Kanisa y'Endagaano Ensya.

William Branham.

Read the full account in...
Obusingye BwÉkanisa Ya Perugamo.

Okushuuruurwa 2:14,
“Okwo oineyo abarikwikiriza enyegyesa ya Balamu, owaayegyeise Balaki kuta enkongi omu maisho g'Abaisraeli, ngu barye ebitambiirwe ebishushani ebirikuramibwa, kandi bashambane.”

Hati tokaabaasa kugira enkora y'Abanikolaiti omu kanisa haza otataasyemu enyegyesa egi endiijo, nayo. Nooreeba, waihaho Ekigambo kya Ruhanga n'okukora kw'Omwoyo nk'omuringo gw'okuramya (“abo Abarikundamya bashemereire Kundamiza omu Mwoyo n'omu mazima”) obwo noija kuteekwa kuheereza abantu omuringo ogundi gw'okuramya ogutari gwa Ruhanga, kandi ogwo ogutari gwa Ruhanga n'enkora ya Balamu.

Ku turaabe nituza kwetegyereza eki enyegyesa ya Balamu eri omu kanisa y'Endagaano Ensya tushemereire kugaruka enyima tureebe eki yaabaire eri omu kanisa y'Endagaano eya Ira tutyo tugite aha busingye bwa kashatu reero tugiiheyo tugihitsye omu bwire obu.

Ekirikushoboorora nikishangwa omu kitabo ky'Okubara Eshuura 22 kuhitsya omu ya 25. Hati nitumanya ngu Abaisraeli bakaba bari abantu ba Ruhanga abatoorainwe. Nibo baabaire bari Abapentekoote b'omu biro byabo. Bakaba bahungiire ahansi y'eshagama, boona bakaba babatiziibwe omu Nyanja Erikutukura kandi bakaruga omu maizi nibeeshongorera omu Mwoyo nibazinira omu maani g'Omwoyo Orikwera, obwo Miriamu, nabikazi, naateera ekitaasa kye. Mpaho, ahanyima y'obwire bw'orugyendo Abaisraeli aba bakahika Moabu. Noijuka Moabu ou yaabaire ari. Akaba ari mutabani wa Looti ou yaazaire ahari omwe omuri bahara be, kandi Looti nawe akaba ari mwihwa wa Abrahamu, n'ahabw'ekyo Israeli na Moabu bakaba baine obuzaare. Niinyenda ngu ekyo mukireebe. Abamoabu bakaba nibamanya amazima, yaaba baabaire bagatuura omu bikorwa nari batarikugatuura.

N'ahabw'ekyo Abaisraeli bakahika aha myatano ya Moabu batyo baayohereza entumwa aha mugabe nibagira bati, “Turi ab'eishe-emwe. Reka turabe omu nsi yaawe. Abantu baitu nari amatungo gaitu ku garaarye nari gakanywa ekintu kyona, nitwija kukishashurira tushemereirwe.” Kwonka omugabe Balaki omutima gwe gukamuhwa omunda. Ogwo mwebembezi w'ekibiina ky'Abanikolaiti akaba ateeteekateekire kureka ekanisa ekarabamu n'obumanyiso bwayo n'eby'okutangaaza n'okweyoreka kw'ebiconco by'Omwoyo Orikwera ebitari bimwe, n'aha maisho gaabo nihamurinkana n'ekitiinisa kya Ruhanga. Akaba ari omu kabi k'amaani, k'okufeerwa bamwe aha bantu be. N'ahabw'ekyo Balaki akanga kwikiriza Abaisraeli kurabamu. Omu mazima, akaba abatiiniire kimwe, okuhitsya obu yaagiire ahari nabi owaabaire akorera ebihembo orikwetwa Balamu akamushaba ngu abe omuteerani ahagati ye na Ruhanga kandi n'okweshengyereza Ow'obushoboorozi kukyeena Abaisraeli, akabamara amaani. Reero Balamu, aine ekihika ky'okutunga omwanya omu gavumenti kandi n'okuba omuntu mukuru, akashemererwa munonga kukora ekyo. Kwonka ku yaareebire ashemereire kwirira haihi, kandi n'okuhurira kuruga ahari Ruhanga kugira ngu abantu bakyeenwe, nk'oku yaabaire atarikubaasa kukikora wenka, akagyenda kubuuza Ruhanga yaaba yaabaire naabaasa kumwikiriza kugyenda. Hati ekyo tirikushushana nk'Abanikolaiti abu turi nabo ebiro ebi? Nibakyeena buri omwe otarikutwaza nkabo.

Balamu ku yaashabire Ruhanga orusa rw'okugyenda, Ruhanga akamwangira. Mugyenzi ekyo kikashaasha! Kwonka Balaki akagyemesereza, yaamuraganisa ebihembo ebirikukiraho n'ekitiinisa. Ahabw'ekyo Balamu akagaruka ahari Ruhanga. Hati okugarukwamu rimwe kukaabaire nikumara. Kwonka tikwo kyabaire ahari Balamu engangaazi. Ruhanga ku yaareebire okwehabagiza kwe, Yaamugambira kwimuka akagyenda. Jubajuba akatandiika endogoya atyo yaagyenda. Akaba ashemereire kwetegyereza ku oku kwabaire kuri okukunda kwa Ruhanga okugyemirwe kwonka n'ahabw'ekyo akaba atarikubaasa kubakyeena n'obu yaakugyenzire emirundi makumi abiri kandi akagyezaho emirundi makumi abiri. Abantu ka nibashushana nka Balamu ebiro ebi! Nibaikiririza omuri Baaruhanga bashatu, babatizibwa omu byeterero bishatu omu mwanya gw'EIZIINA, kandi nabwo Ruhanga ayohereza Omwoyo aharibo nk'oku yaakozire ahari Balamu, batyo bagumizamu nibaikiriza ngu bahikiire kimwe, kandi buzima hanu n'ab'entwaza ya Balamu eijwire. Waareeba, enyegyesa egyo ya Balamu. Gyenda omu maisho nk'oku orikwenda. Kikore omu muringo gwawe. Nibagira bati, “Eego, Ruhanga atuhaire omugisha. Nikiteekwa kuba kihikire.” Nimmanya ngu Ruhanga abahaire omugisha. Ekyo tindikukihakanisa. Kwonka nigwo muhanda gumwe gw'ekibiina ky'ediini ogu Balamu yaatoire. N'okugomera Ekigambo kya Ruhanga. N'enyegyesa y'ebishuba.

N'ahabw'ekyo Balamu akashuuma nk'omugwa-iraro omu muhanda okuhitsya obu maraika otumirwe Ruhanga yaayemereire omu muhanda gwe. Kwonka nabi ogwo (bishopu, kalidinaali, ceyamaani, purezidenti kandi n'omureeberezi mukuru wa boona) akaba ahumisiibwe munonga aha bintu by'Omwoyo ahabw'okuteekateeka aha kitiinisa n'okusiimwa n'esente okuhitsya obu ataabaasize kureeba maraika ayemereire aho na rurara esyoirweyo. Maraika akaba ayemereire aho kuzibira nabi omushazi ogu. Egyo ndogoya nkye ekareeba maraika etyo yaamuhigiza neetoora oku n'oku okuhitsya obu aha muheru yaamigiire ekigyere kya Balamu aha rugo rw'amabaare. Endogoya yaayemerera tiyaabaasa kugumizamu. Ekaba etarikubaasa. N'ahabw'ekyo Balamu akagigurukaho kandi yaatandika kugiteera. Endogoya yaatandika kugamba na Balamu. Ruhanga akaikiriza egyo ndogoya kugamba omu rurimi. Endogoya egyo ekaba etari haiburiidi; ekaba eri embibo eyaabandize. Ekagambira nabi ogwo ohumisiibwe eti, “Tiinye ndogoya yaawe, kandi tintwire ninkuheeka n'obwesigwa?” Balamu yaagarukamu ati, “Eego, eego, ori endogoya yangye kandi otwire nompeeka n'obwesigwa kuhitsya hati; kandi ku ndaabe ntarikubaasa kukugyendesa, ninza kukwita... Rekyera aho! Eki n'enki, kugamba n'endogoya? Ekyo nikitangaaza, naaba ninteekateeka ngu nimpurira endogoya neegamba naanye ningigarukamu.”

Ruhanga atuura naagamba omu rurimi. Akagamba aha bugyenyi bwa Belishaza n'ahari Pentekoote. Naakikora ebiro ebi ogundi murundi. N'okuhabura kw'okucwerwa orubanja oruri haihi kwija.

Bwanyima maraika yaayeyoreka Balamu. Yaagambira Balamu ngu kuri etaaba ndogoya akaabaire yaafiire na hati ahabw'okugyeza Ruhanga. Kwonka Balamu ku yaaraganiise kugarukayo, akooherezibwa aine okuhaburwa kugamba ekyo kyonka eki Ruhanga araamugambire.

N'ahabw'ekyo Balamu akashuuma yaayombeka amatambiro mushanju g'enyamaishwa ezitarikuzira z'okutamba. Akaita empaya y'entaama erikworeka okwija kwa Mesia. Akaba naamanya eky'okukora kuhika ahari Ruhanga. Ebikoreso bye bikaba biri kurungi; kwonka bitainemu maani; nikwo kiri na hati. Timurikukireeba Banikolaiti 'mwe? Abaisraeli bakaba bari eifo okwo omu ruhanga nibatamba ekitambo ekirikushushana nakyo, nibakora ebintu ebirikushushana, kwonka omwe wenka niwe yaabaire naareebwamu obumanyiso. Omwe wenka niwe yaabaire aine Ruhanga ahagati yaabo. Emigyenzo terikwija kugira ahi yaakuhitsya. Terikubaasa kutwara omwanya gw'okweyoreka kw'Omwoyo. Ekyo nikyo kyabaireho ahari Niika. Bakataho enyegyesa ya Balamu, etari nyegyesa ya Ruhanga. Batyo baateera entsibo; eego baagwa. Baahinduka abantu abafiire.

Ahanyima y'okutamba ebitambo, Balamu akaba ayetegwire kuragura. Kwonka Ruhanga akaboha orurimi rwe tiyaabaasa kubakyeena. Yaabaha omugisha.

Balaki akagira ekiniga kingi, kwonka hakaba hatariho ekintu kyona eki Balamu yaakubaasize kukora aha kikwatiraine n'okuragura okwo. Kikaba kyagambirwe Omwoyo Orikwera. N'ahabw'ekyo Balaki akagambira Balamu kushuuma ifo, omu ruhanga, kandi ngu areebe ebicweka byabo by'enyima kureeba yaaba haabaire obundi hariho omuringo gwona ogu yaakubaasa kubakyeeneramu. Obukoryo obu Balaki yaakoreise nibwo bukoryo obu barikukoresa ebiro ebi. Ebigombe by'amadiini ebihango nibigaya ebibiina ebikye kandi ekintu kyona eki birikushanga omu bibiina bikye ekirikubaasa kubireetera kuhemuka nibikyoreka kandi bikigambira ahaiguru. Ab'omurembe baatuura omu kibi, tihariho orikukigambaho ekintu kyona; kwonka reka omwe aha ntoore agwe omu kabi haza oreebe yaaba buri rupapura rw'amahurire rutaraakibuzye eihanga. Eego, Abaisraeli bakaba baine ebicweka byabo by'enyima (obunyamubiri). Bakaba baine orubaju orwabaire rutashemereire kusiimwa; kwonka n'omu kutahikiirira kwabo, ahabw'ekigyendererwa kya Ruhanga ekirikukorera omu kutoorana, ahabw'embabazi kwonka etari mirimo, BAKABA BAINE EKICU NYOMUSHANA N'ENYOMYO Y'OMURIRO NYEKIRO, BAKABA BAINE ORUKIRI ORWATEIRWE, ENJOKA Y'OMURINGA KANDI N'OBUMANYISO N'EBY'OKUTANGAAZA. Bakaba bahamiibwe - atari ahabwabo, kureka omuri Ruhanga.

Read the full account in...
Obusingye BwÉkanisa Ya Perugamo.

Hurira, iwe Israeli! MUKAMA Ruhanga waitu n'omwe;

Eky'Ebiragiro 6:4