Inshita ya Lukuta lwa Tuatira.

William Branham.

Belengeni ili buku...
Inshita ya Lukuta Lwa Tuatira.

Ubusokololo 2:20-23,
Lelo ndi ne ca kukushinina ica kuti waleka fye uyo mwanakashi Yesebele, uuleilumbula kasesema, uusambilisha no kubeleleka abasha Bandi ukucito bulalelale, no kulye fyaipailwa amalambo ku milungu.
Kabili namupele inshita iya kuti alapile; lelo tafwayo kulapila ku bulalelale bwakwe.
Mona, nde muposa pa busanshi, no kuposa mu bucushi bukalamba, abacita nankwe ubucende nga tabalapile ku milimo yakwe.
Na bana bakwe nkabalofya ku mfwa; kabili inkuta shonse shikeshibo kuti ni ne kasapika wa mfyo ne mitima; kabili nkapela imwe umo umo umwabele milimo yenu.

Ica kubalilapo kabili icintu icikankala sana ico tusambilila pali Yesebele caba cakutila ena TABA mwana mwanakashi wakwa Abraham, nangula ukwisa kwakwe mu mikowa iya bana ba Israele kwisamo kumo ukwa bumupashi nga filya kwali ukwa kwa Ruti, umwina Moab. Iyo mukwai. Uyu mwanakashi ali mwana mwanakashi wakwa Ethbaal, imfumu yaku Sidon ( 1 Shamfumu 16:31), uyo wali shimapepo kuli Astarte. Apokele icipuna ca bufumu pa kwipaya uo alekonka, Pheles. E ico tulemona apa pene ukutila ali mwana mwanakashi wa cipondo. (Ici mucine cine citwibukisha pali Kaini.) Kabili inshila aishilebelamo icilundwa ca Israele ta cali ukupitila mu nshila isha bu mupashi iyo Lesa asontelele ukwisamo ukwa Bena fyalo; lelo aishile ingilamo ku CUPO kuli Ahab, imfumu iya mikowa ikumi limo iyakwa Israele. Nomba uku kwampana nge fyo twacimona takwali ukwa Bumupashi; kwali kwa mapolitiki. Kabili e ico uyu mwanakashi uyo uwaishibishe ukupepa utulubi takwete ukukabila nangu panono ukuti abe kashinshimuna uwakwa Lesa Umo uwa Cine, lelo tutile aishile no kupangila libela ukupilibwila Israele ukumutalusha ukufuma kuli Shikulu.

Nomba Israele (imikowa ikumi limo) balishibe kale fintu cali ukupepa utwana twa ng'ombe utwa golide, lelo ili ni nshi tabalati babe abaipelesha ku kushinshimuna utulubi, pantu Lesa aleshinshimunwa kabili ne funde lyakwa Mose lyalebomfiwa. Lelo ukufuma pa nshita iya cupo cakwa Ahab kuli Yesebele, ukupepa utulubi kwali lundulwike mu musango uwa bipisha sana. Cali ilyo uyu mwanakashi aishileba na mapepo mu ma tempile ayo akulile kuli Astarte (Venus) na Baali (mulungu kasuba) ica kutila Israele aishile fika pa cifulo icabipisha mu bumi bwakwe.

Nefi mu mano nomba kuti twatendeka ukumona ifyo Mupashi wakwa Lesa uletantika muli iyi Nshita ya Tuatira. Ici cili apa.
Ahab aupile Yesebele kabili acicitile nge mibombele ya mapolitiki ku kukosha ubufumu bwakwe no ku bucingilila. Ici e cilya cine ico ulukuta lwacitile ilyo lwaupilwe mu nshita yakwa Constantine. Bonse baishile pamo pa mulandu wa mapolitiki, nangula balibikileko umwela wa bumupashi kuli cena. Nomba tapali uwinga nshinina ine ukutila Constantine ali Mwinakristu. Ali musenshi ne fyalemoneka kwati fiteyo fya Bwinakristu. Apentele amalupanda aya buta pa fishangu fya bashilika. Ewa tampile Knights yakwa Columba. Abikile ulupanda pa lupungu lwakwa Saint Sophia muli co atendeke ulutambi.

Cali mano yakwa Constantine ukuleta bonse pamo, abasenshi, abaitunga ukuba Abenakristu na Benakristu aba cine. Kabili pa kashita camoneke kwati ali no kulunduluka pantu abacetekela aba cine balishile ukwisamona nga kuti babwesha balya abafumine ukutaluka ku Cebo. Ilyo bamwene ukutila te kuti bababweseshe mucine, bapatikishiwe ukutalukako ukufuma mwi bumba lya mapolitiki. Elyo ilyo bacitile, baishileitwa abafulungana no kucushiwa.

Lekeni nsose pano pene ukutila natukwata icintu cimo cine icilecitika ino ine nshita. Abantu bonse baleisa capamo. Balelemba Baibele iyo ikalinga cila muntu nangula muYuda, Katolika atemwa Protestant. Balikwata Akabungwe kabo abene aka Nicene lelo balaketa Akabungwe ka Ecumenical. Kabili bushe mwalishiba abo utu tonse utubungwe tulwisha? Balalwisha ba Pentecostal aba cine. Nshilepilibula akabungwe aketwa Pentecostal. Ndepilibula abo ababa ba Pentecostal pantu balisushiwa na Mupashi wa Mushilo kabili balikwata ifishibilo ne fya bupe mukati kabo pantu benda mucine.

Ilyo Ahab aupile Yesebele pa mulandu wa mapolitiki alishitishe ububeli bwakwe. Mukailunde ku kabungwe kabili mu kashitisha ububeli bwenu, munyina, nangula ulefwaya ukucicetekela atemwa iyo. Cila bumba lya ba Protestant ilyo lyatalile ukufumamo elyo kabili lyalibwelelemo balishitishe ububeli bwabo, kabili ilyo washitisha ububeli bobe, uba fye nga Esau _kuti walila no kulapila umusango onse ulefwailamo, lelo tekuti cikucite icisuma nangu cimo. Kwaba fye icintu fye cimo ico wingacita kabili cilya caba, “Fumeni mukati kabo, mwe bantu bandi, kabili mwikumako ku membu shabo!” Nomba nga tamuletontonkanya ukutila ndi uwa lungama, asukeni fye ili lipusho limo.

Ukuti umuntu onse uli no mweo anjebeko lukuta nshi atemwa kwenda kwakwa Lesa kwisa ukwatalile ukukwata ukupuputulwa kabili kwaishilebwela panuma lwaile mukabungwe no kwisaba icilonganino? Belengeni amalyashi yenu ayakale. Te kuti musangepo lumo - tapaba nangu lumo.

Cali ni ora iya bipisha kuli Israele ilyo ailundile ne sonde no kusha ifya Bumupashi ukuya ku fya mapolitiki. Cali ni ora iyabipisha ku Nicaea ilyo lukuta lwacitile icintu cimo cine. Caba ni ora iyabipisha nomba ukutila inkuta shileisa pamo.

Nomba ilyo Ahab aupile Yesebele amusuminishe ukubule ndalama sha buteko no ku kulilako ifimayanda fibili ifikalamba ifya ku nshinshimwinamo Astarte na Baali. Ilya imo iyo bakulile kuli Baali yali ikalamba nganshi kuli Israele onse ukwingilamo no kushinshimuna mulya. Kabili ilyo Constantine no lukuta fyaupene apele ifikulwa fya lukuta, kabili abikilemo ifipailo ne fimpashanya, kabili abungenye ubutungulushi ubo bwatendeke kale ukukosa.

Ilyo Yesebele akwete amaka aya buteko kunuma yakwe apatikishe bukapepa bwakwe pa bantu kabili aipeye bakasesema na bashimapepo bakwa Lesa. Caishile bipa nganshi icakutila Eliya, inkombe mu bushiku bwakwe, atontonkenye ashele fye eka; lelo Lesa akwete na bambi 7000 abo abasha fukamine kuli Baali. Kabili ino ine nshita nomba kunse kulya pakati ka balya ba Baptist, Methodist, Presbyterian, na bambipo., kuliko bambi abali no kufumako no kubwekela kuli Lesa. Ndefwaya imwe ukwishiba ukutila nshaba, nomba, kabili nshatala ukuba uwa kususha abantu. Caba cilonganino_imibombele yakabungwe iyo nsusha. Ningile ukukasusha pantu Lesa alikapata.

Nomba lekeni twiminine fye pali miniti pano no kubwekeshapo ifyo twaletele palwa kushinshimuna mu Tuatira. Natile ukutila baleshinshimuna Apollo (uyo uwali mulungu kasuba) ukubikapo na cilolo. Nomba uyu Apollo aleitwa 'ukanya ububifi'. Afumishe ububifi ukufuma ku bantu. Alebapala kabili ali umulungu uwa cine kuli bena. Alingile ukusambilisha abantu. Alelondolwela abantu palwa kushinshimuna, ne ntambi sha mwitempile, ukupyungila ku milungu, palwa malambo ne mfwa no mweo panuma ya mfwa. Inshila acitilemo ici cali ukupitila muli kasesema mwanakashi uyo waikele uwaputwamo pa cipuna ca tumolu tutatu. Mwe! Bushe mulecimona? Uyu pano kasesema mwanakashi uwitwa Yesebele kabili alesambilisha abantu. Kabili amasambilisho yakwe yalebeleleka abasha bakwa Lesa no kubalenga ukucito bulalelale. Nomba ubulalelale cipilibula, 'ukupepa utulubi.' Filya efyo bupilibulo bwa bumupashi bwaba. Cabo kwampana ukushasuminishiwa. Ukwampana kwa kwa Ahab no kwampana kwa kwa Costantine konse kubili kwali uku shasuminishiwa. Bonse babili bacitile ubulalelale bwa bumupashi. Onse uwa bulalelale akaposwa muli bemba wa mulilo. Lesa efyo asosa.

Belengeni ili buku...
Inshita ya Lukuta Lwa Tuatira.

Download (PDF English)... Jezebel Religion.

Kuli uyo uwacimfya, atwalilila no kucita ifyo mfwaya mpaka na ku mpela, nkamupeela amaka yakuteeka imishobo yonse.

‘Akabateeka ne nkonto ya cela mu minwe. Akabatobaula nge fipe fye bumba.’ Ayo yene e maka napokelele kuli Tata.

Kabili nkamupeela no lutanda lwa lucelo.

Ukusokolola 2:26-28