Nikola cipilibula, ‘ukucimfya ulukuta.’

William Branham.

Belengeni ili buku...
Inshita ya Lukuta Lwa Pergamo.

Ukusokolola 2:15,
15 Ifyo fine wakwata abaikate sambilisho lya bena Nikola, icintu ico Napata.

Mwala ibukisha ukuti naliletele mu Nshita ya mu Efese ukutila ishiwi, Nikola, lyafuma ku mashiwi yabili aya ci Greek: Nikao ico cipilibula ukucimfya, kabili Lao icipilibula ulukuta. Nikola cipilibula, “ukucimfya ulukuta.” Nomba mulandu nshi ici cabela icintu icabipa nganshi? Cintu icabipa nganshi pantu Lesa tatala ukubika ulukuta Lwakwe mu maboko ya butungulushi ubwasalwa ubo ubwendela na mano ya mapolitiki. Abika ulukuta Lwakwe mu kusakamana kwa balashikwa na Lesa, abaisushiwa no Mupashi, abaume abekalila Icebo abatungulula abantu ukupitila mu kubalisha Icebo. Tapatulula abantu mu mabumba pakutila amabumba yaletungululwa na bushimapepo ubwa mushilo. Cishinka icakutila ubutungulushi bulingile bwaba ubwa mushilo, lelo nakabili no lukuta lonse lulingile ukuba. Ukutwalilila, tapaba iciputulwa mu Cebo umo bashimapepo nangu bakapyunga nangu aba musango uyu bapapatila pakati kakwa Lesa na bantu, nangu palibapo incende apo bapatulwa mukupepa kwabo kwa kwa Shikulu. Lesa afwaya bonse ukumutemwa no ku Mubombela capamo. Ubwina Nikola bulonaula filya fintu no kupatula ba kapyunga ku bantu no kulenga intungulushi ukuba bashikulu pa banabo mu cifulo ca kuba ababomfi.

Nomba ilisambilisho ukuba lyatendeke ngo mulimo mu nshita ya ntanshi. Cilemoneka kwati ubwafya bwaba mu mashiwi yabili: 'abakalamba' (abantu abakalamba) kabili 'naba kangalila' (ba bishop). Nangula Ilembo lilangisha ukuti kwaliba abakalamba abengi muli cila lukuta, bamo batendeke (Ignatius umo pali bena) ukusambilisha ukuti itontonkanyo lyakwa bishop ali umo uwa cila bonse atemwa uwakwato lupaka ukutungulula abakalamba. Nomba icishinka ca mulandu caba lishiwi 'umukalamba' lilangisha ifyo umuntu aba, ilyo ishiwi 'bishop' lilanga iofeshi lya muntu umo wine. Umukalamba aba muntu. Bishop e ofeshi lya muntu. 'Umukalamba' lyonse aba kabili cilangisha lyonse ku kukula kwa muntu muli Shikulu. Ena mukalamba, te pamulandu wakutila alisalwa atemwa ukulashikwa, na fimbipo., lelo pamulandu MUKALAMBA. Alishibisha, uwasambilishiwa, te muteku, uwasubilwa pa mulandu wa kwishibisha kabili na bucishinka pa mulandu wakuba Umwinakristu uwakosa panshita ntali.

Lelo awe, ba bishop taba shintilile pa nkalata shakwa Paulo, lelo lyena baile ku milimo yakwa Paulo pa nshita aitile abakalamba ukufuma mu Efese ukuya ku Miletus mu Milimo ya Batumwa 20. Mu vesi 17 ilembo lyatila, aitile “abakalamba” elyo na vesi 28 betwa bakangalila (ba bishop). Kabili aba ba bishop, (ukwabulo kutwishika aba mano ya mapolitiki no kufwaisha ukuteka) bakonkomeshe ukuti Paulo apele ubupilibulo ubwa kutila 'bakangalila' bali abapulamo ukucila pa mukalamba wa pa ncende imo uwakwete icifulo ca bukalamba mu lya mwine fye mu lukuta lwakwe. Kuli bena bishop ali ni ulya uwali na maka ayacilile pa ntungulushi ishingi isha mu fifulo ifyalekana lekana. Itontonkanyo lya musango yu lyali nalimo mu Malembo atemwa mwi lyashi lyakale, lelo no muntu uwa mibele yakwa Polycarp ashintilile ku kabungwe ka musango yu.

E ico, cilya icatendeke nge milimo mu nshita yakubalilapo capangilwe nge sambilisho iline line kabili efyo caba na lelo. Ba Bishop ne liline basosa ukuti balikwata amaka ukutungulula abantu kabili no kubabomfya nge fyo balekabila, ukubabika apo balefwaya muli bukapyunga. Ici cikanya ubutungulushi bwa Mupashi wa Mushilo Uyo uwasosele, “Mpatwileni Paulo na Barnabas pa mulimo uo nabetilako” Ici caba munkanya-Cebo na munkanya-Kristu.

Mateo 20:25-28,
Lelo Yesu abetile bese kuli Wene, kabili atile, Mwaishibo kuti bakateka ba Benafyalo baumya bukateka pali bene, na bakalamba babo baumyo lupaka pali bene.
Lelo te kuti cibe ifi muli imwe; lelo uwa muli imwe uufwayo kubo mukalamba, abe kapyunga wenu; no wa muli imwe uufwayo kube mfumu, abe umubomfi wenu:
Ifyo Umwana wa muntu taishile ku kupyungilwa, lelo ku kupyungila, no kupela umweo Wakwe icilubula ca pa bengi.

Mateo 23:8-9,
“Lelo imwe mwiitwa Rabi: pantu Kasambilisha wenu Umo, noyu ni Kristu; na imwe bonse muli aba bwananyina. Kabili mwiita uwa pano isonde tata: pantu Shinwe Umo, Uwaba mu mulu.”

Pa kucilenga ukumfwika bwino ukucila apa, lekeni nondolole ubwina Nikola muli uyu musango. Mwalaibukisha ukuti mu Kusokolola 13:3 itila,
“Kabili namwene umo uwa mitwe yakwe ngo wakomenwe ku kufwa: ne mpumo ya mfwa yakwe yali poshiwe: kabili abape sonde bakonkele iciswango balepapa.”
Nomba natwishiba ukuti umutwe uwakomwa cali ubufumu bwa Roma ubwa Cisenshi, yalya amaka ayakalamba aye sonde aya mapolitiki. Uyu mutwe waliiminine nakabili nga “Ubufumu bwa Roman Catholic ubwa bumupashi.” Nomba lolekesheni ici bwino bwino. Cinshi ico Rome wa cisenshi uwa mapolitiki acitile ico icali ishintililo lya kulunduluka kwakwe? Ena, “alesalanganya no kucimfya.” Ilya e yali imbuto ya Rome_ukupatulula no kucimfya. Ameno yakwe ayacela yalelepula no konaula. Uo alepwile no konaula tekuti eme nakabili nga lintu aonawile Cathage no kumushika mu mucele. Imbuto imo ine iya cela yashele muli wene ilyo aimine ngo lukuta lwa bufi, kabili na mafunde yakwe yalitwalilila ukuba cimo cine_ukupatulula no kucimfya. Ici e bwina Nikola na Lesa alibupata.

Nomba cintu caishibikwa bwino ice lyashi lya kale icishinka cakuti ilyo ici cilubo caingile mukati ka lukuta, abantu batendeke ukulwishe ofeshi lya bu bishop necalecitika cakutila ici cifulo calepelwa ku basambilila nganshi abaume aba mano ya mapolitiki kabili abalunduluka mu fyuma. Amano ya buntunse ne mitantikile fyatendeke ukusenda icifulo ca mano ya Bulesa kabili no Mupashi wa Mushilo tawa tungulwile nakabili. Ici cali mucine cine icabipisha, pantu ba bishop baishile tendeka ukusambilisha ukuti tacalefwaikwa nakabili imibele ya Bwinakristu iyapwililika ku kupyungila nalimo Icebo atemwa imilimo mu lukuta pantu cali umulalilo kabili no kusefya ifyali ifikankala. Ici casuminishe abaume ababi (bakabepa) ku konaula umukuni.

Pakuba na masambilisho ayapangwa na bantu ya kusansabika ba bishop pa ncende ishishapelwa kuli bene mu Malembo, ulutampulo lumbi ulwakonkelepo lwali ukuleta ifyakulumbwilako ifya pusana fyakulilwe mu buteko bwa bukapepa; pantu bwangu bwangu kwali ba Archbishop pa mulu wama bishop kabili ama cardinals pa mulu wama archbishops kabili pa nshita iyakwa Boniface wa citatu kwaliko papa pali bonse, Pontiff.

Ukubikapo ne sambilisho lya bena Nikola kabili no kwampana kwa Bwinakristu pamo no bwina Babylon icintu icaishilebapo caishileba ico Esekiele amwene mu Cipandwa 8:10,
“Awe naliingile no kumona; kabili moneni e pali ifilengwa fyonse fya fikulika, ne finama fya makankamike, ne milando yonse ya kupapusha iya ba ng'anda yakwa Israele, fyashilwa pa cibumba ukushinguluka uku no ku.”
Ukusokolola 18:2,
“Kabili abilikishe na maka, shiwi lya kosa ati, Nawa, nawa Babylon mukalamba, aisabo bwikalo bwa fiwa, icifungo ca mupashi onse uwakowela, icifungo ca cuni conse icakowela ne ca kulengo butolo, ico fyalo fyonse nabanwako umwangashi wa cipyu ca bulalelale bwakwe.”

Nomba ili sambilisho lya bena Nikola, ili funde ilyabikilwe mu lukuta talyabombele bwino nganshi ku bantu abengi pantu balebelenga inkalata ishaibela atemwa ilyashi pa Cebo ilyalembelwe ku muntu uwa bulesa. E ico cinshi ico ulukuta lwacitile? Lwa tamfishe bakasambilisha abalungami no koca imifungilo. Batile, “Cisenda amasambililo ayaibela ku kubelenga no kumfwa Icebo. Cinshi nangu ni Petro atile ukuti ifintu ifingi ifyo Paulo alembele fyali ifyakosa ku kufyumfwa.” Panuma ya kufumyapo Icebo ku bantu, bwangu bwangu caishileba ku bantu ukukutika fye kufyo shimapepo alesosa, kabili no kucita ifyo alebeba. Baitile cilya ukuba Lesa ne Cebo Cakwe ica mushilo. Bali cimfishe amano ya bantu no bumi no kubalenga abasha ba bushimapepo ubwalufiwa.

Nomba nga mulefwaya icishininkisho ukuti Ulukuta lwa Katolika lufwaya ubumi na mano ya bantu, kutikeni fye kwi funde lyakwa Theodsius X. Ifunde Lyantanshi lyakwa Theodosius.

Ili funde lyapelwe lilya line panuma lintu abatishiwe no Lukuta lwa Ntanshi lwa Roma. “Ifwe bafilolo batatu tulefwaya ukuti abantu besu ukwabulo kutenshiwa banakilile kuli bukapepa ubo ubwa sambilishiwe na Petro Washila ku bena Roma, ubo ubwa sungwa mu cishinka ku ntambi kabili ubo nomba bwacetekelwa na kuli pontiff, Damasus wa ku Rome, kabili Petro, bishop wa ku Alexandria, umuntu uwa mushilo uwa Butumwa ukulingana ne ntambi sha Batumwa, kabili ne sambilisho lya Mbila nsuma; lekeni tucetekele mu mutwe wa Bulesa umo uwa kwa Tata, Umwana, na Mupashi wa Mushilo, uwa bumulopwe bumo bwine mu Bene batatu Abashila. Tulepingula ukutila abakulakonka ici citetekelo bakalaitwa Abenakristu ba ci Katolika; tuleita bonse impelwa mano sha bukapepa bumbi ne shina lyabipa lya mashilu, kabili no kukanya abapilibulwa babo ukuita ukuti ma chalici. Kunse ka kwebaula kwa bupingushi bwa bulesa, balingile ukusubila ukukandwa ukwa cilamo uko ubutungulushi bwesu, ubwatungululwa na mano ya ku mulu buli no kutontonkanya bwino ku kucushisha...”

Amafunde yakulimuna ikumi na yasano ayo iyi mfumu yaletele mu myaka iingi yaleseshe bakabila wa mbila nsuma insambu shabo shonse ku kucita ifya bukapepa bwabo, bali batamfishe ku ma ofeshi ya buteko yonse, no kubatinya ku kubalipilisha, ukubasendele fipe, ukubatamfya mu calo kabili nangu ukucila ifyo, imfwa.

Namwishiba ifyo cili? Tuleya kuli cilya cine ilelo.

Ulukuta lwa Roman Catholic lulaita ulwine Nyina wa lukuta. Lulaita ulwine ulukuta ulwantanshi atemwa ulwakubalilapo. Ico cishinka icine cine. Lwali ulwa kubalilapo Ulukuta lwa Ntanshi lwa Rome ulwa bwekele kunuma no kuya mu lubembu. Lwali ulwa ntanshi ulo ulwapangile akabungwe. Muli lwena mwasangilwe imilimo ne sambilisho lya bena Nikola. Tapali nangu umo uwingakana ukuti ni nyina. Lwena ni nyina kabili alifyala abana banakashi. Nomba umwana mwanakashi afuma mu mwanakashi. Umwanakashi uufwele ishakolokondwe aliikala pa mpili cinelubali sha Rome. Ena ni cilende kabili alifyala abana banakashi. Balya abana banakashi ma chalici ya ci Protestant ayafumine muli wene elyo kabili babwekele nakabili mu kabungwe no bwina Nikola. Uyu Nyina wa ma chalici ya bana bakanakashi etwa cilende mukalamba. Uyo aba umwanakashi ushali uwa cishinka ku mulapo wa cupo cakwe. Alyupilwe kuli Lesa kabili aliile no kucita ubulalelale na ciwa kabili mubulalelale bwakwe alifyala abana banakashi ababa fye nga ena. Uku ukuba pamo kwa nyina no mwana mwanakashi kwaba munkanya-Cebo, munkanya-Umupashi kabili icakonkelepo ni munkanya-Kristu. Ee, MUNKANYAKRISTU.

Nomba ilyo nshilati nje apatali nganshi ndefwaya ukulumbula ukuti aba ama bishop abakubalilapo batontonkenye ukuti bali pa mulu wa Cebo. Baleeba abantu ukuti kuti balekelela imembu shabo panuma ya kuyebelela isho imembu. Cilya tacali icine. Batendeke ukubatisha utunya mu myaka imyanda ibili. Balecita ulubatisho nge cakupilibwilako. E mulandu wine abantu bali abasankanishiwa ilelo. Nga bali abasankanishiwa lilya, mupepi nganshi na Pentecost, nomba baba mu musango uwapelelwa nganshi, ukuba nalimo imyaka 2000 ukutaluka ku cine ca ntendekelo.

Owe, Ulukuta lwakwa Lesa, kwaba fye isubilo limo. Bwekeleni ku Cebo no kwikala na cena.

Belengeni ili buku... Inshita ya Lukuta Lwa Pergamo.

Ici e cipangano nkapangana na ba ŋanda yakwa Israeli, ilyo isho nshiku shikapita. Ine ne Mfumu ndesosa nati, nkabika amafunde yandi mu mano yabo, kabili nkayalemba na mu mitima yabo. Ine nkaba Lesa wabo, elyo nabo bakaba abantu bandi.

Bahibulu 8:10