Makanisa mushanju omuri Asia.

William Branham.

Read the full account in...
Obusingye bw'Ekanisa ya Efeso.

Okwenda ngu oyetegyerereze kimwe obutumwa bw'Obusingye bw'Ekanisa niinyenda kushoboororaho engyenderwaho ezitari zimwe ezimbaasiise kuhika aha kumanya amaziina g'entumwa, oburaingwa bw'obusingye, kandi n'ebindi ebiine akakwate nabwo.

Ahabw'okushangwa okwega oku kwabaire nikwija kuba okurikukirayo obukuru kukira okundi oku ndagizire kuhitsya obwire obu, nkasherura Ruhanga kumara ebiro bingi ngu ntungye okwebemberwa kw'Omwoyo Orikwera. Bwanyima nibwo naashomire Ebyahandiikirwe ebirikukwata aha Busingye bw'Ekanisa kandi naasheruririza omu byafaayo bingi by'ekanisa ebyahandiikirwe ab'ebyafaayo abatarikugwera rubaju abu naabaasize kutunga. Ruhanga tarangire kugarukamu okushaba kwangye, ahabw'okuba ku naashomire Ekigambo n'ebyafaayo, nkabaasibwa Omwoyo Orikwera kureeba eky'okureeberaho kishwekwirwe kirikuraba omu byasha by'emyaka kuhikira kimwe hati, ebiro by'aha muheru.

Ekishumuruzo eki naahairwe Mukama ekyatumire naabaasa kuhamya entumwa ahabwa buri busingye n'ekirikukirayo kuba eky'Ebyahandiikirwe. Omu bwijwire nikibaasa kwetwa ekishumuruzo Kikuru munonga omuri Baiburi. N'okushuuruurirwa ngu Ruhanga tahinduka, kandi emitwarize Ye tebaasa kuhinduka nk'oku Nawe Ari otahinduka. Omu kitabo ky'Abaheburaayo 13:8 nihagira hati,

“Yesu Kristo tahinduka; oku abaire ari nyomwabazyo, n'eriizooba nikwo ari, kandi nikwo ariguma ebiro byona.”

Omubuurizi 3:14-15,
“Nimmanya ngu, eki Ruhanga akora kyona kiryagumaho ebiro byona; tihaine kirikubaasa kukyongyerwaho, nari okukituubyaho; kandi Ruhanga akakihanga atyo, ngu abantu Bamutiine. Ekiriho kirabaireho; ekiribaho nakyo kirabaireho; kandi Ruhanga agaruraho ekyabaire kiihirweho.”

Reeba nkiki: Ruhanga otahinduka aine emitwarize etahinduka. Eki Yaakozire OMU KUTANDIKA naija kugumizamu naakikora okuhitsya obu kiraakorwe omurundi ogw'AHA MUHERU. Tiharibaho okuhinduka. Koresa ekyo aha Busingye bw'Ekanisa. Omuringo gw'omushaija ou Ruhanga yaatooraine ahabw'obusingye bw'okubanza, kandi n'oku Ruhanga yaayorekirwe omu buheereza bw'omushaija ogwo, kukaba nikwija kuba eky'okureeberaho aha bundi busingye bwona. Eki Ruhanga yaakozire omu busingye bw'ekanisa y'okubanza nikyo Arikwenda kukora omu busingye obundi bwona.

Hati nitumanya buzima omu Kigambo ekyahandiikirwe Omwoyo Orikwera oku ekanisa y'okubanza, nari shi eyaabandize, yaatandikire kandi n'oku Ruhanga Yaagyeyorekyeiremu. Ekigambo tikibaasa kuhinduka nari kuhindurwa ahabw'okuba Ekigambo ni Ruhanga. Yohaana 1:1,

“Bwa mbere na mbere hakaba hariho Kigambo; Kigambo ogwo akaba atuura na Ruhanga; kandi Kigambo akaba ari Ruhanga.”

Okuhinduraho ekigambo kimwe, nk'oku Haawa yaakozire, nikireeta ekibi n'okufa, nk'oku kirikugira omu Kushuuruurwa 22:18-19,

“Omuntu weena ku aribyongyeraho, Ruhanga aryamwongyeraho ebibonaboneso ebihandiikirwe omu kitabo eki;
kandi omuntu weena ku aricwa aha bigambo eby'omu kitabo ky'obunabi obu, Ruhanga aryamwaka omugabo gwe ogw'omu (Kitabo ky'Amagara) n'ogw'omu rurembo orurikwera, ebihandiikirwe omu kitabo eki.”

N'ahabw'ekyo, oku ekanisa yaabaire eri ahari Pentekoote niyo ngyenderwaho. Ekyo nikyo ky'okureeberaho. Tihariho ky'okureeberaho ekindi. Abeegire n'obu baakugamba ki, Ruhanga TAKAHINDURAHOGA eky'okureeberaho ekyo. Eki Ruhanga yaakozire ahari Pentekoote nikyo Araije kuguma naakora okuhitsya obu obusingye bw'ekanisa buraahweho.

N'obu abeegire baraakugambire ngu obusingye bw'entumwa bukahwaho, otakiikiriza. Okugamba nk'oku kugwire ahabw'enshonga ibiri. Eky'okubanza kya byona, kigwire kukitwaramu ngu tihakiriho ezindi ntumwa, ngu ahabw'okuba ezaabandize ikumi na ibiri zikafa. Entumwa nikimanyisa “ogwo otumirwe”; kandi hariho baingi abatumirwe ebiro ebi, kwonka nibeetwa abamiishani. Obwire bwona obu abashaija barikwetwa kandi bakatumwa n'Ekigambo ky'Amagara nihaba hariho obusingye bw'entumwa oburikugumizamu. Ekya kabiri, nibagamba aha busingye obu “amaani g'Omwoyo Orikwera agoorekirwe” nk'obwahweire ahabw'okuba ebya Baiburi bihweireyo. Ago tigari mazima. Tihariho n'obu kyakuba Ekyahandiikirwe kimwe ekirikugamba kityo, kwonka baingi bahendera nibagamba okundi. Nkuku hanu okuhamya kwaitu okurikworeka ku enshoboorora ezi zombi zigwire.

Ebyakozirwe 2:38-39,
“Petero yaabagarukamu ati: Mweteise, mwena mubatizibwe omu Iziina rya Yesu Kristo, mubone kusaasirwa ebibi byanyu; kandi nimwija kuheebwa ekiconco ky'Omwoyo Orikwera.
Ahakuba okuraganisibwa oku n'okwanyu n'okw'abaana baanyu, n'okwa boona abari hare, omuntu weena oryetwa Mukama Ruhanga waitu.”

Okuraganisibwa amaani agu entumwa zaahairwe aha izooba rya Pentekoote “n'okwanyu (Abayudaaya), n'abaana baanyu (Abayudaaya), n'okwa boona abari hare (Abanyamahanga), omuntu weena oryetwa Mukama Ruhanga waitu (Abayudaaya n'Abanyamahanga).” Okuhitsya obu Arireka kweta, obutumwa bwa Pentekoote n'amaani TIBIRIHWAHO.

Eki ekanisa yaabaire eine ahari Pentekoote n'obugabe bwayo obutarikubaasa kugiihwaho. Omu kutandika, ekaba eine Ekigambo kya Ruhanga ekishemeire. Ekaba eine amaani g'Omwoyo agaayorekirwe omu bumanyiso obutari bumwe n'eby'okutangaaza kandi n'ebiconco by'Omwoyo Orikwera.

Abaheburaayo 2:1-4,
“Nikyo tushemerereire kuta omutima aha bi twahuriire, ngu tutahaba tukabirugaho. Mbwenu Ekigambo ekyagambirwe baamaraika, ku kiraabe kyahamire, kandi n'okushiisha kwona n'okutahurira kwona (aha Kigambo) ku biraabe byahairwe ekifubiro ekibishemereire, itwe turyakira tuta, ku turiba tuteetaire aha kujunwa okukuru okurikwingana kuti? Okujunwa okwo kukabanza kugambwa Mukama, twakuhamizibwa Abaamuhuriire; kandi na Ruhanga yaakuhamya n'obumanyiso n'eby'okutangaaza n'eby'amahano by'emiringo mingi n'ebiconco by'Omwoyo Orikwera, ebi Ruhanga yaagabire nk'oku yaasiimire.”

Egyo kanisa eyaabandize teratairweho bantu. Ekaba neeyebemberwa Omwoyo Orikwera. Ekaba etari mpango munonga. Ekangwa kandi yaagaywa. Ekabonabonesibwa. Ekahiigwa kuhika omu kufa. Kwonka ekaguma eri ey'amazima ahari Ruhanga. Ekaguma n'entwaza y'Ekigambo ekyabandize.

Hati otahabisibwa hanu. Ku ndaagambe nti Ruhanga n'emihanda Ye tibihinduka, nimba ntaagira ngu ekanisa n'entumwa zaayo tibibaasa kuhinduka. Ekanisa ti Ruhanga. N'ahabw'ekyo neebaasa kuhinduka. Kwonka eki naagamba kiri ngu ahabwa Ruhanga okutahinduka n'emihanda Ye etahinduka nitubaasa kugarukayo omu kutandika tureebe ekikorwa ky'okubanza kandi ekihikire kya Ruhanga reero tucwemu ahabw'egyo ngyenderwaho. Okwo nikwo kirikukorwa. Ekanisa y'Amazima neija kuguma neegyezaho kuba nk'eyaabandize ahari Pentekoote. Ekanisa y'Amazima ey'ebiro ebi neija kugyezaho kwenda kwingana n'eya ira eyaabandize. Kandi entumwa aha makanisa, ziine Omwoyo omwe wa Ruhanga omurizo, niziija kugyezaho kwenda kwingana n'entumwa Paulo. Tiziribeera kimwe nkawe; kwonka entumwa z'amazima nizo zirikwija kuba haihi munonga na Paulo, owaabaire atari mbohe y'omuntu weena, ayeheereireyo kimwe ahari Ruhanga, kandi owaagambire Ekigambo kya Ruhanga kyonka, kandi akooreka Omwoyo Orikwera omu maani. Tihariho ndiijo ntumwa eyaakubaasize kukikora. Nooteekwa kukora orikwihirira aha kyabandize. Nk'oku ekintu kizaara ekirikukishusha, Ekanisa y'Amazima niyo erikwija kuguma neegyezaho kugyendera omu ntambo z'abaagitandikire ahari Pentekoote kandi n'entumwa zaayo niziija kukurata entumwa Paulo, entumwa y'okubanza aha busingye bw'ekanisa y'okubanza. Kyanguhi kityo, kandi nikitangaaza kityo.

N'ekishumuruzo eki, kyanguhi kityo, kandi kirikutangaaza, nkabaasa, ndikuhwerwa Omwoyo Orikwera, kushoma Ekitabo ky'Okushuuruurwa n'ebyafaayo ntyo naashangamu buri busingye, buri ntumwa, oburaingwa bwa buri busingye, kandi n'ekicweka eki buri emwe yaakozire omu kigyendererwa kya Ruhanga okuruga ahari Pentekoote kuhika aha muheru gw'obusingye obwo.

Nk'oku iwe hati orikwetegyereza oku turikucwamu oku eki Ekanisa y'Amazima yaabaire eri (eki yaabaire eri ahari Pentekoote kandi n'eki yaabaire eri omu busingye bw'Entumwa nk'oku kyorekirwe omu Kigambo omu Kitabo ky'Ebyakozirwe) nitubaasa kukoresa enkora egyo kutworeka ekanisa nk'oku yaaremirwe. Okuhaba kw'amaani, nari shi obuhabe, obwashensheire omu kanisa y'okubanza kandi obwashuurwirwe omu Bitabo by'Ebyakozirwe n'Okushuuruurwa kandi n'omu Mabaruha g'Engiri nibwija kuguma nibweyongyera kandi nibweyongyera kweyoreka butunu omu kwihaihana kwa buri busingye, okuhitsya obu amazima garaashwekyerwe kimwe omwirima aha muheru, nari omu Busingye bwa Laodikia.

Hati omu kishumuruzo eki ky'okubanza eki tutungire kuruga ahari Mukama, aho nihaija agandi mazima agarikutangaaza kwonka makyeho. Ngambire ngu Ekanisa y'Amazima neija kuguma neegyezaho kushushana nk'oku yaabaire eri omu Kitabo ky'Ebyakozirwe. Ekyo kihikiire kimwe. Kwonka tushangire ngu Ekigambo nikyongyera kwegyesa aha kutaahirirwa obuhabe okuhitsya obu amazima garaashwekyerwe kimwe omwirima omu biro by'aha muheru obu Mukama arikwija kuba ari haihi kureebeka. Ekibuuzo hati nikiimuka omu mitima yaitu; Ruhanga atsigaho Abe kandi abareka ngu bagwe omu mbeera y'okuhabisibwa kyarimwe? Tikirikubaasika ahabw'okuba Ekyahandiikirwe nikigamba bwerure omuri Matayo 24:24 ngu, “Entoore” TIZIRIKUBAASA kuhabisibwa.

“Ahakuba haryaimuka abarikweyeta Kristo na baanabi b'ebishuba, baryakora obumanyiso bukuru n'eby'okutangaaza, babone kuhabisa n'entoore, KYABA NIKIBAASIKA.”

Mbwenu niki? Eky'okugarukamu nikireebekyera kimwe omu maisho gaitu. Hariho Ekanisa y'Amazima n'ekanisa y'ebishuba. Hariho Omuzaabibu gw'Amazima n'omuzaabibu gw'ebishuba. Kwonka n'ekya buzima egyo kanisa y'ebishuba, omubiri gw'omuzaabibu gw'ebishuba, nigwija kuguma nigugyezaho kutwara omwanya gw'Ekanisa y'Amazima kandi n'okurwanirira ngu bo, zitari Ntoore, nibo b'amazima kandi abeesigwa. Omuzaabibu gw'ebishuba nigwija kugyezaho kwita ogw'Amazima. Okwo nikwo kyabaire kiri omu Kitabo ky'Ebyakozirwe, okwo nikwo kyorekirwe omu busingye mushanju, kandi nikwo kirangiriirwe omu Baruha z'Engiri ezitari zimwe. Okwo nikwo kitwire kiri. Okwo nikwo kiri hati. Okwo nikwo kiriba. Tikibaasa kuhinduka.

----
Aga makanisa mushanju agari omuri Asia Enkye hakaba harimu emitwarize ei gaabaire gaine omurigo, omu biro ebyo ebya ira, eyaahindukiremu ekijuma ekyezire omu busingye obwakuratsireho. Ezaabaire ziri embibo ezimezire obwire obwo bwanyima zikakura zaaba ez'okugyesha, nk'oku Yesu yaagambire ati, “Mbwenu ku baraabe nibagira bati omuti omubisi, ogwomire gwo baryagugira bata?” Luka 23:31.

Read the full account in...
Obusingye bw'Ekanisa ya Efeso.

Eryo izooba omushana tigurijwa, kandi tiharigira kibunda,

kureka riryaba eizooba rimwe eririkumanywa MUKAMA; tiburiba nyomushana, kandi tiburiba nyekiro, ahakuba n'omu mwabazyo omushana guryajwa.

Zekaria 14:6-7