Kubatizibwa omu maizi.
Okushuuruurwa Kwa Yesu Kristo.
William Branham.Read the full account in...
Okushuuruurwa Kwa Yesu Kristo.Niinyikiriza ngu nikyetaagisa okushuuruurirwa okurikwo okurikuruga aha Mwoyo Orikwera kugira ngu oreebe amazima g'Obwaruhanga omu biro ebi obu turi rwagati y'okukiikamya kubi Ebyahandiikirwe bingi. Kwonka ekanisa ensinguzi eyombekirwe aha kushuuruurirwa n'ahabw'ekyo nitubaasa kutegyereza Ruhanga kutushuuruurira amazima Ge.
Kwonka, omu mazima torikwetenga okushuuruurirwa aha kubatizibwa omu maizi. Eki kikuri omu maisho nikikureeba. Kikaabaasikire edakiika n'emwe entumwa kuhabisibwa kuruga aha ki Mukama yaabaragiire butunu eky'okubatiza omu Iziina rya Isheboona n'ery'Omwana n'ery'Omwoyo Orikwera reero akabashanga omu bugomi bakigyendereire? Bakaba nibamanya Eiziina eryo, kandi tihariho omwanya na gumwe omu Byahandiikirwe ahu baabatiize omu muringo ogundi kwihaho omu Iziina rya Mukama Yesu Kristo.
Obwengye bw'obutoosha bukaakworekire ku Ekitabo ky'Ebyakozirwe niyo kanisa omu bikorwa, kandi ku baraabe baabatiize omu muringo ogwo, n'ahabw'ekyo ogwo nigwo muringo ogw'okubatirizamu. Hati ku oraateekateekye ngu ekyo kigumire, eki kyo nookiteekateekaho ki? Omuntu weena owaabaire atabatiziibwe omu Iziina rya Mukama Yesu akaba naateekwa kugaruka akabatizibwa.
Ebyakozirwe 19:1-6,
“Apolo ku yaabaire akiri Korinso, Paulo yaaraba omu kyanga kya ruguru, yaahika Efeso, yaashangayo abeegi bamwe; yaababuuza ati: Obu mwaikiriza, mukaheebwa Omwoyo Orikwera? Baamugarukamu bati: Ngaaha, n'okuhurira titukahuriraga, yaaba habaho Omwoyo Orikwera. Yaagira ati: Mukabatizibwa omu kubatizibwa ki? Bati: Omu kubatiza kwa Yohaana. Paulo yaagira ati: Yohaana akabatiza okubatiza kw'okweteisa, naagambira abantu kwikiriza Ogwo orikwenda kwija enyima ye, niwe Yesu. Ku baahuriire ekyo, baabatizibwa omu Iziina rya Mukama waitu Yesu. Paulo ku yaabataireho engaro, Omwoyo Orikwera yaabaijaho; baagamba endimi ezindi, baaragura.”Nkikyo aho. Abo bantu barungi ba Efeso bakaba baahuriireho eby'okwija kwa Mesia. Yohaana akaba Yaamubuuriireho. Bakaba babatiziibwe okubatizibwa kw'okweteisa ebibi, BATEGYEREIZE okwikiriza Yesu. Kwonka hati bukaba buri obwire BW'OKUGARUKA kureeba Yesu n'okubatizibwa ahabw'OKWIHWAHO ebibi. Bukaba buri obwire bw'okuheebwa Omwoyo Orikwera. Kandi ku baabatiziibwe omu Iziina rya Mukama Yesu Kristo, Paulo yaabataho engaro Omwoyo Orikwera yaabaijaho.
Oo, abatuuragye abo ba Efeso bakaba bari abantu barungi; kand ku haakubaireho abantu abaabaire baine obugabe bw'okuhurira bahamire, bakaba bari abo. Yetegyereze ahu baabaire baahika. Bakaba baahika aha kwakiira Mesia owaabaire naija. Bakaba Bamweteekateekire. Kwonka torikureeba ngu n'obu kiraabe kyabaire kiri kityo bakaba Bamuteishukireho? Akaba Yaizire kandi yaagyenzire. Bakaba nibeetenga okwijuzibwa Omwoyo Orikwera. Ku oraabe waabatiziibwe omu Iziina rya Mukama Yesu Kristo, Ruhanga naija kukwijuza Omwoyo We. Ekyo n'Ekigambo.
Ebyakozirwe 19:6 ebi twashoma bikaba nibihikiiriza Ebyakozirwe 2:38,
“Mweteise, mwena mubatizibwe omu Iziina rya Yesu Kristo, mubone kusaasirwa ebibi byanyu; kandi nimwija kuheebwa ekiconco ky'Omwoyo Orikwera.”Waareeba, Paulo, naayebemberwa Omwoyo Orikwera akagambira kimwe nk'ebi Petero yaagambisiibwe Omwoyo Orikwera. Kandi ebyagambirwe TIBIRIKUBAASA kuhindurwa. Nibiteekwa kushushana nk'oku byabaire biri kuruga aha izooba rya Pentekoote kuhitsya obu entoore ey'aha muheru eribatizibwa.
Abagalatia 1:8,
“Kwonka ku haakugira owaababuurira engiri etari nka i twababuuriire, yaaba itwe n'obu yaakuba maraika orugire omu iguru, akyeenwe.”Hati bamwe omuriimwe aba Yesu Wenka nimubatiza okugwire. Nimubatiza ahabw'okugira ngu mugarurwe busya orikushusha oti okwibikwa omu maizi kukabajuna. Okugarurwa busya tikurikureetwa amaizi; n'omurimo gw'Omwoyo. Omuntu owaayebembeirwe Omwoyo Orikwera akaragiira ati, “Mweteise, mwena mubatizibwe omu Iziina rya Mukama Yesu,” taragambire ngu amaizi nigagarura busya. Akagira ngu n'ekirikuhamya “omutima ogutarikweshinja ahari Ruhanga.” Kikaba kiri ekyo kyonka.
1 Petero 3:21,
“Amaizi ago nikyo kishushani ky'ago agabakiza omu kubatizibwa, ti kwihaho nziro z'omubiri, kureka n'endagaano y'omutima ogutarikweshinja ahari Ruhanga, kandi ebajuna ahabw'okuzooka kwa Yesu Kristo.”
Ekyo ninkiikiriza.Omuntu weena owaakuba aine enteekateeka egwire ngu ebyafaayo nibyoreka ngu okubatiza omu maizi kuri omu muringo ogundi gwona ogutari omu Iziina rya Mukama Yesu Kristo, ninkuhabura kushoma ebyafaayo nikwo iwe wenka oyesherurire. Ekirikukurataho ahaifo n'Okubatiza omu mazima okwabaireho omuri Rooma omu mwaka gwa A.D. 100 kandi kukagaruka kwahandiikwa omu katabo k'amahurire akarikwetwa TIME, ebiro 5 Okwaikumi-na-ebiri 1955.
“Omudiikoni yaimutsya omukono gwe, kandi Publius Decius yaaraba omu muryango gw'eibatirizo. Marcus Vasca omutunzi w'embaaho akaba ayemereire omu kiyanja amaizi gamuhikire omu manyaanya. Akaba naamwenya obu Publius yaaribaata omu kiyanja aha rubaju rwe. 'Credis?' yaabuuza. 'Credo,' Publius yaagarukamu. 'Niinyikiriza ngu okujunwa kwangye nikuruga ahari Yesu ori Kristo, Owaabambirwe omu biro bya Pontio Pilaato. Nkafa Nawe kugira ngu mpeebwe Amagara Agatahwaho hamwe Nawe.' Atyo yaahurira emikono y'amaani emubangiire, yaayeyorobya yaagwa omu kiyanja agarami, kandi yaahurira eiraka rya Marcus omu kutu kwe - 'Ninkubatiza omu Iziina rya Mukama Yesu' - obwo amaizi agarikufuka nigamushweka.”
Bakaba nibabatiza omu Iziinar ya Mukama Yesu Kristo kuhitsya obu amazima gaabuzire (kandi tigaragarukire okuhitsya omu busingye obu obw'aha muheru - eki kikabaho okuruga ahari Niika okuhitsya aha kutandika kw'ekyasha kya makumi abiri eki). Kwonka amazima gagarukire. Sitaane tarikubaasa kuzibira okushuuruurirwa Omwoyo yaaba naayenda kukuha.
Eego, ku haakubaire hariho Baaruhanga bashatu, obwo mukaabatiize ahabwa Isheboona, kandi n'Omwana, kandi n'Omwoyo Orikwera. Kwonka OKUSHUURUURIRWA OKWAHAIRWE YOHAANA kukaba kuri ngu hariho RUHANGA OMWE kandi Eiziina Rye ni MUKAMA YESU KRISTO, kandi nimubatiza ahabwa Ruhanga OMWE kandi omwe wenka. Ekyo nikyo kyareeteire Petero okubatiza omu muringo ogu yaabatiizemu ahari Pentekoote. Akaba naateekwa kuba ow'amazima aha kushuuruurirwa okwabaire nikugira kuti: “N'ahabw'ekyo ab'enju ya Israeli boona bamanye buzima ngu YESU OGWO, Ou mwabambire, Ruhanga akamuhindura OMUKAMA KANDI KRISTO.” Ngugwo aho, “MUKAMA YESU KRISTO.”
Yesu ku araabe ari “BYOMBI” Mukama kandi Kristo, n'ahabw'ekyo We (Yesu) ni, kandi tabaasa kuba ekindi kyona kureka “Isheboona, Omwana, kandi Omwoyo Orikwera” omu Muntu OMWE owaayeyorekyeire omu mubiri. TARI “Ruhanga omu baperesona bashatu, tiriniiti ehairwe omugisha,” kureka RUHANGA OMWE, OMUPERESONA OMWE oine ebyeterero bishatu bikuru, oine ofiisi ishatu ezirikworeka ebyo byeterero. Garuka okihurire. Yesu ogu niwe “BYOMBI Mukama kandi Kristo.” Mukama (Isheboona) kandi Kristo (Omwoyo Orikwera) byona ni Yesu, ahakuba We (Yesu) ni BYOMBI (Mukama kandi Kristo).
Ekyo ku kiraabe kitatworekire okushuuruurirwa okw'amazima okw'Obwaruhanga, tihaine ekirikitworeka. Mukama TARI ondiijo; Kristo TARI ondiijo. Yesu ogu niwe Mukama Yesu Kristo - RUHANGA OMWE. Filipo eizooba rimwe akagambira Yesu ati, “Mukama wangye, tworekye Isheboona ekyo nikitumara. Yesu yaamubuuza ati: Ahi Naakatuurira naimwe, Tokaamanyaga? Ondeebire, biri areebire Isheboona, n'enki ekirikukushabisa oti, Otworekye Isheboona? Nyowe na Tata tuba omwe.”
----
Torikubaasa kuta Ruhanga omu baperesona bashatu nari omu bicweka bishatu. Torikubaasa kugambira Omuyudaaya ngu hariho Isheboona, n'Omwana n'Omwoyo Orikwera. Naija kukugambira ahonaaho ahi ekiteekateeko ekyo kyarugire. Abayudaaya nibamanya ku enyikiriza egi yaahamiibwe omu Rukiiko rwa Niika. Tikirikutangaaza nibatushekyerera ngu turi abapagaani.Nitugamba ahari Ruhanga otahinduka. Abayudaaya nabo ekyo nibakiikiriza. Kwonka ekanisa ekahindura Ruhanga waayo otahinduka kuruga ahari OMWE kuba BASHATU. Kwonka omushana guriyo nigugaruka omu bwire bw'omu mwabazyo. Reeba oku kiri eky'okutangaaza amazima aga oku gaizire omu bwire obu Abayudaaya bariyo nibagaruka omuri Palesitaini. Ruhanga na Kristo n'OMWE. Yesu ogu ni BYOMBI MUKAMA KANDI KRISTO. Yohaana akaba aine okushuuruurirwa, kandi YESU akaba ari okwo kushuuruurirwa, kandi We akeeyoreka hanu omu Byahandiikirwe - “NIINYE Owaabaire Ariho, Oriho, kandi Oribaho, Ow'obushoboorozi bwona. Amiina.”
Okushuuruurirwa kwaba kukuri hare, imutsya amaisho okusherure ahari Ruhanga. Ogwo nigwo muhanda gwonka ogu waakukutungiramu. Okushuuruurirwa nikuteekwa kuruga ahari Ruhanga. Tikukareetwaga muntu, okubaasa kw'obuhangwa, kureka kuheebwa Omwoyo. Noobaasa kukwata omu mutwe Ebyahandiikirwe, kandi n'obu ekyo kiraabe kiri kirungi, tikirikubaasa kukora. Nikuteekwa kuba okushuuruurirwa okuruga ahari Ruhanga. Omu Kigambo nihagira ngu tihariho owaakubaasa kugira ngu Yesu ni Kristo atagambisiibwe Mwoyo Orikwera. Nooteekwa kuheebwa Omwoyo Orikwera reero obwo, kandi obwo bwonka, nibwo Omwoyo araakuhe okushuuruurirwa ku Yesu ari Kristo: Ruhanga, Oshukirweho Amajuta.
Tihariho orikumanya ebya Ruhanga kureka Omwoyo wa Ruhanga hamwe n'ogwo ou Omwoyo wa Ruhanga abishuuruurira. Tushemereire kutakira Ruhanga kutuha okushuruurirwa kukira ekindi kyona omu nsi. Twikiriize Baiburi, twayakiira amazima makuru gaayo, kwonka tekahindukire ehuriire aha bantu baingi ahabw'okuba okushuruurirwa kw'Omwoyo tikuriho. Ekigambo tikikahindukire ekihuriire. Omuri 2 Abakorinso 5:21 Baiburi neegira ngu tuhindukire okuhikiirira kwa Ruhanga ahabw'okuteerana na Yesu Kristo. Ekyo waakikyenga? Neegira eti: TURI OKUHIKIIRIRA KWONYINI KWA RUHANGA WE WENKA ahabw'okuba OMURI KRISTO. Neegira ngu We (Yesu) Akahinduka EKIBI ahabwaitu. Terikugira ngu Akahinduka omunyabibi, kureka Akahinduka EKIBI ahabwaitu kugira ngu ahabw'okuteerana kwaitu Nawe tubaase kuba OKUHIKIIRIRA kwa Ruhanga.
Ku turaikirize eki ngu (kandi nituteekwa) Akahinduka EKIBI ahabwaitu ahabw'okuza omu mwanya gwaitu, obwo nituteekwa kwikiriza n'eki ngu itwe ahabw'okuteerana Nawe tuhindukire OKUHIKIIRIRA KWONYINI kwa Ruhanga. Okwanga kimwe biri nooba oyangire ekindi. Okwakiira kimwe nooba oyakiriire ekindi. Hati nitumanya ngu Baiburi neegamba etyo. Tikirikubaasa kuhakanisibwa. Kwonka okushuuruurirwa kwakyo kubuzire. Tikikashoboorokyeire baingi aha baana ba Ruhanga. N'omushororongo murungi kusha omuri Baiburi. Kwonka tushemereire kugutunga guhindwirwe OGUHURIIRE ahariitwe. Ekyo nikyetaagisa okushuuruurirwa.
Read the full account in...
Okushuuruurwa Kwa Yesu Kristo.
Obushwere
