Mul’ata Yesuus Kiristoos.

William Branham.

Ergaa dubbisaa...
Mul’ata Yesuus Kiristoos.

Yeroo ammaa kana, yeroo Caaffanni Qulqullaa'oon gar malee itti jal'ifan keessa jiraachaa jirru kanatti dhugaa waa'ee Waaqummaa arguuf mul'ata dhugaa Hafuura qulqulluun kenname akka nu barbaachisu nan amana. Garuu waldaan mo'attu, waldaan injifattu mul'ata irratti waan ijaaramtuuf Waaqayyo dhugaa Isaa akka nuuf mul'isuuf dhimminee eegganna.

Haa ta'u malee, dhugaa dubbachuuf cuuphaa bishaanii irratti mul'ata isin hin barbaachisu. Inni ifaan ifatti fuula keessan dura jira waan ta'eef. Ergamoonni Gooftaa irraa kallattiidhaan Maqaa Abbaatti, kan Ilmaatti, kan Hafuura Qulqulluuttis akka cuuphaniif abboommii fudhatanii, ergasii fedha isaaniitiin karaa irraa maqanii abboomamuu diduu keessatti ni kufuun daqiiqaa tokkoof ni danda'amaa? Maqichi maal akka ta'e isaan ni beeku turan, Caaffata Qulqullaa'oo keessattis Maqaa Gooftaa Yesuus Kiristoosiin ala karaa biraatiin iddoon itti namoonni cuuphaman tokko illee hin jiru.

Macaafni Hojii Ergamootaa waldaa amantii hojiitti hiikte akka taate amanamaadha, isaan akkasitti cuuphan erga ta'ee karaan ittiin cuuphan karuma sana ta'a. Amma sun waan ulfaataadha jettanii yaaddu yoo ta'e, waa'ee kanaa immoo maal yaaddu laata? Namni Maqaa Gooftaa Yesusiin hin cuuphamne kamuu irra deebi'ee cuuphamuu qaba.

Hojii Ergamootaa 19:1-6,
“Apholos amma illee Qorontos utuu jiruu, Phaawulos kutaa biyya gara olii keessa darbee, Efesoon dhufe. Achitti immoo bartoota gooftaa tokko argatee,“Apholos amma illee Qorontos utuu jiruu, Phaawulos kutaa biyya gara olii keessa darbee, Efesoon dhufe. Achitti immoo bartoota gooftaa tokko argatee, “Yeroo amantan hafuura qulqulluu fudhattaniittuu?” isaaniin jedhe. Isaan immoo, “Hafuurri qulqulluun akka jiru iyyuu nuyi hin dhageenye” jedhanii deebisan. Kana irratti Phaawulos, “Yoos immoo isin maalitti cuuphamtan ree?” jedhe; isaan immoo, “Cuuphaa Yohannisitti” jedhan. Phaawulos yommus, “Yohannis isa booddee isa dhufuuf turetti, kana jechuunis Yesusitti, akka amanan saba barsiisee, cuuphaa geddarannaa yaada garaa cuuphe” jedhe. Jarri kana dhaga'anii maqaa gooftaa Yesusitti cuuphaman. Yeroo Phaawulos harka isaa isaan irra kaa'etti hafuurri qulqulluun isaan irratti bu'e; isaan afaan hin beekamneen haasa'an, raajiis in dubbatan.”

Egaa akkasuma ta'uu qaba. Namoonni gaggaariin Efesonitti argaman sunneen waa’ee Masiihii isa dhufuuf jiruu dhaga’anii turan. Yohaannis waa'ee Isaa lallabee darbe. Isaan cuuphaa cubbuuttii yaada garaa geeddarachuu cuuphamaniiru, Yesusitti amanuuf Of FUULDURA ilaalaa turan. Amma garuu OF DUUBATTI gara Yesuus ilaalanii DHIIFAMUU cubbuu argachuuf yeroon itti cuuphaman ga'eera. Yerichis yeroo isaan Hafuura Qulqulluu itti fudhatan ture. Maqaa Gooftaa Yesuus Kiristoosiin yommuu cuuphamanitti Phaawuloos harka isaa isaan irra kaa'e, Hafuurri Qulqulluus isaan irra bu'e.

Oo, namoonni jaallatamoon Efesoonitti argaman sun namoota gaggaarii turan; namni mirga nageenyaa akka qabu bare kamuu ni cuuphame. Fageenya dheeraa hammamii deemanii akka dhufan hubadhaa. Masiihi isa in dhufa jedhame simachuuf karaa dheeraa akkasii deemanii dhufan. Isaan Isaaf of qopheessaa turan. Kana hundumaa keessatti garuu akka Inni isaan jala darbe argitanii? Inni erga dhufee deebi'ee deemee tureera. Isaan Maqaa Gooftaa Yesuus Kiristoositti cuuphamuu barbaadan. Isaan Hafuura Qulqulluun guutamuu barbaadan. Maqaa Gooftaa Yesuus Kiristoositti cuuphamtaniittu yoo ta'e, Waaqayyo Hafuura Isaatiin isin guuta. Kun Dubbii Waaqayyoo ti.

Hojiin Ergamootaa 19:6 inni duraan dubbifne sun fiixa ba'iinsa Hojii Ergamootaa 2:38 ture;
“Yaada garaa keessanii geddaradhaa; cubbuun keessan akka isiniif dhiifamuuf, tokko tokkon keessan maqaa Yesus Kristositti cuuphamaa; kennaa hafuura qulqulluus in fudhattu.”

Ilaalaa, Phaawuloos geggeessaa Hafuura Qulqulluutiin waanuma Pheexiroos geggeessaa Hafuura Qulqulluutiin dubbatee ture dubbate. Wanti dubbatames jijjiiramuu HIN DANDA'U. Guyyaa Pheenxeqoosxee irraa kaasee hanga namni fo'ame inni dhumaa cuuphamutti isuma sana ta'uu qaba.

Galaatiyaa 1:8,
“Haa ta'u iyyuu malee, ani yookiis ergamaan waaqa irraa tokko, wangeela isa nuyi kanaan dura isinitti himnettii (lallabnettii KJV) kan gargar ba'e yoo isinitti hime (lallabe KJV), abaaramaa haa ta'u!”

Amma warra Tokkummaa (Oneness) keessaa kaan keessan dogoggoraan cuuphxu. Isin akka waan bishaan keessa gadi seensifamuun nama fayyisuutti, lammata dhalachuutti nama cuuphxu. Lammata dhalachuun bishaaniin argama miti; inni hojii Hafuura Qulqulluu ti. Namichi geggeessaa Hafuura Qulqulluutiin abboommii, “Yaada garaa keessanii geeddaradhaa, tokkoon tokkoon keessan Maqaa Gooftaa Yesusitti cuuphamaa” jedhu kenne, bishaanni lammata nama dhalachiisa hin jenne. Cuuphaan bishaanii ragaa “Yaada garaa nama hin ceephaane argachuudhaaf, Waaqayyotti himatan” qofa akka ta'e dubbateera. Inni kanuma duwwaa dha.

1 Pheexiroos 3:21,
“Kunis fakkeenya cuuphaa isa isin amma ittiin ooltanii ti; cuuphaan waan ittiin karaa du'aa ka'uu Yesus Kristos, yaada garaa nama hin ceephaane argachuudhaaf, Waaqayyotti himatanii dha malee, waan ittiin xurii dhagnaa dhiqatan miti.”
Kana nan amana.

Namni wayii kan yaada sobaa wayii isa cuuphaa bishaanii karaa Maqaa Gooftaa Yesuus Kristoosiin raawwatamuun ala karaa biraa akka raawwatamu seebaab mirkanessuu danda'a jedhu qabu yoo jiraate, innumti seenawwan dubbisee ofuma isaatii akka bira ga'uuf isa nan gorsa. Kan armaan gadii kun ragaa dhugaa waa'ee Cuuphaa kan Dh.K.B bara 100tti Roomaatti adeemsifamee yoo ta'u, Barruun 'TIME' Muddee 5,1955tti irra deebi'ee maxxanseera.

“Diyaaqoniin harka isaa ol kaasnaan, Publiyoos Deesiyoosis karaa balbala cuuphaa ol seene. Kuufama bishaanii hamma mudhii isaatti guute keessa dhaabatee kan ture Maarkus Vaaskaa nama qoraan gurguruun jiraatu ture. Publiyoos gara bishaan kuufamaa isa bukkee jirutti yummuu seenu Maarkus in seeqa ture. 'Kreediis?' jedhee gaafate. 'Kreedoo' jedhee deebiseef Publiyoos. 'Fayyina koo Yesuus Kiristoos isa bara Phoonxos Philaaxos mo'etti fannifameen akkan argadhe nan amana. Isaa wajjin Jireenya Bara Baraa argadhuuf Isaa wajjin du'eera.' Achiis bishaan kuufamaa sana keessatti dugdaan duubatti kufuuf yommuu inni of gadhiisu harki jabaataan isa deeggaraa akka jiru dhagnaan ni beeka ture, achumaanis sagaleen Maarkus kan, 'Maqaa Gooftaa Yesusitti sin cuupha' jedhu dhaga'ee ture-akkuma bishaan diilalla'aan isa irra aanee isa awwaaletti kana dhaga'e.”

Hanga yeroo dhugaan badeetti (hanga bara dhumaa kanaatti dhugaan sun iddootti utuu hin daabi'in ture - kunis Niiqiyaa irraa qabee hanga jijjiirama jaarraa kanaatti kan ture dha) namoonni Maqaa Gooftaa Yesus Kiristoositti cuuphamaa turan. Amma garuu iddootti deebi'eera. Yeroo Hafuurri Qulqulluu mul'ata kennuu barbaadutti Seexanni isa ittisuu hin danda'u.

Eeyyee, Waaqayyoliin sadii utuu jiraatanii silaa, Abbaatti, Ilmatti, Hafuura Qulqulluuttis cuuphuu dandeessu turtan. Mul'anni YOHAANNISIIF KENNAME garuu WAAQAYYO TOKKO akka jiruu fi Maqaan Isaas GOOFTAA YESUUS KIRISTOOS akka ta'e dha, isinis Waaqayyo TOKKICHA sana duwwaatti cuuphaa. Kanaafidha Pheexiroos akkuma gaafa Pheenxeqosxeetti cuupheetti kan cuupheef. Inni Mul'ata isa, “Egaa Waaqayyo, YESUUS isa isin muka irratti fanniftan kana GOOFTAADHAA FI KIRISTOOS akka godhe, Israa'elonni hundinuu utuu hin mamin haa beekan” jedhuuf amanamaa ture. Inni kunoo, “GOOFTAA YESUUS KIRISTOOSI.”

Yesuus Gooftaa fi Kiristoos 'LAMAANUU' yoo ta'e, Inni (Yesus) “Abbaa, Ilma, Hafuura Qulqulluu”tu Qaama TOKKO ta'ee nama foonii keessan mul'ate malee kan biraa ta'uu hin danda'u. Innis “Waaqayyo qaamolee sadiin jira, sadan tokkummaan ykn sillaaseen (trinity) haa eebbifamu” isa jedhan MITI, WAAQAYYO TOKKOtu, QAAMA TOKKOtu (ONE PERSON) maqaalee ulfinaa gurguddoo sadii qaba, hojiiwwan sadii kan maqaalee ulfinaa sana mul'isan qaba malee. Ammas al tokko dhaga'aa. Yesuus innumti kun “Gooftaadhaa FI Kiristoosi” dha. Gooftaa (Abbaa) fi Kiristoos (Hafuurri Qulqulluu) lamaanuu Yesuusi dha, Inni (Yesuus) LAMAAN isaanii (Gooftaa fi Kiristoos) waan ta'eef.

Sun mul'ata Waaqummaa (Godhead) isa dhugaa nutti hin argisiisu taanaan, homtinuu nutti hin argisiisu. Gooftaan nama kan biraa MITI; Kiristoos nama kan biraa MITI. Yesus kun Gooftaa Yesuus Kiristoosi - WAAQAYYO TOKKICHA dha. Filiphos gaaf tokko Yesuusiin, “Yaa Gooftaa, Abbaa nu argisiisi, kanaa achii nu ga'a” jedhe. Yesuus deebisee, “Utuma ani yeroo dheeraa hammana ga'u isinii wajjin jiraadhuu iyyuu ana hin beeknee Filiphos? Namni ana arge abbaa arge; attamitti, 'Abbaa nu argisiisi' jetta ree? Anaa fi Abbaan koo Tokko” jedheen.

----
Waaqayyoon qaamota sadii ykn kutaa sadiitti qooduu hin dandeessan. Abbaan, Ilmi, Hafuurri Qulqulluunis akka jiru nama Yihudii tokkotti himuu hin dandeessan. Yaadni sun eessaa akka dhufe innuu dafee isinitti hima. Qanoonaan kun Yaa'ii Niiqiyaatti geggeeffame irratti akka hundeeffame warri Yihudootaa ni beeku. Isa isaan akka warra Waaqayyoon hin beekneetti nu tuffatan hin dinqifatinaa.

Nuyi waa'ee Waaqayyo tokkicha isa hin jijjiiramnee dubbanna. Yihudoonnis kanumatti amanu. Waldaan garuu Waaqayyo isa hin jijjiiramne TOKKO irraa gara SADIITTI jijjiirte. Garuu ifni yeroo galgalaa'etti as deebi'aa jira. Dhugaan kun yeroo Yihudoonni gara Filisxeemitti deebi'aa jiranitti dhufuun isaa akkam nama dinqisiisa. Waaqayyoo fi Kiristoos TOKKO. Yesus kun GOOFTAA FI KIRISTOOSI dha. Yohaannis Mul'ata qaba ture, YESUUS immo Mul'aticha ture, Inni as Caaffata Qulqullaa'aa kana keessatti Ofii Isaa omiishe - “ANI Isa Ture, Isa Jiruu fi Isa Dhufuuf Jiru, Isa Hundumaa Danda'u dha. Ameen.”

Mul'anni isin irraa yoo fagaate, akka argattaniif ol ilaalaa Waaqayyoon barbaaddadhaa. Karaan tokkichi ittiin argattan kana qofa. Mul'anni Waaqayyo biraa dhufuu qaba. Inni gonkumaa namaan, dandeettii namni qabuun hin dhufu, dandeettii Hafuuraatiin dhufa malee. Caaffata Qulqullaa’oo sammuutti qabachuu dandeessu ta'a, sun gaarii ta’us garuu waa'ee hin baasu. Kan waa'ee baasu mul'ata Waaqayyo biraa dhufu dha. Geggeessaa Hafuura Qulqulluu malee namni Yesusiin Kiristoos jechuu akka hin dandeenye Sagalichi dubbateera. Hafuura qulqulluu fudhachuu qabdu, sana booda Hafuurrichi mul'ata Yesuus kun Kiristoos, Isa Dibame, Waaqayyo akka ta'e ibsu isiniif kennuu danda'a.

Hafuura Waaqayyoo fi nama Hafuurri Waaqayyoo itti mul'isu malee, namni waan Waaqayyoo beeku tokko illee hin jiru. Waan biyya lafaa kanarra jiru hunda caalaa, mul'ata argachuuf Waaqayyoon waammachuu qabna. Macaafa Qulqulluu amannee fudhanneerra, dhugaawwan gurguddaa Inni qabus fudhanneerra, garuu amma iyyuu namoota baay'ee biratti dhugaa qabatamaa hin jiru sababiin isaas mul'anni Hafuurichaan argamu isaan bira waan hin jirreef. Sagalichatti lubbuun hin horamne. Macaafni Qulqulluun 2 Qorontos 5:21 Yesus Kiristoositti dabalamuu keenyaan qajeelina Waaqayyoo akka taane dubbata. Argitanii? NUYI KRISTOOS KEESSA ta'uudhaan QAJEELINA WAAQAYYOO TAANE jedha. Inni (Yesus) nuuf jedhee CUBBUU ta'e jedha. Inni cubbamaa ta'e hin jedhu, Isatti dabalamuudhaan QAJEELINA Waaqayyoo akka taanuuf Inni CUBBUU nuuf ta'e jedha malee.

Dhugummaa isa Inni iddoo keenya bu'ee CUBBUU ta'ee yoo amanne (dirqama amanuus qabna), akkasuma dhugummaa Isatti dabalamuu keenyaan QAJEELINA Waaqayyoo taanees dirqama amanuu qabna. Isa tokko amanuu diduun isa kaanis amanuu diduu dha. Isa tokko amananii fudhachuun isa kaanis fudhachuudha. Amma Macaafni Qulqulluun akkas akka jedhu ni beekna. Kun haalamuu hin danda'u. Garuu mul'anni isaa hin jiru. Inni ijoollee Waaqayyoo harka caalu biratti dhugaa miti. Inni caqasuma gaarii Macaafa Qulqulluu keessa jiru tokko qofaadha. Akka nu keessatti LUBBUU horu goonee ittiin jiraachuu nu barbaachisa. Sun immoo mul'ata barbaada.

Ergaa dubbisaa...
Mul’ata Yesuus Kiristoos.

“Egaa Waaqayyo, Yesus isa isin muka irratti fanniftan kana gooftaadhaa fi Masiihii akka godhe, Israa'eloonni hundinuu utuu hin mamin haa beekan!” jedhe.

Namoonnis kana dhaga'anii garaan isaanii baqaqe; Phexrosii fi ergamoota warra kaaniin, “Yaa oboloota nana maal goonu ree?” jedhan.

Phexros immoo, “Yaada garaa keessanii geddaradhaa; cubbuun keessan akka isiniif dhiifamuuf, tokko tokkon keessan maqaa Yesus Kristositti cuuphamaa; kennaa Hafuura Qulqulluus in fudhattu.

Abdiin Waaqayyo abdachiise isinii fi ijoollee keessaniif, warra fagaatanii jiraataniif, Waaqayyo keenya gooftichi itti waamu hundumaafis” jedhee deebiseef.

Hojii Ergamootaa 2:36-39