Obusingye bwÉkanisa ya Perugamo.

William Branham.

Read the full account in...
Obusingye bwÉkanisa ya Perugamo.

Okushuuruurwa 2:15,
“Kandi hoona oine n'abandi abarikwikiriza enyegyesa ey'Abanikolaiti, (ei Nyanga).”

Noija kwijuka ku nyorekire omu Busingye bwa Efeso nti ekigambo, Nikolaiti, nikiruga omu bigambo by'Orugriika bibiri: Nikao ekirikumanyisa okusingura, kandi Lao ekirikumanyisa abakuratsi. Nikolaiti nikimanyisa, “okusingura abakuratsi.” Hati ahabw'enki eki kiri ekintu kibi munonga? Ni kibi munonga ahabw'okuba Ruhanga takataga ekanisa Ye omu mikono y'obwebembezi obutoorainwe obukora n'enteekateeka y'eby'obutegyeki. Ataire ekanisa Ye omu bureeberezi bw'abantu abatairweho Ruhanga, baijwire Omwoyo, abatwire amagara g'Ekigambo abeebembera abantu omu kubariisa Ekigambo. Tataaniise bantu okubata omu bibiina kugira ngu abantu baingi ab'ahansi munonga beebemberwe n'obunyamurwa oburikwera. N'eky'amazima ngu obwebembezi niburagiirwa kuba oburikwera, kwonka kandi n'abantu boona nikwo barikuragiirwa kuba. Ekindi, tihariho mwanya omu Kigambo ahu abanyamurwa nari abaheereza nari abari nk'abo barikuteerana Ruhanga n'abantu, n'obu gwakuba omwanya ahu barikutaanisibwa omu kuramya Mukama kwabo. Ruhanga naayenda boona hamwe Kumukunda n'Okumuheereza. Obunikolaiti nibushiisha ebyo biragiro kandi omu mwanya gw'ebyo butaanisa abaheereza n'abantu kandi bukora abeebembezi abakama omu mwanya gw'okuba abaheereza. Hati enyegyesa egi buzima ekatandika nk'ekikorwa omu busingye bw'okubanza.

Nikireebeka omurabanamu gukaba guri omu bigambo bibiri: “abakuru b'ekanisa” (presbyters) “n'abareeberezi” (baabishopu). N'obu Ebyahandiikirwe byoreka ngu hariho abakuru b'ekanisa baingi omuri buri kanisa, bamwe bakatandika (Ignatius omwe omuribo) kwegyesa ngu ekiteekateeko kya bishopu kikaba kiri ekirikukira byona obukuru nari obushoboorozi hamwe n'obutegyeki ahaiguru y'abakuru b'ekanisa. Hati amazima g'ekintu eki gari ngu ekigambo “mukuru w'ekanisa” nikimanyisa eki omuntu ari, kunu ekigambo “bishopu” kirikumanyisa ofiisi y'omuntu ogwo. Omukuru w'ekanisa n'omushaija. Bishopu ni ofiisi y'ogwo mushaija. “Omukuru w'ekanisa” buriijo kitwire kandi buriijo nikiija kuguma nikimanyisa emyaka y'omushaija amazire omuri Mukama. Ni mukuru omu kanisa, t'ahabw'okuba atoorainwe nari atairweho emikono, n'ebindi, kureka n'ahabw'okuba NI MUKURU OMU MYAKA. Amazire obwire bwingi munonga, atendekirwe, ti musya, naayesigwa ahabw'ebi arabiremu kandi n'obuhame bw'okuguma ayemereire omu bumanyi bw'Obukristaayo bwe. Kwonka ngaaha, baabishopu tibarahamiire aha baruha za Paulo, kureka buzima bakaza omu by'obwire obu Paulo yaayeta abakuru b'ekanisa okuruga Efeso kuza Mileeto omu Byakozirwe 20. Omu mushororongo gwa 17 Ebyahandiikirwe nibigamba biti, “abakuru b'ekanisa” bakeetwa reero omu mushororongo gwa 28 nibeetwa “abareeberezi” (baabishopu). Kandi baabishopu aba, (tihariho kubanganisa baine enteekateeka y'eby'obutegyeki kandi baine ekihika ky'okwenda obutegyeki) bakaguma bakihamize ngu Paulo akaba naamanyisa ngu “abareeberezi” bakaba nibakira omukuru w'ekanisa omu kicweka eki arimu aine obushoboorozi omu kanisa ye yonka. Aharibo bishopu akaba ari ogwo oine obushoboorozi obweyongyeireho ahaiguru y'abeebembezi baingi b'amakanisa g'emyanya ei barimu. Ekiteekateeko nk'ekyo kikaba kitari ky'Ebyahandiikirwe n'obu kyakuba eky'ebyafaayo, beitu kandi n'omushaija w'ekyemerero nk'ekya Polycarp akeegamira entwaza nk'egyo.

N'ahabw'ekyo, ekyo ekyatandikire nk'ekikorwa omu busingye bw'okubanza kikahindurwa enyegyesa buzima kandi nikwo kiri n'eriizooba. Baabishopu nibakigira ngu baine obushoboorozi bw'okutegyeka abantu kandi bakabakoresa nk'oku barikwetenga, nibabata ahu barikweyendera omu buheereza. Eki nikihakanisa obwebembezi bw'Omwoyo Orikwera Owaagizire ati, “Muntooranire Barunaba na Saulo, bakore omurimo ogu mbeeteire.” Eki nikirwanisa Ekigambo kandi ni antikristo. Matayo 20:25-28, “Yesu yaabeeta, yaabagira ati: Nimumanya abakuru b'abanyamahanga ku babategyekyesa eikama, n'abakuru baabo bakabaragiiza obushoboorozi; kwonka omuriimwe tikwo kiriba; weena orikwenda kuba mukuru omuriimwe, ashemereire kuba omuheereza waanyu; n'orikwenda kuba ow'okubanza omuriimwe ashemereire kuba omuhuuku waanyu; nk'Omwana w'omuntu oku ataizire kuheerezibwa, kureka okuheereza abandi, n'okuhayo amagara Ge okucungura baingi.” Matayo 23:8-9, “Kwonka imwe mutaryetwa Rabi, ahabw'okuba Omwegyesa waanyu n'omwe (kandi niwe Kristo), kandi naimwe mwena muri eishe-emwe. Kandi mutaryeta omuntu weena ow'omu nsi Shoimwe; ahabw'okuba mwine Shoimwe omwe Ori omu iguru.”

Okwenda ngu eki nkyorekye butunu okukiraho, ka nshoboorore Obunikolaiti omu muringo ogu. Noijuka ngu omu Kushuuruurwa 13:3 nihagira hati, “Ogumwe aha mitwe yaayo nooshusha oti gukaba gwine obuhuta obw'okugiita; kwonka obuhuta obwo bukakira; ab'ensi yoona baagikurata nibagitangaarira.” Hati nitumanya ngu omutwe ogwahutaziibwe gukaba guri Obugabe bwa Rooma empagaani, egyo nsi nkuru y'eby'obutegyeki. Omutwe ogu gukagaruka gwaimuka “nk'obugabe bw'eby'omwoyo bw'Abakatorika ba Rooma.” Hati eki okireebe n'obwegyendesereza. Rooma y'eby'obutegyeki empagaani ekakora ki ekyabaire kikuru ky'obusinguzi bwayo? Rooma, “ekabaganisa kandi yaasingura.” Egyo niyo yaabaire eri embibo ya Rooma - baganisa reero osingure. Amaino ga Rooma g'ekyoma gakatagura gaashonshomera. Ou yaabaire etaagura ekashonshomera akaba atarikubaasa kugaruka kwimuka nk'obu yaacwekyereza Carthage kandi akagimiisheeramu omwonyo. Embibo y'ekyoma egyo ekagigumamu obu yaimuka nk'ekanisa y'ebishuba, kandi entwaza yaayo egumire eri emwe - baganisa reero osingure. Obwo nibwo Bunikolaiti kandi Ruhanga naabwanga.

Hati n'eky'ebyafaayo kirikumanywa gye ngu obuhabe obu ku bwashensheire omu kanisa, abantu bakatandika kuhakanira ofiisi y'obwa bishopu n'ekyarugiremu obukuru obu bukaba buheebwa abarikukizayo obwegyese kandi abatunguukire omu bintu kandi abantu abarikufa aha by'obutegyeki. Okwetegyereza kw'obuntu hamwe na zaapuroguramu bikatandika kuza omu mwanya gw'Obwengye bwa Ruhanga kandi n'Omwoyo Orikwera akaba atakitegyeka. Buzima eki kikaba kiri kibi munonga, ahakuba baabishopu bakatandika kukigumya ngu kikaba kitakyetaagisa omuntu kugira engyesho nungi z'Abakristaayo kugira ngu abuurire Ekigambo nari ayebembere emikoro omu kanisa ahakuba zaasakaramento n'emikoro nibyo byabaire biri bikuru. Eki kikareetera abantu ababi (ababeihabeihi) kutaagataagura obusyo.

Ahabw'okugira enyegyesa etairweho abantu y'okukuza baabishopu kubata omu mwanya ogutabahairwe omu Byahandiikirwe, entambo eyaakuratsireho ekaba eri ey'okubaha ebitiinisa omu matembezo ebyahendereire omu madaara g'ebitiinisa by'abakuru b'ediini; ahakuba omu bwire bukye hakabaho ba acibishopu ahaiguru ya baabishopu na baakalidinaali ahaiguru ya ba acibishopu kandi omu bwire bwa Boniface owa kashatu hakaba hariho paapa ahaiguru ya boona, Pontiff.

Ekyarugire omu nyegyesa y'Abanikolaiti hamwe n'Obukristaayo kubugaita n'ebikorwa by'aba Babulooni kikaba nikiteekwa kuba eki Ezekieli yaareebire omu Shuura ya 8:10, “Naanye naataahamu; ku naagire kugira nti, naareeba ebishushani by'emiringo yoona y'ebirikwekurura ahansi, n'eby'enyamaishwa ezirikunugwa, n'eby'ebishushani byona ebirikuramibwa ab'enju ya Israeli, biteirwe aha kisiika embaju zoona.” Okushuuruurwa 18:2, “Yaagamba n'eiraka rihango ati: Orurembo orukuru Babulooni rugwire, rugwire! Ruhindukire obutaaho bwa baadaimoni, n'obweshereko bw'emyoyo yoona emibi n'obw'amahungu goona amabi agarikunugwa, ahakuba amahanga goona ganyweire viinyo y'okurigira okubi okw'orurembo orwo.”

Hati enyegyesa y'Abanikolaiti egi, ekiragiro eki ekyahamire omu kanisa abantu baingi tikirabagyendeire gye ahakuba bakaba babaasa kushoma ebaruha zitari za buriijo nari ebihandiiko ebyegamiire Ekigambo bihandiikirwe omuntu orikutiina Ruhanga. Mbwenu ekanisa ekakora ki? Ekabinga abeegyesa abahikiriire kandi yaayotsya emizingo y'ebitabo. Bakagira bati, “Nikitwara obwegyese bw'omutaano kushoma n'okwetegyereza Ekigambo. Na Petero akagira ngu ebintu bingi ebi Paulo yaahandiikire bikaba bigumire kwetegyereza.” Ekigambo ku kyaihirwe omu bantu, tikiratwaire bwire burainga abantu baatandika kuhurikiza eki omusaserdooti yaabaire naagamba kyonka, kandi n'okukora eki yaabagambira. Ekyo baakyeta Ruhanga n'Ekigambo Kye Ekirikwera. Bakasingura ebiteekateeko n'amagara g'abantu batyo baabahindura abahuuku b'obusaserdooti bwa ngambanyenka.

Hati ku oraabe nooyenda obuhame ngu Ekanisa Enkatoriki neeyetenga amagara n'ebiteekateeko by'abantu, iwe hurikiza ekiragiro kya Theodosius II. Ekiragiro kya Theodosius ky'okubanza.

Ekiragiro eki kikashohozibwa ahonaaho ahanyima ye okubatizibwa n'Ekanisa y'Okubanza ya Rooma. “Itwe abagabe bashatu nitwenda ngu abantu baitu abu turikutegyeka baramatire kimwe aha diini ei Petero Orikwera yaayegyeise Abarooma, etwire erinzirwe omu bwesigwa n'emigyenzo kandi hati erikwaturwa paapa, Damasus owa Rooma, na Petero, bishopu wa Alexandria, omushaija w'oburikwera bw'Entumwa okurugiirira aha mitwarize y'Entumwa, kandi n'enyegyesa y'Engiri; ka twikiririze omu Bwaruhanga bumwe bwa Isheboona, Omwana, n'Omwoyo Orikwera, bw'ekitiinisa ekirikwingana omuri Tiriniiti Erikwera. Nituragiira ngu abakuratsi b'okwikiriza oku beetwe Abakristaayo Abakatoriki; nitweta abakuratsi boona abataine bwengye b'ediini ezindi eiziina ribi eririkuhemura: abarikucwamu ekanisa ebicweka, kandi nituzibira n'enteerane zaabo z'omu byombeko kwetwa amakanisa. Orekire ekya Ruhanga kubacwera orubanja oruhikire rukabasinga, nibateekwa kutegyereza ekifubiro ky'amaani eki obushoboorozi bwaitu, obwo turikwebemberwa obwengye oburikuruga omu iguru turiteekateeka ngu kihikire kubaha...”

Ebyo biragiro ikumi na bitaano by'ekifubiro ebi omugabe ogu yaarabizeho omu myaka mingi nk'egyo bikaaka ababuurizi abarikuhamisiriza obushoboorozi bwa Baiburi obugabe bwona bw'okuta omu nkora ediini yaabo, byabaiha aha mirimo ya gavumenti yoona, kandi byabatiinisiriza kubataho omutango, okunyagwaho ebyabo, okubingwa owaabo, obundi n'okubaita.

Noomanya? Okwo niyo tworekyereire ebiro ebi.

Ekanisa Enkatorika ya Rooma neeyeyeta Nyina w'Amakanisa. Neeyeyeta ekanisa y'okubanza nari eyaabandize. Ekyo kihikiire kimwe. Ekaba eri Ekanisa ya Rooma eyaabandize bwanyima ekagaruka enyima ekaza omu kibi. Ekaba ey'okubanza kwekoramu ekibiina ky'ediini. Omuriyo hakashangwamu ebikorwa kandi bwanyima n'enyegyesa y'Obunikolaiti. Tihariho n'omwe orikwija kuhakana ngu teri nyina. Ni nyina kandi ekazaara abahara. Hati omuhara aruga omu mukazi. Omukazi ojwaire ebirikutukura ashutami aha bubungo mushanju bwa Rooma. Ni maraaya kandi akazaara abahara. Abo bahara n'amakanisa g'Abapurotesitante agaamurugiremu reero gakagarukira kimwe enyima omu kibiina ky'ediini n'omu Bunikolaiti. Nyina ogu w'abahara - amakanisa naayetwa maraaya. Ogwo n'omukazi owaabaire atari mwesigwa aha ndahiro z'obushwere bwe. Akaba ashweirwe Ruhanga kwonka yaaguma naashambana na sitaane kandi omu kushambana kwe azaire abahara abarikumushusha. Okwegaita kwa nyina ogu n'abahara nikurwanisa Ekigambo, kurwanisa Omwoyo kandi ekirikurugamu ni antikristo. Eego, ANTIKRISTO.

Hati ntakagiire hare munonga niinyenda kugamba ngu baabishopu aba aba ira bakateekateeka ngu bakaba bari ahaiguru y'Ekigambo. Bakagambira abantu ngu bakaba nibabaasa kubasaasira ebibi byabo baabyatura. Ekyo tikikabahoga amazima. Bakatandika kubatiza abaana bato omu kyasha kya kabiri. Buzima bakabatiza okubatiza kw'okuhindurwa busya. Tiky'okutangaaza abantu bashobeirwe ebiro ebi. Ku baraabe baabaire bashobeirwe obwire obwo, bari haihi munonga na Pentekoote, hati bari omu mbeera mbi munonga, bari haihi nk'emyaka 2000 kuruga aha mazima agaabandize.

Oo, Kanisa ya Ruhanga, hariho amatsiko gamwe gonka. Garuka aha Kigambo kandi ogume Nakyo.

Read the full account in...
Obusingye bwÉkanisa ya Perugamo.

Kwonka egi niyo ndagaano ei ndiragaana n'enju ya IsraeliBwanyima y'ebiro ebyo, nikwo Mukama arikugira; Ndyata ebiragiro byangye omu bwengye bwabo, Kandi aha mitima yaabo niho ndibihandiika; Nyowe ndyaba Ruhanga waabo, Nabo babe abantu bangye.

Abaheburaayo 8:10