Yesebel, asasedoti loka Astarte.

William Branham.

Naka oitabo...
Atur naka Ekanisa loka Suatira.

Apukokinio 2:20-23,
20 Konye ejai Eong aidrot na kajo, naarai inyeinit (ingirikinit) aberu ngin Yesebel, naenyara bon anabi, isisianakini ingalari da ikabulesin tetere edotearos, ka ainyam nueinakinio aputosia.
21 Abu kainak nges apak tetere itoronikin, kwabo mam ekoto aitoronikin kotoma adoteuke.
22 Koany, acakakini nges ojam, kangul da luedoteete nepepe kanges acakakini toma aiticanio naepol, dimikito kitoronikinos kotoma aswamisioke.
23 Ido aari ikedwe katwanare. Ejenunete da ikanisan kere ebe Eong ngopengol loererei aomisio ka itauon, Eong da ainakini nginidiopet kayesi kwape ejaatar aswamisiokus.

Ibore yenisodit ido yenepol noi yenikisisiauni oni yenikamunit Yesebel nges ngin ebe MAM ngesi erai akoku naka Aburaam, karaida aitolomunioke toma atekerin nuka Isirael mam arai naka acamunio komoyo kwape ajaar ngin naka Rusi, Amoabit. Mam cut. Aberu na arai akoku naka Etibaal, ekabaka loka Sidon (1 Ikabakan 16:31), loarai esasedoti loka Astarte. Abu ngol kodum eicolong koipone loka aiyar loageikinit ngesi, Pheles. Kwangin kirasakini do oni aanyun ebe arai ngin akoku naka ekaaran. (Cut bo kisiitikini na oni nuka Kain.) Ido eipone loaraunor ngesi nako Isirael mam arai kopitenin luemoyo luabu Edeke kibwaikinite kanu acamunio naka Imo; konye abu ngesi kolom koipone loka ADUKOKIN kede Akab, ekabaka loka atekerin atomon nuka Isirael. Aso aimorikikin na kwape kidaunia oni aanyun mam arai Nakemoyo; arai naka acoa nakipugaet. Kwangin do aberu na naajai iilokina toma aima aputosia mam ajaatar keipud edio da loka araun nakamaan Edeke Ediopet Lokabeit, dimarai abu akesa ya kobu ka alosikineta nueyapoikinit nuka aitapaar Isirael awai kamaka Ejakait.

Aso Isirael (atekerin nutomon) adaunitor sek ajenun inyo arai aima itak lukesabu, konye kiton na mam ber kes agwelara cut toma aima aputosia, naarai Edeke nges amayo ido ekisil loka Musa ajai ecamunitai. Konye ameun kapak naka adukokin naka Akab neejai Yesebel, abu aima aputosia konyanyaar kotoma oipone loeyari. Arai neabu aberu na koraunor asasedoti kotoma oyekalun luabu ngesi kodukokite Astarte (Venus) ka Baal (edeke lokolong) neabu Isirael kodolunio toma akirot alopet naapolor ationis noi naka aijarake.

Kede kanu kotoma aomisio kipedori do kwana oni ageun aanyun nueuta Emoyo loka Edeke aitolomun kotoma Atur na naka Suatira. Enata kane.
Abu Akab komany Yesebel ido eswamauni ngesi ngin kwape aingalakin kacoa nakipugaet tetere itogogongi akejakanut ka ayuar da nges. Ngin nges cuticut naabu ekanisa kiswama neabu ngesi kodukokinor kakan naka Constantine. Kes luarei apotu kimorikikinos kanuka acoasinei nukipugaet, karaida apotu kesi kibwaikisi einer aitusubite bala arai ngin nakemoyo. Kwana emamei idio yenepedori aitacamun eong ebe arai Constantine Ekristayot. Arai ngol ekapirit loajaasi kede nuasubito bala iica luikristayon. Abu kinomanak imusalaban lukakwangak obukui luka iserikalei. Ngesi ekageunan loka “Knights of Columbus.” Abu kibwaik emusalaba kuju oswi loka eyekalu loanyaritai St. Sophia kanen ageikinia einono.

Arai aomisioit naka Constantine atukokin itunga kere, ikapirin, Ikristayon luedakitos ekiror bon, ka Ikristayon lukabeit. Ido adaun ipak yenedit atakani bala ti nges kepedo naarai apotu ikeyuunak lukabeit koupunos aanyun arai apedorete kesi ainyakun ngul luapotu kikaleleoros awai kamaka Akirot. Naanyuniata kesi ebe mam kes apedorete ainyakun kwi toma abeit, apotu do kesi kobuikinos atiakar awai kama ejai akuan naka acoa nakipugaet. Ne do eswamauniata kesi ngun, aponi kes konyarai luepaaritos kosodete do aire.

Mere eong kalimu kane cut ebe kija kibore ngipengin iswama kopekwana cut. Eutasi itunga kere aimorikikin. Eutasi aiwadik Ebaibuli loebuni aitelel nginitunganan arai erai ngesi Iyudayat, Itulikit arai yenika Protestant. Ejaatar kesi ka Airiamun nakec naka Nicaea konye enyaritosi kesi Ecumenical Council (Aurianet naka Aimorimorun naka Ikristayon luka Akwap kere). Ido ijeni kereka jo yen itijiete iriongeta lu kere? Itijiete kesi Ipentekotin lukabeit. Mam eong abala erionget loenyaritai Pentekosit. Abala eong ngul lueraasi Ipentekotin naarai eraasi kesi luileleba Emoyo lokalaunan ido ejaatar ka aanyuneta ka ainakineta kotoma akidingos kec naarai elosete kesi kotoma abeit.

Naabu Akab komanyia Yesebel kanuka acoa nakipugaet abu do ngesi kogwela airumeteke naurunet. Kiloma ijo neejai erionget igwela do airumetekon naurunet, onac, arai ikoto ijo aiyuun ngun arai mam. Kangoligurupu loka lua Protestant loabu kolomunitor kinga kosodi alosit abongor abu kogwela airumeteke naurunet, ido naigwelaria ijo airumetekon naurunet, iputosi ijo cut ka Esau - ipedori jo aimony ka aitoronikin kere nuikoto jo, konye mam ngin kiswamaikini jo amodiojokis. Ejai ibore idiope bon yen ipedori ijo aswam ido nges na, “Ikatunga kolomutu kotomakeng, kinyeis aimorikikin kadiakanaretake”. Aso arai mam ijo iwomit ebe enera eong abeit aso kobongok aingiset na adiopet. Epedori kereka emodiotunganan loejari alimokin eong ali tope ekanisa arai aswam naka Edeke naabu kojaunotor kaisikwarunio kosodi abongun akaulo na nges alomar toma aitemonokineta ka araun da erionget (edini)? Kosiom akirosineikon nukolo eswamas. Mam ijo ipedori adumun adiopet - emamei karaida adiopet.

Arai esawa lokiding kuare kanuka Isirael neabu ngesi kimorikikinotor kakwapin kosodi ainyekikin nukemoyo kanuka nukacoa nakipugaet. Arai esawa lokiding kuare ko Nicaea neabu ekanisa kiswama ibore ngipengin. Erai esawa lokiding kuare kwana neutatar ikanisan aimorimorun.

Aso neabu Akab komanyia Yesebel abu ngesi kocamak ngin aitwasam apesan nuka apugan kosodi adukun itogoi iyarei luapolok kanuka amaya Astarte ka Baal. Ediopet ngol loadukitoi kanuka Baal arai loapol nelosikin Isirael kere abunore kosodi aima kangina. Ido neapotu Constantine ka ekanisa kodukokinotor, abu ngesi koinak ekanisa aduketa, kosodi aibwaikin itemwan ka aputosia, kosodi aitemonokin apolousio nukokanisa nu da sek adaunito ageun aitodianar.

Naabu Yesebel kodumunia apedor naka apugan aingarakinit nges, abu ngesi kobuik itunga ekedini kosodi aiyar inabin ka isasedotin luka Edeke. Abu koroniar noi kiton neabu Eliya, ekiyakia lokapaaranike, koomitor ebe arai ngesi bon ediopet loedeuna, konye ajaatar Edeke kice bobo 7000 lumam apotu kobilakitotor akung neejai Baal. Ido kopekwana da kinga ngina kiding kiriongeta kangul luka Baptists, Methodists, Presbyterians, kicie da, ejaasi ice luepote alomun kinga kosodete abongun neejai Edeke. Akoto kereka eong ijo ajenun ebe mam eong, kwana, ido mam cut ajaunar asurokinit itunga. Erai edini - eiswamae loka aitemonokineta (erionget) nges asurokinit eong. Ejai eong asurokinit ngesi naarai elait Edeke nges.

Kwana kapaikisi ber oni ne apak edit kasodete ainyogoor kasupanut nuapotu oni ketolomutu nuikamunitos aima naka Suatira. Abala eong ebe amaete kesi Apollo (loarai edeke loka akolong) nepepe kekabaka. Aso Apollo lo anyaritai ekerebonoron nukaronok (ekepolian). Erebonori ngesi nukaronok awai kanejaasi itunga. Esirerengi ngesi kes ido arai edeke loteni mamakec. Nges arai loaomitai aisisianakin itunga. Nges etetemi nuekamunitos aima, ka itangasinei luka eyekalu, aijaanakin neejaasi idekesio, nuekamunitos asuban ka atwanare ka aijar akaulo naka atwanare. Eipone loeswamaa ngesi nu arai kotoma anabi naeboie ebwangarit koicolong loka akeje auni. Loka! Iwanyu jo ngin? Enata anabi ngin naenyaritai Yesebel ido euta akesa ya aisisianakin itunga. Ido aisisianakinike nges aijodijod ibulesin luka Edeke ka aidupor kes iswamaete adoteu. Adoteu apolouke “aima aputosia”. Ngin nges apolouke komoyo. Erai aimorikikin namam acamakinitai. Aimorikikin naka Akab ka aimorikikin naka Constantine araasi kere numam acamakinitai. Luarei apotu kiswamaata adoteu komoyo. Kanginidote kere ebuni angetakin kotoma angolol naka akim. Abala Edeke kwangin.

Naka oitabo... Atur naka Ekanisa loka Suatira.

Ŋin yenipikori, ka aricit aswamisioka kiton awasia, ainakini ŋes apolou kama ejaas atekerin,

Ŋes da icokiei kes kebela loka asuat, kwape ebwaŋabwaŋatar amoti nuka ekajean, kwape kainakinia da Papaka eoŋ;

eoŋ da ainakini ŋes etop.

Apukokinio 2:26-28