Mvulatswinga ya Zwifhinga zwa Tshifhidzo.
Zwifhinga zwa tshivhidzo ya Asia.
William Branham.Vhalani mulaedza...
Tshifhinga tsha Tshivhidzo tsha Efeso.Uri ni kone u pfesesa mulaedza wa Zwifhinga zwa Tshivhidzo ndi tama uri ndi ṱalutshedze milayo yo fhambanaho ye ya ntendela uri ndi swike kha madzina a vhaḓinḓa, vhulapfu ha zwifhinga, na zwiṅwe zwiitisi zwe zwa katelwa ngomu henefho.
Vhunga sa izwo ngudo yo vha yo tea u vha tshikumedzwa tshoṱhe tshe nda vhuya nda dzhena khatsho u swika tshifhinga tshino, ndo ṱoḓa tshifhaṱuwo tsha Mudzimu lwa maḓuvha manzhi ndi tshi nyaga nḓodzo ya Muya Mukhethwa. Ndo vha ndo sokou vhala maṅwalo nga ha Zwifhinga zwa Tshivhidzo nda dzhena kha ḓivhazwakale dza tshivhidzo dzo ṅwalwaho nga vhaḓivhivhazwakale vha sa dzhii sia vhane nda nga kona u vha wana. Mudzimu ho ngo vhuya a litsha u fhindula thabelo dzanga, afho ndi tshi vhala Ipfi na ḓivhazwakale, ndo zwi kona nga Muya Mukhethwa u vhona mudzedze u tshi randula vhukati ha makhulu na makhulu a miṅwaha u swika kha tshino tshifhinga, na musi uno wa vhufhelo.
Khoṋo ye nda fhiwa nga Mudzimu ye nga yo nda kona u topola muḓinḓa wa tshifhinga tshikene yo dzhenelana kokotolo na maṅwalo. Nahone i nga tou pfi ndi ngilimane ya Bivhili. Ndi nzumbululo ya uri Mudzimu ha shanduki, na uri dzinḓila dzawe a dzi shanduki vhunga sa izwo na ene a sa shanduki. Kha Vhaheberu 13:8, i ri:
“Yesu Khristo ndi ene mulovha, ṋamusi, na lini na lini.”
Muhuweleli 3:14-15,
“Ndi a ḓivha uri, tshini na tshifhio tshine Mudzimu a ita, tshi ḓo vha hone lini na lini: a hu na tshine tsha nga itwa khatsho, kana tshithu tshine tsha nga ṱuswa khatsho: nahone Mudzimu u a zwi ita, uri vhathu vha tetemele phanḓa Hawe.
Zwire hone ndi zwa kale zwine zwa ḓo vha hone na zwone ndi zwa kale; Mudzimu u vhuyisa zwe zwa vha zwo fhira.”Imani ndi ni vhudze: Mudzimu a sa shandukiho a re na nḓila dzi sa shandukiho. Zwe a i ta u THOMANI u ḓo hana a tshi zwi ita u swika a tshi dovha u zwi ita MUGUMONI wa tshifhinga. A hu nga vhi na tshanduko. Zwi shumiseni na kha Zwifhinga zwa Tshivhidzo. Mufuda wa muthu ane Mudzimu a mu khetha tshifhingani tsha u thoma, na uri Mudzimu u a ḓivhonadza kha vhushumeli ha muthu onoyo, ha vha tsumbo kha huṅwe vhushumeli hoṱhe. Zwe Mudzimu a ita kha tshifhinga tsha tshivhidzo tsha u thoma ndi zwine a ṱoḓa u ita kha zwiṅwe zwifhinga zwoṱhe.
Zwino ri a zwi ḓivha kokotolo u bva kha Ipfi, zwe zwa ṅwalwa nga Muya Mukhethwa, uri tsha u thoma, kana tshivhidzo tsha mathomo tsho vha tsho sendekwa uri Mudzimu o ḓivhonadza khatsho. Ipfi a ḽi nga shanduki kana u shandukiswa ngauri Ipfi ndi Mudzimu. Yohane 1:1,
“U rangani Ipfi o vha e hone, Ipfi o vha e ha Mudzimu, nahone Ipfi o vha e Mudzimu.”
U shandukisa ipfi ḽithihi, sa zwe Efa a ita, zwi ḓisa tshivhi na lufu, sa zwine ḽa amba kha Nzumbululo 22:18-19,
“...Arali muthu a engedza kha aya mafhungo, Mudzimu u ḓo inga maṱungu e a ṅwalwa kha iyi bugu khae:
Huno arali muthu a ntsha u bva kha maipfi a re bugu iyi ya tshiphorofita, Mudzimu u ḓo muntshavho u bva kha Bugu ya Vhutshilo, na kha muḓi mukhethwa, na kha zwithu zwo ṅwalwaho kha iyi bugu.”Ngauralo, zwe tshivhidzo tsha vha tshi zwone Phenthekhoste ndi wone muelo. Ndi yone nḓila; A hu tshe na iṅw e nḓila. Novha Vhoranḓivho vha ri mini, Mudzimu ha ATHU shandula nḓila yeneyo. Zwe Mudzimu a ita Phenthekhoste u tea u hana a tshi zwi ita u swika zwifhinga zwa tshivhidzo zwo guma.
Naho vhoranḓivho vha tshi nga ni vhudza uri tshifhinga tsha vhuphenthekhostala tsho fhela, ni songo zwi tenda. Fhungo iḽo ḽo khakhea fhethu huvhili. Ha u thoma, a si zwone u humbula uri a hu tshe na vhaaphostola, nga vhanga ḽa uri vha mathomo vho fa. Muaphostola zwi amba “Uyo we a ruṅwa”; nahone hu na vhanzhi vhe vha ruṅwa ṋamusi, fhedzi vha vhidzwa u pfi vhafunziruṅwa. Tenda vhanna vha tshi khou vhidzwa vha tshi ruṅwa vha tshi bva na Ipfi ḽa Vhutshilo hu na tshifhinga tsha Vhaaphostola tshine tsha khou endelela. Tsha vhuvhili, vha amba vhu nga tshifhinga tsha “mbonalo ya maanḓa a Muya Mukhethwa” tsho fhela vhunga Bivhili yo fhedziswa. Iyo a si ngoho. A hu na na ḽiṅwalo na ḽithihi ḽi dzinginya zwenezwo, fhedzi vhanzhi vha zwi phetha nga u amba zwi si zwone. Vhuṱanzi hashu ha u ri a si zwone ngovhu ha uri zwoṱhe maambiwa aya ndi a mazwifhi.
Mishumo 2:38-39,
“Petro a amba navho a ri, Rembuluwani, ni lovhedzwe noṱhe Dzinani ḽa Khristo Yesu u itela u kupulwa ha zwivhi, ndi hone ni tshi ḓo wana tshifhiwa tsha Muya Mukhethwa.
Izwi zwo ambelwa vhoinwi, na vhana vhaṋu, na vhoṱhe vha re kula, vhanzhi vhane Murena Mudzimu washu a ḓo vha vhidza.”Phuluphedziso ya maanḓa e vha aphostola vha vha vho ḓadzwa ngao Phenthekhoste ndi a “vhoinwi (vhayuda) na vhana vhaṋu (Vhayuda), na vhoṱhe vha re kule (Vhannḓa), na vhanzhi vhane Murena washu Mudzimu a ḓo vha vhidza (vhoṱhe vha nnḓa na vhayuda).” U swika a tshi guma u vhidza, mulaedza wa Phenthekhoste na maanḓa a ZWI NGA IMI.
Zwe tshivhidzo tsha vha tshi nazwo Phenthekhoste ndi pfanelo yatsho ine tshi si nga si i dzhielwe. Mathomoni, tsho vha tshi na Ipfi ḽa Mudzimu ḽo kunaho. Maanḓa a Muya Mukhethwa o vhonadzwa nga kha zwiga na maḓembe o fhambanaho na mpho dza Muya Mukhethwa.
Vhaheberu 2:1-4,
“Ndi zwoneha tshashu nga hu vhe u simesa u sedza e ra a pfa, uri ri zwi sa ḓo ri suvha zwa bvuḓa nga minweni.
Ngauri arali fhungo ḽe ḽa ambiwa nga vharuṅwa ḽo khwaṱha, u pfuka hoṱhe na u sap fa hoṱhe ha lifhedzwa nga ho zwi eḓanaho.
Riṋe ri ḓo ponyoka hani arali ro nyadza u tshidzwa uhu hungafha? Uhu he ha thoma u buliwa nga Murena, ha kona u ḓala kha vho riṋe nga vhe vha pfa Ene;
U tshidzwa uhu Mudzimu o hu ṱanzielela nga zwiga na nga maḓembe nga maanḓa a mbeu nnzhi, na nga mikovhe minzhi ya Muya ye a vha kovhela nga he A funa.”Tshivhidzo tsha u thoma a tsho ngo dzanganywa nga muthu. Tsho vha tshi tshi rangwa phanḓa nga Muya Mukhethwa. Tsho vha tshi si tshihulu uya ngafhi lini. Tsho nyadzwa tsha nyalwa. Tsho tsikeledzwa. Tsho shengedzwa u swika lufuni. Fhedzi tsho vha tshi fulufhedzea kha Mudzimu. Tsho dzula na Ipfi ḽa Tshivhumbeo tsha mathomo.
Zwino ni songo tenda u xedzwa. Afho ndi tshi ri Mudzimu na nḓila dzawe ha shanduki, a tho ngo ri tshivhidzo na vhaḓinḓa vhatsho a vha shanduki. Tshivhidzo a tshi Mudzimu. Ngauralo tshi a kona u Shanduka. Fhedzi tshe nda amba ndi uri nga ṅwambo wa Mudzimu a sa shandukiho na nḓila dzi sa shandukiho ri nga kha ḓi humela murahu ra vhona tshiito tshau thoma na tsho khunyelelaho tsha Mudzimu ra ko nou haṱula nga muelo wonoyo. Zwi itwa nga u tou ralo.Tshivhidzo vhukuma tshi ḓo lingedza u vha sa tshivhidzo tsha mathomo tsha Phenthekhoste. Tshivhidzo vhukuma tsha ṋamusi tshi ḓo lingedza u ḓivhambedza na tsha u thoma. Na vhaḓinḓa vha zwivhidzo, vha na Muya muthihi wa Mudzimu ngomu havho, vha ḓo lingedza u ḓivhambedza na Muaphostola Paulo. A vha nga tou fana kokotolo nae fhedzi vhaḓinḓa vhukuma ndi vhone vhane vha ḓo vha tsinisa na Paulo, we a vha o vhofholowa na vhathu vhoṱhe, o ḓikumedza tshoṱhe kha Mudzimu, a ṋekedza vhathu Ipfi ḽa Mudzimu fhedzi, a vhonadza Muya Mukhethwa maanḓani awo. Haho muṅwe we a ita zwi ngaho zwenezwo. Ni tea u edzisela zwa mathomo. Sa kha mabebo, Tshivhidzo vhukuma ndi tshone tshine tsha ḓo lingedza u tevhela vhuṱala ha vhatumbuli vhatsho nga Phenthekhoste na vhaḓinḓa vhatsho vha ḓo tevhela muaphostola Paulo, muḓinḓa wa u thoma kha tshifhinga tsha tshivhidzo tsha u thoma. Zwo tou leluwa nga u tou ralo, na u vha zwa vhuḓisa.
Na iyi khoṋo - yo leluwesa, ngeno i ya vhuḓisa - ndo zwi kona, nga thuso ya Muya Mukhethwa, u vhala Bugu ya Nzumbululo na dziḓivhazwakale nda wanulusa kha tshifhinga tshithihi nga tshithihi, muḓinḓa muthihi nga muthihi, vhulapfu ha tshifhinga nga tshithihi, na tshipiḓa tshithihi tshazwo tsha tamba kha ndivho ya Mudzimu u bva Phenthekhoste u swika vhufheloni ha izwo zwifhinga.
Vhunga sa izwi ni tshi vho pfesesa uri ri haṱula hani zwe Tshivhidzo Vhukuma tsho vha tshi zwone (zwe tsha vha tshi zwone Phenthekhoste na zwe tsha vha tshi zwone nga tshifhinga tsha vhaaphostola sa zwe zwa vhiswa zwone ngomu ha Ipfi kha Bugu ya Mishumo), ri nga shumisa mulayo honoyo muthihi uri rikone u vhona uri tshivhidzo tsho kundelwa hanihani. Vhukhakhi ha mathomo, he ha ṋangavhedzela ngomu tshivhidzoni ha dzumbululwa kha Bugu ya Mishumo na Nzumbululo, na kha Maṅwalo, zwi ḓo ṋaṋa u vhonadzwa kha u tevhekana ha zwivhifhinga, u vhuya u swika ri tshi ḓa kha u fheliswa ha ngoho tshoṱhe kha tsha mafhelo, kana Tshifhinga tsha Laodikea.
Zwino henefha kha khoṋo ye ra ṱanganedza u bva kha Murena, hu ḓa iṅwe ine ngoho yayo i takadza zwiṱuku. Ndo ri Tshivhidzo Vhukuma tshi ḓo dzulela u ṱoḓou nga sa zwe tsha vha tshi zwone kha Bugu ya Mishumo. Iyo ndi ngoho vhukuma. Fhedzi ro wana uri Ipfi ḽi funza nga ha u dzhenelwa nga vhukhakhi u swika vhufheloni ha ngoho tshoṱhe maḓuvhani a vhufhelo afho Murena a tshi vho ṱoḓou vhonala. Zwino hu tutuwa mbudziso mihumbuloni yashu; Naa Mudzimu u a ṱutshela Vhawe na u litsha vha tshi wela tshiimoni tsha u fhurwa tshoṱhe? A zwi athu no ngo vhuya zwa itea, ngauri maṅwalo a zwi vhea khagala Mateo 24:24 uri “Vhanangiwa” A VHA NGA fhurwi.
“Hu ḓo vuwa Vhokhristo vha u zwifha, na vhaphorofita vha u zwifha, vha sumbedza zwiga zwihulu na maḓembe; lune NGAVHE ZWO VHA ZWI TSHI KONADZEA, vho vha vha tshi ḓo fhura vhanangiwa.”
Miniha? Phindulo i khagala phanḓa hashu. Hu na tshivhidzo tsha vhukuma na tshivhidzo tsha mazwifhi. Hu na Muṱokola vhukuma na Muṱokola wa mazwifhi. Fhedzi zwi a pfala uri hetshiḽa tshivhidzo tsha mazwifhi (vhathu vha muṱokola wa mazwifhi), tshidzulela u ṱoḓou dzhia vhudzulo ha tshivhidzo tsha vhukuma na u lwisa uri tshone, hu si Vhanangiwa, ndi vhone vha vhukuma na vho themendelwaho. Tsha mazwifhi tshi lingedza u ṱoḓou vhulaha tsha vhukuma. Zwo vha zwo tou ralo kha Bugu ya Mishumo, zwo tou vhewa nga u ralo kha zwifhinga zwa sumbe, nahone zwo ḓivhadzwa nga u ralo kha Maṅwalo. Zwo dzula zwo tou ralo. Zwi ḓo ḓi dzula zwo ralo. Zwi nga si shanduke.
----
Izwi zwifhinga zwa tshivhidzo zwine zwa wanala Asia Minor zwo vha zwi na zwiṅwe zwiṱalului ngomu hazwo, nga tshifhinga tshenetsho tsha kale, we wa ha muthselo wo lundaho wa zwifhinga zwa nga matshelo. Dze dza vha dzi tshi sokou vha mbeu dze dza zwalwa murahu ngei dzo ḓo bvelela nga vhuya khaṋoni yo no vhibvaho, sa zwe Yesu a ri: “Zwino arali vha tshi rali kha muri mutete, muri wo omaho vha ḓo u ita zwi ngafhani?” Luka 23:31.Vhalani mulaedza...
Tshifhinga tsha Tshivhidzo tsha Efeso.
