Ageunet ngina a nganyamet.
Anganyameta Angakanikaarei nguna Ekanisa.
William Branham.Tosiomete alo akirot...
Ekek ngolo a Ngiuni Anyamet Ngina a Epeso.Kotere imisiikini iyong ejok Eemut ngolo a ngaturio a ngikanisae acamit ayong akitacaun ngirotin ngulu alalak ngulu apotu ekengarakis ayong ariamun ngirorwa a ngikiakitono, aoyiau ngina kebu nginaturi yaik, ka ngace dang nguna erucokina ka ngun.
Ikwangina araakar akisiom ngakiro nu ibore ngini ationo noi ngini abu ayong ekatakinite noi akitodol tokona esaa lo, abu ayong ewarite Akuj alotooma ngarwa nguna alalak anguna ka akiengakino a ngina ke Ekuwam a ngolo Akuangan. Epite ngolo bon abunio ayong atopedoria ka atoloma dang tooma ngiemuto ngulu alalak ngulu ngorok a ekanisa ngulu abu ayong atoriamunite: ngulu egirito ngikegirak ngulu pa ariito lowae edio. Pa abu kipiyo Akuj abongokin akilip kang, anerai ngina asiomia ayong Akirot ka ngiemuto, abu Ekuwuam ngolo Akuangan eketepedo ayong akingolikin ngiboro ngul epite ngolo angaarotor alotooma ngamiae nguna a ngikaru akitodol naturi napei na.
Elacet ngolo abu Ekapolon akainaki ayong ngolo abu ekengarak ayong ayenun ekiakitono ngolo a nginaturi erai ngolo iriamara ka ngakigiret. Acepaki ebeit inges enyarao ebe, amoru ngina erai atoto ngina ke Ebaibul. Erai apukokino nata ebe emam nyiloconokin Akuj, ka ebe ngirotin keng dang emam nyiloconokin ikwanginapei nyiloconokinoe inges dang. Alotoma Ngiburanian 13:8 ebala ebe,
“Erai Yesu Kristo ngolopeigol, bien ka nakuwuarina ka ngikaru daadang.”
Ekalimonokinan 3:14-15,
“Ayeni ayong atemar nguna daadang itiyiae Akuj, erubarete ngikaru ka ngikaru; mam ibore iyiatakinio nen, kori ngini elemario a nen; etiyia Akuj ngun ikotere ngitunga daadang kitopoloorito Akuj.
Ibore daadang ngini eyiai, ayiai sek ekingaren, ibore daadang ngini eyiakaun ayiai sek ekingaren, itobongonokini Akuj ibore ngini sek keyiai toyiakaun nabo.”Ikes nugu ne: Akuj ngina nyiloconokin ka ngirotin keng dang ngulu nyiloconokinosi. Nguna abu inges kitiyia EKINGAREN ebeit inges aropar itiyae ngun akitodol ngina itiyiakinia ngun arwait ngina ka AKAU. Emam akilocokinet eyiakaun. Kisitiyia nait ngun asiomia nganyameta nguna a ekanisa. Ekabila a itunganan angini abu Akuj kisitiyia ananyamet a ngina esiaunan, ka epite ngolo etiyaa Akuj alotoma akijaanakin a etunganan angol. Nguna abu Akuj kitiyiate ananyamet a ngina esiaunan, ngunapei ngun ecamit inges etic alotoma nganyameta daadang.
Tokona ikiyeni iwon alotoma Akirot ngina abu Ekuwuam ngolo Akuangan kigirite epite ngolo esiakinor ekanisa ngolo esiaunan ka epite ngolo abunio Akuj kitodiaror alotoma keng. Nyiloconokin Akirot kori dang nyiloconokin anerai erai Akirot Akuj. Yokana 1:1,
“Anakisiaun ayiai Akirot, ayiai Akirot kaapei ka Akuj, Akirot arai Akuj.”
Akilocokin Akirot apei bon, ikwa ngina etiyiator Eva, eyiauni asecit ka atwanare, ikwapei ebakar alotoma Apukokino 22:18-19,
“...ani kiyiataki itunganan ngakiro ngace neni kec, iyiatakini Akuj dang inges ngakisicaneta nguna elimunitoi a lokitabo a lo:
Ani kelema itunganan ngakiro ngace a nakiro a nguna edwaritae a lokitabo a lo, elemari Akuj atyaket keng a lokitoe a ngolo ka akiyiar ka alotaun angolo akuagan ka aloboro angulu igiritai tooma lokitaabo.”Enguna, epite ngolo ayiakar ekanisa alo Pentekost inges erai akipimet. Engol epikica. Mam nabo ece pikica. Nyemitakinitae nguna ebasi ngikasiomitok, EMAM nyilocokino Akuj epikica ngol. Nguna abu Akuj kitiyia alo Pentekost eropari Inges itiyiae ngun akitodol ngina egolokinotor nganyameta angikanisai daadang.
Tar kikilimokis iyes ngikasiomitok ebe alunyar apaki ngina a ngikiakia, nyinupa ngun. Ediakara alimunet ngin alotoma ngirotin ngiarei. Ngina a ekingaren, erono atamakin ebe emam nabo nyeroko ngikiakia eyiakasi, ebe anguna adauniata ngulu esiaunak ngulu tomon-ka-ngiarei atwakare. Apolou ngina a ekiakia na ebe, ngolo “iyiakitae;” ido elalak tokona ngulu iyiakitae anakolongit ana, Nai enyaritae ikes Misionaris (kori ngikalimonokinak) keroko enyaritae ngitunga ka kiyiakianaretei ka Akirot ngina ka akiyiar inges atemar eroko anyamet ngina a ngikiakia elosi ngaren. Ngina a ngarei irworosi ikes nguna ka “Akidodiario ka apedor a Ekuwuam a ngolo Akuangan” araut ibore ngini ebasi ikes ebe adaun ebe anerai erikakin kowana Ebaibul. Nyiyookino ngun. Emam tar Akigiret apei dang ngina irworo ngun, nai irworosi ngikalalak alopite a ece. Eyiai ayokokitogogonget nege ebe erai ngakisitanakinet ngun nguna ka aliokonu.
Ngiticisio 2:38-39,
“Tema Petero neni kec ebe, kibelekisi ngitain, ido ikibatisae iyes daadang a Lokiro a Yesu Kristo anguna ka alemar ngasecisia kus; iriamunete ainakinet ngina a Ekuwuam a ngolo Akuangan,
anerai erai akikonget ngina kus ka ngina a ngikusidwe, ka ngina a ngulu elwaka daadang, ido ngina a daadang a ngulu enyarauni Ekpolon Akuj yok neni keng.”Akiikinet ngina ka apedor ngina ariamunete ngikiakia a lo Pentekost erai “ngina kus (a Ngiyudayian), ka neni a ngikusidwe (Ngiyudayian), ka neni a ngulu alwanak (Ngibukui), ka daadang ngulu enyarauni Ekapolon Akuj yok neni keng (Ngiyudayian ka Ngibukui).” akitodol ngina epalikinia inges anyaritoi, eemut ngolo a Pentekost ka apedor EMAM NYESALUNI.
Nguna ayiakatar ekanisa alo Pentekost arai ibore keng ngini pa abeit akipotor. Anageunet ayiakatar inges Akirot ka Akuj ngina asegan. Ayiakatar inges apedor ngina a Ekuwuam ngina esilereunitai alotooma ngakitaanyuneta ka ngaumonokineta ka ngainanakineta nguna ke Ekuwuam a ngolo Akuangan nguna alalak.
Ngiburanian 2:1-4,
“Anguna angun ejoikinit iwon noi akiyiatakin akiwakin ngitain yok tooma nguna ikiira, ikotere nyikisep aneni kec.
Anerai ani kicasit Akirot ngina erworosi ngipian ka Akuj, ngina diakaret ka ngina maange (akimaangekinit Akirot) aropio kan akiyokino;
ikikoni iwon ikikui ai, erai ikijemakinit akiteyiario ngina etia nen? Abu Ekapolon togeu alimonokin, tosodete ngulu kiirarete inges kitogogongo aneni yok.
Akuj dang abu kiteyenu alotooma ngakitaanyunet ka ngaumonokineta ka nguna ka apedor nguna a ngiticisio a ngulu egelegelia, ka alotooma ngainakineta nguna a Ekuwuam a ngolo Akuangan ikwapei eyiakar Akecamit a Elope.”Mam pa arai ngitunga etemunete ekanisa ngolo esiaunan ngol. Arai inges ekanisa ngolo arikit Ekuwuam ngolo Akuangan. Pa arai ngolo alalan dang. Etidingitae ka tojemitetei dang. Esicanitae noi. Esicanio inges tar natwanare dang. Nai arai inges ngolo eyookino aneni ka Akuj. Abu torubaki iboi ka epikica ngolo ka Akirot angina esiaunan.
Tokona tocoito nyikirikor nawae a ne. Ngina abaakar ayong ebe, emam nyiloconokin Akuj ka ngirotin keng, mam pa abala ayong nyepedori ekanisa ka ngikiakyakya keng akilocokin. Meere ekanisa Akuj. Angun epedori akilocokin. Nai nguna abu ayong atolimunite ikes nu ebe, anguna nyiloconokinor Akuj ka ngrotin keng dang, ikipedori iwon alosit nageun ama ido engolikisi etic ka Akuj ngolo esiaunan ka ngolo adoliton ido esitiyiata ngun ikwa ibore ngini kipimet. Erai ngol epite ngolo itiyiaere. Ekanisa ngolo a kire inges ngolo ikatakinit nooi akikwanikin ka ngolo esiaunan ngolo a Pentekost. Ekanisa ngolo iyookino ngolo ka akolongit ana ikatakini noi akikwanikin ka ngolo paaran esiaunan ye. Ka ngikiakitono dang lokanisa, ngulu eyiakatar Ekuwuam ka Akuj lopeingol alotooma kec, ikatakinete akikwanikin ka Paulo. Nyepote ikes akikwanikin kire ka inges jik; nai ngikiakitono ngulu a kire ikes ngulu epote aapikin Paulo, ngolo alacakina alotunga daadang, ngolo abu kipotoki Akuj akiyiar keng, ido inanak Akirot ka Akuj bon, ido kisilereu Ekuwuam ngolo akuangan alotooma apedor. Amam ice ngini abeit kitiyia ngun. Ebeit iyong kitiyiae totupite nguna esiaunak sek. Ikwapei euriya nginibore ekabila keng, ekanisa ngolo iyookino inges ngolo ikatakini akiwuap ngikukusi a ngikageunak keng alo Pentekost ka ngikiakitono kec epote akiwap ekiakia Paulo, ngolo arai ekiakitono ngolo esiaunan neni ka anyamet a ekanisa angolo esiaunan. Epataka ikongina, ka toumokina dang.
Kaapei ka elacet lo, ngolo epatana, toraibo ngolo eumokina nooi, abu ayong apedo alotooma akingarakinet ngina a Ekuwuam a ngolo Akuangan, akisiom ekitaabo ngolo ka Apukokinio ka ngiemuto ngulu ngorok ido atoriamu anen ngina nyamet, ka ekiakitono angina nyamet, aoyau a ngikaru ngina abu ngina nyamet yaa. Ka etic ngolo abu ipei kec kitiyia alotooma alosikinet ka Akuj ameun alo Pentekost akitodol tari nangetakinet ngina anganyameta angun.
Ikwapei idauniata iyes ayenun epite ngolo ipimere iwon epite ngolo ikoni ekanisa ngolo Iyookino (epite ngolo ayiakar inges alo Pentekost ka epite ngolo ayiakar inges ananyamet a ngikiakia ikwapei eyiakatar alotooma Akirot alotooma Ekitaabo ngolo a Ngiticisio) ikipedori iwon akisitiya ekisil ngolopei ngol ikotere etakanuni epite ngolo kibusokinor ekanisa. Adiakaret ngina apolon kori ngadiakanareta, nguna apotu tololout lokanisa ngolo esiaunan ido aponi topukoroi a lokitaabo a ngolo a Ngiticisio ka ekitabo ngolo ka Apukokino ka dang alotooma ngabaruwae, epote akilereun ejok ikwapei itiyiatar alotooma nganyameta nguna etupakinete, akitodol ngina ikidolio iwon neni ikamaria akirionut akiyokino jik ananyamet a ngina ka awasia, kori ngina a Laodekia.
Tokona alotooma elacet ngolo a ekingaren lo ngolo ejaun iwon aneni a Ekapolon, buni nabo ace kiyookino ngina edit noi ka toumokina iwadio cici. Abala sek ayong ekanisa ngolo iyookino erubakini juijui ikatakinit akikwanikin ka ngolo eyiai Lokitaabo ngolo a Ngiticisio. Iyokino ngun kire. Nai ikidau iwon ayenun atemar itatami Akirot akicodunet ngina ka amodio akitodol ngina ikamaria akirionut akiyookino jik alotooma akolongit ngina esidion ngina eapunia Ekapolon atakanun. Tonyouni nai akingiset alotooma ngatameta yok; ejali mono Akuj Ngikeng ka tocamak ikes kibusokinos tooma nadoketait ngina ka amodiario angina ileleba-a? Emam jik, anerai ebala Akigiret ka akileere alotooma Matayo 24:24, ebe emam NYEMODIKINIO ngulu “seuna.”
“Anerai enyounete ata Kristo ngulu aliokonok, ka ngikadwarak dang ngulu aliokonok, ido itodiunete ikes ngakitaanyunet ka ngaumonokineta nguna apolok noi; paka ngina epedoriata amodikin tar ngulu seuna ERAI KEPEDOR.”
Nyo nai? ecai abongokinet alokingaren yok. Eyiai ekanisa ngolo akire ka ekanisa ngolo ka aliokonu. Eyiai emusabibu ngolo akire ka emusabibu ngolo alikonu. Nai kire ekanisa ngolo ka aliokonu ngol, akuwuan a emusabibu a ngolo aliokonon a ngol, ebuni akikatakinit jwi jwi apolokinit ewae ngolo a ekanisa a ngolo akire ido ka akitiji dang tobala ebe ikes, meere ngulu Seuna, ikirai ngulu a kire ka ngulu iyokino. Ikatakini ngina ka aliokonu akiar ngulu iyokino. Erai ngol epite ngolo ayiakatar alokitabo a ngolo a Ngiticisio, erai dang epite ngolo eyiakar ngol alotoma nganyameta ngakanikarei, ka erai dang epite ngolo elimoritotor ngabaruwae nguna gelegela ngun. Erai ngol epite ngolo kolong ayiakar. ka inges epite ngolo eyiakar tokona. Ka inges epite ngolo ebunio ayakaun. Emam nyilocokin.
----
Ayiakatar ngikanisae ngulu ayiaksi Asia ngolo cici ngipitesio kiding kec, alorwa a ngulu ngorok a ngul, ngulu apotu toraut ngaraito nguna ekokito nguna a nganyameta anguna aponito alongaren. Ngulu sek arai ngikinyom ca pas ngulu arupunete alokau aina apotu toraut ibore ngini abu todol napaki ngina akokioto todolete dang nalemio kec, ikwa ngina abunio Yesu tema, “Erai kitiyiakinete ikes nu lokitoe ngolo aliban, nyanu nai nguna itiyiakino neni a ekitoe a ngolo aonon?” Luka 23:31.Tosiomete alo akirot...
Ekek ngolo a Ngiuni Anyamet Ngina a Epeso.
