Yohaana ahari Patumo.

William Branham.

Read the full account in...
Okworekwa kwa Patumo.

Okushuuruurwa 1:9-10
9 Nyowe Yohaana mwene waanyu, okwataniise naimwe omuri Yesu (Kristo) omu busaasi n'omu bukama n'omu kugumisiriza, nkaba ndi aha kirwa Patumo, ntuzirwe Ekigambo kya Ruhanga n'okuhamya ebya Yesu (Kristo).
10 Aha Izooba rya Mukama nkaba ndi omu Mwoyo, naahurira eiraka rihango nk'ery'enzamba enyima yangye.

Okukuratana oku kw'okworekwa kw'Okushuuruurwa kw'Omuntu Yesu Kristo kukaheebwa Yohaana obu yaabaire atwairwe aha Kirwa Patumo nk'ekifubiro. Ekirwa eki ekikye kiri mailo makumi ashatu okuruga aha nyambukiro ya Asia Enkye omu Nyanja ya Aegea. Ahabw'okuba ekirwa ky'enkiri kandi kiijwiremu enjoka, eminya, na zaaskorupio, kikaba kiine omugasho mukye omu by'obushuubuzi, n'ahabw'ekyo kikaba nikikoresibwa obugabe bw'Abarooma nk'omwanya gw'ekifubiro ei baabaire barindira enkozi z'ebibi ezirikukirayo obubi, embohe z'eby'obutegyeki, n'ebindi.

Noija kwetegyereza ku Yohaana ayeyanjwire aha Bakristaayo nk'ow'eishe-emwe ori omu kubonabona. N'omu bwire obu obu ekanisa eyaabandize yaabaire neeraba omu kuhiigwa kwingi. Ediini yaabo ekaba “etarikujumwa hoona hoona” kureka abantu bo bonka bakaba bateebwa omu kihome kandi baitwa. Yohaana, nk'omutwe muhango gw'abantu abandi, akaba hati naabonabonera omu nkomo ahabw'Ekigambo kya Ruhanga n'obujurizi bwa Yesu Kristo. Ku yaakwatsirwe, bakagyezaho kumwita nibamuteeka omu majuta agarikubira kumara eshaaha makumi abiri na ina kwonka byaba ebya busha. Abategyeki abo abaitsirwe ekiniga kandi bataine maani bwanyima bakamucwera orubanja rw'okumukomera Patumo nk'omurogi. Kwonka Ruhanga akaba ari nawe, kandi yaagirirwa embabazi kuruga aha kirwa kugaruka Efeso ahu yaagarukire kugumizamu nk'omuriisa kuhitsya obwire obu yaafiire.

Ekitiinisa ky'Emirndi mushanju ky'Obuntu Bwe.

Okushuuruurwa 1:14-16,
“Omutwe Gwe n'eishokye Rye bikaba nibyera nk'ebyoya by'entaama, nibyerera kimwe nk'orubaare; amaisho Ge gakaba gari nk'endimi z'omuriro, ebigyere bye bikaba nibyengyengyeta nk'omuringa ogushemereziibwe omu iziiko, kandi eiraka Rye rikaba nirihoorera nk'amaizi maingi; omu mukono Gwe gwa buryo akwaitsemu enyonyoozi mushanju, omu kanwa Ke haarugamu rurara ey'amoogi abiri, kandi ahamaisho Ge hakaba nihamurinkana nk'eizooba eririkujwisa amaani.”

Okweyoreka kwa Yesu ahari Yohaana ka kwamukwatsireho munonga kandi kukamwimutsya omu mwoyo, owaabaire ari omu buzaahe ahabw'Ekigambo, kwonka reeba, EKIGAMBO Ekihuriire hati kyemereire omu maisho ge. Ka n'okworekwa okurikushoboorora gye, ahakuba buri kintu ekyorekirwe kiine amakuru. Ka n'okushuuruurwa Kwe okw'ekitiinisa.

1.Eishokye Rye Niryera nk'Orubaare.

Yohaana naabanza kwetegyereza kandi agamba aha kwera kw'eishokye Rye. Rikaba niryera, kandi niryerera kimwe nk'orubaare. Eki kikaba kitari ahabw'emyaka Ye. Oo, ngaaha. Okwera munonga okw'eishokye Rye tikirikumanyisa obukuru omu myaka kureka obumanyi, obukuru, hamwe n'obwengye. Ogwo Otahwaho takura omu myaka. Obwire niki ahari Ruhanga? Obwire n'akantu kakye ahari Ruhanga, kwonka obwengye ni kikuru ahari Ruhanga. Ni nk'obu Sulemaani yaashaba Ruhanga obwengye bw'okucwa emanja z'abantu ba Israeli. Hati ariyo Naija, Omucwi w'emanja z'ensi yoona. Aryajwekwa ekirunga ky'obwengye. Ekyo nikyo eishokye eririkwera kandi eririkwengyengyeta ririkumanyisa.

Akaba ari omucwi w'emanja naashuuruura ebitabo kandi naabacwera emanja z'ebihandiikirwemu. Danieli Akamureeba naizira omu bicu. Ekyo nikyo buzima Yohaana yaareebire. Bombi Bakamureeba ari omu nshusha emwe. Bakareeba Omucwi w'emanja n'orukoba Rwe rw'okucwisa emanja ruri aha mabega Ge, ayemereire ashemeire kandi ari orikwera, aijwire obwengye, ahikiire kimwe kucwera ensi orubanja omu kuhikiirira. Haleluya.

2. Amaisho Ge gari nk'Omuriro.

Kiteekateekyeho. Amaisho ago rimwe agatarabaasize kuhweza gye ahabw'amarira g'obusaasi n'okubonabonesibwa. Amaisho ago agaarizire ahabw'esaasi aha kituuro kya Lazaaro. Amaisho ago agatarareebire ekibi ky'abo baitsi Abamuhanikire aha musharaba kwonka omu busaasi akataka ati, “Taata basaasire.” Hati amaisho ago n'endimi z'omuriro, amaisho g'Omucwi w'emanja Orikwija kuzimuurira abo Abaamwangire. Okucamukirira kw'obuntu oku Yaakizireyo kworeka obu Yaareebeka nk'Omwana w'Omuntu kukaba kuri oku, Akarira kaingi. Kwonka enyima y'okurira okwo n'obusaasi obwo hakaba hariyo Ruhanga.

Amaisho ago gamwe gakareeba okworekwa. Gakareeba hare omu mitima y'abantu kandi gashoma ebiteekateeko byabo byonyini kandi gaamanya emitwarize yaabo yoona etari emwe. Ruhanga akaba naareebera omu maisho g'omuntu ofa n'ekiniga kingi munonga, Owaagambiire ahaiguru abaabaire batarikumanya eki yaabaire Ari ati, “Muryafeera omu bibi byanyu, ku muriba mutaikiriize ku Ndiwe.” Yohaana 8:24.
“Ku ndaabe ntakora mirimo ya Tata, murekye Kuunyikiriza; kwonka ku Ndaabe ngikora (emirimo ya Tata), n'obu muraabe Mutarikuunyikiriza, mwikirize emirimo.” Yohaana 10:37-38.
Nka Yeremia owa ira, akaba ari nabi orikucura, ahakuba abantu tibaraakiire Ekigambo kya Ruhanga kandi baanaga aha rubaju okushuuruurirwa.

Ago maisho g'ekiniga kingi g'Omucwi w'emanja na hati gariyo nigahandiika eby'amagara g'ebiine omubiri byona. Nigairuka oku n'oku nigabuga ensi, tihaine eki Atarikumanya. Naamanya ebyetengo by'omutima kandi n'eki buri omwe amaririire kukora. Tihaine ekisherekirwe ekitarishuuruurwa ahakuba ebintu byona nibireebwa butunu omu maisho g'Ogwo oshoboorora ebyaitu. Kiteekateekyeho, na hati Naamanya ebi orikuteekateeka.

Eego, Ngugwo Ayemereire aho nk'Omucwi w'emanja n'amaisho g'ekiniga kingi kucwa orubanja. Obwire bw'embabazi buhweire. Oo, kuri abantu beeteisa kandi bakasherura amaisho Ge omu kuhikiirira hakiriho obwire kugira ngu babaase kuhindura ekifuba Kye omushego gwabo ensi etakayagiibwe omuriro mwingi.

3. Ebigyere by'Omuringa.

“Ebigyere Bye bikaba nibyengyengyeta nk'omuringa ogushemeziibwe omu iziiko.” Omuringa nigumanywa ahabw'okuguma kwagwo okurikutangaaza. Tihaine ekindi kintu ekirikumanywa eki waakugujwangamu eky'okubaasa kugwongyera kuguma. Kwonka ogu muringa ogurikushoboorora ebigyere Bye gukikizireyo kutangaaza munonga ahabw'okushangwa ngu gukabaasa kuraba omu kigyezo ky'eiziiko ry'omuriro, ekigyezo eki ekindi kintu kyona kitakarabagamu. Kandi ekyo kihikiire kimwe. Ahakuba omuringa nigumanyisa Okucwa Orubanja kwa Ruhanga: encwamu y'orubanja ei Ruhanga yaaragiire kandi akagihikiiriza.

Okubara 21:8-9, “MUKAMA yaagira Musa ati: Heesha enjoka ey'obushegu oburikubabiirira, ogihanikye aha muti; bwanyima oraarumwe enjoka weena, ku araagireebe, naakira. Musa yaaheesha enjoka y'omuringa, yaagihanika aha muti; bwanyima omuntu weena owaabaire arumwa enjoka, ku yaabaire areeba ahari egyo njoka y'omuringa, akira.” Abaisraeli bakaba basiisire. Ekibi kikaba nikiteekwa kucwerwa orubanja. N'ahabw'ekyo Ruhanga akaragiira Musa kuta enjoka y'omuringa aha muti, kandi weena owaabaire agireeba akaba ajunwa okuruga omu kifubiro ky'ekibi kye.”

Kwonka ekiro kimwe ebyo bigyere by'omuringa biryayemerera aha nsi. Kandi Aryaba Omucwi w'emanja w'ensi yoona, kandi Aryacwera abantu emanja omu buringaniza n'okuhikiirira. Kandi tiharibayo okweshara orwo rubanja. Tihariho kuhindura aha kucwa orubanja okwo. Tiharibaho kworobyamu omu kucwa orubanja orwo. Enkozi y'ebibi eryaguma eri enkozi y'ebibi. Osiisikaire aryaguma ari osiisikaire. Ogwo otahinduka tarihinduka obwo, ahakuba takahindukaga kandi tarihinduka. Ebyo bigyere by'omuringa biryacwanyagura omuzigu. Biryacwekyereza antikristo, enyamaishwa hamwe n'ekishushani kandi na byona ebibi ebiri omu maisho Ge. Aryacwekyereza entwaza z'amakanisa ageetereirwe Eiziina Rye gakashiisha ekitiinisa kyaryo atyo azicwanyagure hamwe na antikristo. Abanyabibi boona, abaikiriza ngu Ruhanga tabaho, abarikwikiriza ngu tihaine ekirikubaasa kumanywa ahari Ruhanga, ab'omurembe, abarikwikiriza ngu omuntu aine obugabe kutoorana enyetwara ye, boona baryaba bariyo. Rufu, okuzimu, kandi n'ekituuro biryaba biriyo. Eego biryaba biriyo. Ahakuba ku Ariija, ebitabo biryashuuruurwa. Obwo nibwo n'ekanisa ya kooyakooya n'abaishiki abashugaine bataano abashema barireebeka. Aryashoroora entaama omu mbuzi. Ku Ariija aryatwara obukama, ahakuba n'Obwe, kandi Aryaba ari hamwe n'enkumi emirundi obukumi, Omugore We, orikwija Kumuheereza. Ekitiinisa! Oo, ni hati nari tiburibaho. Yeteise obwire butakahweire. Sisiimuka orugye omu bafu otyo osherure Ruhanga kugira ngu oijuzibwe Omwoyo Orikwera We kitari ekyo noija kufeerwa amagara agatahwaho. Okikore hati hakiriho obwire.

4. Eiraka Rye Rikaba Nirihoorera nk'Amaizi Maingi.

Hati amaizi maingi nigooreka ki? Kihurire omu Kushuuruurwa 17:15, “Amaizi agu waareeba . . . n'abantu b'emiringo mingi n'emitwe mingi n'amahanga n'endimi.” Eiraka Rye rikaba nirihoorera nk'abantu baingi abarikugamba. Niki? N'okucwa orubanja. Ahakuba aga n'amaraka g'emitwe mingi yaabajurizi, abu ahabw'Omwoyo Orikwera omu busingye bwona baajuriire Kristo kandi bakabuurira Engiri Ye. Riryaba riri eiraka rya buri muntu nirisingisa orubanja omusiisi owaaayangire kuhaburwa. Amaraka g'entumwa mushanju garyahurirwa kurungi. Abo babuurizi abeesigwa abaaburiire amaani ga Yesu g'okujuna, abaabuuriire okubatizibwa omu maizi omu Iziina rya Yesu, abaabuuriire okwijuzibwa n'amaani g'Omwoyo Orikwera, abaayemereire n'Ekigambo okukira n'amagara gaabo; boona bakaba bari eiraka rya Yesu Kristo ahabw' Omwoyo Orikwera omu busingye bwona. Yohaana 17:20, “Tindikushabira abo bonka, kureka n'abandi Abariinyikiriza ahabw'ekigambo kyabo.”

Oo, kuri nimukireeba. Amaizi nigo gaahwerekyereize ensi, kwonka nigo maizi gamwe agaajunire Noa kandi gakagaruka gakajuna ensi yoona ahabwa Noa. Hurira eiraka Rye, eiraka ry'abaheereza Be, ryaba niryeta ngu oije oyeteise kandi otungye amagara.

5. Omu Mukono Gwe Gwa Buryo Akwaitsemu Enyonyoozi Mushanju.

“Omu mukono Gwe gwa buryo akwaitsemu enyonyoozi mushanju.” Hati buzima twamanyire okuruga omu mushororongo gwa makumi abiri eki buzima enyonyoozi mushanju ziri. “Amakuru g'enyonyoozi mushanju nibo baamaraika (entumwa) b'ago makanisa mushanju.” Hati titukaabaasa kukora enshobi omu nshoboorora yoona hanu, yaaba Naagitushoboororera. Ezi nyonyoozi mushanju nizo ntumwa aha busingye mushanju bw'ekanisa oburikwihaihana. Tizeetsirwe maziina. Zoorekirwe kwonka nka mushanju, emwe ahari buri busingye. Kutandikira aha Busingye bwa Efeso kuhikira kimwe ahari obu Busingye bwa Laodikia buri ntumwa ekareeta obutumwa bw'amazima aha bantu, etarikuremwa kukirinda, Ekigambo kya Ruhanga ahari obwo busingye.

Buri emwe ekaba ekiramatiraho. Zikaba zihamiire omu bwesigwa bwazo aha mushana ogwabandize. Buri busingye ku bwabaire buruga ahari Ruhanga, entumwa Ye erikwesigwa ekaba egarura obusingye obwo aha Kigambo. Amaani gaazo gakaba nigaruga ahari Mukama kitari kityo tizaakubaasize kuzibira ebingonzi. Zikaba ziri buhooro omu kureeberera Kwe, ahakuba tihaine ekyabaire nikibaasa kuzishahura omu mukono Gwe, nari ekyabaire nikibaasa kuzitaanisa na rukundo ya Ruhanga, ka bube oburwaire, akabi, okujwara busha, enjara, rurara, amagara nari rufu. Buzima zikaba zimweheereire kimwe kandi zirinzirwe amaani Ge agataine bugarukiro. Zikaba zitarikufa aha kuhiigwa okwabaire nikuzihikaho. Obusaasi n'okushekyererwa bikaba bitari kindi kureka eky'okureetera kuha Ruhanga ekitiinisa kugira ngu ziteekateekweho kuba zishemereire kubonabonesibwa Ahabwe. Kandi omu kusiima ahabw'okujuna Kwe zikaaka n'omushana gw'amagara Ge kandi zaayoreka rukundo Ye, okugumisiriza, obucureezi, okwerinda, okutwaza gye, obwesigwa. Kandi Ruhanga yaabashagika n'eby'okutangaaza, obumanyiso, kandi n'eby'amahano. Bakaregwa ngu n'abarikurengyesereza omu kwikiriza kwabo, kandi ngu n'abarikwera abeekuringa ahansi. Bakangwa ebibiina by'amadiini kandi baateererwa enaku, kwonka baaguma bari abeesigwa aha Kigambo.

Kandi okuba gye oku ti kw'entumwa mushanju z'obusingye bw'ekanisa zonka. Buri mwikiriza w'amazima ari omu ngaro za Ruhanga kandi naabaasa kutunga ahari rukundo Ye n'amaani, kandi atungye ebirungi byona ebi Ruhanga ari aha mwikiriza. Ebi Ruhanga aha entumwa, kandi n'oku aheereza omugisha kandi akakoresa entumwa, n'eky'okureeberaho ky'oburungi Bwe aha baikiriza boona kandi n'okureeberera Kwe aha ngingo ZOONA ez'omubiri Gwe. Amiina.

6. Rurara y'Amoogi Abiri.

“Omu kanwa Ke haarugamu rurara ey'amoogi abiri.” Omu Baheburaayo 4:12, “Ahakuba Ekigambo kya Ruhanga kiine amagara n'amaani, kiine obwogi bwingi okukira rurara yoona ey'amoogi abiri, nikicumita kihika ahu kitaanisiza amagara n'omwoyo, engingo n'omushokooro, kandi kirahuka kucaaka ebi omuntu arikuteekateeka n'ebi amaririire omu mutima gwe kukora.” Okuruga omu kanwa Ke hakarugamu rurara y'amoogi abiri nikyo KIGAMBO KYA RUHANGA.

Hati Paulo akagira ngu Ekigambo kikaija omu maani nk'oku kyaizire omu iraka. Ekigambo ekyabuuriirwe buzima kikeeyoreka. Nka rurara erikumurinkana, erikushara kikaza omu biteekateeko by'abantu, kandi nk'omusyo gw'omushaho oshemeza abantu kikashara kyaihamu endwara kandi kyabohoorora embohe. Hoonahoona ahu abaikiriza aba aba ira baabaire baza, “bakaba bagyenda nibabuurira Engiri (Ekigambo) kandi Ruhanga ahamya Ekigambo ekyo n'obumanyiso obwabaire bukikomookaho.” Abarwaire bakatambirwa, baadaimoni baabingwa, kandi bagamba omu “ndimi” nsya. Ekyo kikaba kiri Ekigambo omu bikorwa. Ekigambo ekyo tikikaremwaga omu kanwa k'Abakristaayo abarikwikiriza. Kandi omu busingye obu abw'aha muheru kiri hanu kiine amaani maingi munonga okukira obundi bwire bwona omu mugore Kigambo ow'amazima. Oo, busyo bukye 'mwe, imwe abakye omu mubaro, muramatire aha Kigambo, mukiijuze omu kanwa kaanyu n'omu mitima yaanyu, kandi eizooba rimwe Ruhanga aryabaha obwo bukama.

7. Ahamaisho Ge Nk'Eizooba.

Omu Kushuuruurwa 21:23 nihagira hati, “Orurembo orwo tirwetenga izooba nari okwezi kurwakira, ahakuba ekitiinisa kya Ruhanga nigwo mushana gwarwo, kandi Omwana gw'Entaama niwe tabaaza yaarwo.” Egi ni Yerusaalemu Ensya. Omwana gw'Entaama aryaba omuri orwo rurembo, kandi ahabw'okubaho Kwe, tiharyetenga mushana. Okwo izooba tiririturuka kandi rikajwa, ahakuba Niwe Izooba n'Omushana byaho, We wenka. Amahanga agarirwijamu garyagyendera omu mushana Gwe. Timushemereirwe ahabw'okugira ngu eizooba eryo ritwiriire haihi? Yohaana akareeba eizooba eryo niriija. Eego, Mukama Yesu, Ija juba!

Malaki 4:1-3, “Ahakuba reeba, eizooba niriija, niryotsya nk'etanuuru, obu abanyamaryo n'enkozi z'ebibi bariba nk'ebitsintsi by'embuba; ekyo kiro ekiriija kiryabookyeza kimwe, tikiribatsigira muzi n'obu ryakuba eitaagi; nikwo MUKAMA ow'amahe arikugira. Kwonka imwe abarikutiina Eiziina Ryangye, Eizooba ry'Okuhikiirira riryaturuka ahabwanyu, riine okutamba omu mapapa Gaaryo. Muryashohora nimukina nk'enyana zirikuruga omu kihongore. Aha izooba eri Ndikoreraho, muryaribatiirira ababi, babe eiju ahansi y'ebigyere byanyu; nikwo MUKAMA ow'amahe arikugira.” Nkikyo aho ogundi murundi. EIZOOBA nirijwisa amaani gaaryo goona. Oo, amaani g'Omwana wa Ruhanga nigaakira ahagati y'ebikondo by'etabaaza mushanju eby'ezaabu. Ngugwo Ayemereire, Omucwi w'emanja, Ogwo owaabonaboine kandi akatufeera. Akeekorera ekiniga kingi kya Ruhanga ari wenka. Akanyuukira omu inyuukiro rya viinyo ry'ekiniga kya Ruhanga ari wenka. Nk'oku twaheza kugamba, aha musiisi, eiraka Rye ni nk'okuhoorera kw'obururuma nari ebingonzi bya rufu birikwecundira aha nkiri z'aha nkungu. Kwonka ahari orikwera, eiraka Rye ni nk'eiraka ry'akagyera akarikweshongora ekyeshongoro kirungi waaba obyami ohuumwire, omazirwe omuri Kristo. Naatwemurikira n'amaranzi ga rukundo Ye erikutagata Naagira ati, “Mutatiina, Niinye Ogwo Owaabaire Ariho, Ogwo Oriho, Ogwo Oribaho; Niinye Ow'obushoboorozi bwona. Tihariho ondiijo kureka Nyowe. Niinye Alufa na Omega, Niinye BYONA.” Niwe Irebe ry'omu ruhanga, Enyonyoozi y'omu Kasheeshe Erikumurinkana. Niwe Orikukira oburungi abantu omutwaro aha magara gangye. Eego, ekyo kiro kikuru kiri haihi kusheesha reero Eizooba ry'Okuhikiirira riryaturuka riine okutamba omu mapapa Garyo.

Read the full account in...
Okworekwa kwa Patumo.

Ku naamureebire, naagwa aha bigyere Bye nk'ofiire. Kwonka Yantaho omukono Gwe gwa buryo naagira ati: Otatiina; Niinye w'Okubanza kandi Ow'aha muheru,

(Niinye Ogwo obaho); Nkaba nfiire, mbwenu Ndi ohuriire ebiro byona, (Amiina); kandi Nyine ebishumuruzo bya rufu n'okuzimu.

Okushuuruurwa 1:17-18.