Asitaati na Baali.

William Branham.

Read the full account in...
Obusingye bw'Ekanisa ya Suatira.

Okushuuruurwa 2:20-23,
20 Kwonka Nyine eki ndikufa naiwe; ogumisiriza omukazi Yezebeeli, orikweyeta nabikazi, kandi oyegyesa abahuuku Bangye, akabahabya ngu bashambane, kandi ngu barye ebitambiirwe ebishushani.
21 Nkamuha omwanya gw'okweteisa; kwonka yaayanga kweteisa obushambani bwe.
22 Reeba, Niinyija kumunaga aha kitabo n'abashambane be omu kubonabona kwingi, ku baraabe bateeteisize by'emicwe ye;
23 Kandi n'abaana be Ndyabaitsa rufu; amakanisa goona garyamanya ngu Niinye ocaaka emitima n'emyoyo; kandi Ndyazimuurira omuntu weena omuriimwe ebishemereire ebi yaakozire.

Eky'okubanza kandi ekintu kikuru munonga eki turikwega ahari Yezebeeli kiri ngu TARI muhara wa Abrahamu, n'okutaaha kwe omu nganda za Israeli tikurabaire kw'omwoyo nk'okwa Ruusi, Omumoabukazi. Ngaaha sebo. Omukazi ogu akaba ari muhara wa Isi-baali, omugabe w'Abasidoni (1 Bagabe 16:31), owaabaire ari omunyamurwa w'emandwa Asitaati. Isi-baali akaba atungire obutegyeki ahabw'okwita owaabaire amubandiize, Filiizi. N'ahabw'ekyo nitureeba ahonaaho ku yaabaire ari muhara w'omwitsi. (Eki buzima nikitwijutsya Kaini). Kandi n'omuringo ogu yaahindukiire ekicweka kya Israeli gukaba gutari kurabira omu mihanda y'omwoyo ei Ruhanga yaabaire ataireho ahabw'Abanyamahanga kwikirizibwa kutaahamu; kureka akataahamu ahabw'OKUSHWERWA Ahabu, omugabe w'enganda ikumi za Israeli. Hati okwegaita oku nk'oku twaheza kureeba kukaba kutari kw'Omwoyo; kukaba kuri okw'eby'obutegyeki. Kandi omukazi ogu owaabaire ayemariire omu kuramya ebishushani akaba ataine kyetengo kyona ky'okuramya Ruhanga Omwe w'Amazima, kureka akaija n'ebigyendererwa ebi yaabaire yaayerahiire biri eby'okuhindura Israeli kuruga ahari Mukama. Hati Israeli (ezo nganda ikumi) ekaba yaaherize kumanya eki kyabaire kiri okuramya enyana z'ezaabu, kwonka nabwo bakaba batakeeheereireyo kimwe kuramya ebishushani, ahakuba Ruhanga akaba naaramibwa kandi n'ekiragiro kya Musa kikaba nikiikirizibwa. Kwonka okuruga omu bwire obu Ahabu yaashwereiremu Yezebeeli, okuramya ebishushani kukeeyongyera omu muringo ogurikutiinisa munonga. Obwire obu omukazi ogu yaahinduka omunyamurwa-kazi omuri hekalu ezi yaayombekyeire emandwa Asitaati (Venus) na Baali (ruhanga w'eizooba) nibwo Israeli yaahika omu bwire bugumire omu kubaho kwayo.

i j Nitukiteekateeka ahari eki nitubaasa hati kutandika kureeba eki Omwoyo wa Ruhanga arikworeka omu Busingye obu obwa Suatira. Nkiki hanu.
Ahabu akashwera Yezebeeli kandi yaakikora nk'akakoryo k'eby'obutegyeki okuha amaani obugabe bwe kandi n'okuburinda. Ekyo nikyo buzima ekanisa yaakozire obu yaashwerwa omu butegyeki bwa Konsitantiini. Bombi bakeegaita hamwe ahabw'enshonga z'eby'obutegyeki, n'obu baakiteireho endeebeka y'okuba eky'omwoyo. Hati tihariho n'omwe orikubaasa kuunyikiririsa ngu Konsitantiini akaba ari Omukristaayo. Akaba ari omupagaani aine ekyabaire nikishusha ekirikuranga Omukristaayo. Aha ngabo z'abaserukare akateeraho ebishushani by'emisharaba erikwera. Niwe yaatandikireho ekibiina ky'Abarinzi ba Kolumba. Akata omusharaba aha munaara gw'ekanisa y'Orikwera Sofiya omu buryo obwo yaatandikaho omugyenzo.

Ekaba eri enteekateeka ya Konsitantiini kureeta buri omwe kuba bamwe, abapagaani, Abakristaayo abatahamize n'Abakristaayo b'amazima. Kandi ahabw'omwanya mukye kikareebeka orikushusha oti akaba naija kusingura ahakuba abaikiriza b'amazima bakaija kureeba yaaba baabaire nibabaasa kugarura abo abaabaire barugire aha Kigambo. Ku baareebire ngu bakaba batarikubaasa kubagarura omu mazima, bakagyemeserezibwa kwecwaho nibaruga ahari abo ab'ekibiina ekikwataniise n'eby'obutegyeki. Kandi ku baakikozire, baayetwa empabe reero baahiiganisibwa.

Ka ngambe hanu ku twine ekintu nikyo kimwe ekirikugyenda omu maisho na hati. Abantu boona nibeegaita hamwe. Nibahandiika Baiburi erikwija kubaasikira buri omwe k'abe Omuyudaaya, Omukatoriki nari Omupurotestante. Baine Orukiiko rwabo rwa Niika kwonka nibarweta Orukiiko Orurikugaita Amakanisa. Beitu noomanya abu ebibiina by'amadiini byona birikurwanisa? Nibirwanisa Abapentekoote b'amazima. Tindikumanyisa ekibiina ky'ediini ekirikwetwa Abapentekoote. Nimmanyisa abo abari Abapentekoote ahabw'okuba baijwire Omwoyo Orikwera kandi baine Obumanyiso n'ebiconco ahagati yaabo ahabw'okuba nibagyendera omu mazima.

Ahabu ku yaashweire Yezebeeli ahabw'enshonga z'eby'obutegyeki akaguza obuhunguzi bwe bw'omujigaijo. Waayegaita n'ekibiina ky'ediini nooba waaguza obuhunguzi bwawe bw'omujigaijo, ow'eishe-emwe, yaaba orikwenda kukiikiriza nari otarikwenda. Buri kibiina ky'ediini ky'Abapurotestante ekirarugireyo bwanyima kikagarukayo bakaguza obuhunguzi bw'omujigaijo bwabo, kandi ku oraaguze obuhunguzi bwawe bw'omujigaijo, nooba ori nka Esau - noobaasa kurira kandi oyeteise byona ebi orikwenda, kwonka tihaine eki kirikwija kukugasira. Hariho ekintu kimwe kyonka eki orikubaasa kukora kandi ekyo ni, “Mukirugyemu imwe bantu Bangye 'mwe, kandi murekye kukwatanisa nakyo omu bibi byakyo.” Hati ku oraabe nooteekateeka ngu timpikire, garukamu ekibuuzo eki kimwe kyonka. Hariho omuntu weena ohuriire orikubaasa kungambira ekanisa nari shi enkora ya Ruhanga eragizireho okusisiimuka reero ekagaruka ahanyima y'okwekoramu ekibiina ekaba ekigombe ky'ediini? Shoma ebyafaayo byawe. Tokaagibona - n'obu yaakuba emwe.

Ekaba eri eshaaha ya nyekiro omu itumbi ahari Israeli obu yaayegaita hamwe n'ensi etyo ekatsigaho eby'Omwoyo ahabw'eby'obutegyeki. Ekaba eri eshaaha y'eitumbi ahari Niika obu ekanisa yaakozire ekintu nikyo kimwe. N'eshaaha y'eitumbi hati obu amakanisa garikwegaita hamwe.

Hati Ahabu ku yaashweire Yezebeeli akamwikiriza kutwara esente z'eihanga atyo yaayombeka amaju abiri mahango munonga g'okuramizamu emandwa Asitaati na Baali. Egyo eyaabaire eyombekyeirwe Baali ekaba eri mpango ekirikugasha ahabw'Abaisraeli boona kwija bakaramizamu. Konsitantiini n'ekanisa ku baashweraine akaha ekanisa ebyombeko, kandi yaataho amatambiro n'ebishushani, atyo yaatebeekanisa abakuru b'ediini omu madaara g'ebitiinisa agaabaire gaatandikire kureebeka.

Yezebeeli ku yaatungire obushagiki n'obushoboorozi bwa gavumenti yaagyema ediini ye aha bantu kandi yaita baanabi n'abanyamurwa ba Ruhanga. Kikaba kubi munonga okuhitsya obu Eliya, entumwa y'omu bwire bwe, yaateekateekire ngu akaba ariwe wenka owaabaire atsigaireho; kwonka Ruhanga akaba aineyo 7000 abandi abaabaire batakatsimbiraga Baali amaju. Kandi na hati aheeru okwo omuri ebyo bigombe by'amadiini by'Ababaputisiti, Abametsodisti, Abapuresibateeri, n'ebindi, hariyo bamwe abaraije kurugamu bagarukire Ruhanga. Niinyenda ngu mukimanye ku ntarikuhakanisa, hati, kandi tinkahakanisaga abantu na kakye. N'ekigombe ky'ediini - entwaza y'ekibiina ky'ediini niyo ndikuhakanisa. Ninteekwa kukihakanisa ahakuba Ruhanga naakyanga.

Hati ka twemerere hanu edakiika reero tugarukye tweijutsye ebi twihiremu ebirikukwata aha by'okuramya omuri Suatira. Naagizire nti bakaba nibaramya Apollo (owaabaire ari ruhanga w'eizooba) hamwe n'omugabe. Hati Apollo ogu akaba naayetwa “orikwihaho emikyeeno.” Akaba aiha emikyeeno aha bantu. Abaha omugisha atyo yaaba ruhanga buzima aharibo. Akaba ashemereire kwegyesa abantu. Akaba abashoboororera eby'okuramya, n'emigyenzo ya hekalu, okuheereza baaruhanga, aha bitambo n'okufa n'amagara ahanyima y'okufa. Omuringo ogu yaabaire akoramu eki gukaba guri okurabira omuri nabikazi owaabaire ashutama atembirwe omwoyo gw'emandwa aha ntebe y'amaguru ashatu. Mugyenzi! Waakireeba? Ngugu hanu ogwo nabikazi orikwetwa Yezebeeli kandi orikwegyesa abantu. Kandi okwegyesa kwe nikuhabisa abaheereza ba Ruhanga kubareetera kushambana. Hati okushambana nikimmanyisa “okuramya ebishushani.” Ago nigo makuru gaakyo ag'omwoyo. N'okwegaita okutari kw'ebiragiro. Okwegaita kwa Ahabu n'okwegaita kwa Konsitantini kwombi kukaba kutari kw'ebiragiro. Bombi bakashambana omu buryo bw'omwoyo. Buri mushambani omuheru gwe guryaba omu nyanja y'omuriro. Ruhanga nikwo yaagambire.

Read the full account in...
Obusingye bw'Ekanisa ya Suatira.

Download (PDF English)... Jezebel Religion.

Orikusingura, akaguma naakora emirimo Yangye okuhitsya aha muheru, Ndyamuha obutegyeki aha mahanga goona,

Kandi aryabategyeka n'enkoni y'ekyoma, nk'oku omuntu ayatagura enyabya z'eibumba, Nkaanye oku naahairwe Tata obutegyeki;

Kandi Ndyamuha enyonyoozi y'obusheeshe.

Okushuuruurwa 2:26-28