kukitaahamu tukishoboorore munonga, ahabw'okuba niinyikiriza ngu hariho okufa kumwe. Hariho Amagara gamwe. Niinyikiriza ngu omuntu oine Amagara Agatahwaho takaabaasa kufa na kakye. Niinyikiriza ngu hariho okucwekyererezibwa kimwe kw'ogwo mwoyo ogukora ekibi, ahakuba Baiburi neegira eti, “Omwoyo ogukora ekibi, buzima guryafa.” Ti muntu; “omwoyo ogukora ekibi.” N'ahabw'ekyo, Sitaane buzima naateekwa kufa, acwekyerezibwe ahwereho kimwe. Ka nimpakanisa abantu b'enyikiriza erikugira ngu abantu boona baryajunwa abarikugira ngu Sitaane aryajunwa! Akashiisha, kandi niweb ukomooko bw'ekibi. Kandi omwoyo gwe gukashiisha; kandi akaba ari omwoyo. Ogwo mwoyo guryahweraho kimwe, tihariho akantu kaagwo koona akaritsigaraho.
Kandi ekibi ku kyahikire omu nsi, enyima omu kutandika, nk'esuuka erikwiragura neeshuuma kuruga omu iguru, buzima kikashanyaraza ensi. Kikata buri kihangirwe, omu nsi, n'ebihangirwe byona bya Ruhanga, omu buhuuku. Omuntu akaba omuhuuku w'okufa, oburwaire, emirabanamu, enaku. Eby'obuhangwa byona bikagwa nakyo. Ekibi kikaba kiri omubazi gw'okushanyaraza buzima ogwashanyareize ensi. Reero twateebwa hanu, tutaine matsiko, 'habw'okuba buri kihangirwe aha nsi kikaba nikikyorobera. Kandi na buri omwe owaazairwe omu nsi akaba naakyorobera.
N'ahabw'ekyo, kikeetaagisa kwija kuruga omu Mwanya ogwabaire gutarimu kibi. Kikaba kitarikubaasa kuruga omu nsi. Omuntu omwe omuriitwe akaba atarikubaasa kucungura ondi. Kikaba nikiteekwa kuruga aha Ndiijo. N'ahabw'ekyo, omuntu ku yaamanyire ngu akaba ataanisiibwe na Ruhanga we, yaahinduka omuzengyerezi. Bakarira. Baataka. Baafa kubi. Baazengyerera, nibaraba omu nshozi n'omu mahamba, nibasherura Orurembo oru Ruhanga yaagyezire kandi akarwombeka. Ahakuba, akamanya ngu ku yaakugaruka omu Kubaho kwa Ruhanga, akaabaasa kubigambaho Nawe. Kwonka hakaba hatariho oburyo bwona bw'okugarukayo. Akaba abuzire. Akaba atarikumanya omuhanda ogu araatoore, n'ahabw'ekyo akafa kugyenda, naazengyerera, naagyezaho kusherura ahantu ahu yaakubaasa kubona omuhanda gw'okugaruka omuri ogwo Mwanya. Ekintu omunda ye kikamugambira ngu akaruga o-omu Mwanya ogwabaire guhikiriire.
Tihariho omuntu n'omwe hanu omuri aba bantu abarikureebwa abateeraniire aha, akasheeshe aka, nari omu bahurikiize orutambi rw'amaraka, ahi rurikuhika hoona omu nsi, tihariho n'omwe hanu, nari ahandi hoona, otarikusherura okwo kuhikiirira. Nooshashura amabanja gaawe, oteekateeka oti, “Ekyo nikimara.” Waaheza kushashura amabanja gaawe, bwanyima habeho owaarwara omu b'eka yaawe. Oburwaire ku burikukira, oshanga oine agandi mabanja g'okushashura. Eky'okubanza noomanya, eishokye ryawe ritandika kuba enju, reero oyenda ngu ogarukye obe muto. Kandi hariho ekintu obwire bwona, obutoosha, kandi ahabw'ekyo kingonzi ky'ekibi. Kwonka omu mutima gwawe, ahabw'okushangwa ngu noosherura ekyo, nikyoreka ngu hariho Okuhikiirira ahantu nanka. Ahantu nanka, hariho ekintu.
-----Aha muheru, ekiro kimwe, ekyo n'ekyo kiro ahari Gologosa, hakabaho Ogwo owaashuumire kuruga omu Kitiinisa. Ogwo, orikwetwa Yesu Kristo, Omwana wa Ruhanga, Owaarugire omu Kitiinisa, reero Gologosa yaateebwaho. Ekyo nikyo kiro obu omuhendo gwashashurwa, kandi n'ekibuuzo ky'ekibi kyahwa ebiro byona. Kandi kyaiguraho omuhanda gw'eki kintu eki turikugirira enjara n'eiriho. Kikataho omwanya gw'okumarwa. Tihariho muntu n'omwe orataayaayiire Gologosa, kandi akareeba oku kyabaire, orikubaasa kuguma nk'oku yaabaire ari. Buri kintu eki areetengire nari akagirira orushusho, nikiboneka, ku arikuhika omuri ogwo mwanya. Kikaba kiri ekiro kikuru munonga, kandi ekintu kikuru munonga, okuhitsya obu kyatengyeitse ensi. Kikatengyetsa ensi, nk'oku yaabaire etakatengyetsibwagaho.
Yesu ku yaafeereire Gologosa kandi akashashurira ekibuuzo ky'ekibi, egi nsi y'ekibi ekashwekwa omwirima. Eizooba rikaraara omu ihangwe, ryahwa amaani. Enkiri zaatengyeta, enshozi zaayatagurika, n'emitumbi y'abaafiire yaazooka kuruga omu bituuro. Kikakora ki? Ruhanga akakigyenderera, ahari Gologosa. Akahutaaza egyo nyamaishwa, erikwetwa Sitaane, ebiro byona. Hati akakara munonga okwiha obwo, ahabw'okuba kikareeta Omushana omu ruganda rw'abantu. Kandi omuntu weena naamanya ngu enyamaishwa ehutaaziibwe niyo ekazire munonga okukirayo, erikwekuruza aho n'omugongo gwayo guhendekire. Hati, Sitaane akateerwa yaagwa ahansi, ahari Gologosa. Ensi ekakihamya ngu okwo nikwo kyabaire. Omuhendo gw'ahaiguru ogurikukirayo ogurashashwirwe, kandi Ogwo wenka owaabaire naabaasa kugushashura, akaija yaakikora ahari Gologosa. Aho niho omuhendo gw'amaani gwashashuriirwe. Ekyo ni kimwe aba bintu ebyo.
Ruhanga akaba naakyenda. Tihariho muntu owaabaire ashemereire. Tihariho muntu owaabaire naabaasa. Tihariho muntu owaakubaasize kukikora. Reero Ruhanga yaija, We wenka, yaaba omuntu, yaatuura amagara g'abantu, aine ebyetengo by'abantu, kandi yaabambwa ahari Gologosa. Kandi aho ku... Sitaane akateekateeka ngu akaba atarikubaasa kukikora, ngu Akaba atarikubaasa kukirabamu. Akasingura omuri Gesesemaani kandi na buri kigyezo eki omuntu weena arabugaine. Akakirabamu nk'abantu boona, kwonka Yaashashura omuhendo. Kandi ekyo nikyo kyareeteire ensi kushwekwa omwirima. Kikaba kiri nk'omubazi ogurikugwejegyeza, ahabw'okushemeza. Dokita ku aha omuntu omubazi gw'okumugwejegyeza, naabanza yaamukabisa, atakamushemeize. Kandi Ruhanga ku ya-yaashemeize Ekanisa, ensi ekaheebwa omubazi ogurikugwejegyeza, eby'obuhangwa byatengyetsibwa munonga. Tiky'okutangaaza! Ruhanga, omu mubiri gw'obuntu, akaba naafa. Bukaba buri obwire obu ensi yaabaire etwire etegyereize, kwonka baingi omuribo tibarakimanyire. Nk'oku kiri n'eriizooba, baingi basherwire ebintu ebi, kwonka kandi tibarikubyetegyereza. Tibarikumanya ah'okuhungira. Na hati nibakigyezaho kusherura eby'okweshemeza n'ebintu by'ensi, nibagyezaho kusherura obuhungiro.
Hakaba hariho, haabaireho ebyapa bingi by'endagiiriro ebirikworeka ekyo kiro, ebirikushushanisa bikuru bingi. Kikaba kyorekirwe omu mwana gw'entaama, omu nimi, omu kaiba, kandi n'ebintu ebi byona, kwonka nabwo tibirabaasize kukiihaho. Tibirabaasize kucwa ekyo kigo kya rufu, ahu Sitaane yaabaire naategyeka ensi. Ezo nkiri zonyini ezi yaabaire atamburiraho, naashuuma naanyegyera omu nsi, nizaaka n'obuganga bw'ekibiriiti! Lusafeeri akaba ari omwana w'obusheeshe, kandi akatambura omu nsi obu yaabaire erikwotsya n'omuriro ogurikubaruka niguruga okuzimu omu itaka. Ezo nkiri ezaabaire zihozire, Yesu ku yaafiire ahari Gologosa, zikajumbukayo zaaruga omu itaka. Omuhendo ogwashashwirwe, kandi n'obuhuuku bwa Sitaane bukahendeka.
Ruhanga akagarura omu ngaro z'omuntu, omuhanda gw'okugaruka aha ki yaabaire naasherura. Akaba atakiine kurira bundi. Akateera, ku Yaahenzire oruti rw'omugongo rwa Sitaane, aho ahari Gologosa, oruti rw'omugongo rw'ekibi, n'orw'endwara! N'ahabw'ekyo nikireetera buri muntu ofa, aha nsi, kugaruka omu Kubaho kwa Ruhanga, asaasiirwe ebibi. Haleluya! Ebibi byaitu bisaasiirwe. Sitaane tarikubaasa kugaruka kututa omu mwirima akatwiha ahari Ruhanga. Hariho omuhanda rugyendwa ogutairweho. Hariho n'esimu aho. Hariho esimu erikuhika omu Kitiinisa, kireetera buri muntu kuba haihi n'esimu egyo. Omuntu ku araabe aijwire ekibi, neemuhikanisa n'ahakuru. Naabaasa kusaasirwa ekyo kibi. T'ekyo kyonka, kureka ekibi ekyo kikashashurirwa. Oo! Tikirikukwetaagisa kugira oti, “Tinshemereire.” Buzima, toshemereire, okaba otarikubaasa kuba oshemereire na kakye. Kwonka Ogwo oshemereire akaza omu mwanya gwawe. Orekwirwe. Tikirikukwetaagisa kuzengyerera bundi. Tikirikukwetaagisa kuba omuntu orikusherura eby'okweshemeza hanu omu nsi.
Ahakuba hariho enshuro eijwire Eshagama,
Erikuruga omu mitsi ya Emanueli,
Abasiisi ku beejabika omuri ogwo mwegyemure,
Baihwaho ebibi byabo byona.Toshemereire kubura. Hariho omuhanda rugyendwa, kandi n'Omuhanda, kandi nigwetwa Omuhanda ogurikwera. Otashemeire tarikugurabamu. Ahakuba, naaraba omu nshuro, okubanza, reero ataaha omu muhanda rugyendwa.
Akahenda amaani ga Sitaane. Yaigura enyigi z'ekihome ky'okuzimu, ahari buri muntu owaabaire akomeirwemu, omu nsi egi, omu bihome, naatiina ngu ku arifa, oku rufu eriba ahariwe. Ahari Gologosa, Akaigura ezo nyigi z'ekihome, yaarekura buri mbohe yaagyenda n'obusingye. Toshemereire kugaruka kubandikwa ekibi. Toshemereire kugaruka kuhayo engingo zaawe kushiisha, kunywa amaarwa, kureetsa, kuteera zaara, kugamba ebishuba. Noobaasa kuba ow'amazima, ohikiriire, kandi ogororokire. Kandi Sitaane tihaine eki yaakukikorera, ahabw'okuba okwatsire omurunga, omurunga gw'Amagara oguhamiire omuri Rukiri owa Iranaira. Tihariho ekintu kyona ekirikubaasa kukutengyetsa Kikagakwihaho. Tihariho miyaga yoona erikubaasa kukutengyetsa Ekagakwihaho. Tihariho ekintu kyona, nangwa n'obu yaakuba rufu yo yonka, terikubaasa kututaanisa n'okukunda kwa Ruhanga okuri omuri Kristo Yesu.
Ekyo nikyo Gologosa yaabaire neemanyisa. Abantu abaabaire bari omu buhuuku bakarekurwa. Abantu abaabaire nibatiina okufa tibarikubaasa kugaruka kutiina okufa. Omuntu oiniire orushusho Orurembo, oru Ruhanga yaagyezire kandi akarwombeka, naabaasa kuteera entambo aze omu muhanda rugyendwa, kandi amaisho ge agahangye Eiguru, ahabw'okuba arekwirwe. Haleluya! Acungwirwe. Tarikwetenga kugaruka kuzengyerera, ahakuba hariho oburyo bw'okumanya yaaba ohikire nari otahikire. Ruhanga naatuha Amagara. Ebibi byaitu tibyakiriho. Ekyo kiro ahari Gologosa kikashashura omuhendo.
-----Eky'okubanza, tushemereire kusherura tumanye amakuru g'ekyo kiro. Ekya kabiri, tushemereire kureeba eki ekyo kiro kyatukoreire, hati, eki kyatukoreire. Hati, ekya kashatu, tureebe eki tushemereire kukorera ekyo kiro. Tushemereire kukora ki? Eky'okubanza, tushemereire kukishwijuma, ahakuba n'ekiro kikuru, kikuru munonga okukira ebindi biro byona. Omuhendo gw'ekibi gukashashurwa. Amaani ga Sitaane gakahendwa. Kandi hati nitwenda kureeba eki tushemereire kukora omu buryo bw'okusiima, hati, omu buryo bw'okusiima. Yesu ku yaafiire aha Musharaba, ahari Gologosa ekiro ekyo, Tarashashwire muhendo gw'ebibi byaitu kwonka, kureka Akashashura n'omuhendo kandi yaataho omuhanda kugira ngu tubaase Kumukuratira; ahakuba itwe, nka ba Adamu abaagwire kwonka abaherize kucungurwa. Nk'oku Omwoyo yaayebembeire Adamu (Adamu w'okubanza) ahabw'Omwoyo, owaabaire naategyeka eby'obuhangwa byona, n'ahabw'ekyo itwe (Adamu wa kabiri), nari abantu b'ensi Kristo akatucungura, okwiha aha kiro kya Gologosa, nitubaasa Kumukuratira.
Read the full account in...
Ekyo kiro ahari Gologosa.
Obushwere n’Okushenda.
