Nugeikinet Aturio nuka Ekanisa.
Ikanisan lu ikanykaarei Asia.
William Branham.Asiomio eitabo...
Atur naka Ekanisa loka Epeso.Tetere jo imisiikini kaileleba aisiiraret naka Aturio nuka Ekanisa, akoto ber eong aitetem ngun nuibusakinit atupit nuda apotu kesipedosi eong adolore toma okiroria luka ikiyakia, ka aojau naka aturio, ka nukabeit da ace nuejaas toma nen.
Kwape abeitor aisisia na araun naposik kakere kotoma kanu lem etoritor eong aitodol apak na, abu do eong kamo Edeke adaun apaarasia nuipu kanuka aisinyikokinio naka Emoyo Lokalaunan. Kanen bon nges do abu eong kasiomia Nuiwadikatai Obaibuli nu da ikamunitos Aturio nuka Ekanisa kasodi da aidulokin aisiom akiro nukolosek eswamas kOkanisa nuiwadikatos ikajenak akiro nukolosek lu kere abu eong kapedo adumun, lu da mam agongakina emodiowai. Mam abu kokurwok Edeke abongokin ailip ka, naarai nape asiomia Akirot nepepe kakirosinei da nukolosek eswamas, abu Emoyo Lokalaunan kesipedo eong aanyun engaara epitene loitorit toma okar akwat nuipu ido aitodol toma apaaran napena nakawasia.
Elacet loabu Ejakait kejaik eong lo da abu eong kapedoria asekununaa ekiyakia kanuka nginitur erai lopejai toma Kanuiwadikatai Obaibuli. Kotoma abeit epedorio ti anyara nges Engaet loka Ebaibuli. Nges apukokinio na ebe mam Edeke ijulanakin, ido ebe Irotinike da eraasi lumam ijulanakinos kwape Kangesi. Kotoma Iburanian 13:8 ebala,
“Erai Yesu Kristo ngopengol bian ka lolo, ido kiton ikar kere.”
Ekalimonokinan 3:14-15,
“Ajeni eong ebe nginibore kere yeniswamai Edeke ejaenena ikar kere: emamei ibore kere yenepedori aiyatakinio, karaida aingongaario: ido eswama Edeke ngun, tetere eyongete itunga nges.
Nuejaas kwana kejaas apengo; ngun da nuekotosi ajakut apotu kojaas sek: emoot Edeke bobo nukolo ketuboros.”Erai nges nata: Edeke lomam ijulanakin ka irotin da lumam ijulanakinos. Ngin nabu Ngesi kiswama KANASODIT ejai do Nges aiyatakinit aiswamaenen aitodol naiswamaere irwan NAKAWASIA. Mam nepecep da aijulakinet ebuni ajaun. Kibwaik ngin toma Aturio nuka Ekanisa. Eipone ketunganan kaloabu Edeke koseu kanuka atur nasodit, keipone da loabu Edeke kitodiaror kotoma aijaanakin naka etunganan kangol, eraun aanyunet kanuka aturio nuce da kere. Nuabu Edeke kiswama kotoma atur nasodit naka ekanisa erai ngipengin nges naekoto Ngesi aiswamaenen kotoma aturio nuce da kere.
Nat kwana kijeni oni kaitebeikin kotoma Akirot naiwadikat Emoyo Lokalaunan eipone loageunere ekanisa losodit, araibonat logeet, ka eipone da loabu Edeke kitodianaror Elopet kotomakec. Mam Akirot epedori aijulakin araibo nat aijulakinio naarai erai Akirot Edeke. Yokana 1:1,
“Kageunet ajai Akirot, ajai Akirot mama ejai Edeke, korai Akirot Edeke.”
Aijulakin akirot adiopet naka ngin kwape abu Keba kiswama, eyangauni adiakar ka atwanare, kwape cut ebalar kotoma Apukokinio 22:18-19,
“Etejenikini nginitunganan yenepupuni akiro nuka adwarasit naka eitabo kalo ebe: Arai kiyataki itungana kotomakec, iyatakini Edeke tomakeng aiticaneta nuiwadikatai toma oitabo lo, bobo da arai elemari itunganan kotoma akiro nuka eitabo loka adwarasit kana, elemari Edeke akorakineteke kokitoi loka aijar, kore da lokalaunan, nuiwadikatai toma oitabo lo.”
Kwangin, ejautene loka ekanisa koPentekosit ngol nges adoketait. Ngin nges naanyunet. Emamei bobo epitene ece. Mam ace nuebalasi ikesisiak, MAM Edeke ijulakinit eiswamae ngol. Nuabu Edeke kiswama ko Pentekosit ejai Nges aiyatakinit aswam aitodol naegolokinotor aturio nuka ekanisa.
Karaida kepedorete ikesisiak alimokin ijo ebe atubor atur naka ikiyakia, siri jo kicam ngun. Alimunet naikoni nen erai naibiroro kowaitin iarei. Nasodit kakere, erai naibiroro aomit ebe emameete bobo ikiyakia ice, naarai bon ebe kwi lutomon kaluare lugeet atwakata. Ekiyakia apolouke ebe “loiyakiaritai”; ido ipu lolo luiyakiaritai konye enyaritai kes missionaries. Kwape erokore itunga enyaraununo ka aiyakianar kede kAkirot naka Aijar apolouke eroko atur naka ikiyakia iyatakinit. Nakiyareikinet, itejenaritosi kesi nuka atur naka 'agogong naka Emoyo Lokalaunan itodiaritai' kwape nadaun naarai angetakin Ebaibuli. Erai ngin nakaisab. Emamei karaida ediope ekokoro kotoma Obaibuli loitetemit kwangin, konye luipu itogogongitos ebe mam ikote nen. Na nges aitogogongetewok ebe aiwosaeta ngun kere nuarei mam eraasi nukabeit.
Aswamisio 2:38-39,
“Kotema Petero kes atiar, Kitoronikinos, Kibatisaunos, nginitunganan kayesi, kokiror loka Yesu Kristo, kanuka aisionio naka adiakanaretakus; kiinakinio ainakinet naka Emoyo Lokalaunan.
Naarai aisumunet erai kanukus ka ikusidwe da, ka itunga kere luelwaka, kere luenyarauni Ejakait Edekewok mamakeng.”Aisumunet naka apedor naaponi kobukokinai Ikiyakia koPentekosit erai kanukus (Iyudayan), ka ikusidwe (Iyudayan), ka itunga kereluelwaka (Imo), ka ngul kere luenyarauni Ejakait Edekewok amakeng (Iyudayan ka Imo)“. Aitodol Nges aitanang anyarit, iraret naka Pentekosit ka agogong MAM ebuni ADAUN.
Ngin nakejaatar ekanisa koPentekosit erai apedorike namam ikopar. Kageunet ajaatar nges ka Akirot naka Edeke na da naipiororoi. Kejaatar ngesi kagogong naka Emoyo itodiara kotoma aanyununeta nuegelegela ka nukaumokin nepepe ka ainakineta da nuka Emoyo Lokalaunan.
Iburanian 2:1-4,
“Kanukangun ibusakinit oni aiyatakin noi aibwaikin itauon ngun nukipupu, kenyeis aikaleleorio kamakec.
Naarai arai icasit akirot nakineras imalaikan tape eropio kadolit nginiibucaret ka nginiiulanut (mama ejai Akirot),
kikwaikini ai kikui oni arai kijali aitajario naetia nen? Abu Ejakait kogeu alimokin ngin, kosodete lukiirarete Nges apotu kitogogongoto mamawok,
Edeke da abu kitejen nepepe kakes kotoma aanyuneta ka nukaumokin, ka nukapedor nuka iponesio luegelegela, kotoma akorakineta da nuka Emoyo Lokalaunan, kwape ejaar akoteke elopet.”Ekanisa ngol logeunet mam kerai itunga kitemonokinete. Engarenikinit nges Emoyo Lokalaunan. Mam kerai lokepol noi. Kerai lokengarai kimuaritete da. Kerai lokeridakitai. Kerai lokereitai kiton atwanare. Konye kerai lokabeit mama ejai Edeke. Kebu kosalak toma oiswamae logeunet loka Akirot.
Aso kwana sir kitapaar kane. Neabalar eong ebe Edeke ka Irotinike mam cut ijulanakinos, mam eong abala ebe ekanisa ka ikiyakiake mam ijulanakinos. Mam ekanisa erai Edeke. Kanuka ngun epedori ngesi aijulakin. Konye nuabala eong kes nuta ebe, kanuka Edeke lomam ijulanakin ka irotinike da lumam ijulanakinos kipedori do oni angolikin eipone loajaar kotoma ageunet kasodete aanyun aswamisoit nasodit naka Edeke na da itekoro, kasodete konyet aisisiaun kotoma adoketait kangin. Ngol nges eipone loiswamaere. Ekanisa lokabeit ebuni duc aitam aputoor bala logeunet ko Pentekosit. Ekanisa loka lolo da lokabeit ebuni aitam ayapikinit ngol losek losodit. Ido ikiyakia mama ejaasi ikanisan, kwape ejaatar ka Emoyo ngopengol loka Edeke tomakec epote aitam ayapikin ekiyakia Paul. Mam bo kes epote asubit bala ngesi cut; konye ikiyakia lukabeit eraunos kesi ngul loepote ayapikinit Paul, loamamei emodio tunganan lokeyait nges, kogwelara cut neajai Edeke, kosodi aijaikin Akirot naka Edeke bon, kitodiarite da Emoyo Lokalaunan kotoma agogong. Amamei ece lo ti kepedoo. Erai ijo aswam kama ejai nageunet. Kwape eurunia nginibore yen kaputoke, Ekanisa lokabeit nges duc ngol loetamit atupit kotoma okukut luka ikageunakake ko Pentekosit ido ikiyakiake etupete ekiyakia Paul, ekiyakia losodit neejai atur naka ekanisa nasodit. Erai naepatana kwangin, koumokina da kwangin.
Kede kelacet lo, loepatana konye ca koumokina, abu eong kapedo, kanuka aingarakinio naka Emoyo Lokalaunan, aisiom Eitabo loka Apukokinio ka akirosinei nueswamas kolosek kasodi adumun kotoma kanen nginitur, ngolikiyakia, aojau naka nginitur, ka atutubet nabu ngindiopet kiswama kotoma alosikinet naka Edeke ameun koPentekosit aitodol angetakinet naka aturio kangun.
Kwape do kwana idaunia jo amisiikin eipone lokitiakunia oni ejautene kEkanisa Lokabeit (nukerai ngesi ko Pentekosit ka nukerai ngesi katur kanaka ikiyakia kwape isideleleunitere kotoma Akirot naka Edeke kotoma Oitabo loka Aswamisio) kipedori do oni kwana aitwasam etube ngopengol aitodikinia oni eipone loabu ekanisa kibiroror. Apaar nakapolon, arai bo nat apaanareta, nuapotu kidadaunos toma okanisa losodit, nuda aponi kopukorai kotoma Oitabon luka Aswamisio ka loka Apukokinio; nepepe da kotoma Obaluwan, erai naebuni aiyatakinit atakanun itodiara noi bobo da noi kotoma kanginitur naetupakini aitodol nakidolunio oni toma aimudicario cut naka abeit kotoma atur nakawasia, arai bo nat, atur naka Laodikia.
Kwana kotoma olacet kalo losodit lokidumu oni kanejai Ejakait, elomuni do abeit ace namam da eumokina noi. Abu eong kalim ebe Ekanisa Lokabeit ebuni duc aitam aputoor kwape sek ajaar kotoma Oitabo loka Aswamisio. Erai ngin cut abeit. Konye kidau oni angicun ebe isisianakini da bobo Akirot alomun naka apaar aitodol naejaunor aimudicario cut naka abeit kotoma apak nakawasia napeyapiei Ejakait atakanun. Ebuni do kwana aingiset toma aomisiowok: ejali kereka Edeke lukeng kosodi aosikin kes aibirokin toma ojautene loka aitapaario cut? Mam nepecep da, naarai inera Ebaibuli kotoma Matayo 24:24 kwanata ebe 'luseuna' MAM EPEDORIO aitapaar.
“Naarai enyounete lukriston lukengalak, ka inabin lukengalak, itoduunete ngul aanyuneta nuepolok, ka nukaumokin da; tetere itapaarete luseuna ARAI EPEDOROS.”
Inyobo do? Idelelei abongokinet kakonyewok. Ejai Ekanisa Lokabeit ka ekanisa da lokaingal. Ejai Emusabibu Lokabeit ka emusabibu lokaingal da. Konye ca ekanisa ngol lokaingal, akuan naka emusabibu lokaingal, ebuni duc atamit ayangar aiboisit naka Ekanisa Lokabeit, kosodi aiketar ebe erai nges, kwabo mere Luseuna, kes eraasi lukabeit cut, ido da luibusakinit amunokin. Lukaingal epote aitam aiar Lukabeit. Ekote nen kotoma Oitabo loka Aswamisio, koipone kangol nges loitodiaritere kotoma aturio akanykaarei, ido ngol nges eipone loitejenaritere kotoma Obaluwan luegelegela. Eipone ngol nges lolem ejaar. Eipone ngol nges loejaar kwana. Eipone ngol nges loebunio ajaun. Mam ngin epedori aijulakin.
----
Ikanisan lu ikanykaarei luajaasi Asia Minor, kejaas ka ipitenin, kapakio kolo kangun, luapotu koraunos araito naetionit naka aturio nukokau. Lukeraas kokau kangina ikinyom luka iraan, apotu do ekaulo kotakanutu kotoma aisak etiokitos kwape da abalar Yesu, “Naarai arai kiswamaata nu kokitoi loepalal, ikonakinete bo do aikaloeonit?” Luka 23:31.Asiomio eitabo...
Atur naka Ekanisa loka Epeso.
Edukone ka Elakit.
