Yokana ko Patumo.

William Branham.

Naka oitabo...
Aitapoet nako Patumo.

Apukokinio 1:9-10
Eong Yokana, Onacekus, loamori nepepe kayes aiticanio, ka ajakanut, ka atiting, nuejaas toma Yesu, abu kajai apujan naenyaritai Patumo, kanuka Akirot naka Edeke, ka aitejenun da nuka Yesu. Abu kajai kotoma Omoyo kaparan naka Ejakait, kasodi apupun eporoto loepol kokaukang, bala loka arupepe.

Aitapoeta nu nuetuputupas nuka Apukokinio naka Ejautene loka Yesu Kristo aponi koinakinai Yokana neajaar nges irengearitai apujan nako Patumo. Ejai ipujan yen toma angolol naka Aegean amairon akaisauni anyoun koitolima loka Asia Minor. Kanu keraar aiboisit nakileleba amor ka imunuo, aidodokai ka ikiritona, kedit do ameda ke, kanukangun etwasamai do nges Apugan nakoRome kwape aiboisit naetisilanarere ienan, neda edarere ienan luatioko noi, iketepegak apugan ka, ice da.

Ibuni jo acoikin ebe itijenara Yokana elopet neejaas Ikristayon kwape onac kotoma aiticanio. Kerai na apak naetoritor ekanisa losek toma areio na apol. Mam kerai bon ebe ekecediini “etepegitai kanginibois kere” konye itunga da ikulepek erupanakinio aidarisia koarete da. Yokana, kwape kikodeta luka luceda ajai do kwana engirikinit aenio kanuka Akirot naka Edeke ka ajenanut naka Yesu Kristo. Nakikamunere nges, apotu kesi kotamata aiar nges koipone loka aidor nges kakinyet adaun isawan akaisarei kaluongon konye komen. Apotu do ijaka ngul luanyunyurasi ido komamei ibore yenapedorete aswam kotubokis nges ayangario Patumo kwape ekacudan. Konye ajaas Edeke kanges, ido aponi nges koosikinai anyoun kapujan kosodi abongor Epeso ne bobo abu ngesi kiyatakinia kwape ekecokon kiton apak naka atwanareke.

Aatenak akanykaarei nuka aibuses naka etunganane ke.

Apukokinio 1:14-16,
"Kokwang akouke ka iketim da kwape ajul nukakwangak, kwape akako; akekonye da kwape aipeloret naka akim. Akekeje da aikomon nuepwatat, bala naililiauna kotoma oupa, eporotoke da kosubite bala eporoto loka akipi nuipu. Ido abu kitingite aacer akanykaarei kakanike nakoteten, ido kolom kaitukuke ekileng loekwana kowaitin iarei kere, ereeteke da kosubite bala akolong naecai kakepedor."

Eipone lokeraar atakanun naka Yesu atirorio naidul ka aisinyikokinio da neajai Yokana, lo da ajai egoloritai kinga kakwapuke kwape aitisilaret kanuka Akirot, ido koany AKIROT Nakajaran kwana ebwoi kakonyeneke. Aitapoet bo na nainwakakini, naarai kanginitodiaret naitetemitai ejaas ka apolou. Erai apukokinio naka ejauteneke loka aibuses.

1. ItimaKe kokwangak kwape Akako.

Abu Yokana kogeu ber nasodit aanyun kosodi alimor akwangus naka itimake. Keraasi lukakwangak, ido kiliacacaete kwape kakako. Mam na kerai kanuka amojonguKe. Okwe, mam. Itima lu luiliacacaete kiac mam itodunitos amojong dimarai aijen, ationit, ka acoa. Mam Lomam Edaun emojongi. Inyo nat apak kama ejai Edeke? Apak erai naka apolou naedit kama ejai Edeke, konye acoa nges epol akepolou. Esubit bala apak ya na elipia Solomon Edeke kanuka acoa tetere atubonokinia itunga luko Isirael. Aso ebunit kereka Ngesi, Ekatubon loka akwap kere. Eponio aitanap Nges aboko naka acoa. Erai ngun kes itodiaritosi itima lukakwangak kiacakiac.

Kerai Ngesi Ekatubon epukonori iitabon ido kotubonokini itunga kangun kanu kejaas tomakec. Abu Daniel koany Nges ebuni kotoma odouon. Erai ngupengun cut kes nuabu Yokana da koany. Apotu kesi kere cut koanyut Nges koipone loeputo. Apotu kesi koanyut Ekatubon ka amunyoKe naka etube ikaja kokeperiniKe, ebwoi esegaara korai da Lokalaunan, ilelebas ka acoa, isilosikino cut atubokin akwapin kotoma adolit. Alleluia.

2. Akekonye kwape Akim.

Koomoom ngun. Akonye ngun nusek acokicokete kede kakiyo nuka aiturur ka aitim. Akonye ngun nuapotu komonyata kanuka aitimit kates naka Lasaro. Akonye ngun numam apotu kosesenata aronis naka ikaarak luekajakinete Nges omusalaba konye kotoma aiturur kiworo atiar, “Papa kisioni kes.” Kwana akonye ngun eraas aipeloret naka akim, akonye nuka Ekatubon Loebuni atacakin ngul luagirete Nges. Nuka atironoreta nuka eitunganane kere nuabu Ngesi kitodia noi natakanunia Ngesi kwape Okoku loka Etunganan, nakerai adiopet kakesi nges na ebe atapit Nges amonyenen. Konye ca kau kaimony kangin ka aiturur da ngin aroko Edeke ejai.

Akonye ngupengun asesenenete aitapoeta. Asesenenete toma aidules nakotoma otauon luka itunga ka asiomunun da cut aomisiokec kajenunet da irotinikec luagelegela. Ngol lokesarani kakonye kangun kanuetwakete kerai Edeke, Lokiworoi nekejaas ngul lumam kejenete Ngesi kwape kejaar Ngesi, “...Arai mam iyuunito ebe Arai Eong, itwakete kotoma adiakanaretakus.” Yokana8:24. “Araimam eswamai aswamisio nuka Pap aka, sirikiyuut. Konye arai eswamai, (aswamiso nuka Papaka) karaida mam kiyuunito Eong kiyuutu aswamiso.” Yokana 10:37,38. Bala kolosek Yeremia, kerai Ngesi enabi lokamonyan, naarai mam itunga kepotu kijaut Akirot naka Edeke ido kepotu kigaliosi apukokinio awai.

Akonye ngun nuka Ekatubon nu da esaranete konokiete ejaasi kwapekwana da iwadikaete aijar naka awat kere. Engolengoleete lailo ka laije anatar akwap kere, emamei ibore yenimam Nges ejeni. Ejeni Ngesi nuipuda etau ka nuelosikinit nginidiopet aswam. Emamei da ibore yenibwaitai yenimam eponio apukor, naarai imujalalas iboro kere kakonyen Kangol loejai aiswamanar kaoni. Koomoom ber ijo ngun, ejeni Ngesi karaida ber kwapekwana ngun nuiwomoomoi ijo.

Eebo, Nges ngol ebwoi kanen kwape Ekatubon kede kakonye nuesaranete kanu aijaikin etube. Adaun apaaran naka aitim. Okwe, arai lem itunga kitoronikinos kosodete aimo akekonye kotoma adolit naeringar ber apak ejai. Arai lem kesi kitarautu atorobuke amutetekec eroko akwapin kecalara kotoma akim.

3. Akeje nuka Aisinit.

“Akekeje da bala aikomon (aisinit) nuepwatat bala naililiauna koupa.” Aisinit ejena kanuka agogonguke na itegelikina. Emamei imodiobore yenejenio yenipedori ijo ainyongakin ka nges tetere aiyatakinia akegogong. Konye do aisinit na naitetemit Akekeje erai da bobo naitegelikina naarai ebe atitingiki aitemio naka eupa loesarani, aitemio, aingito namam icie yenitoritor toma. Ido erai ngin cut nakabeit. Naarai aisinit itodiarit Etube loka Edeke: etube da loabu Edeke kicorak kosodi konyet aitodolikin.
Aimario 21:8,9,
“Kotema Ejakait Musa atiar, Kosub emun loka akiin, kibwaik kuju okitoi: kosodi kanen ngin yenetodio, naeanyunia ejari. Kosub Musa emun loka aisinit, kibwaik kuju okitoi: kosodi kanen, arai etodit emun itunganan kere, naesesenia emun loka aisinit, kojari “ Kebu Isirael kodiakarite. Ebusakinit da adiakar atubokinio. Kanukangun do abu Edeke kicorak Musa aikajakin emun loka aisinit okitoi ido ngin yenangolikini etajario kama kejai atubokinio kanuka adiakarike.

Konye kapaaran acie epote akeje ngun nuka aisinit aibwo kakwap. Ido ebuni da Ngesi araun Ekatubon loka akwap kere, ebuni da atubokin itunga kede kabeit ido kadolite da. Ido emameun eipone lokinacet etube ngol. Emamei aibelokin etube ngol. Emameun aitikitik nges. Ngol lomam edolit ebuni asalit mam edolit kwape kwangin; ngol da loesiliana ebuni asalit esiliana kwape kwangin. Je lomam ijulanakin mam ebuni aijulakin kapak kangin, naarai mam cut Nges iiritor ido mam da ebuni aijulakin. Akeje ngun nuka aisinit epote ainginyinginy lokasurup. Epote amudiar lokasurup loka kristo, etiang, ka aput ka ngul da kere lukarokok kakonyeneke. Ebuni Ngesi amudiar ipitinan luka ikanisan luayangasi Ekekiror kanu bon amunaaria ailiyake kosodi ainginyinginy kes nepepe kalokasurup loka Kristo. Ikaronok kere, ngul lumam iyuunitos ebe ejai Edeke, ka ngul luebalas ebe mam epedorio ajenun nuikamunitos Edeke dimarai iboro luetakanete bon, ka ngul luepodokinitos nuka tinen kwana bon, ka ngul luineras kwape ekototor, epote kere ajaun ngina. Atwanare, Okatwak ka ailit epote ajaun ngina. Eebo epote ajaun. Naarai naebunio Ngesi, eponio apukor iitabon. Erai kapak kangin nges etakanunia ekanisa loejalam ka abekon da ngun akany nubangiok. Ebuni Ngesi atiakun amerekekin kaneejaas akinei. Naebunio Ngesi, ebuni ayangaar ajakanut, naarai erai naKeng, ido eupunos Ngesi ka ilukumin irwan ilukumin itomon, aKeteran, luepote aijaanakin Nges. Erai nukaibuses! Okwe, erai kwape kwana, araimam, mam bo do bobo cut. Kitoronikin eroko apak ketuboro. Kokweny kanejaas ikatwak ido komo Edeke kanu ailelebio kede Ekemoyo Lokalaunan araimam itwaniari ijo aijar namam edaun. Kiswamau ngun kwape kwana eringa apak ejai.

4. Eporotoke Kerai kwape Eporoto loka Akipi Nuipu.

Nat kwana inyo kereka itodiaritos akipi? Kopupok ngin kotoma Apu. 17:15, “...akipi nuibu koany,... kes itunga, ka ikodeta, ka atekerin, ka angajepa.” Eporotoke kerai kwape eporoto loka ikodeta ineraasi. Ngesi bo inyo? Erai Etube. Naarai lu kes iporotoi luka ikodeta luka ikajenak, luapotu kanuka Emoyo Lokalaunan anatar aturio kitejenut Kristo kosodete da alimonokin Akekiro Nukajokak. Ebuni araun eporoto loka nginitunganan ikeun kotoma otube asurokin ekadiakanaran loabu kogir aijaun aikwenyaret. Eponio aiirar iporotoi luka ikiyakia ikanykaarei ikeseuna kocaete da. Ikalimonokinak ngul lumunon luapotu kolimonokis agogong naka Yesu naitajari, luapotu kolimonokis aibatis kakipi Kokiror loka Yesu, luapotu kolimonokis ailelebio ka agogong naka Emoyo Lokalaunan, luapotu kobwaata ka Akirot adepar neabwoiata kakeceijar kikulepek, kesi kere araasi eporoto loka Yesu Kristo kanuka Emoyo Lokalaunan ameun kiton anatar aturio. Yokana 17:20, “Mam elipakini lu bon, konye ngul da lukeyuunete kanuka akecekirot.”

Oo, arai bon ijo koany ngin. Kerai akipi kes kemudiarete akwap, konye kerai kereka bobo da akipi ngupengun kes kitajarete Noa, kitajarata da akwap kere kanuka Noa. Kopupok Eporotoke, eporoto loka ikejaanakinakake kwape enyaritor ijo toma aitoronikin ka aijar da.

5. KakaniKe Nakoteten Ajaasi Aacer Akanykaarei.

“Ido abu kitingite aacer akanykaarei, Kakanike nakoteten.” Nat kwana kijenu oni sek kokokoro loka akaisaarei iboro lueraas kaitebeikin aacer ngun akanykaarei. “Aiyeiyea naka aacer akanykaarei eraas imalaikan (ikiyakia) luka ikanisan ikanykaarei.”Aso do mam oni ti kipedo aiswamaun aibucaret kane koipone edio kere, kwape kijulanakinia Ngesi ngin kanuwok. Aacer nu akanykaarei eraasi ikiyakia mama ejaas aturio akanykaarei nuka ekanisa nu da etuputupasi. Mam kes enyaritai kikiroria. Bon itodiaritai kes kwape ikanykaarei, ediope neejai nginitur. Ameun katur naka Epeso kwape kwangin aijesun kiton atur na naka Laodikia abu ngolikiyakia koyau akirot nakabeit mama ejaas itunga, komam ekurokini aidarit ngin Akirot naka Edeke kanuka atur naka ekanisa ngin bon.

Kanginidiopet abu kiminaikin mamake. Keraasi kesi lumam kiriangiriangas kotoma arimanutukec neejai aica nageunet. Kwape eriyaror nginitur awai kama ejai Edeke, ajai do ekiyakiake lomunot aibelokin atur ngin neejai Akirot. Kerai agogongukec nakebuni kanejai Ejakait karaimam, mam ti kesi kepedosi abwoikin akailan. Ayuara kesi kotoma aidarioke, naarai amamei ibore yenapedori aurupoor kes Kakanike, amamei da imodiobore yenapedori aitiak kesi ka amina naka Edeke, karaida kerai ariebo, aronis, amujalal, ebeli, ekileng, aijar araibonat atwanare. Keraas kesi kabeit luainakina mamake bobo da kidaritete kede Kakegogong kere. Mam kesi kepodokinito nuka areo nabunonokini kes korotokec. Ariebo ka akwenar kerai konyet nuabeitor ainanakinia aibuses nejai Edeke ebe emaritai kes da araut luebusakinit aisiriebio kanuKe. Ido kotoma aisiyalamikinit kanuka Aitajarioke anokiete kesi kede kakim naka Aijarake ido da elorounitos aminaKe, atitingikin, aiyapepera, aitikokina, aiyamaara, amunonut. Edeke da abu kitejen kes kede kaswamisio nukaumokin, aanyununeta, kaswamisio da nukapedor. Aponi kiwosai kesi kanu araut luitemeritos aomisio nuka ediini, ka lueomiara ebe kes lukalaunak. Apotu iriongeta kogiroto kes kitaraunitete da luekwenare konye apotu kesi kosalito eraasi lukabeit nejai Akirot.

Mam da aitalakaario na erai bon kanuka ikiyakia lukanykaarei luka aturio nuka ekanisa. Konye nginikeyuunan kere yenikabeit ejai toma akan naka Edeke ido epedori airiun kanejai aKemin kagogong da, kosodi adumun ameda naileleba naka ngun kere nuerai Edeke nejai ikeyuunan. Nueinakini Edeke ekiyakia, keipone da loisirerengionono ka aitwasamaenen nges, erai aanyunet nejaas ikeyuunak kere, naka akejokis ka aidarake da mama ejaasi atutubeta nuka akuanake KERE. Amen.

6. Ekileng Loekwana Kowaitin iarei kere.

“Ido kolom Kaitukuke ekileng loekwana kowaitin iarei kere.” Iburanian 4:12, “Naarai eraiAkirot naka Edeke nakajaran, nakapedor da, ekwana adepar ngolikileng loekwana kowaitin kere, ipelori da kiton aitiak aijar ka emoyo, ailenyeta ka asuni, emisiikin da aomisio ka nuelosikit etau.” Kaitukuke kolom ekileng loekwana kowaitin kere iarei, ngin nges AKIROT NAKA EDEKE.

Aso abala Paul ebe abu Akirot kobu kotoma apedor kede keporoto da. Akirot nalimonokinio abu kaitebeikin kitodianar alopet bon. Kelomari aomisio nuka itunga bala ekileng loesarani, lo da etubutubei, bobo da bala ekileng loka ekajengan abu kojengana adekasinei kosodi da alacanakin ikijoreoro. Kanginibois kere nalosete ikeyuunak ngul lukolosek, “apotu kesi koloto elimonokinete Akiro Nukajokak (Akirot) ido abu Edeke kitogogong Akirot ngin ka aanyuneta etupitosi.” Lukadekak etangaleununo, ajokin erengeanario, ido apotu kinerenenas kangajepa nukitetiak. Kerai ngin Akirot kotoma aswamisioit. Mam cut Akirot ngin ikarunitor kakitukes nuka Ikristayon luiyuunitosi. Ido kotoma atur na nakawasia ejai ne korai naegogong ka naepol da noi kotoma ateran nakabeit naka Akirot adepar nesek. Okwe, isipan yenicici, yes ludidik luikidioko, kodongakinos neejai Akirot, kilelebata akitukes kus ka ikusitauon da kede kangin, ido konyet kapaaran ace ebuni Edeke aijaikin yes ajakanut.

7. EreeteKe Bala Akolong.

Kotoma Apukokinio 21:23,
“Mam ere ipuda akolong karaida elap acaikin nges; naarai inwakakinit aibuses naka Edeke, atalake da nges Imerekek.” Erai Yerusalem lokitetet nges lo. Ejaun Imerekek ore ngol, ido naarai ejaun nges nen, mam do bobo ipudakinoi aica: Mam akolong ebuni alomun kosodi aica kangina, naarai Nges Elopet erai Akolong ka Aica da kangina. Atekerin nuepote tomake elosenenete kotoma Aicake. Mam kereka ijo iyalama ebe kidoloki apaaran ngin oni? Abu Yokana koany apaaran ngin ebunit. Karaida ikote nen, Ejakait Yesu, kobia katipet!

Malaki 4:1-3,
“Naarai ebala Ejakait loka ajoresio ebe, Koany, ebunit apaaran, esarani bala eupa; eraunos luituros kere, ka luiswamaete aronis kere ariang: icwei kes apaaran naebunit, mam ideikini kes aliasit karaida atenu. Konye yes luiyongito Ekakiror elomuni kanukus Akolong naka adolit ejai kaitangaleun kotoma abebenokake. Ilosete yesi icuros bala itaak kengaun kauj. Ebala Ejakait loka ajoresio ebe, Ipudapudaete yesi ikaronok; naarai eraunos ekurwon kotauon luka akejekus kapaaran naeswamaa.“

Engin bobo kanen. AKOLONG ecai kakepedor kere. Oo, apedor naka Okoku loka Edeke ecai kokiding kipirin lukatalai ikanykaarei lukesabu. Engol ebwoi, Ekatubon, Je loaponi kisiriebai kotwana da kanuwok. Abu Ngesi Elopet koyanga kamake anyunyura naka Etube loka Edeke. Abu Ngesi bon kicakacak acuet naka adedeng naka anyunyura naka Edeke. Kwape sek kilimunitor oni, mama ejai ekadiakanaran, esubit eporoto loka Ejakait bala agiro naka akipi nuecakitos araiboot ikokoron luka akipi kotoma akailan nuka atwanare ibukanakinos atiidan nuka ariri naka angolol. Konye mama ejai yenikalaunan, esubit Ekeporoto kwape eporoto loka aguurut naewoi ejijim iperi do jo kotoma aiyengun, kisimonikina kotoma Kristo. Ecaikini mamawok kede kainwaketake nuka amin nukitwamanaunete ebala Ngesi, “Sirikiyong, arai Eong Ngol Lokejai, Ngol loejai, Ngol Loebuni; Eong Lokapedor kere. Amamei bobo ece kilema Eong. Eong Alupa ka Omega, Loerai ngin KERE.” Nges erai Apecel naka Aditot, Aacerit Naemwekimweki naka Atupuruc. Nges ngol Loitelekarit ilukumin itomon kotauka kajokis. Eebo ekapakina apaaran nakapolon acilun ido elomuni Akolong naka Adolit kede kaitangaleun kabebenokaKe.

Naka oitabo... Aitapoet nako Patumo.

Naanyunia Nges, abu kebirokin akejeneke bala atwanit. ”Kedokok akanike nakoteten, kabala ebe, Sirikiyong, arai losodit ka Lokawasia da,

ido Lokajaran; abu katwanite, ido koany ajari ikar ka ikar, ajai kilaceta Iuka Atwanare ka luka Okatwak.

Apukokinio 1:17-18.