Inshita ya Lukuta Lwa Laodikea.

William Branham.

Belengeni ili buku...
Inshita ya Lukuta Lwa Laodikea.

Ukusokolola 3:15-19,
15 Naishibe milimo yobe, tauli uwatalala nangu uwakaba: Kuti natemwa nga wali uwatalala nangu uwakaba.
16 E ico kanshi pantu uli uwa cifulefule, kabili tauli uwakaba nangu uwatalala Nkakufwisa mu kanwa Kandi.
17 Ico utila, Ndi wa fyuma, ukucindama ni ncindama, kabili nshilekabila kantu nangu kamo; kabili tawishibe ukuti uli uwa nkumbabulili, kabili umulanda, kabili umubusu, kabili impofu, kabili uwa bwamba:
18 Ndekupanda amano ushite kuli Ine golide uwalopolwa ku mulilo, ukuti ucindame; na malaya ayabuta, ukuti ufwale, kabili ukuti shimoneka insoni sha bwamba bobe; no muti wakusuba pa menso, ukuti umone.
19 Bonse abo Natemwa, Ndabebaula no kufunda: e ico cincila, no kulapila.

Nge fyo tubelengele ifi capamo ndi uwashininkisha ukutila na mumona ukutila Umupashi tausoselepo nangu cimo icintu icisuma pali iyi nshita. Alepanga imilandu ibili no kuleta ubupingushi Bwakwe pali bena.

(1) Ukusokolola 3:15,16 “Naishibe milimo yobe, tauli uwatalala nangu uwakaba: iye nga waba uwatalala na pamo uwakaba. E fyo ico uli uwa cifulefule, kabili tauli uwakaba nangu uwatalala, nkakufwisa mukanwa Kandi.”

Twalalolekesha pali ici bwino bwino. Yalesoso kutila ili bumba ilya nshita ya Laodikea yabe ya cifulefule. Icifulefule cifwaikwa ubupingushi ukufuma kuli Lesa. Ubupingushi bwa kutila bakabafwiswa mukanwa Kakwe. Pano epo tatulefwaya ukuluba nge fyo abantu abengi bacita. Bena mukukana kwata amano basoso kutila Lesa kuti akufwisa ukufuma mu kanwa Kakwe kabili cilya cileshininkisha ukutila takwaba icintu ica musango ifi nge cine icili conse kwisambilisho ilya kucingilila ukwaba Mushilo.
Ndefwaya ukulungamika ukutontonkanya kwenu ino ine nshita. Iyi vesi tayapelwa ku muntu umo. Yapelwa ku lukuta. Ena alelanda ku lukuta. Nacimbi, nga muli no kusunga fye Icebo mu mutima muli no kwibukisha ukutila tapali nangu pamo e po cisoso kutila twaba MUKANWA ka kwa Lesa. Twalilembwa mu ndupi Shakwe.

Twaba mu cifuba Cakwe. Kunuma kulya, mu nshita ishi shaishibikwa ilyo ta kulaba inshita twali mu mano Yakwe. Twaba mwi cinka Lyakwe, kabili mu mulemfwe Wakwe, lelo tatwatala mukanwa Kakwe. Lelo ni cinshi icili mukanwa ka kwa Shikulu? Icebo cili mukanwa Kakwe.

Mateo 4:4, Lelo Alyaswike ati, “Calembwa aciti, Te kucilyo ceka umuntu ekalila no mweo, lelo ku Cebo conse icifuma ku kanwa ka kwa Lesa.”
Icebo cilingile ukuba mutunwa twesu, na ifwe. Nomba twalishiba ukutila ulukuta e mubili Wakwe. Luli pano ukusende cifulo Cakwe. Ni cinshi icili no kuba mu kanwa ka lukuta? ICEBO.
Petro 4:11,
“Ngo muntu alanda, alande ngo ulande fyebo (Icebo) fya kwa Lesa.”
Petro 2:1-21,
“Pantu ku kufwaya kwa buntu takwaleta ukusesema nangu limo: lelo ni pa kobelwa ku Mupashi wa Mushilo epo abantu ba mushilo balandile.”
Nomba ni cinshi ica lubana na ba bantu aba bushiku bwa kulekelesha? BENA NABATALUKA UKUFUMA KU CEBO. BENA TABALI NAKABILI ABAKABA PALWA CENA. BENA BALI ABACIFULEFULE PALWA CENA. Nalashininkisha cilya ino ine nshita.

Ba Baptist balikwata ifisumino fyabo ne fishilano ifyashintilila pa Cebo kabili te kuti mubasunkanye. Basoso kutila inshiku shabutumwa shafisungusho shalipita kabili ta kwaba Ukubatishiwa na Mupashi wa Mushilo, panuma ya kucetekela. Ba Methodist basosa (ukushintilila pa Cebo) takwaba ulubatisho lwa mu menshi (ukusansa te lubatisho) kabili ukutila ukusangululwa e Lubatisho lwa Mupashi wa Mushilo. Ulukuta lwa kwa Kristu bashintilila pa lubatisho ulwa kupilibula kabili mu milandu ingi balebishiwa aba bembu abauma kabili no kufuma aba bomba. Nalyo line balanda ukutila isambilisho lyabo lyashintilisha pa Cebo. Konkeni fye umushilwa kabili iseni kuli ba Pentecostal. Bushe balikwata Icebo? Besheni ne Cebo no kumona. Bali no ku kana Icebo pa fya kumfwa umfwa inshita fye ili yonse. Nga cakutila waleta ica kumonekela icapala amafuta no mulopa ne ndimi kabili ne fishibilo fimbi, nga cakutila cili mu Cebo atemwa iyo, atemwa nalimo cailulwa bwino bwino ukufuma mu Cebo, icintubwingi cili no kuwila cilya. Lelo cinshi ica citika ku Cebo? Icebo calibikwa kumbali, e ico Lesa alesosa, “Ndeisa mukumukanya imwe bonse. Ndi no kumufwisa mukanwa Kandi. Ino e mpela. Ba cinelubali ukufuma ku nshita cinelubali, nsha monapo nangu kamo lelo abantu ukusansabika icebo cabo abene pa mulu wa Candi. E ico ku mpela ya ino nshita ndekufwisa mu kanwa Kandi. Lyena na cipwa. Ndi no kulanda fye bwino. Ee, ndi pano mukati ka Lukuta. Ameni wakwa Lesa, uwa cishinka kabili uwa cine ali no kuisokolola Umwine kabili cikaba UKUPITILA MULI KASESEMA WANDI.” Owe ee, cilya e fyo cili.

Ukusokolola 10:7,
“Lelo mu nshiku she shiwi lyakwa malaika uwalenga cinelubali, ilyo alaswa alishemo, elyo cikafishiwapo ica nkama cakwa Lesa ifyo Alandile kubasha Bakwe bakasesema.”
Mwacimone co. Ena aletuma kasesema uwashininkishiwa. Ena aletuma kasesema panuma mupepi ne myaka amakana yabili. Ena aletuma umo uyo uwaba ukutali na kabungwe, amasambililo, ne sonde ilya bukapepa icakutila nge fyo Yohane Kabatisha na Eliya uwa kale, Ena akomfwa fye ukufuma kuli Lesa kabili akakwata “efyo asosa Shikulu” no kulandilako Lesa. Ena akaba akanwa ka kwa Lesa kabili ENA, NGE FYO CALANDWA MULI MALAKI 4:6, AKABWESHA IMITIMA YA BANA UKUBWEKELA KULI BASHIBO. Akabwesha abasalwa aba bushiku bwa kulekelesha kabili bakomfwa kasesema uwashininkishiwa ukupela icine cituntulu nga filya cali na Paulo. Akabwesesha icine nge fyo bacikwete. Kabili balya abasalwa pamo na ena muli bulya bushiku e balya abo mucine bakalangisha Shikulu no kuba Umubili Wakwe kabili ukuba Ishiwi Lyakwe no kubomba imilimo Yakwe. Aleluya! Bushe mulecimona?

Ukutontonkanya pa kashita ukwe lyashi ilya kale ilya lukuta lili no kushininkisha ifyo ili tontonkanyo lili ilyapwililika. Mu Nshita Sha Mfifi Icebo cali mupepi no kulufishiwa conse ku bantu. Lelo Lesa atumine Luther ne CEBO. Ba Lutheran balandileko Lesa pali ilya nshita. Lelo balibungenye, elyo kabili Icebo icasanguluka calilufiwe pa tubungwe utushintilila ku cishilano ne fisumino, kabili te ku Cebo ica anguka. Bena nakabili te kuti balandileko Lesa. E lyo Lesa atumine Wesley, kabili ena ali ishiwi ne Cebo mu bushiku bwakwe. Abantu aba sendele ubusokololo bwakwe ukufuma kuli Lesa baishileba inkalata isha mweo ishibelengwa no kwishibikwa ku bantu bonse aba ku nkulo shabo. Ilyo ba Methodist bafililwe, Lesa alimishe bambi kabili e ico calitwalilile ukupita mu myaka mpaka muli buno bushiku bwa kulekelesha kuliko na bambi abantu mu mpanga, abo ukupitila mu nkombe yabo bakaba ishiwi ilya kulekelesha ku nshita iya kulekelesha.

Ee mukwai. Ulukuta taluli nakabili “akanwa” kakwa Lesa. Lwena lwaba akanwa ka luko ulwine. E ico Lesa alepilibukila pali lwena. Akesa lupwisha ukupitila muli kasesema na nabwinga, pantu ishiwi lya kwa Lesa likaba muli Wene. Ee e fyo lili, pantu isoso kutila mu cipandwa ica kulekelesha ica Kusokolola vesi 17 “Umupashi na nabwinga batila iseni.” Umuku naumbi isonde likomfwa ukufuma fye kuli Lesa nga filya pa Pentecosti; lelo mucine nabwinga wa Cebo bakamukana nge fyo cali mu nshita ya ntanshi.

Nomba alibilikisha kuli ino nshita ya kulekelesha, “Mwalikwata Icebo. Mwalikwata ama Baibele ayengi ukucila lyonse, lelo tamulecita icintu nangu cimo pa Cebo kano fye ukucipatulula no kucipandaula mutupimfya, ukusenda ifyo mulefwaya no kusha ifyo tamulefwaya. Tamukwete ukutemwa MUKWIKALILA cena, lelo ukulanshanya cena. Kuti natemwa waba uwatalala atemwa uwakaba. Nga wali uwatalala no kukana cena, kuti naiminina cilya. Nga kuti mwaba abakaba sana ukwishiba icine ca ciko no kwikalila cena, ine kuti na mutasha pali cilya. Lelo ilyo musenda fye Icebo Candi no kukana cicindika, ine mukubwekesha ningile ukukana mupelo mucinshi. Nkamufwishila kunse pantu Ine mulengu'mfwisho muselu.”

Nomba umuntu uuli onse alishiba ukutila caba amenshi aya cifulefule aya mulenga imwe ukulwala mu mala. Nga mulefwaya ukuluka, amenshi aya cifulefule e cintu icawama ukunwa. Ulukuta lwa cifulefule na lulenga Lesa ukulwala kabili Ena nabilisha ukuti Akalufwisa kunse. Ciletwibukisha ifyo Ena aumfwile ilyo takulaba ilyeshi, bushe tefyo cili?

Owe, nga cali kuli Lesa ulukuta lwali ulwatalala atemwa ulwakaba. Icawamishapo, lwalingile ukuba ulwakukabila (ukukaba). Lelo te fyo lwaba. Ubupingushi nabupelwa. Lwena taluli nakabili ishiwi lyakwa Lesa kwi sonde. Lwena luli no kusunga efyo luli, lelo Lesa alesosa iyo.

Owe, Lesa acili alikwata ishiwi ku bantu ba mwi sonde, nge fyo Apela ishiwi kuli nabwinga. Lilye shiwi lili muli nabwinga nge fyo tusosele kabili twalalandapo ifingi pali cilya pantanshi.

(2) Ukusokolola 3:17-18,
Ico utila, ndi wafyuma, ukucindama ni ncindama, kabili nshilekabila kantu nangu kamo; kabili tawishibe ukuti uli uwa nkumbabulili, kabili umulanda kabili umubusu, kabili impofu kabili uwa bwamba; Ndekupanda amano ushite kuli Ine, golide uwalopolwa ku mulilo, ukuti ucindame; na malaya ayabuta ukuti ufwale, kabili ukuti shimoneka insoni sha bwamba bobe; no muti wa kusuba pa menso, ukuti umone.

Nomba lolekesheni ishiwi lyakubalilapo ilya iyi vesi, “ico utila.” Mwamona, bena balelanda. Bena balelanda nga kanwa ka kwa Lesa. Ici cishininkisha filya fine fye ifyo na cisosa ama vesi 16-17 yapilibula. Lelo nangula basosa cilya, cilya tacilecilenga ukuba icalungama. Ulukuta lwa Katolika lusoso kutila lulalandilako Lesa, ukusosa lwena e shiwi ilya shininkishiwa ilya kwa Shikulu. Nibanga abantu ababifi nganshi kuli bumupashi ukucila ifyo naishiba, lelo balaleta ukulingana ne mbuto iyaba muli bena, kabili twalishiba uko ilya mbuto yafuma, bushe tatwaishiba?

Luleitakisha mu cinso cakwa Yakobo 2:5-7,
“Umfweni, mwe ba munyinane batemwikwa, Bushe Lesa tasalile ababusu ba pano isonde kukuba abacindama mu citetekelo, kabili impyani sha bufumu ubo Alaile ukupela aba Mutemwa? Lelo imwe mwasulo mubusu. Bushe te bantu bafyuma e baumyo lupaka pali imwe, no kumukulila apa kupingwila? Bushe te bene e bapontele Shina lisuma ilyo mwainikwako?”
Nomba NSHILE eba ukutila muntu wa cuma te kuti abe uwa bu Mupashi, lelo ifwe bonse twalishiba ukutila Icebo cisosa ukuti banono ababe fyo. Caba ababusu e bafula mu mubili uwa lukuta ulwa cine. Nomba kanshi, ngo lukuta lwaisula ne cuma, twaishiba fye icintu fye cimo; “Ichabod” nailembwa pa mpongolo yaluko! Te kuti mukane cilya, pantu cilya e Cebo.

Belengeni ili buku...
Inshita ya Lukuta Lwa Laodikea.

Mona, ninjimina pa mwinshi, no kukunkunsha: ngo muntu aumfwe shiwi Lyandi, no kwisulako ku mwinshi, ndi no kwingila kuli wene, no kulila pamo nankwe umulalilo, na wene alelila pamo na Ine.

Uwacimfya Nkamupelo kwikala pamo na Ine pa cipuna Candi ca bufumu, ifyo na ine na cimfishe, no kwikala pamo na Tata pa cipuna Cakwe ca bufumu.

Uukwete ukutwi, omfwe ico Umupashi ulesosa ku nkuta.

Ukusokolola 3:20-22