Kristu kunse ka Lukuta.
Inshita ya Lukuta Lwa Laodikea.
William Branham.Belengeni ili buku...
Inshita ya Lukuta Lwa Laodikea.Ukusokolola 3:20-22,
20 Mona, ninjiminina pa mwinshi, no kukunkunsha: ngo muntu aumfwe shiwi Lyandi, no kwisulako ku mwinshi, Ndeingila kuli wene, no kulila pamo nankwe umulalilo, na wene alelila pamo na Ine.
21 Uwacimfya Nkamupelo kwikala na Ine pa cipuna Candi ca bufumu, ifyo na Ine nacimfishe, no Kwikala pamo na Tata pa cipuna Cakwe ca bufumu.
22 Uukwete ukutwi, omfwe ico Umupashi ulesosa ku nkuta.Nomba kuli icimfulunganya icikalamba nganshi pali iyi vesi pantu abengi nganshi abantu ababomba palwabo balaibomfya mukubila kwa mbila nsuma palwabo kwati fye Yesu ali pa mwishi wa mutima uwa mubembu onse ukukonkonsha ukuti bamusumine. Lyena kanshi kuti calandwa ukutila ngo mubembu aliswile umwinshi, Shikulu kuti aingilamo. Lelo iyi vesi tailelanda pa babembu umo umo. Iyi yonse mbila naikwata ukusondolwela nge fyo cila mbila icita muli cila nshita. Mu vesi 22 ilesoso kutila, “Uukwete ukutwi, omfwe ico Umupashi ulesosa ku NKUTA,” e ico iyi ni mbila ku lukuta lwa kulekelesha. Iyi e micitile ya lukuta lwa Laodikea ilyo impela ya luko ilepalama. Yena te mbila ya kuli umo ku muntu umo; yena cili Mupashi ukweba ifwe uko Yesu abelele. KRISTU NASHA ULUKUTA.
Bushe ici tacili icilekonkapo icikwetemo amano atemwa impela nge Cebo nacibikwa ku mbali pamulandu wa cisumino, Umupashi wa Mushilo walifumishiwapo kuli ba papa, ba bishop, ba kateka, ba filolo, na bambipo, kabili Kapususha bali mubika ku mbali pa butantiko ubwa milimo, atemwa ukuilunda ku lukuta, atemwa ukupashanya kumo kumibombele ya lukuta? Ni cinshi na cimbi icinga citwa ukukanya Wene? Ici e bucisanguka! Ici e kupona! Ici e mwinshi uwaisuka kuli munkanyakristu, pantu nga Umo aishile mwi Shina ilya kwa Wishi (Yesu) kabili tapokelelwe, lelo alikenwe, lyena kukesa isa umbi ne shina lyakwe umwine, (uwabufi, kapashanya) kabili ena bakamupokelela, Yohane 5:43. Umuntu wa lubembu, ulyo mwana wa boni akesa senda icifulo.
Mateo 24, ilalumbula ifishibilo mu myulu palwa buno bushiku bwa kulekelesha lintu fye Yesu talaisa. Ndesunguka nga mwalimwene icishibilo ca musango filya ililine icafikilishiwa ngo kulangisha icishinka cine ico tulanshanyapo. Cilye cishinka ca kutila Yesu balimusunkila kunse bwino bwino mpaka mu nshita ya kulekelesha Ena alisunkilwe kunse ka lukuta. Ibukisheni ukutila mu nshita ya kubalilapo lwena lwali lukuta ulwabalika ulutuntulu ulwa cine. Lelo nomba kwaliko icilubo icinono icaleitwa imilimo iya bena Nikola ico icalengele icishilwa ukukana isushiwa. Elyo mu nshita iya konkelepo imfifi ingi yalishilemo mpaka umupila wa lubuto waakile panono, kabili imfifi ya kupikile ulubali lwa cishilwa nacimbi. Mu nshita iyalenga citatu lwalikupikilwe nalyo line, kabili mu nshita iyalenga cine iyo yali Inshita ya Mfifi, ulubuuto lwalishimine lonse.
Nomba tontonkanyeni pali ici. Ulukuta lubalikila mu lubuuto ulusanika ulwakwa Kristu. Wene e KASUBA. Ulukuta e MWESHI. E ico ici cishilwa ca lubuuto e mweshi. Lwalicepele ukufuma mupepi ukubo mweshi utuntulu mu nshita ya kulekelesha, kuli sifele mu nshita iyalenga cine. Lelo munshita iyalenga cisano lwatendeke ukukula. Mulwalenga mutanda lwasendele ulutampulo ulukalamba ulwa kukula ukuya pantanshi. Mu ciputulwa ica nshita iyalenga cinelubali lwali lucili lulekula, elo mukupumikisha lwaishile leka, kabili lwashibantulukile mupepi ku cintu icishili nangu cimo, icakutila mucifulo ica lubuuto cali ukufita ukwa kupona, kabili ku mpela ya nshita lwalilekele ukubalika pantu imfifi yalisendele icifulo. Kristu ali nomba kunse ka lukuta.
Ici pano icishibilo mulwelele. Ukushima ukwa kulekelesha ukwa mweshi kwali ukushima ukwapwililika. Lwaishile shibantulukila ku mfifi iyapwililika mu ntamfu cinelubali. Mu ntamfu iyalenga cinelubali, imfifi iyapwililika yaishile ilyo papa wa ku Roma (Paulo uwalenga Mutanda) aile ku Palestine ukukwata ukutandala kwa mushilo ku Yerusalemu. Ena ali ni papa wantanshi uwatalile ukuya ku Yerusalemu. Papa etwa Paulo uwalenga Mutanda. Paulo ali ni nkombe ya ntanshi kabili uyu muntu etwa kuli lilye shina. Moneni yena ili iyalenga mutanda, atemwa impendwa ya muntu. Ici cili pa kucila pa kupumikisha fye. Kabili ilyo aile ku Yerusalemu, umweshi atemwa ulukuta lwaile mu mfifi iyapwililika. Ici eco. Ici e mpela. Ino nkulo tayakapite mpaka fyonse fikafikilishiwe. Ifi fine Shikulu Yesu, iseni bwangu!
Nomba kuti twamona umulandu kwabelele imyangashi ibili, umo uwacine na umo uwa bufi. Nomba kuti twamona Ukushima kwa mweshi kwamoneke lintu Papa atandalile Yelusalemu. umulandu Abraham akwatile abana baume babili, umo uwa kumubili (uyo wacushishe Isaki) kabili umo uwa bulayo. Nomba kuti twamona ifyo kutila ukufuma mu bafyashi bamo bene abalumendo babili bafyelwe nga ba mpundu, umo ukwishiba no kutemwa ifintu fyakwa Lesa, kabili umubiye ukwishiba ifingi ifya cishinka cimo cine, lelo tabali ba Mupashi umo wine, kabili e ico acushishe umwana uyo wali uwasalwa. Lesa tabikile ukuluba pa mulandu wa kuluba. Ena abikile ukuluba pa mulandu wa basalwa. ABASALWA TE KUTI bacushe abasalwa.
ABASALWA TE KUTI bacene abasalwa. Ni balya abaluba abacusha no konaula abasalwa. Owe, balya abaluba ni bakapepa. Bena balicenjela. Bena ba mu mushilwa wakwa Kaini, ubufyashi bwa nsoka. Balakula ba Babele wabo, balakula imisumba yabo, balakula amabufumu yabo, kabili inshita yonse ukwita pali Lesa. Bena balipata aba bufyashi ba cine, kabili bali no kucita fyonse ifyo benga cita, (nangula mwi Shina lyakwa Shikulu) ku konaula abo abali abasalwa bakwa Lesa. Lelo bena balefwaikwa. “Inge misungu cinshi ku ngano?” Ukwabule misungu, te kuti kube ngano. Lelo kumpela, cinshi icicitika ku misungu? Ilocewa no mulilo ushingashimishiwa. Kabili ingano? Shena shili kwi? Shena shalonganiwa mu butala Bwakwe. Mulya e muntu Ena ali.
Owe mwe basalwa bakwa Lesa, cenjeleni. Someni nganshi. Beni abacenjela. Bombeleni ipusukilo lyenu nakatina no kututuma. Shintilileni pali Lesa kabili beni abakosa mubulamba Bwakwe. Umulwani wenu, kasebanya, nangu ni ino ine nshita aleya aleenda nge nkalamo iilebuluma ukufwaya uo engalya. Loleni mu mapepo no kuba abakosa. Ino ni nshita ya mpela. Fyonse fibili umwangashi uwa cine no wa bufi fileisa mukukula, lelo ilyo ingano tashilakula, yalya mankumba ayapishiwa yalingile ukukakwa ku kocewa. Mwamona, bena baleya mukuilunda ku Kabungwe Ka Machalichi Ye Sonde. Kulya e kukakwa. Nombaline ukubikwa mubutala bwa ngano buli no kwisa. Lelo ino ine nshita imipashi ibili ilebomba mu myangashi ibili. Fumeni pakati ka mankumba. Tampeni ukucimfya pa kutila mwingaba abalingwa ukutashiwa kuli Shikulwinwe, kabili abalinga ukuteka no kutungulula pamo Nankwe.
Belengeni ili buku...
Inshita ya Lukuta Lwa Laodikea.
