Akitapoet ngina alo Patimo.
Yokana alo Patimo.
William Branham.Tosiomete alo akirot...
Akitapoet ngina alo Patimo.Apukokino 1:9,10
9. Ayong Yokana ngolo dang arai lokatokus, ka erukitos kus anakisicanio, ka alotooma apukan ngina ka atitinyu a Yesu Kristo, abu oyakaun loculat ngolo ka anam, ngolo enyaritae Patimo, anguna ka Akirot ka Akuj ka akiteyenunet ngina a Yesu Kristo.
10. Abu ayong atoyiakaun a lokuwuam nakolongit ngina ke Ekapolon, ka abu eira a lokau kang eporoto ngolo apolon ngolo ekoni ngolo ka arupepe,Ngakitapoeta nguna aropiuno nu, nguna ka apukokino ngina ke Etunganane a ngolo erai Yesu Kristo aponi inakinai neni a Yokana, apaki ngina arocarere inges Patimo loculat ngolo ka anam. Iculat ngini cici en, ayiai tooma anam ngina ka Aegean, neni ebai ngamairei ngatomoniuni, alokipetet ka akwap a ngina a Asia Maina. Ido arai inges akibois ngina alalak ngatabab, ka kileleba ngimuno, ngageregera ka ngitwania, mam pa ayiakatar inges idiobore ngini arai kitojoik amucurusao, angun, esitiyae inges Apukan ngina Roma ikwa akibois ngina erocere ngikasecak ngulu apolok noi, ka ngulu itepegito apukan, ka ngice dang.
Iripuni iyong atemar eyiai Yokana anege iteyeniara Lokristo ikwa Lokaato ngolo eyiai nakisicanio. Arai alotooma ngapakio nugu ayiakar ekanisa ngolo esiaunan tooma nakisicanio. Mere akitidingit akiyiun ka “akirworor ikes a nguna aronok anakiboiso a daadang bon” nai ayiakasi ngitunga erocorocoo ka toaretei dang. Nai ayiai Yokana eriamunit ngican ngulu ka aeno ikwapei ngasepico a nguluce a daadang, anguna ka Akirot ka Akuj ka akiteyenunet ngina a Yesu Kristo. Apaki ngina ekamunere inges, apotu ikes kikatakis akiar inges ka akipore inges ka akimiet alotooma apaki ngina a ngisaae a ngatomoniarei-ka-ngiomwon. Apotu ngikapolok ngulu anyunyurasi ngul kekurowo ikes akiar inges, torocasi inges Patimo ikwa ekapilan. Nai ayiai Akuj kaapei ka inges, aponi kideunae inges akitodol ngina abunio tonyounio a loculat ka anam tobongo Epeso, neni abunio inges torucoria ekeetic ikwa Ekeyokon akitodol napaki ngina ka atwanare keng.
Ngadoketa Ngakanikarei Nguna ka Akibuses a ngina Ke Etunganane Keng.
Apukokino 1:14-16,
“Akwang akou Keng ka ngitim dang ekote ngajul nguna a imesek, akwang noi ekoni edou; ekote ngakonyen Keng arira ngina ka akim;
acayete ngakejen Keng ikwa asuwat ngina epwasitae ka erurumae etoil Keng ikwa ngakipi nguna alalak.
Adakit inges a nakan Keng a ngina aloteten ngikacer ngikanikarei, alomunit anakituk Keng atum ngina ekwaka ngiwaetin daadang ngulu arei: acai ereet Keng ikwangina ecaya akolong anagogongu keng.“Epite ngolo ikituumikinio ka ngolo enepunia etau anatakanunet a Yesu neni a Yokana, a ngolo arocaritae neni alwanan a nguna ka Akirot, toanyu AKIROT ngina eyiairi ngin tokona ewoi a lokingaren Keng. Erai kire na akitapoet ngina etacaikinan, anerai nginibore daadang itamio kori elimitoi ane, eyiakatar apolou keng. Wuoitakoi apukokino ngina ka akibuses Keng.
1.Akwangak ngitim Keng Ikwa Edou.
Abu Yokana ngina esiaunan tolimu esuuda ngolo a ngitima Keng. Arai ngulu akwangak, ido tocayete ikwa edou. Meere nu a nguna a ngikaru keng. Okoe, mam. Ngitim ngulu akwangak noi ngul, nyitoodiarito ngikaru Keng nai ayenut, akitemokino, ka aosou. Inges ngolo eyiari ngikaru ka ngikaru ngol, emam nyemojongoene. Nyo bo ngapakio aneni ka Akuj? Erai ngapakio ibore ngini edit aneni ka Akuj, aosou inges ejok. Ikoni apaki ngina anyaraa Solomon Akuj a nguna ka aosou ikotere ipukaa ngidwe ngulu a Israel. Ebunit inges, ngolo erai Ekatubon ka akwap a daadang. Ebuni inges enapit aboko ngina ka aosou. Erai ngun nguna ewoikinito ngitima Keng ngulu emilimilete ngul.
Arai inges ekatubon, tongaanari dang ngikitaboi ido kisitiyiae ngikitaboi ngul atubonokinia. Abu Daniel kingolik Inges ebunit a lodowon. Erai ngun nguna abu Yokana kingolik. Apotu ikes lu arei ngul kingolikis inges erai ngolo ikwaan. Apotu ikes toanyuasi ekatubon eenikinit arukwan loseketa Keng, towuoi eseg ka ekwang, kileleba aosou, itemoikino ka akileleba atubokin ngakwapin alotooma akiyookino. Haleluya.
2. Ngakonyen Keng Nguna Ekote Akim.
Totamaki ngun. Ngakonyen ngunapei paaran aribokinito alotooma ngakiyo nguna ka akision. Ngakonyen ngun, nguna apotu kigworo ka akision analial a Lasaro. Ngakonyen ngun, nguna pa apotu kingolikis aronis a ngikaarak a ngulu aronok angul, a ngulu apotu kinenekis Inges lomusalaba, abu kikalou alotooma akialolong tema, “Papa kitim ikes.” Erai ngakonyen ngun arira ngina ka akim, ngakonyen nguna ke Ekatubon, ngolo ebuni akitac ikes ngulu apotu tongero Inges.
Alotooma epupe ngolo sek a etunganane, abu Inges kitoodiu epupe ngolopei a itungan ngol, apaki ngina atakanunia ikwa Lokoku ngolo a Itunganan, inges lopei ngol, amina Inges akigworo, ido nai alokau ka akigworo ka akialolong angin, arai Inges Akuj.
Ngakonyen ngunapei ngun ikec eteete ngaanyuneta. Apedorito ngakonyen ngun aripikin neni cukul noi alotooma ngitai a ngitunga ka asiomun ngatameta kec ka ayenut ngirotin kec ngulu alalak noi. Arai Akuj ayiai enepi anakonyen ka akuwuan a ngina etwani, ngolo abu kigwor anguna a ngulu pa ayenete atemar arai inges ngai, “Erai pa kinupa atemar ayong lopei ngol, ipote iyes atwakare anasecisia kus.” Yokana 8:24.
“Erai pa ketiyiai ayong ngiticisio a Papa kang, nyikinupa ayong. Nai ani ketiyiae ayong (ngiticisio a papa kang), erai pa ikinupito iyes ayong, tonupa ngiticisio,” Yokana 10:37-38.
Ikwa kolong Yeremia, arai inges ekadwaran ngolo amina akigworo, anerai apotu ngitunga nyecamut Akirot ka Akuj ido apotu kijukasi apukokino nawae.Ngakonyen nguna eriraete nguna ke ekatubon ngun, eyiakasi akigir akiyiar angitunga daadang. Tokeereto todolito ama ka ama ka abongunit alotoma akwap daadang, emam ibore ngini nyeyeni inges. Eyeni inges nguna iitanit etau, ka nguna elosikinit nginitunganan daadang akitiyia. Emama ibore ngini engopit ngini nyisilereunio, anerai ileerete ngiboro daadang aneni Keng a ngolo ebeit iwon abongonokin. Totamaki nguna, eyeni inges tar tokona nguna itami iyong.
Ee, inges ngol ewoi ikwa ekatubon ka ngakonyen Keng nguna eriraete anguna ka akitolot etube. Adaun apaaran ngina ka akitimio. Okoe, epite ngolo abeitor ngitunga kiwarirtotor ereet Keng anakiyokino eroko apaki eyiai. Ikotere itaraunete ikes atorobu Keng apilo eroko apaki ngina icunyaria Inges kwap ka akim.
3. Ngakejen Nguna Ikote Nguna ka amaratoit angina epwasitae.
“Ekote ngakejen Keng amaratoit ngina epwasitae nguna asibit anokete a nakim.”
Eyenen sek amoru na anguna ka agogongu keng. Emam ibore alotooma ngiboro ngulu eyenio ngini ipedori iyong akisitiyia akikatakinia inges. Nai amaratoit na ngina iteyenunit ngakejen Keng, erai ibore ngini yenen ido alotoma nen, adau akiloun akikatakino ngina ka arira ka akim a ngina amwanan, akikatokinet ngina nyikatokino idio. Ido iyokino kire ngun. Anerai ewoikinit amaratoit etube ngolo ka Akuj: etube ngolo abu Akuj kicikak ebe toyiakaun, ka abu kitodolik dang.Ekimar 21:8-9,
“Tolimok Ekapolon Moses tema, kitiyiau etorube a emun a ngolo ka akisorit, ido kikacak lopir, itunganan daadang ngini ekonyi emun, emaikina kingolia lotorube ngolo ke emun a ngol, ido eyiari itunganan ngin.
abu nai Musa kitiyau etorube a emun a eburonis, ido kikacak lopir; apaki daadang ngina ekonyia emun itunganan idio,engoliari itunganan ngin neni a emun a ngolo etiyaunitae ke eburonis, ido toyar.”
Asir Israel asec. Eitana akisec totubokinae. Aso abu Akuj kicikak Moses akiwakin emun ngolo suwat lopir, ka inges ngini abu kingolik ayiai inges ayiunio anasecisia keng.Nai akolongit apei epote ngakejen nguna ikote amaratoit ngun akiwuo alotooma akwap, ido ebuni Inges araut ekatubon ngolo ka akwap a daadang, ka alotoma arakau elope ke etube ebuni inges atubokin ngitunga a etube a ngolo edolit. Ido emamukaun akiicor alotube angol. Mam dang epite ngolo ebukinor etube ngol. Emam dang aboliaboliatoi alotoma keng. Inges ngini nyiyokino erubakini ca erai ngini nyiyokino; inges ngini esiiliana erubakini ca erae ngini esiiliana. Inges jik ngolo Nyijulanakin ngol, nyebuni jik akijulakin anapaki a ngin, anerai emam nyikatokino inges kori nyikatokini nabo akijulakin. Epote ngakejen nguna ka amaratoit ngun akipudaar emoit. Epote akiranyun eketidinga a Kristo, etiang ka aputo keng ka nginibore daadang ngini etakadakinan anakonyen Keng. Ebuni Inges akiranyun ngatukon nguna a ekanisa nguna adaut akisitiyia Ekiro Keng amunaunia apirianut Keng ido ebuni Inges akiranyun tar eketidingan Kristo. Ngulu aronok daadang, ngulu daadang nyenupito atemar eyiai Akuj adio, ngulu imuriara alotoma ayenut atemar eyiai Akuj adio, ka ngulu itarauna ngitunga ka akwap a ngina tokona epoloe a na, ka ngulu engamanakin ngakirosia ka akwap nguna kitet, epote daadang ayiakaun nen. Ebuni Akitu, egeena, ka akipany ngina ka aliel dang eyiakaun nen. Kire epote ayiakaun. Anerai ngina ebunio inges eponio angaar Ngikitaboi. Erai nai nen apaki ngina epeleunio ekanisa ngolo jalam, ka ngapesur nguna banganotin. Ebuni Inges atiakun ngamesekin aneni a ngamee. Ikamari inges apukan ndina ebunio, anerai erai ngina Keng, ido epote ngalipio irwanikinitae ka ngalipio ngatomotomon ayiakaun ka Inges, ateran Keng, ngina ebunit akijaanakin inges. Akibuses! Okoe, erai torai napakana kori mam nabo. Tokiwa eroko nyelunyara apaki. Tokienyutu alotooma ngikatwak ido kiwara Akuj ikotere ikilelebio kan Ekuwuam Keng ani kemam ikibuci iyong akiyiar ngina emam nyedaun. Kitiyia ngun tokona eroko eyiai apaki.
4. Ekoni Eporoto Keng eruye ngolo Angakipi a nguna Alalak.
Tokona nyo mono ewoikinito ngakipi? Kiira nu alotoma Apukokino 17:15,
“Ngakipi nguna itee iyong,… erai ngitunga, ka ngasepico, ka ngibukui, ka ngangajepa.”
Ekoni eporoto Keng erwor ngolo ka asepic a ngina alalan. Nyo nai ngin? Erai ngol etube. Anerai erai ngol erwor a ngiporotoi a ngasepico a ngikayenak. Ngulu apotu alotoma Ekuwuam ngolo Akuangan kiteyeniar neni a Kristo ka tolimonokis Eemut Keng. Ebuni nen araut akilerer ngina ka anyoun ke eporoto a nginitunganan anapaki a ngina ka atubokino akitoron ngolokasecan daadang anguna pa abunio torimaria nguna eretakinitere inges. Epote ngiporotoi ngulu a ngikiakitono a ngulu kanikarei akupo noi ka tocayayete dang noi. Tar ngikalimonokinak dang ngulu eyiunak ngulu apotu tolimonokis apedor a Yesu ngina ikilakuni, ngulu apotu tolimonokis ebatisimu ngolo a ngakipi a Lokiro a Yesu, ngulu apotu tolimonokis nguna ka akilelebio a ngina a lotooma ka apedor ngina ke Ekuwam a ngolo Akuangan, ngulu apotu towaa ka Akirot akilo aminakin ngakecewat; erai ikes daadang eporoto ngolo a Yesu Kristo alotoma Ekuwuam ngolo Akuangan, ameun alotooma ngaturio daadang. Yokana 17:20,
“Nyelipi ayong anguna alu bon, nai anguna angulu ekeyiunete ayong alotooma akitatam kec.”Okoe kerai topedorete iyes akingolikin Inges. Arai ngakipi apotu tomunyasi akwap, nai arai nabo ngakipi nupei ngun apotu toyiut Noa ka toyiu akwap daadang anguna a Nua. Topupokisi eporoto Keng, ngiporotoi a ngiketiyiak Keng, ikwapei enyaratar nakiki ka nakiyiar.
5. Nakan Keng ngina a Loteten Ayiakasi Ngikacer Ngikanikarei.
“Atingit Inges anakan Keng a ngina a loteten ngikacer ngikanikarei.”
Tokona ikidau iwon ayenun alotooma ngulu cicik 20 apolou ngina a ngikacer. “Akimunono ngina a ngikacer a ngikanikarei erai ngimalaikan (ngikiakitono) ngulu a ngikanisae a ngikanikarei.” Tokona nyikipedori iwon akitiyiaun adio bucaret anege alopite a edio a daadang, ikwapei eyiakar Inges ikilacanakini iwon apolou kec. Ngikacer ngulu kanikarei lu erai ngikiakitono lokanisae ngikanikarei ngulu atupakina. Mam nyenyaritae ikes a ngirorwa kec. Ameun alotooma aturi ngina a Epeso akitodol naturi ngina a Laodekia na, abu ngolo kiakitono yau Akirot ngina ka akiyookino lotunga, tomam akikaruna ngina ka akiricit Akirot paka alotooma ngina turi daadang. Abu ngolo kiakitono kimiidikina Nakirot. Arai ikes ngulu ecasito alotoma akecekerarit akica ngina esiaunan ngin. Ngina eakaria aturi adio aneni ka Akuj, enyakununuyete ngikiakitono Keng ngulu eyiunak ngul ngitunga nabo tooma Nakirot. Abunit agogongu kec aneni ke Ekapolon, ani kemam pa kepedorito ikes awoikin ngakikatanakinet nguna ationok. Angaleete ikes alotoma akidario Keng, anerai amam ibore ngini apedori ajakar ikes anakan Keng, ka amam dang ibore ngini apedorit atiakar ikes anamina ka Akuj, ata bo kerai ibore edeke, ationis, akiler, eron, atum akiyiar kori atwanare. Arai ikes ngulu ainakina kire neni Keng ido kidaritetei ka apedor a ngina ka agogongu Keng. Pa ekamunito ikes nguna ka akisicanio angina abunene neni kec kori nguna ke erasi, nai arai ainakin Akuj akibuses bon, anerai ajokinit ikes ariamun ngican a nguna Keng. Ka alotooma akitalakar Inges a nguna ka akiteyiario apotu ikes tonokete ka akica a ngina ka akiyiar Keng ido kitodiut amina Keng, atitinyu, apatanu, atitinyikinit, akiyiapara, ka akiyiunit. Ido abu Akuj kitogogong ikes ka ainakin ikes etic ngaumonokineta, ngakitanyuneta, ka ngaumonokineta. Aponi kisiburae ikes anguna ka arakau ngibango, ka ngikebelibelok ngulu asegak. apotu ngatukon nguna a Ngikiristo kitorona ikes ido kirumae ikes ikwa ibore ngini ekianare, nai apotu ikes tosalakis erai ngulu etingito Akirot.Ido akitgogongio na nyerai a nguna a ngikiakitono bon a ngulu a ngikanisae a ngulu kanikarei bon. Eyiai ngolo kanupan ngolo iyookino daadang tooma nakan ka Akuj ido enakunit inges alotooma amina Keng ka apedor, ka ariamun akileleba ngina a ngajokisia anguna sek einakinit Akuj neni a ekanupan. Ibore ngini einakinit Akuj ekiakitono, kori epite ngolo isirerengio Inges ka isitiyiae dang ekiyiakitono, erai akitaanyunet neni a ngikanupak a daadang a ngulu ka ajokis Keng ka akidario ka neni a ngimembae a DAADANG a ngulu erai akuwuan Keng. Amen.
6. Atum ngina Ekwaka Ngiwaetin Daadang.
“Abu atum ngina akwaka ngiwaetin keng ngiarei tolomu a nakituk Keng.” Alotooma Ngiburanian 4:12, “Anerai akirot ka Akuj erai ngina eyiari ka ngina ka apedor, nabo ekwana akilo atum ngina ekwaka ngiwaetin daadang, icumi akitodol akitiak akiyiar ke ekuwuam, ngakilenyet dang ka asumet, emisiikini ngatameta ka nguna elosikinit etau.” Abu atum ngina akwaka ngiwaetin ngiarei tolomu a nakituk Keng ngina erai AKIROT KA AKUJ.
Ebala Paulo ebe, abu Akirot bu ka apedor ka eporoto. Itodiarit Akirot alope ngina elimonokinio ngun. Ikwa arira, atum ngina ikitubi abu toloma tooma etau a itunganan, alopite a ngolo eyiakar ekileng a edokito ngolo eyengari ngidekesio ido tolacaki ngienan. Neni daadang aloseneneete ngikanupak ngul, “Apotu toloto tolimonokinete Eemut (Akirot) ido abu Akuj kitogogong Akirot ngin a ngakitaanyuneta a nguna atupakinito.” Aponi kitangaleunoi ngikadiakak, aponi kiritarae ngikuwuamin ngulu aronok, ido apotu ikes kirworikis a ngangajepa a nguna kitet. Arai ngin Akirot eyiai lotic. Emam nyikaruna Akirot ngin a nakituka a ngikiristo a ngulu iyiunito. Ka anaturi a ngina ka awasia a na eyiai inges erai ngina agogongiar ka topoloorite dang akilo ngina sek ayiakar alotoma ateran ngina a kire ngina ka Akirot. Okoe, isipan ngini cici, iyes ngulu ipeipeyianito ngul, totinga Akirot kojokan, kileleba ngakituka kus ka ngitai kus ka Akirot a ngin, ido akolongit apei ebuni Akuj ainakin iyes Apukan.
7. Ekoni Ereet Keng Akolong.
Alotooma Apukokino 21:23,
“Nyiitani ere akolong kori elap acaikin inges: anerai inwakuni asir ka Akuj inges, etaa Keng dang inges imesek.”
Erai ne Yerusalem ngolo kitete. Ebuni imesek ayiakau lotaun ngol, ido anguna ka ayiakauna Keng, emamukaun akica ace ngina iitanio. Emam nyelomuni akolong ido tocaik nen, anerai erai inges elope akolong ka akica dang. Ngibukui dang ngulu epote neni Keng epote alosit anakica Keng. Nyilakara mono iyes anguna ikidolokinio iwon apaaran ngi a? abu Yokana kingolik akolongit ngin ebunit. Kire jik, Ekapolon Yesu, bua atipei!Malaki 4:1-3,
“Ebala Ekapolon ngolo etiron ebe, kiirasi ebunit akolongit ngina eriraa akim ikoni ngina ke ekitet, akolongit ngina icunyarere daadang ngulu eturok ka ngulu itiyiaete aronis, mam ikes ipei dang ngini idongi nai iyes ngulu itopoloorito Ekiro Kang elomuni apedor Kang ngina ayiunan ikoni akolong, ido bu apedor neni kus ikoni ngikoi ngulu ka akolong, ikitangaleu iyes. Iruwurosi iyes ngulu ilacakina ngulu ilakara ikwa ngimanang ngulu engaaritae ananok akolongit ngina etiyiakinia ayong ngun ilounete iyes ngulu ityiaete aronis ipudaarete iyes ikes ikwa apuwa ngina eyiai kwap ngakejen kus. Anakolongit a ngina etiyiakinia ayong nu, adau Ekapolon ngolo a ngajorei erwor ngun.”Inges ngol nabo. AKOLONG ngina ecai alotooma agogongu keng daadang. Okoe, agogongu ngina a Lokoku ka Akuj ecai alokiding ngicoge ngulu a egolit a ngulu kanikarei ngulu a ngitaae. Inges ngolo ewoi ngol, ekatubon, Inges ngolo abu toriamu ngican ka totwan dang a nguna yok. Abu inges elope kiwok etube ngolo ka Akuj daadang. Abu inges kipuda acuet ngina a ngacwan a ngina erai arienyao ka anyunyura ngina ka Akuj bon. Ikwapei ikidaunia iwon alimun, ikokini eporoto keng a neni ke ekasecan eruye ngolo a ngakipi alotoma aguruwoc ngina cukul noi ka eruye a ngikaguragurae a ngulu ka anam ngulu icuruno atwanikin lokipetetio ka anam ngulu ileleba ngamoru. Nai neni a ekakwang, ikokini eporoto Keng aeo ngina abobon ngina a ngakipi a nguna apatanak apaki ngina iperio iyong alodiyete kec iengunit, kimwonikina alotoma Kristo. Ikicaikinit inges iwon ka akica a ngina a ngikoi ka akolong a ngulu ka amina tobala, “Nyikuriaketa, arai ayong ngolo keyiai, ka ngolo eyiai, ka ngolo ebunit; arai ayong Akuj ngina Etiron. Mame nabo Akuj ace alokau kang. Arai ayong Alpa ka Omega, ngolo erai ibore DAADANG.” Erai Inges Aturot Ngina Ka Akadipaalat, Etop Ngolo Ecai Ngolo Ka Ataparacu. Inges Erai Ngolo Ebusan A Lotau Kang Akilo Ngalipio Ngatomon. Ee, eyiai akolongit ngin apeleun, ido ebuni akolong ngina ka akiyokino alomun ka angaleu dang eyiai nabebenuk Keng.
Tosiomete alo akirot...
Akitapoet ngina alo Patimo.
