Ukwishibisha ku Nshita sha Nkuta.
Nkuta cinelubali ku Asia Munono.
William Branham.Belengeni ili buku...
Inshita Ya Lukuta Lwa Efese.Pakutila imwe mwingomfwikisha bwino bwino Imbila ya Nshita Sha Nkuta ndefwaya ukulondolola ifishinka ifyalekana lekana ifya nengele ine ukufika pa mashina ya nkombe, ubutali bwa nshita, kabili ne fintu fimbi ifilesangwamo.
Apo uku kusoma kwali no kuba ukukankala nganshi uko nshatala nkwatapo ukufika ino nshita, nalifwaile Lesa pa nshiku ishingi ku kuputwamo kwa Mupashi wa Mushilo. Lyena fye e lintu nabelengele Amalembo pa Nshita Sha Nkuta no kufwailisha nganshi mu malyashi ayakale ayengi aya Lukuta ayalembwa na bakalemba we lyashi lya kale abengi abaishibisha abo nasangile. Lesa tafililwe ukwasuka amapepo yandi, pantu ilyo nalebelenga Icebo na malyashi ya kale, nali afwilishiwe no Mupashi wa Mushilo ku kumona icilangililo icafimbulwa ico icamoneka mu myaka imyanda kabili mpaka ne lelo, ubushiku bwa kulekelesha.
Ulufungulo ulwapelwe kuli ine na Shikulu ico icalengele ukuti njishibe inkombe iya cila nshita yaba iya mu Malembo nganshi. Mucine limbi kuti lyaitwa Ulufungulo ulwine lwine lwa Baibele. Caba ukusokolola ukutila Lesa tapilibuka, kabili no kutila inshila Shakwe tashipilibuka nge fyo wene Aba. Mu Bahebere 13:8 isoso kutila,
“Yesu Kristu aba cimo cine mailo, ilelo, no muyayaya.”
Lukalamilandu 3:14-15,
“Ninjishibo kuti, conse ico Lesa acita, cene cikabapo umuyayaya: takuli ukulundapo pali ico, kabili takuli ukufumyapo kuli ico: kabili Lesa acite fi, ukuti abantu babe nakatina ku cinso Cakwe.
Icabapo na nomba epo cili; ne co cikesabapo na nomba epo cili; kabili Lesa alafwaya abweshe cilya capita.”Ici cili pano: Lesa ushipilibulwa ne nshila ishabulo kupilibulwa. Ico Acitile pa KUBALILAPO Ali no kutwalilila ukulacita mpaka cakulacitwa ukufika ne nshita ya KULEKELESHA. Takwakatale ukubapo ukupilibulwa. Bikeni ifi ku Nshita Sha Nkuta. Umusango wa Muntu uo Lesa asalile ku nshita ya kubalilapo, kabili ifyo Lesa ailangishe muli bukapyunga bwa ulyo muntu, kuti aba icilangililo ku nshita shonse shimbi. Ifyo Lesa acitile mu nshita ya lukuta lwa kubalilapo efyo Alefwaya ukucita ku nshita shonse shimbi.
Nomba twalishiba filya fine fye ukufuma mu Cebo ico icalembelwe no Mupashi wa Mushilo ifyo ulwa ntanshi, atemwa ulukuta lwa ntendekelo, lwasangilwe kabili ifyo Lesa ailangishe Umwine muli lwena. Icebo teti cipilibuke atemwa ukupilibulwa pantu Cebo ni Lesa. Yohane 1:1,
“Mukutendeka mwali Cebo, kabili Cebo ali pamo na Lesa, kabili Cebo ali ni Lesa.”
Ukupilibula icebo cimo ica cena, ngefyo Efa acitile, cileta ulubembu ne mfwa, nangu nga filya isosa mu Kusokolola 22:18-19,
“...Ngo muntu alundapo pali ifyo fintu, Lesa akalundapo pali wene ifinkunka ifyalembwa mwi buku ili:
Kabili ngo muntu afumyapo ifyebo fya mwi buku lya kusesema uku, Lesa akafumye cakaniko cakwe mwi Buku lya Mweo, ne ca mu musumba wa mushilo, kabili ku fintu ifilembelwe mwi buku ili.”Kanshi, ifyo ulukuta lwali pa Pentecost e lamfya. Cilya e cipasho. Takwaba icipasho cimbi. Te mulandu ifyo bakasambilila basosa, Lesa TA pilibula cilye cipasho. Ifyo Lesa acitile pa Pentecost Alingile ukutwalilila ukulacita mpaka inshita sha nkuta shikapwe.
Nangula bakasambilila kuti ba mweba ukutila inshita ya batumwa yalipwa, mwila cicetekela. Ukulanda kwa musango filya kuntu kwalubana pa milandu ibili. Icakubalilapo, cilubo ukutontonkanya ukutila takwaba nakabili abatumwa na bambi, pa mulandu fye wakutila balya abantendekelo ikumi limo na babili balifwa. Umutumwa cipilibula 'uyo uwatumwa'; kabili kwaba abengi abatumwa ilelo, lelo betwa ba minshoni. Cikulu fye abantu bacili baleitwa no kutumwa ne Cebo ca Mweo eko ili inshita ya batumwa iletwalilila. Ica cibili, basontelela ku nshita ya 'kulangisha amaka ya Mupashi wa Mushilo' nge yapwa apo Baibele yali pwishiwa. Cilya te cishinka. Takwabako ilembo nangu limo ililangisha filya, lelo abengi balanda mukushininkisha mu nshila imbi. Ici pano icishininkisho cesu ukutila yonse iyi milandu ibili ya bufi.
Imilimo ya Batumwa 2:38-39,
“Awe Petro atile kuli bene, Lapileni, no kubatishiwa onse uwa muli imwe mwi Shina lya kwa Yesu Kristu ku kulekelelwe membu shenu, elyo mukapokelele ca bupe Umupashi wa Mushilo.
Pantu icalailwe cili kuli imwe, naku bana benu, kabili kuli bonse aba kutali, kuli bonse abo Lesa wesu aketa bese kuli wene.”Ubulayo ubwa maka yalya ayo abatumwa bapelwe pa Pentecost yali kuli “imwe (aba Yuda), kabili na kubana benu (aba Yuda), kabili na bonse balya abali ukutali (Abenafyalo), kabili na kuli bonse abo Shikulu Lesa wesu aketa (bonse umuYuda no Mwinafyalo).” Mpaka Akaleke ukwita, imbila ya Pentecost na maka tafya KATALE UKUPWA.
Ifyo lukuta lwakwete pa Pentecost e nsambu sha luko ishi shakapokololwe. Muntendekelo, lwalikwete Icebo cakwa Lesa ica pwililika. Lwalikwete amaka ya Mupashi ukulangishiwa mu fishibilo ifya misango misango ne fipapwa ne fya bupe fya Mupashi wa Mushilo.
AbaHebere 2:1-4,
“E ico tufwile ukwangwo kucila ifyo twaumfwa, epali twasesenunwako.
Pantu nge Cebo icalandilwe muli ba malaika cabe caikata, na conse ica bumpulamafunde ne ca bucintomfwa (ku Cebo) capokelele ukukandwa ukuyene;
Ifwe tukapusuka shani, nga tatusakamene ipusukilo ilya kulefi; ilyabalilepo ukulanda Shikulu, kabili lyaikashiwe kuli ifwe ku ba Mumfwile;
Lesa nao alebashimikila ubunte, kuli fyonse fibili fishibilo, na ku fipapwa, na kufisungusho ifya misango misango, na ku fyakaniko fya Mupashi wa Mushilo, umo afwaile Umwine?”Lulyo Lukuta lwa ntendekelo talwabunganishiwe na bantu. Lwali tungulwilwe na Mupashi wa Mushilo. Talwali ulukalamba nganshi. Lwalipatilwe no kusulwa. Lwali titikishiwe. Lwali cushiwe na kumfwa. Lelo lwali ulwa cine kuli Lesa. Lwalikele ne cipasho ica Cebo cantendekelo.
Nomba mwileka mulufiwe pano. Ilyo nsosele ukutila Lesa ne nshila Shakwe tafipilibuka, nshacisoso kutila ulukuta ne nkombe shaluko tekuti bapilibuke. Ulukuta te Lesa. E ico kuti lwapilibuka. Lelo ico nacisosa caciba ukutila pa mulandu wakwa Lesa uushipilibuka ne nshila ishishipilibuka kuti twabwekela kunuma ku kutendeka no kumona imibombele yantanshi kabili iyapwililika iya kwa Lesa elyo kabili pinguleni kuli lilye lamfya. Filya efyo cicitwa. Ulukuta lwa Cine lyonse lukesha ukuba ngo lwa ntendekelo pa Pentecosti. Ulukuta Ulwacine ulwa lelo lukesha ukulingana nga lulyo lwakubalilapo ulwa ntanshi. Kabili inkombe ku nkuta, pakukwata Umupashi umo wine uwakwa Lesa muli bena, bakesha ukulingana no mutumwa Paulo. Tabakabe filya fine nga wene; lelo inkombe sha cine eshikaba ishapalama nganshi kuli Paulo, uwali umuntungwa ku bantu bonse, uwaipelesha kuli Lesa, kabili apele Icebo cakwa Lesa ceka, no kulangisha Mupashi wa Mushilo mu maka. Takuli umbi uwingacicita. Mulingile ukubomba ukufuma ku ntendekelo. Nge fyo icapalana cileta icapalana, Ulukuta ulwa Cine lyonse lukaba lulya ululeesha ukukonka mu ntampulo shaba lutendeke pa Pentecosti kabili inkombe shaluko shikakonka umutumwa Paulo, inkombe iya kubalilapo ku nshita ya lukuta lwantanshi. Cena ni cilya icaanguka, kabili cilye cisuma nganshi.
Nolu lufungulo, icaanguka nganshi, lelo nomba icisuma nganshi, nalicitile, ku bwafwilisho bwa Mupashi wa Mushilo, ku kubelenga Ibuku lya Kusokolola kabili na malyashi ayakale no kusanga uko cila nshita, cila nkombe, ubutali bwa cila nshita, kabili iciputulwa cila umo abombele mu kupanga kwa kwa Lesa ukufuma ku Pentecost mpaka na kumpela ya shilye nshita.
Apo nomba muleumfwa ifyo tupingula ifyo Ulukuta lwa Cine lwali (ifyo lwali pa Pentecost kabili ifyo lwali mu nshita ya batumwa nge fyo lwatantikwa mu Cebo mwi Buku lya Milimo ya Batumwa) kuti twabike funde limo line ukutulangisha ifyo lukuta lwafililwe. Icilubo icikankala, atemwa ifilubo, ifyaingile mu Lukuta lwa ntanshi kabili fya sokolwelwe mu ma Buku ya Milimo ya Batumwa kabili Kusokolola elyo kabili mu Makalata fili no kwisalangishiwa nganshi kabili nganshi pa mbilibili muli cila nshita iyaishile, mpaka tukafike pa kufumishiwapo umupwilapo ukwa cine mu ya kulekelesha, atemwa Inshita ya Laodikea.
Nomba ukufuma kuli ulu lufungulo ulwa ntanshi ulo twapokelele ukufuma kuli Shikulu, kulya kulefuma nacimbi kabili panono icine icawama. Nacisoso kutila Ulukuta ulwa Cine lyonse lukesha ukuba nge fyo cali mwi Buku lya Milimo ya Batumwa. Cilya cishinka nganshi. Lelo natusango kutile Cebo nakabili cilesambilisha ukwingila kwa cilubo mpaka kukabe ukufumishiwapo umupwilapo ukwa cine mu bushiku bwa kulekelesha ilyo Shikulu ali mupepi no kumoneka. Ilipusho nomba lileisa mu mano yesu; bushe Lesa na alalukila Abakwe no kubaleka ukuwila mu nshila iya kubepwa ukwapwililika? Nangu panono, pantu Amalembo yasosa palwalala muli Mateo 24:24, ukutila aba 'Salwa' TEKUTI ba bepwe.
“Pantu kukema ba Kristu wa bufi, na bakasesema wa bufi bakema, no kulange fishibilo fikalamba ne fya kupapa; ica kuti, balufye na basalwa bene, NGA CABE CINGACITWA.”
Ni cinshi kanshi? Ubwasuko buli palwalala kuli ifwe. Kwabo Lukuto lwa Cine no ulukuto lwa bufi. Kwaba Umwangashi wa Cine no mwangashi wa bufi. Lelo mucine lulyo lukuta lwa bufi, umubili wa mwangashi wa bufi, lyonse bukesha ukusende cifulo ica Lukuta lwa Cine no kulwisha ukutila lwena, kabili te Basalwa, bena e bacine kabili abashininkishiwa. Aba bufi bakesha ukwipaya aba Cine. Filya efyo cali mwi Buku lya Milimo ya Batumwa, filya efyo catantikwa mu nshita cinelubali, kabili filya efyo calandwa mu Nkalata ishapusana pusana. Filya efyo caba lyonse. Filya efyo cili nomba. Filya efyo cikesaba. Teti cipilibuke.
----
Ishi nkuta cinelubali ishabela ku Asia Munono shakwete imibele imo muli shena, muli shilye nshiku sha kale, ico caishileba icisabo icapya ica nshita isha leisa. Ifyo fyali fye ifilimwa kunuma kulya fyaishile bako ku ntanshi mu kulobolola ukwa fikapo, nge fyo Yesu asosele,
“Ico nga bacite fi mu muti ubishi, kanshi cinshi cikacitwa mu wauma?” Luka 23:31.Belengeni ili buku...
Inshita Ya Lukuta Lwa Efese.
