Batisimo na Mai.
Emoniseli ya Yesu Klisto.
William Branham.Tanga compte mobimba na...
Emoniseli ya Yesu Klisto.Nayebi ete esengeli emoniseli ya solo mpenza kouta na Molimo Mosantu mpo na komona bosolo na ntina na Bonzambe, na mikolo oyo wana tozali kati na bobebisami mpenza ya Makomi mingi kati na Biblia. Kasi lingomba oyo ezali na elongá, lingomba molongi etongami likolo na emoniseli, na yango tokoki kotya motema ete Nzambe akomonisa biso bosolo na Ye.
Nzonkande, ozali mpenza na bosenga ya emoniseli te mpo na batisimo ya mai. Yango ezali mpenza wana liboso na elongi na yo. Ekoki nde kosalema ata mpo na miniti moko ete bantoma bámemama mosika na etinda ya sikisiki ya Nkolo, ya kobatisa na Nkombo na Tata mpe ya Mwana mpe ya Molimo Mosantu, bongo bazwama kati na bozangi botosi na nkô? Bango bayebaki oyo Nkombo yango ezalaki, mpe esika ata moko te ezali kati na Makomi, wapi bango babatisaki na lolenge mosusu kasi na Nkombo na Nkolo Yesu Klisto.
Mayele ya bomoto ekoyebisa yo ete Mokanda ya Misala ezali lingomba kati na mosala, mpe soki bango babatisaki bongo, boye yango nde lolenge ya kobatisa. Sikawa soki okanisi ete ezali makasi, okanisi nini mpo na likambo oyo? Moto nyonso oyo abatisamaki te na Nkombo na Nkolo Yesu asengelaki kobatisama lisusu.
Misala 19:1-6,
“Mpe esalemaki ete wana Apolosi azalaki na Kolinti, Polo, sima na ye koleka na bikólo ya likolo ya Azia, akómáki na Efese. Kuna akutaki mwa ndambo ya bayekoli mpe atunaki bango: Bino bozwaki Molimo Mosantu, ntango bondimaki? Mpe bango balobaki na ye ete: Totikalá naino koyoka te ete Molimo Mosantu azalaka. Bongo ye alobaki na bango ete : Bongo libatisi ya ndenge nini mpenza bozwaki? Bango bazongisaki: Tozwaki libatisi ya Yoane. Bongo Polo alobaki: Yoane abatisaki na libatisi ya kobongola motema, azalaki koloba na bato ete basengelaki kondima Ye Oyo akoya sima na ye, elingi koloba Klisto Yesu. Ntango bayokaki likambo yango, babatisamaki na Nkombo na Nkolo Yesu. Ntango Polo atiaki maboko na ye likolo na bango, Molimo Mosantu akitaki likolo na bango; mpe bakomaki koloba minoko na sika mpe kosakola.”Yango wana mpenza. Bato malamu oyo na Efese basilaki koyoka na ntina na Masiya oyo asengelaki koya. Yoane ateyaki Ye. Babatisamáki mpo na kobongola mitema na masumu, kotaláká LIBOSO mpo na kondimela Yesu. Kasi sikawa, ezalaki ntango ya kotala na SIMA epai na Yesu mpe kobatisama mpo na BOLIMBISI ya masumu. Ekomaki ntango ya koyamba Molimo Mosantu. Mpe wana bazuaki libatisi na Nkombo na Nkolo Yesu Klisto, Polo atiaki maboko na ye likolo na bango mpe Molimo Mosantu akitaki likolo na bango.
Oh, balingami wana na Efese bazalaki bato malamu; mpe soki moto moko azalaki na makoki ya komiyóka ete abatelami, ezalaki bango. Botala boni bautaki mosika. Bango bakomaki kino na esika ya koyamba Masiya oyo asengelaki koya. Babelemaki mpo na Ye. Kasi bozali komona te ete na esika na yango, bazangaki Ye? Ye ayaki mpe Akendeki. Basengelaki kobatisama na Nkombo na Nkolo Yesu Klisto. Basengelaki kotondisama na Molimo Mosantu. Soki obatisámá na Nkombo na Nkolo Yesu Klisto, Nzambe akotondisa yo na Molimo na Ye. Yango ezali Liloba.
Misala 19:6, oyo totangi ezalaki kokokisama ya Misala 2:38,
“Bobongola mitema, mpe bobatisama moko na moko na bino na Nkombo na Yesu Klisto mpo na kolimbisama ya masumu na bino, mpe bokozua likabo ya Molimo Mosantu.”Bomoni, Polo, na nzela ya Molimo Mosantu, alobaki mpenza makambo Petelo alobaki na nzela na Molimo Mosantu. Mpe oyo elobamaki EKOKI TE kobongolama. Esengeli kozala ndenge moko kobanda na Pantekote kino ete moponami ya suka mpenza abátisama.
Bagalatia 1:8,
“Kasi soki biso moko, to mwanje ya likolo, ateyi bino nsango malamu oyo ekeseni na oyo biso toteyaki bino, tika ete alakelama mabe.”Sikawa bamosusu kati na bino, bato ya Bomoko bozali kobatisa mabe. Bino bozali kobatisa mpo na kozongisama moto ya sika lokola soki kodindisama na mai ezali kobikisa yo. Kozongisama moto ya sika eutaka na mai te; ezali mosala ya Molimo. Moto oyo na nzela ya Molimo Mosantu apesaki etinda: “Bobongola mitema mpe bobatisama moko na moko na bino na Nkombo na Nkolo Yesu,” Alobaki te ete mai nde ezongisaka moto sika. Alobaki ete yango ezalaki bobele kotalisa polele “lisosoli malamu liboso na Nzambe.” Esili.
1 Petelo 3:21,
“Mayi yango ezalaki elilingi ya libatisi oyo ebikisi bino sikawa (yango ezali kolongola mbindo ya nzote te, kasi eyano ya lisosoli malamu liboso na Nzambe,) na nzela ya lisekwa ya Yesu Klisto.”
Nandimi yango.Soki moto moko azali na makanisi ya mabe ete mambi ma kala makoki kotalisa polele libatisi ya lolenge mosusu kasi na Nkombo na Nkolo Yesu Klisto te, nakolinga kopesa ye toli ete atánga mambi ma kala mpo amóna ye moko. Oyo ezali makomi ya lisolo ya solo ya Libatisi oyo esalemaki na Roma, na mobu ya 100, ya eleko na biso, mpe ekomamaki lisusu na Zulunalo TIME ya sanza ya Zomi na Mibale, mokolo ya mitano ya mobu 1955.
“Mosungi atombolaki loboko na ye, mpe Publius Decius akotaki na ekuke ya esika ya kobatisa. Marcus Vasca, moteki mabaya, atelemaki na kati pisini ya mai oyo esukelaki ye na loketo. Azalaki komungamunga wana Publius azalaki kopusana pene na ye na kati ya pisini ya mai. Atunaki ye: ‘Credis’? Publius ayanolaki: ‘Credo’. ‘Nandimi ete lobiko na ngai euti na Yesu Klisto, Oyo abakamaki na ekulusu na nse na Ponsi Pilato. Nakufi elongo na Ye, mpo ete elongo na Ye nakoka kozwa Bomoi na Seko.’ Na sima, ayokaki maboko na ye ya makasi kosunga ye, wana amitikaki kokweisama na mokongo kati na mai, mpe ayokaki mongongo ya Marcus na matoi na ye: ‘na batisi yo na Nkombo na Nkolo Yesu’; mpe mai ya malili efinikaki ye.”
Kino na ntango bosolo ebungaki (mpe ezongaki bobele na eleko oyo ya suka; elingi koloba uta na Likita ya Nicée kino na ekeke oyo) bazalaki bobele kobatisa na Nkombo na Nkolo Yesu Klisto. Kasi yango ezongi. Satana akoki te kopekisa bomonani ya emoniseli na ntango oyo Molimo alingi kopesa yango.
Ya solo, soki ba-Nzambe bazalaki misato, wana bokokaki na bino malamu kobatisa mpo na Tata, mpe mpo na Mwana, mpe mpo na Molimo Mosantu. Kasi EMONISELI OYO EPESAMAKI EPAI NA YOANE ezalaki ete NZAMBE azali MOKO mpe Nkombo na Ye ezali NKOLO YESU KLISTO, mpe bozali kobatisa mpo na Nzambe MOKO mpe bobele moko. Yango nde ntina Petelo abatisaki na lolenge asalaki na Pantekote. Asengelaki kozala sembo na emoniseli oyo ezalaki: “Tika ete ndako nyonso ya Yisalaele bayéba ete Nzambe akómisi YESU MOKO WANA Oyo bino bobakaki na ekulusu NKOLO MPE KLISTO.” Ye wana : “NKOLO YESU KLISTO.”
Soki Yesu azali Nkolo MPE Klisto, wana Ye (Yesu) azali, mpe akoki kozala eloko mosusu te kasi “Tata, Mwana, mpe Molimo Mosantu” kati na moto MOKO oyo amonisami kati na nzoto. Ezali TE “Nzambe kati na bato misato, bósáto epambwami,” kasi NZAMBE MOKO, MOTO MOKO ná bibiangelo misato ya minene, ná misala misato oyo ezalaki kotalisa bibiangelo yango. Boyoka yango lisusu: Yesu moko wana azali “Nkolo MPE Klisto.” Nkolo (Tata) mpe Klisto (Molimo Mosantu) bazali Yesu, mpo ete Ye (Yesu) azali nyonso mibale (Nkolo MPE Klisto).
Soki biso tozali komona te kati na yango emoniseli ya solo ya Bonzambe, wana eloko mosusu ya komonisa yango ezali te. Nkolo azali eloko mosusu TE; Klisto azali eloko mosusu TE. Yesu Oyo azali Nkolo Yesu Klisto — NZAMBE MOKO. Mokolo moko, Filipo alobaki na Yesu: “Nkolo, lakisa biso Tata mpe yango ekokoka mpo na biso.” Yesu alobaki na ye: “Ngai naumeli ntango mingi elongo na bino mpe oyebi Ngai te? Ye oyo amoni Ngai amoni Tata, na bongo ntina nini ozali koloba, Lakisa biso Tata? Ngai ná Tata na Ngai tozali Moko.”
----
Okoki kosála na Nzambe bato misato to biteni misato te. Okoki te koloba na Moyuda ete ezali na Tata, mpe na Mwana, mpe na Molimo Mosantu. Akoyebisa yo mbala moko esika nini likanisi yango eutaki. Bayuda bayebi ete endimeli oyo etiamaki na Likita ya Nicée. Ezali kokamwa te ete batálaka biso lokola bapagano.Tozali koloba na ntina na Nzambe oyo abongwanaka te. Bayuda mpe bandimaka yango. Kasi lingomba ebongoli Nzambe wana MOKO oyo abongwanaka te na ba-Nzambe MISATO. Kasi pole ezali kozonga na ntango na mpokwa. Boni ezali kobenda likebi mpo na komona ete bosolo oyo eye na ntango oyo Bayuda bazali kozonga na Palestina. Nzambe ná Klisto bazali MOKO. Yesu oyo azali NKOLO MPE KLISTO. Yoane azalaki na emoniseli, mpe Yesu azalaki Emoniseli, bongo Amitalisaki Ye Moko awa kati na Likomi oyo: “NGAI NAZALI YE Oyo Azalaki, Oyo Azali, mpe Oyo Azali koya, Mozwi-Na-Nguya-nyonso. Amen.”
Soki ozangi emonilseli, tombola miso mpe sengá yango epai na Nzambe. Yango nde lolenge bobele moko okoki kozwa yango. Emoniseli esengeli kouta na Nzambe. Eyáka soko moke te na nzela ya makoki ya bomoto, na nzela ya makoki ya nzoto, kasi Molimo nde apésaka yango. Okoki ata kokanga Makomi na motó, mpe atako ezali malamu mpenza, kasi okozwa yango bongo te. Esengeli kozala emoniseli kouta na Nzambe. Elobami kati na Liloba ete moto moko te akoki koloba ete Yesu azali Klisto bobele na nzela na Molimo Mosantu. Osengeli kozua Molimo Mosantu mpe na sima, mpe bobele na ntango yango, nde Molimo akoki kopesa yo emoniseli ete Yesu azali Klisto; Nzambe, Mopakolami.
Moto moko te ayebi makambo ya Nzambe kasi bobele Molimo na Nzambe mpe moto oyo epai na ye Molimo na Nzambe amonisi yango. Tosengeli kosenga Nzambe emoniseli koleka biloko nyonso mosusu na mokili. Biso tondimi Biblia, tondimi solo ya nkembo oyo ezali kati na yango, kasi ezali kaka naino solo te mpo na bato mingi mpamba te emoniseli ya Molimo ezali te. Liloba epesami bomoi te. Biblia elobi na Bakolinti ya mibale 5:21 ete biso tokómí boyengebene ya Nzambe na nzela ya bomoko na biso elongo na Yesu Klisto. Bososoli yango? Elobi ete TOZALI BOYENGEBENE MPENZA YA NZAMBE YE MOKO na kozaláká KATI NA KLISTO. Elobami ete Ye (Yesu) oyo Akómaki lisumu mpo na biso. Elobi te ete Akómaki mosumuki, kasi akómaki LISUMU mpo na biso mpo ete na nzela ya bomoko na biso ná Ye, biso tókoka kokóma BOYENGEBENE ya Nzambe.
Soki toyambi likambo oyo (mpe tosengeli kondima yango) ete Ye akómaki mpenza LISUMU mpo na biso na ndenge azwaki esika na biso, na bongo tosengeli mpe kondima likambo oyo ete na bomoko na biso ná Ye, tokómi BOYENGEBENE MPENZA ya Nzambe. Koboya moko ezali koboya mosusu. Koyamba moto ezali koyamba mosusu. Sikawa toyebi ete Biblia elobi yango. Bokoki kowangana yango te. Kasi emoniseli na yango ezali kozanga. Ezali mpenza solo te mpo na bana na Nzambe mingi. Ezali bobele molongo moko malamu kati na Biblia. Kasi esengeli kokoma na BOMOI mpo na biso. Yango ekosenga emoniseli.
Tanga compte mobimba na...
Emoniseli ya Yesu Klisto.
