Yoane na Patomo.

William Branham.

Tanga compte mobimba na...
Emonaneli ya Patomo.

Emoniseli 1:9,10
9 Ngai Yoane, ndeko na bino, oyo azali kokabola elongo na bino mpasi, bokonzi mpe motema molai kati na Yesu Klisto, nazalaki kati na esanga oyo ebengami Patamo, na ntina na Liloba na Nzambe, mpe na litatoli ya Yesu Klisto.
10 Namemamakai na Molimo na mokolo na Nkolo, bongo nayokaki nsima na ngai mongongo mokasi, lokola kelelo.

Molongó ya bimonaneli ya Emoniseli ya Yesu Klisto epesamaki epai na Yoane ntango atyamaki lokola na boloko na Esanga ya Patamo. Esanga moke oyo ezali kati na Mbu Égée, na bakilometele ntuku mitano ya Azia Moke. Yango ezalaki mabangamabanga mpe etondaki na banyoka, miselekete mpe bankotó, ezalaki na motuya mingi te na oyo etali mombongo, yango wana Bokonzi ya Roma ezalaki kosalela yango lokola boloko mpo na bato ya mobulu makasi, bakangami ya makambo ya politiki, mpe bongo na bongo.

Bokomona ete Yoane alobaki na ntina na ye moko epai na Baklisto lokola ndeko kati na mpasi. Ezalaki na ntango yango nde lingomba ya ebandeli ezalaki koleka kati na minyoko minene. Bazalaki bobele “koloba mabe na ntina na losambo na bango bisika nyonso te”, kasi bato bazalaki mpe kokangama na boloko mpe kobomama. Yoane, lokola Baklisto mingi mosusu, akangamaki sikawa na bolóko na ntina na Liloba na Nzambe mpe na litatoli ya Yesu Klisto. Ntango bakangaki ye, batokisaki ye kati na mafuta mpo na ngonga ntuku mibale na minei mpo na koboma ye; kasi balongaki te. Lokola bazangaki makoki, bakonzi ya leta batondaki na nkanda mpe batindaki Yoane na esanga ya Patamo lokola ndoki. Kasi Nzambe azalaki elongo na ye, bongo ye akokaki kolongwa na esanga mpe kozonga na Efese epai wapi akobaki mosala na ye mokengeli kino na ntango ya liwa na ye.

Nkembo nsambo ya bomoto na Ye.

Emoniseli 1:14-16,
Motó mpe nsuki na Ye ezalaki mpembe lokola léne, mpembe makasi lokola matandalape; mpe miso na Ye ezalaki lokola móto oyo nezali kopela makasi.
Mpe makolo na Ye ezalaki lokola motako oyo euti kobimisama na litumbu na móto; mpe mongongo na Ye lokola lokito ya mai monene.
Mpe na loboko na Ye ya mobali Asimbaki minzoto nsambo; mpe uta na monoko na Ye, mopanga mopeli na ngambo mibale ezalaki kobima; mpe elongi na Ye ezalaki lokola moi na ntango engalaka na makasi na yango nyonso.

Boni komonana ya Yesu esimbaki mpenza motema mpe epemelaki Yoane, oyo atindamaki na boloko na ntina ya Liloba, mpe tala, LILOBA ya Bomoi etelemi sikawa liboso na ye. Oyo nde emonaneli ya kongɛngisa, mpamba te elembo mokomoko ezali na ndimbola na yango. Oyo nde emoniseli ya Bozali na Ye ya nkembo!

1.Nsuki na Ye Mpembe lokola Matandala.

Likambo ya liboso Yoane amonaki mpe alobelaki ezalaki nsuki mpembe na Ye. Ezalaki mpembe mpe kongenga lokola matandala. Ezalaki te mpo na mbula na Ye. Oh, te. Nsuki mpɛmbɛ makasi ezali komonisa mbula te, kasi makambo oyo moto abiki, bokɔmeli mpe bwanya. Oyo ya Seko akomaka mobange te. Ntango ezali nini mpo na Nzambe? Ntango ezali na ntina mingi te na miso ya Nzambe, kasi bwanya ezali na ntina mingi. Ezali lokola ntango Salomo asɛngaki Nzambe bwanya mpo na kosambisa bato ya Yisalaele. Sikawa Azali koya, Mosambisi ya mokili mobimba. Akolatisama motole ya bwanya. Yango nde nsuki ya mpɛmbɛ mpe ya kongɛnga elingi koloba.

Ye azalaki Mosambisi oyo afungolaki babuku mpe asambisaki uta na yango. Daniele amonaki Ye koya na mapata. Yango mpenza nde Yoane amonaki. Bango mibale bamonaki Ye mpenza ndenge moko. Bamonaki Mosambisi na mokaba na Ye ya kosambisa likoló na mapeka na Ye, atelemaki pɛto mpe mosantu, atondi na mayele, abongi mpenza mpo na kosambisa mokili na bosembo. Aleluya!

2. Miso na Ye lokola Móto.

Bókanisa naino. Miso wana oyo kala ezimamaki na mpisoli ya mpasi mpe ya mawa. Miso wana oyo elelaki na mawa na lilita ya Lazalo. Miso wana oyo emonanaki te mabe ya babomi oyo bakakisaki Ye na ekulusu kasi na mawa agangaki, “Tata limbisa bango.” Miso yango ezali sikawa kongala na móto, miso ya Mosambisi Oyo akopesa mbano na baoyo baboyaki Ye. Kati na mayoki nyonso ya bato, oyo Ye amonisaki mingi ntango Amonanaki lokola Mwana na Moto ezalaki oyo: Azalaki kolela mbala mingi. Nzokande nsima ya kolela wana mpe ya mawa wana, Nzambe azalaki kaka wana. Miso moko wana emonaki bimononeli. Ezalaki kotala na mozindo kati na mitema ya bato, etangaki makanisi na bango mpenza mpe eyebaki banzela na bango nyonso ya ndenge na ndenge. Sima na miso wana ya kufa ezalaki Nzambe, Oyo abelelaki na baoyo bayebaki Ye te mpo na oyo Ye Azalaki, “...Soko bokondima te ete Ngai Nazali Ye, bokokufa kati na masumu na bino.” Yoane 8:24.
“Soki nazali kosala misala ya Tata na Ngai te, bondimela Ngai te. Kasi soki nazali kosala (misala ya Tata na Ngai), atako bondimi Ngai te, bondimela misala...”
Yoane 10:37-38. Lokola Yilimia ya kala, Azalaki mosakoli oyo azalaki kolela, mpamba te bato bayambaki te Liloba na Nzambe mpe babwakaki emoniseli pembeni.

Miso wana oyo ezali kopela mɔ́tɔ ya Mosambisi ezali kutu sikawa kokoma bomoi ya bato nyonso ya mosuni. Kotámbolaká bisika nyonso na mokili mobimba, ezali na eloko moko te oyo Ye ayebi te. Ayebi bamposa ya motema mpe oyo moto na moto akani kosala. Ezali na eloko moko te ya sekele oyo ekozanga komonana, mpamba te makambo nyonso ezali bolumbu liboso na Ye oyo tokozongisa monoko mpo na makambo na biso. Bokanisa naino, Ayebi ata sikawa nini bozali kokanisa.

Iyo, Atelemi wana lokola Mosambisi na miso ya mɔ́tɔ mpo na kopesa etumbu. Mokolo ya mawa esili. Oh, tika ete bato bábongola motema mpe baluka elongi na Ye na boyengebeni wana ntango ezali naino. Ete bákoka kosála ntolo na Ye monyuku na bango ya motó liboso mokili ekufa na mɔ́tɔ.

3. Makolo ya Motako.

“Mpe makolo na Ye ezalaki lokola motáko, oyo euti kobimisama na litumbu na móto.”
Motako eyebani mpo na makasi na yango. Ezali na eloko moko te oyo eyebani oyo okoki kosangisa na yango mpo na kolɛmbisa yango. Kasi motako oyo ezali kolimbola makolo na Ye ezali ya kokamwa mingi koleka na boye ete elongi momekano ya litumbu ya mɔ́tɔ, momekano oyo moto mosusu aleki na yango te. Mpe yango ezali mpenza solo. Mpo motako etalisi kosambisama ya Nzambe: kosambisama oyo Nzambe azwaki mpe akokisaki yango.
Mituya 21:8,9,
“Bongo Yawe alobaki na Mose ete,
Misalelá nyoka ya mɔ́tɔ, mpe tyá yango na nzete: mpe ekosalema ete moto nyonso oyo aswami, ntango akotala yango, akozala na bomoi. Bongo Mose asalaki nyoka ya motako, mpe atiaki yango na nzete, bongo esalemaki ete moto nyonso oyo aswamaki na nyoka, ntango azalaki kotala nyoka ya motako, azalaki kobika.”
Yisalaele asumukaki. Lisumu esengelaki kosambisama. Na bongo Nzambe apesaki etinda na Mose ete atya nyoka ya motako na nzeté, mpe ye oyo atalaki abikisamaki na etumbu ya lisumu na ye.

Kasi mokolo moko, makolo wana ya motako ekotelema na mabelé. Boye Ye akozala Mosambisi ya mokili mobimba, mpe Akosambisa bato na boyengebene mpe na bosembo. Mpe moto moko te akokima kosambisama yango. Moko te akoki komilongola na esambiselo wana. Bakobongola yango te. Ye oyo azali mabe atikala mabe naino; ya oyo azali mbindo atikala na mbindo naino. Oyo Abongwanaka te Akobongwana te na ntango wana, mpo atikala kobongwana ata moke te mpe akobongwana ata mokolo moko te. Makolo wana ya motako makonyata monguna. Makoboma motemeli ya Klisto, nyama, elilingi mpe makambo nyonso ya mbido oyo ezali liboso na Ye. Ye akoboma miango ya mangomba oyo esaleli Nkombo na Ye kaka mpo na kobebisa nkembo na yango mpe Akonyata bango elongo na motemeli na Klisto. Bato nyonso ya mabe, bato oyo bandimaka Nzambe te, bato oyo bayebi te soki Nzambe azali to azali te, bato oyo bandimaka makambo ya sika, bato oyo balingaka bonsomi ya mabe, bango nyonso bakozala wana. Liwa, lifelo, mpe nkunda ekozala wana. Iyo, ya solo. Mpamba te ntango Akoya, babuku ekofungwama. Ezali ntango wana nde lingomba ya móto te mpe mpio te ná baseka mitano ya boléma bakomonana. Akokabola ba-mpate na ba-ntaba. Ntango Ye akoya Akokamata bokonzi, mpo ezali ya Ye, mpe elongo na Ye ekozala na bankóto mbala nkóto zomi: Mwasi na Ye ya Libala oyo akoya kosalela Ye. Nkembo! Oh, ezali sikawa, to ata mokolo moko te. Bobongola mitema liboso ete ntango eleka. Bolamuka longwa na bakufi mpe boluka Nzambe, mpo na kotondisama na Molimo na Ye, soki te bokozanga bomoi na seko. Bosala yango sikawa wana ntango ezali.

4. Mongongo na Ye Ezalaki lokola Mongongo ya Mai Monene.

Sikawa, mai ezali kotalisa nini? Boyoka yango na Emoniseli 17:15, “...Mai oyo omonaki... ezali bato, ebele ya bato, bikólo mpe nkota.” Mongongo na Ye ezalaki lokola lokito ya ebele ya bato oyo bazali koloba. Ezali nini? Ezali kosambisama. Mpamba te yango ezali mingongo ya ebele ya batatoli, baoyo na nzela ya Elimo Santu, bapesaki litatoli na ntina na Klisto mpe bateyaki nsango malamu na Ye kati na bileko. Ekozala mongongo ya moto nyonso oyo na kosambisama ekotelemela mosumuki oyo aboyaki koyoka likebisi. Mingongo ya batindami nsambo ekoyokana makasi mpe polele. Batei wana ya sembo oyo bateyaki nguya ya kobikisa ya Yesu, oyo bateyaki libatisi na mai na Nkombo na Yesu, oyo bateyaki kotondisama mpe nguya ya Molimo Mosantu, baoyo batikalaki ná Liloba koleka bomoi na bangomei; bango nyonso bazalaki mongongo ya Yesu Klisto na nzela ya Molimo Mosantu na boumeli ya bileko. Yoane 17:20, “Nazali kobondela kaka mpo na bango te, kasi mpe mpo na baoyo bakondimela Ngai na nzela ya liloba na bango”.

Oh, soki bobele bokoki komona yango. Ezalaki mai nde ebomaki mokili, kasi ezalaki bobele mai yango nde ebikisaki Nowa mpe lisusu ebikisaki mokili mobimba mpo Nowa. Bóyoka mongongo na Ye, mongongo ya basali na Ye, wana ezali kobenga bato na kobongola motema mpe na bomoi.

5. Na Loboko Na Ye Ya Mobali Ezalaki Na Minzoto Nsambo.

“Mpe Azalaki na minzoto nsambo na loboko na Ye ya mobali” Sikawa, na ntembe te molongo ya ntuku mibale esili koyebisa biso oyo minzoto nsambo ezali. “Mpe libombami ya minzoto nsambo ezali banje (batindami) ya mangomba nsambo.” Tokoki kosala libunga na likambo moko te, lokola Ye azali kolimbolela biso yango. Minzoto nsambo oyo ezali batindami na bileko nsambo oyo ezali kolandana ya lingomba. Batangi bankombo na bango te. Elobami bobele ete bazali nsambo, moko mpo na eleko mokomoko. Kobanda na Eleko ya Efese kino na Eleko oyo ya Laodikia, motindami moko na moko amemaki nsango ya bosolo epai na bato, kozangaka ata moke te kobatela yango lokola Liloba ya Nzambe mpo na eleko wana ya lingomba. Moko na moko akangamaki na yango. Batikalaki ngwi kati na bosembo na bango epai na pole ya ebandeli. Wana eleko moko na moko ezalaki kokende mosika na Nzambe, motindami na Ye ya sembo azalaki kozongisa eleko yango na Liloba. Makasi na bango ezalaki kouta na Yawe; soki te balingaki ata moke te kokoka kopekisa mbonge. Bazalaki kobatelama na mabɔkɔ na Ye, mpamba te eloko moko te ekokaki kolongola bango na mabɔkɔ na ye, mpe eloko moko te ekokaki kokabola bango na bolingo ya Nzambe, ezala maladi, likama, bolumbu, nzala, mopanga, bomoi to liwa. Bamipesaki solo epai na Ye mpe babatelamaki na nguya na Ye nyonso. Bamitungisaki te na ntina na minyoko oyo eyaki na nzela na bango. Mpasi mpe kotyolama ezalaki bobele ntina ya kopesa Nzambe nkembo mpo ete batángamaki lokola babongi konyokwama mpo na Ye. Mpe na botɔ́ndi mpo na lobiko na Ye, bapelaki na pole ya bomoi na Ye mpe bamonisaki bolingo, motema molai, bopɔlɔ, komipekisa, boboto mpe bosembo na Ye. Mpe Nzambe asungaki bango na bikamwa, bilembo mpe makamwisi. Bafundaki bango ete bazalaki bilandalanda, mpe batúntuki. Bakweisamaki na bibongiseli mpe na batyolamaki, kasi batikalaki sembo na Liloba.

Mpe libondisi oyo ezali kaka mpo na batindami ya bileko nsambo na lingomba te. Mondimi nyonso ya solosolo azali kati na loboko na Nzambe mpe akoki kobenda uta na bolingo mpe nguya na Ye, mpe kozwa litomba nyonso oyo Nzambe azali kopesa na mondimi. Oyo Nzambe apesaka motindami, mpe lolenge Apambolaka mpe Asalelaka motindami, ezali ndakisa mpo na bandimi banso ya bolamu mpe kobatelama na Ye na binama NIONSO ya nzoto na Ye. Amen.

6. Mopanga Mopeli Bipai Mibale.

“Mpe uta na monoko na Ye mopanga mopotu mopeli bipai mibale ebimaki.” Na Baebele 4:12, “Mpo ete liloba na Nzambe ezali na bomoi mpe na nguya mpe na mopotu koleka mopanga mopeli na ngámbo mibale mpe ekɔtaka kino kokabola bomoto na kati mpe molimo, mpe mikuwa mpe mafuta na yango, mpe ezali kososola makanisi mpe mikano ya motema.” Mopanga mopotu mopeli na ngambo mibale ebimaki na monoko na Ye, yango ezali LILOBA NA NZAMBE.

Sikawa Polo alobaki ete Liloba eyaki na nguya lokola mpe na mongongo. Liloba oyo eteyamaki, ezalaki komimonisa mpenza yango moko. Lokola mopanga ya móto oyo ezali kokata, ekotaki na lisosoli ya bato, mpe lokola mbeli ya monganga ya lipaso, ekataki bokono mpe esikolaki bakangami. Bisika nyonso oyo bandimi wana ya liboso bakendaki, “bazalaki koteya Nsango Malamu (Liloba) mpe Nzambe atatolaki Liloba yango na bilembo oyo elandaki.” Babeli babikisamaki, milimo mabe babenganamaki, mpe bazalaki koloba na minoko ya sika. Oyo wana ezalaki Liloba kati na mosala. Liloba yango ekweyá ata moke te na minoko ya Baklisto oyo bandimaka. Mpe na eleko oyo ya nsuka, ezali makasi mpe na nkembo koleka na kati ya Mwasi na libala-Liloba, ya solosolo. Ee etonga moke, bino mwa ndambo ya bato moke, bókangama na Liloba, bótondisa monɔkɔ mpe motema na bino na yango, mpe mokolo moko, Nzambe akopesa bino bokonzi.

7. Elongi Na Ye Lokola Moi.

Kati na Emoniseli 21:23,
Engumba yango ezali na bosenga ya moi te to sanza te mpo na kongengisa yango, mpo nkembo ya Nzambe engengisaka yango, mpe Mwana na Mpate azali pole na yango.
Oyo ezali Yelusaleme ya Sika. Mwana mpate akozala na kati ya engumba yango, mpe na ntina ya bozali na Ye, bosenga ya pole ekozala te. Moi ekobima te mpe ekongɛnga kuna te, mpo Ye Moko azali moi mpe pole na yango. Bikólo oyo ekoya na kati na yango bakotambola na pole na Ye Bozali na esengo te ndenge mokolo yango ekómi pene? Yoane amonaki mokolo yango koya. Ata boye, Nkolo Yesu, yaka noki!

Malaki 4:1-3,
Mpo tala, mokolo ezali koya, oyo ekozikisa lokola fulu ya móto; mpe bato nyonso ya lofundu, mpe baoyo nyonso basalaka mabe, bakozala lokola matiti ya kokawuka; mpe mokolo oyo ezali koya ekozikisa bango, elobi Nkolo na bibele, ete ekotika bango ata mosisa te to etape te.
Kasi mpo na bino baoyo bobangaka Nkombo na Ngai, moi ya bosembo ekobima, oyo ezali na lobiko na mapapu na yango; mpe bokobima mpe bokopumbwa lokola bana ya ngɔmbɛ oyo babimisi na lopango.
Mpe bokonyata bato mabe, mpamba te bakozala putulu na nse ya makolo na bino na mokolo oyo Nazali kobongisa; Nkolo na bibele alobi bongo.

Yango wana lisusu. MOI kongaláká na makasi na yango nyonso. Oh, makasi ya Mwana na Nzambe kongengáká katikati na bitemeli nsambo ya miinda, ya wolo. Ye wana Atelemi, Mosambisi, Ye oyo anyokwamaki mpe akufaki mpo na biso. Amemaki nkanda ya kosambisama na Nzambe likolo na Ye moko. Anyataki na ekamwelo ya vinyo ya nkanda makasi ya Nzambe Ye moko. Ndenge tolobaki yango liboso, mpo na mosumuki mongongo na Ye ezali lokola makelele ya mai oyo ezali kosopana to makelele ya mbonge ya liwa oyo ezali kobeta na likoló ya mabongo ya mabanga. Kasi mpo na mosantu, mongongo na Ye ezali lokola lokito ya ebale oyo ezali koyemba na bopolo ntango ozali kolala na bopemi, na bosepeli kati na Klisto. Kongengisáká likolo na biso lingengi na Ye ya bolingo, Azali koloba : “Bobanga te, Nazali Ye Oyo Azalaki, Oyo Azali, Oyo Akoya; Nazali Mozwi-na-Nguya-Nyonso. Longola Ngai, mosusu azali te. Nazali Alifa mpe Omega, NYONSO na yango.” Azali Fololo ya Lobwakú, Monzoto oyo Engengaka na Ntongo. Azali moto oyo aleki kitoko na nkoto zomi mpo na molimo na ngai Ee, mokolo wana monene ekómi pene mpe Moi ya Boyengebene ekobima ná lobiko na mapapu na Ye.

Tanga compte mobimba na... Emonaneli ya Patmos.

Tango namonaki Ye, nakweyaki na makolo na Ye lokola moto akufi. Bongo asimbaki ngai na loboko na Ye ya mobali mpe alobaki na ngai: «Kobanga te! Nazali Ya liboso mpe Ya suka.

Nazali Ye oyo azali na bomoi ; nakufaki, mpe sik’oyo tala, nazali na bomoi mpo na libela na libela ! Nasimbi bafungola ya kufa mpe ya mboka ya bakufi.

Emoniseli 1:17-18.