ናይ ማይ ጥምቀት።
ምግላጽ የሱስ ክርስቶስ።
William Branham.ምሉእ ኣካውንት ኣብ...
ምግላጽ የሱስ ክርስቶስ።ቃል ኣምላኽ ብኹሉ መዳይ ኣብ ዝተጣመመሉ ዘመን ስለ ሓቂ ምልኣተ መለኮት ንምፍላጥ ናይ ብሓቂ ምግላጽን ረዲኤት መንፈስ ቅዱስ ከም ዝሓትት ይኣምን እየ። ነገርግን እታ ስዓሪት ዝኾነት ቤት ኣምላኽ ኣብ ልዕሊ ምግላጽ ዝተሃንጸት ስለ ዝኾነት፤ ኣምላኽ ሓቁ ክገልጸልና ክንጽበዮ ይግብኣና እዩ።
ዝኾነ ኾይኑ ብዛዕባ ጥምቀት እንተኾይኑ ምግላጽ እውን ኣየድልዮን ኣብ ቅድሚ ኣዒንትኹም ብግልጺ ፈጢጡ ዝርእየኩም ቃል እዩ። ሓዋርያት ኩሎም ካብቲ ጎይታ ዝኣዘዞም ጥምቀት ብሽም ኣቦን ወዲን መንፈስ ቅዱስን፤ እንዳፈለጡ ኸምዘይፈለጡ ኰይኖም ንሓንቲ ደቒቓ ብባህ 'ይበሎ ክኸዱስ ይክኣሎም ዶ? ሽሙ መን ከም ዝኾነ ኣጸቢቖም ይፈልጡ እዮም። ብመሰረቱ መጽሓፍ ግብሪ ሓዋርያት ቤተ ክርስትያን ብተግባር እንርእየሉ መጽሓፍ ምዃኑ ብደመ ነፍስ እኳስ ክንርድኦ እንኽእል ሓቂ እዩ። ስለዚ ሓዋርያት ኩሎም ብጀካ ስም ጎይታ የሱስ ክርስቶስ ንጥምቀት ዝተጠቀምሉ ካሊእ ስም የለን።
እምብኣር ሓወርያት ብስም ጎይታ የስሱስ ክርስቶ ስ ካብ ኣጥመቑስ ጥምቀት ብስም ጎይታ የሱስ ክርስቶስ እዩ ክኸውን ዝግብኦ። ምንልባት እዚ እንተኸቢድኩም? በሉ ኽነግረኩም ብሽም ጎይታ የሱስ ክርስቶስ ዘይተጠመቐ ሰብ ምንም ይኹን ብርግጽ በዚ ስም እዚ ክጥመቕ ይግብኦ ምዃኑ ፍለጡ።
ኣብ ግብሪ ሓዋርያት 19፡1-6,
ኰነ ድማ፡ ኣጵሎስ ኣብ ቈረንቶስ ከሎ፡ ጳውሎስ፡ በቲ ላዕላይ ሃገር ሐሊፉ ናብ ኤፌሶን መጸ፡ ሓያሎ ደቀ መዛሙርቲ ድማ ረኸበ እሞ፡ ምስ ኣመንኩምሲ፡ መንፈስ ቅዱስዶ ተቐቢልኩም፧ በሎም። ንሳቶምከኣ፡ ኣይፋልናን፡ መንፈስ ቅዱስ ከም ዘሎ እኳ ኣይሰማዕናን፡ ኢሎም መለሱሉ።ንሱ ኸኣ፡ ብኣየናይጥምቀት ደኣ ተጠመቕኩም፧ በሎም። ንሳቶምውን፡ ብናይ ዮሃንስ ጥምቀት፡ በልዎ። ሽዑ ጳውሎስ፡ዮሃንስሲ በቲ ድሕሪኡ ዚመጽእ፡ ማለት ብየሱስ ክርስቶስ፡ ኪኣምኑ፡ ነቶም ህዝቢ እናነገረ ጥምቀትንስሓ እዩ ዘጥመቐ፡ በሎም። እዚ ምስ ሰምዑ፡ ብስም ጐይታና የሱስ ተጠምቁ። ጳውሎስ ኢዱ ምስኣንበረሎም ከኣ፡ መንፈስ ቅዱስ ናባታቶም ወረደ። ሽዑ ብቛንቋታት ተዛረቡን ተነበዩን።እዞም ኣብ ኤፌሶን ዝነበሩ ኣመንቲ በቲ ዝነበሮም ፍልጠት ጥምቀት ንስሓን በቲ ዮሃንስ ንኽጽበይዎ ብዛዕባ እቲ ዝመጽእ መሲሕ ዝመሃሮም ትምህርትን ሒዞም ብንስሓ ጥምቀት ተጠሚቖም ብየሱስ ንምእማን ይጽበዩ ነበሩ። ሕጂ ግና ብጎይታ የሱስ ክርስቶስ ክጥመቁን ብመንፈስ ቅዱስ ክምልኡን ጊዜኦም ኣኸለ። ብጎይታ የሱስ ክርስቶስ ኣሚኖም ምስ ተጠመቑ ድማ ጳውሎስ ኢዱ ኣንቢሩ ጸለየሎም መንፈስ ቅዱስ ድማ ኣብ ልዕሊ ኹሎም ወረደ።
ኦ! ሒደት መጓሰ ደቂ ኤፌሶን፡ ብሓቂ ሰላም ዘለዎም ሰባት እዮም። ምናልባት ብዘለዎ እምነት ድሓን ዝስመዖ ሰብ እንተሃልዩ፡ ንሳቶም እዮም። ኽንደየናይ ዝኣክል ከም ዝተጉዓዙ ኣስተውዕሉ፡ ነቲ ዝመጽእ መሲሕ ክቕበሉ መንገዲ ዝጀመሩ ሰባት እዮም ኔሮም። ከመይ ከም ዝተመሓላለፉ ርኢኹምዶ ? ንሱ መጺኡስ ተመሊሱ ኸይዱ። ብጎይታ የሱስ ክርስቶስ ክጥመቑን ብመንፈስ ቅዱስ ክምልኡን ግና ግድን ነበረ። ብሽም ጎይታ የሱስ ክርስቶስ ተጠሚቕኩም እንተኾይንኩም እግዚኣብሄር ብመንፈሱ ክመልኣኩም ፍቓዱ እዩ።
ግብሪ ሓዋርያት 19፡1-6 እቲ ኣብ ግብሪ ሓዋርያት 2፡38,
“ተነስሑ ነፍሲ ወከፍኩም ከኣ ብስም የሱስ ክርስቶስ ንሕድገት ሓጢኣት ይጠመቕ፡ ህያብ መንፈስ ቅዱስውን ክትቅበሉ ኢኹም ዝብል ቃል”ምእንቲ ኽፍጸም ጳውሎስ ብምርሒት መንፈስ ቅዱስ ልክዕ ከምቲ ጴጥሮስ መንፈስ ቅዱስ ተመሊኡ ዘተሓላለፎ ትእዛዝ ከተግብር ከሎ ርኣዩ። ስለዚ ድማ እቲ ሽዑ ዝተኣዘዘ ትእዛዝ ፈጺሙ ኣይልወጥን። ካብታ መንፈስ ቅዱስ ዝወረደላ መዓልቲ በዓለ ሓምሳ ጀሚሩ ክሳብ እቲ ናይ መወዳእታ ዝጥመቅ ሕሩይ ኣምላኽ ዝመጽእ ሓንቲ ዓይነት ክትከውን ናይ ግድን እዩ።
ገላትያ 1፡8,
ግናኸ ንሕና እኳ እንተ ዀንና ወይስ መልኣኽ ካብ ሰማይ፡ ብዘይ እዚ ንሕና ዝሰበኽናልኩም ወንጌል ካልእ ወንጌል እንተ ሰበኸልኩም፡ ንሱ ውጉዝ ይኹን።ገለገለኹም ኣመንቲ ሓደ ኣምላኽ ብማይ ጥምቀት ጥራሕ ምድሓን (ዳግም ልደት) ከም እትረኽቡ ብምእማን ኣብ ማይ ስለ ዝጥሓለ ንዳግም ልደት ዘብጽሕ ምድሓን ከምዝረኽቡ ጌርኩም ብጌጋ ሰባት ተጥምቑ። ምድሓን ስራሕ እቲ ማይ ዘይኮነስ ስራሕ መንፈስ እዩ። እቲ ሰብኣይ ብመንፈስ ቅዱስ ተመሊኡ “ተነስሑ ነፍሲ ወከፍኩም ከኣ ብስም የሱስ ክርስቶስ ንሕድገት ሓጢኣት ይጠመቕ” ክብል እንከሎ በቲ ናብ ኣምላኽ ብየሱስ ክርስቶስ እነቕርቦ ልማኖ ሰናይ ሕሊና ክንድሕን ድኣ እምበር በቲ ማይ ማለቱ ኣይኮነን።
1ይ ጴጥሮስ 3፡21,
እቲ ማይ ድማ ሕጂ ብተምሳሉ፡ ማለት ጥምቀት፡ የድሕነኩም አሎ፡ እዚ ኸኣ ብትንሳኤ የሱስ ክርስቶስ ልማኖ ሰናይ ሕሊና ናብ ኣምላኽ እዩ እምበር፡ ምሕጻብ ርስሓት ስጋ ኣይኰነን።ምናልባት ዝኾነ ሰብ ካብ ብጎይታ የሱስ ክርስቶስ ሽም ወጻኢ ካልእ እንጥመቐሉ ስም ከም ዘሎ ታሪኽ የረጋግጽ እዩ ዝብል እንተሃልዩ፥ ታሪኽ ኣንቢብኩም ብዛዕባ ጥምቀት ዝተጽሓፈ ታሪኽ ክትርድኡ ይመኽረኩም። እዚ ዝስዕብ ምስክርነት ብኣቆጻጽራ ኣውሮጳውያን ኣብ 100 ዓ/ም ኣብ ሮማ ዝነበረ ስርዓት ጥምቀት ብታሕሳስ 5/1955 ዓ/ም ኣብ ታይም መጽሄት (Time magazine) ዝሰፈረ ሓቀኛ ታሪኽ እዩ።
“እቲ ዲያቆን ኢዱ ዘርግሔ፡ ፓፒልየስ ዲስየስ ድማ ናብቲ መእተዊ ማይ ጥምቀት ቀረበ። እቲ ሸያጢ ዕንጸይቲ ዝነበረ ማርከስ ቫስካ ድማ ናብቲ ናብ ጉድጓድ ዝመጽእ ዘሎ ፓፒልየስ እንዳጠመተ ብፍሽኽታ ተቐበሎ። ክሬዲስ ? (Credis)? በሎ ክሬዶ (Credo) መለሰ ፓፒልየስ። ምድሓነይ ካብቲ ብጴንጤናዊ ጲላጦስ ኣብ መስቀል ዝሞተ የሱስ ክርስቶስ ምዃኑ ይኣምን እየ፡ ምእንቲ ብትንሳኤኡ ብህይወት ክነብር ብሞቱ ድማ ምስኡ እመውት ኣለኹ። ክብል ከሎ፡ ጽኑዕ ቅልጽም ደጊፉ ናብ ውሽጢ ዝሑል ማይ ከጥልቖ እንከሎ ህስስ ዝበለ ድምጺ ማርከስ፦ ብጎይታብየሱስ ስም የጥምቐካ ኣለኹ ክብሎ ከሎ ሰምዐ”
ቅድሚ እቲ ሓቀኛ ስርዓት ጥምቀት ኣብ ንቅያ ጉባኤ ምጥፋኡ (ክሳብ እዚ ዘለናዮ ክፍለ ዘመን ዘይተመልሰ) ሰባት ብጎይታ የሱስ ክርስቶስ ስም ይጥመቁ ኔሮም። ነገር ግን ሕጂ ተመሊሱ ኣሎ። መንፈስ ክግለጽ ዝኣዘዞ ሓቂ ሰይጣን ደው ከብሎ ኣይክኣሎን።
እወ ሰለስተ ኣማልኽቲ እንተዝህልው ኔሮም ከምቲ ኣመንቲ ስላሴ ዝገብርዎ ብኣቦን ወዲን መንፈስ ቅዱስን ክትጥመቑ ግድን ምኾነ። ነገርግን እቲ ንዮሃንስ ዝተውሃቦ ምግላጽ፥ ሓደ ኣምላኽ ከም ዘሎን ስሙ ድማ ጎይታ የሱስ ክርስቶስ ከምዝበሃልን እዩ። ንስኻትኩም እዉን ናብቲ በይኑ ዘሎ ሓደ ኣምላኽ ኢኹም ዝተጠመቅኩም። ስለዚ ጴጥሮስ ኣብ ብዓለ ሓምሳ ከምዚ ጌሩ ከጥምቕ ዝኽኣለሉ ምኽንያት እዚ እዩ። ጴጥሮስ ኣብቲ በዓለ ሓምሳ ዝተብሃለ ምዓልቲ ብዛዕባ እቲ ሓደ ኣምላኽ ብምግላጽ ክዛረብ ከሎ ፦ 36 እምብኣርሲ ኣምላኽ ነዚ ንስኻትኩም ዝሰቐልኩምዎ የሱስ፡ ንእኡ ጐይታን ክርስቶስን ከም ዝገበሮ፡ ብዘላ ቤት እስራኤል ብርግጽ ትፍለጥ። በለ። እንሀልኩም እምበኣር፡ ጎይታ የሱስ ክርስቶስ።
የሱስ ንሱ ክልቴኡ ጐይታን ክርስቶስን እንተኾይኑ ! ስለዚ የሱስ ኣቦን፣ ወዲን፣ መንፈስ ቅዱስን ኮይኑ ኣብ ሓደ ናይ ስጋ ኣካል ተገሊጹ ማለትዩ። ከምቲ ቅድስተ ስላሴ ኢሎም ዝጽውዕዎ እግዚኣብሄር ኣብ ሰለስተ ኣካላት፡ ፈጺሙ ከምኡ ኣይኮነን። ሓደ ኣምላኽ ሓደ ኣካልብሰለስተ ዓበይቲ መዓርጋት (መዚታት) ከምኡ ድማ እቶም ሰለስተ መዓርጋት (መዚታት) ዝግለጽሉ ሰለስተ ኣሰራርሓታትን እዩ። ደጊምኩም ስምዑዎ፦ ንእኡ ጐይታን ክርስቶስን ገበሮ። ጎይታ (ኣቦ) እዩ፣ ክርስቶስ ድማ (መንፈስ ቅዱስ) የሱስ ክልቲኡ እዩ። ምኽንያቱ ንእኡ ጎይታን ክርስቶስን ገበሮ ስለዝብል።
ምግላጽ ምልኣተ ኣምላኽ (መለኮት) ብኸምዚ መልክዑ ክርድኣና እንተዘይክኢሉ፡ ካልእ ክንርድኣሉ እንኽእል መንገዲ የለን። ጎይታ ኻልእ ኣይኮነን፣ ክርስቶስ እውን ኻልእ ኣይኮነን። የሱስ፡ ባዕሉ የሱስ! ንሱ ጎይታ የሱስ ክርስቶስ ሓደ ኣምላኽ እዩ። ሓደ መዓልቲ ፊሊጶስ፡ ጐይታይ፡ ነቦ ኣርእየና እሞ ይኣኽለና፡ በሎ። የሱስ በሎ፥ፊልጶስ፡ እዚ ኽንድዚ ዚኣክል ዘመን ምሳኽትኩም ክነብር ከሎኹስ፡ ኣይትፈልጠንን ዲኻ፡ እቲ ንኣይ ዝረኣየ ነቦ ረኣዮ። ከመይ ኢልካኸ፥ ነቦ ኣርእየና፡ ትብል አሎኻ? ኣነን ኣቦን ሓደ ኢና።
----
ንእግዚኣብሄር ኣብ ሰለስተ ኸፋፊልኩም ኣቦ፣ ውሉድ፣ መንፈስ ቅዱስ ኢልኩም ንሓደ ኣይሁዳዊ ከተረድእዎ ኣይትኽእሉን ብቀጥታ ሓሳብ ትምህርቲ ሰለስተ ኣምላኽ ካብ ጉባኤ ንቅያ ዝተበገሰ ስርዓተ ኣምልኾ ከም ዝኾነ ኣጸቢቁ ይፈልጥ እዩ ። ጽሉኣት ክብሉናውን እውን ኣይገርምን።ብዛዕባ እቲ ዘይልወጥ ኣምላኽ ተዘራሪብና ኣለና ኣይሁድ እውን ንሱ እዮም ዝኣምኑ። ነገርግን ቤተ ክርስትያን እቲ ዘይቕየር ኣምላኽ ካብ ሓደ ናብ ሰለስተ ብምኽፋል ለዊጣቶ ትርከብ። ነገር ግን ሕጂ እቲ ብርሃን ይምለስ ኣሎ። እቲ ብጣዕሚ ዝገርመኒ ግና እዚ ሓቂ እዚ ኣብተን እስራኤል መሊሳ ከም መንግስቲ ደው ዝበለትሉ ጊዜታት ምምላሱ እዩ። እግዚኣብሄርን ክርስቶስን ሓደ እዮም። እዚ የሱስ እዚ ጎይታን ክርስቶስን ክልቲኡ እዩ። ንዮሃንስ ራእይ ተገልጸሉ። እቲ ዝተገልጸሉ ድማ የሱስ እዩ። የሱስ ድማ ስለ ገዛእ ርእሱ ዝነበርኩን ዘለኹን ዝመጽእን ኹሉ ዝኽእልን ብምባል ገለጸሉ። ኣሜን።
ስምዑኒ ምናልባት ሓደ ቃል ክግለጸልኩም እንተ ዘይኪኢሉ ኣእዳውኩም ኣልዕሉ ንእግዚኣብሄር ድማ ሕተቱ እንተዘይኮይኑ ብኻልእ መንገዲ ክትረኽብዎ እትኽእሉ ምግላጽ የለን ምግላጽ ካብ ላዕሊ እዩ። ካብ ሰብ ዝኾነ ተፈጥሮኣዊ ጸጋ ኣይኮነን መንፈሳዊ ጸጋ እዩ። ምናልባት ነቲ ቃል ክትዝክርዎ ን ክትሓስብዎን ደስ ዘብል ምዃኑ ከተስተውዕሉን ትኽእሉ ኢኹም ነገር ግን ንሱ እውን ኣይሰርሓልኩምን። እቲ ትኽክል ዝኸውን ካብ ኣምላኽ ዝኾነ ምግላጽን ምርሒትን ጥራይ እዩ። ቃል ኣምላኽ ብመንፈስ ቅዱስ እተዘይኮይኑ ሓደ እኳ ክርስቶስ እዩ ዝብል የልቦን ይብል። የሱስ ንሱ ክርስቶስ እቲ ቅቡእ ኣምላኽ ምዃኑ ንኽግለጸልኩም መንፈስ ቅዱስ ክትቅበሉ ግድን እዩ።
መንፈስ ኣምላኽ ዝገለጸሉ እንተዘይኮይኑ ሓደ እኳስ እቲ መንፈስ ኣምላኽ ዝዓጸዎ ነገር ክኸፍት ዝኽእል የልቦን ስለዚ ኣብ ምድሪ ኣብ ንነብረሉ ጊዜ ምግላጽ (ፍልጠት) ኣምላኽ ንምርካብ ካብ ምልማን ንላዕሊ ካሊእ ዓብይ ነገር የለን። መጽሓፍ ቅዱስ ተቐቢልና ኣብ ውሽጡ ዘለዉ ሓቅታት እውን ተቐቢልና፡ ነገርግን መብዛሕቲኦም ሰባት እቲ ምግላጽ ዝህብ መንፈስ ኣምላኽ ስለዘይብሎም ነቲ ኣብ ውሽጡ ዝተጻሕፈ ክርድእዎ ኣይኽእሉን። 2ይ ቆሮንጦስ 5፡21 ንሕና ብእኡ ጽድቂ ኣምላኽ ምእንቲ ኽንከውን፡ ነቲ ሓጢኣት ዘይፈለጠ ኣብ ክንዳና ሓጢኣት ገበሮ። ተረዲኡኩም ? ብክርስቶስ ኰይናስ ገዛእ ጽድቂ እግዚኣብሄር ክንከውን ገበረና። ነቲ ሓጢኣት ዘይፈለጠ ኣብ ክንዳና ሓጢኣት ገበሮ። ኣስተውዕሉ ሓጢኣተኛ ገበሮ ዘይኮነስ በቲ ምስኡ ዘለና ሕብረት ጽድቁ ክንኮኖስ ንእኡ ሓጢኣት ገበሮ።
እዚ ሓቂ እዚ ክንቅበሎ ግዴታ ኣለና ንሱ ኣብ ክንዳና ሓጢኣት ኮነ ንሕና ድማ በቲ ምስኡ ዘለና ሕብረት ጽድቂ እግዚኣብሄር ክንከውን ገበረና። ነዚ ዘይምቕባል ንኹሉ ዘይምቕባል ነቲ ሓደ ምቕባል እውን ካልእ ኩሉ ምቕባል እዩ። ክንክሕዶ ዘይክኣለና ነገር እዩ። መጽሓፍ ቅዱስ ከምኡ እዩ ዝብል ንመብዛሕቲኦም ደቂ ኣምላኽ እዚ ሓቂ እዚ ክቕበልዎ ይኸብዶም እዩ። ክግለጸሎም ስለዘይክኣለ በቃ ደስ ዝብል ቃል ጥራሕ ከም ዝኾነ እዮ ም ዝወስድዎ። ነገር ግን ኣብልዕሌና ሂወት ዘለዎ ቃል ክንገብሮ ይግብኣና እዩ። እዚ እውን ምግላጽ ይሓትት እዩ።
ምሉእ ኣካውንት ኣብ...
ምግላጽ የሱስ ክርስቶስ።
