Yohane Pa Patmo.

William Branham.

Belengeni ili buku...
Icimonwa ca pa Patmo.

Ukusokolola 1:9,10
9 Ine, Yohane, munyinenwe kabili uukumako pamo na imwe ku bucushi, no bufumu no kushipikisha ifili muli Yesu Kristu, nali mu cishi iciitwa Patmo, pa mulandu wa Cebo cakwa Lesa, no bunte bwakwa Yesu Kristu.
10 Nali mu Mupashi mu Bushiku bwa kwa Shikulu, naumfwile kunuma yandi ishiwi likalamba, nge ntandala.

Ifi fimonwa ifyalekana lekana ifya Kusokolola ifya Buntu bwakwa Yesu Kristu fyapelwe kuli Yohane lintu atamfiwe ku Cishi ca Patmo. Ici cishi icinono caba ama mailoshi amakumi yatatu ukufuma kululamba lwa Asia Munono muli Bemba uwa Aegean. Ukuba incende ya mabwe kabili yaisulamo insoka, bama linso na ba kaling'ongo, cena calikwete ubusuma ubunono ubwamakwebo, e ico calebomfiwa ku bufumu bwa ci Roma nge ncende ya cifungo uko balebika ifipondo ifyabipisha nganshi, abafungwa ba fikansa fya calo, na bambipo.

Muli no kumona kutila Yohane aleilondolola umwine ku Benakristu nga munyina uuli mubucushi. Cali ni pali iyi nshita ilyo ulukuta lwa kubalilapo lwalepita mu macushi yakalamba. Bukapepa bwabo tabwali fye “ukuli konse ukubususha” lelo abantu abene balebakaka no kwipaiwa. Yohane, nga balya bambi abengi, nomba alecula mucifungo pa mulandu wa Cebo cakwa Lesa no bunte bwakwa Yesu Kristu. Ilyo akakilwe, balyeseshe apafye ku kumwipaya pa kumwipika mu mafuta pama ora amakumi yabili na yane. Bacilolo abakalipwa kabili abashali na maka lyena bamupingwile ukuya ku Patmo ngo muloshi. Lelo Lesa ali nankwe, kabili alisungilwe ku kufuma pa cishi no kubwekela ku Efese uko ena nakabili atwalilile nga kacema mpaka inshita ya mfwa yakwe.

Imimonekele cinelubali iya bukata iya Buntu Bwakwe.

Ukusokolola 1:14-16,
14 No mutwe Wakwe no mushishi Wakwe fyali ifya buta nga masako aya buta, nge mfula ya buta; na menso Yakwe yali ngo lubingu lwa mulilo.
15 Na makasaYakwe yapalene no butale ubwa bengeshima, ngo walopolwa mwilungu; ne shiwi Lyakwe lyali nge ciunda ca menshi ayengi.
16 Kabili ali ne ntandala cinelubali mu lupi Lwakwe ku kulyo: namu kanwa Kakwe mwafumine ulupanga ulwa twila kubilikubili: ne cinso Cakwe cali nga kasuba ilyo kabalika mu maka yakako.

Ifyo cali icakwikata no kuputwamo ku mimonekele yakwa Yesu kuli Yohane, uyo uwali umufungwa pa mulandu wa Cebo, kabili moneni, ICEBO ica Mweo nomba naciminina kuntanshi yakwe. Ifyo cali icimonwa icakubutisha, pantu imibele yonse iya mimonekele yalikwata ubupilibulo. Ifyo bwabo busokololo ubwa Buntu Bwakwe ubwa bukata.

Umushishi Wakwe uwa Buta nge Mfula ya Buta.

Yohane icakubalilapo amwene no kulumbula pa kubuta kwa mushishi Wakwe. Wali uwa buta, kabili uwabutisha nge mfula ya buta. Ici tacali pa mulandu wa ciimo Cakwe. Owe, iyo .Ukubutisha kwa mushishi uwa buta tacilelangisha iciimo lelo ukwishiba, no bukalamba, na mano. Uwa Muyayaya takota. Inshita yaba ni cinshi kuli Lesa? Inshita cipilibula icintu icinono kuli Lesa, lelo amano e cintu cikankala. Caba ngefyo Solomoni alombele amano kuli Lesa ku kupingula abantu ba Israele. Nomba Wene aleisa, Kapingula uwe sonde lyonse. Akafwikwe cilongwe ca mano. Cilya efyo kubuta no kubeka kwa mushishi kulangisha.

Ali ni Kapingula ukwisula ama buku no kupingula ukufuma muli yena. Daniele Amumwene ukwisa mu makumbi. Ifi e filya fine fye Yohane amwene. Bonse babili ba Mumwene mu musango umo wine fye. Bamwene Kapingula ne lamba Lyakwe ilya bupingushi pa mapeya Yakwe, naiminina uwa pwililika kabili uwa mushilo, uwa isulamo amano, uwalinga nganshi kukupingula isonde mu bulungami. Aleluya.

Amenso Yakwe ngo Mulilo.

Tontonkanyeni pali cena. Yalya amenso ayaleshibantukila limo ne filamba ifya bulanda ne nkumbu. Yalya amenso ayalilile ne nkumbu pa nshishi yakwa Lasaro. Yalya amenso aya shamwene ububi bwa fipondo ifya Mutanike pacapindama lelo mubulanda abilikishe, “Tata babeleleni uluse.” Nomba yalya amenso lubingu lwa mulilo, amenso yakwa Kapingula Uyo ukalambula balya aba Mukene. Pa myumfwile yonse iya buntu Alangishe nganshi ilyo Amonekele ngo Mwana wa Muntu yali ni iyi, ilingi line Alelila. Lelo kunuma ya kulyo kulila na bulyo bulanda kwali nalyo line Lesa. Yalya amenso yamo yene yamwene ifimonwa. Yalolekeshe mukati ka mitima ya bantu no kubelenga amatontonkanyo yabo yene no kwishiba inshila shabo shonse isha lekana lekana. Ukulolekesha muli yalya amenso ayafwa ali ni Lesa,Uyo uwabilikishe kuli abo aba Shamwishibe pa fintu Ena ali,“...Nga tamucetekela ukuti nine Wine, muli no kufwa mu membu shenu.” Yohane 8:24.
“Nga nshilecite milimo yakwa Tata, Mwincetekela. Lelo nga Ndecita (imilimo yakwa Tata), nangu tamule Ncetekela, cetekeleni imilimo...” Yohane 10:37,38. Nga filya Yeremia uwakale, Ena ali ni kasesema uwacililishi, pantu abantu tabalepokelela Icebo cakwa Lesa no kukana ubusokololo.

Yalya amenso ayal ubingu lwa mulilo ayakwa Kapingula nangu ni ino ine nshita yalemona ubumi bwa bantunse bonse. Ukubutuka ukufuma uku no kuya mwi sonde lyonse, takwaba nangu cimo ico Wene taishiba. Alishiba ukukabila kwa mutima kabili nefyo cila umo alefwaya ukucita. Takwaba nangu cimo ica fiswa ico icishakasokololwe, pantu ifintu fyonse fyaba pa mbilibili kuli Wene Uyu uo twabako. Tontonkanyeni pali cena, Ena naishiba nangu ni ino ine nshita ifyo muletontonkanya.

Ee, ulya Naiminina nga Kapingula na menso ya mulilo kukuleta ubupingushi. Inshiku sha luse na shipwa. Owe, ngacakutila abantu bengalapila no kufwaya icinso Cakwe mubulungami ilyo kucili inshita. Pakutila benga cita icifuba Cakwe ica kusailapo cabo ilyo isonde likasungulukila mu mulilo.

Amakasa ya Butale.

“Na makasa Yakwe yapalene ngo butale ubwa bengeshima, ngo bwalopolwa mwi lungu.” Ubutale bwaishibikilwa pa mulandu wa kukosa kwa buko. Takwaba nangu cimo icaishibikwa ico mwingabomfya pali yena ku kulyonaula. Lelo ubu butale ubulondolola amakasa Yakwe buli ubwaishibikwa nganshi apa pa mulandu bwalipita mukweshiwa kwa mulilo uwa mwilungu, ukweshiwa uko umuntu nangu umo tapitamo. Kabili cilya cishinka nganshi. Pantu ubutale bulangisha Ubupingushi ubwa Bulesa: ubupingushi ubo Lesa aletele nokubufikilisha.

Impendwa 21:8- 9,
8 Nao Yehoba atile kuli Mose, Cite nsoka yamukuba, no kuibika pe lamfya: nomba, onse uwasumwa, ilyo aimona, aleba no mweo.
9 Awe Mose acitile insoka ya mukuba, no kuibika pe lamfya, nomba, insoka nga yasumo muntu, ilyo aloleshe nsoka ya mukuba, aba no mweo.
Israele alibembwike. Ulubembu lwalingwilwe ukupingulwa. Eico Lesa aebele Mose ukubika insoka ya butale pe lamfya, kabili uyo uwalolekeshe alipusushiwe ku bupingushi bwa lubembu lwakwe.

Lelo ubushiku bumbi shilye nkasa sha butale shikeminina pe sonde. Kabili Akesaba Kapingula uwe sonde lyonse, kabili mukulungama na mukupwililika Akesa pingula abantunse. Kabili takwakabe ukubutuka kuli bulyo bupingushi.Takwakabe ukufutatuka kuli kulyo kupingula. Takwakabe ukwangalila kuli bwena. Uyo uuli ushalungama akaba ushalungama nalyo line; uyo uuli uwakowela akaba uwakowela nelyo line. Uyo Ushipilibuka takapilibuke lyena, pantu Ena tatala kabili takatale. Shilye nkasa isha butale shikafwanta umulwani. Shikonaula munkanyakristu, iciswango ne cimpashanya na fyonse fye ifyaba ifyakowela mucinso Cakwe. Akonaula imibombele ya lukuta iyo ya bule Shina Lyakwe ku konaula fye ubukata bwa iko no kubashonaula pamo na munkanyakristu. Shonse mbifi, abasenshi, abashacetekela, aba fintu fipya, aba mano, bonse bakaba kulya. Imfwa, kumbo, ne nshishi fikaba kulya. Ee fikaba. Pantu ilyo Akesa, amabuku yakesulwa. Lilya elyo no lukuta ulwa cifulefule kabili na bana cisungu basano abapelelwa amano bakamonekela. Akapatula impaanga ukufuma ku mbushi. Ilyo Akesa Akapokolola ubufumu, pantu Bwakwe, kabili pamo na Ena kukaba imyanda mishila ne myandamishila, Nabwinga Wakwe, uukesa mukupyungila Wena. Ubukata! Owe, ni ino nshita atemwa takwakabe. Lapileni ilyo inshita tailapwa. Bukeni ukufuma pa bafwa no kufwaya Lesa ku kwisushiwa no Mupashi Wakwe nga teifyo mukalufya umweo wa muyayaya. Ciciteni nomba ilyo kucili inshita.

Ishiwi Lyakwe nge Ciunda ca Menshi Ayengi.

Nomba cinshi ico amenshi yemininako? Uumfweni ici mu Kusokolola 17:15,
“...amenshi ayo umwene,... bena bantu, na mabumba, ne nko, na bandimi.”
Ishiwi Lyakwe lyali ngo kulanda kwa cintu bwingi. Cena ni cinshi? Bwena bupingushi. Pantu aya mashiwi aya inte amabumba, abo ukupitila ku Mupashi wa Mushilo mu nshita yonse balipelo bunte pali Kristu no kushimikila Mbila nsuma Yakwe. Likaba lishiwi ilya muntu onse ukwima mu bupingushi ukwebaula umubembu uyo ushafwaile ukupokelela ukusokwa. Amashiwi ya nkombe cinelubali ya komfwikwa nganshi kabili palwalala. Balya bakashimikila abacishinka abashimikile amaka ya kupususha ayakwa Yesu, abashimikile ulubatisho lwa mu menshi mwiS hina lyakwa Yesu, abashimikile ukwisushiwa kabili na maka aya Mupashi wa Mushilo, abaiminine ne Cebo ukucila ifyo baiminine pa myeo yabo abene; bonse fye pamo bali lishiwi lyakwa Yesu Kristu ukupitila ku Mupashi wa Mushilo ukupita mu nshita shonse. Yohane 17:20, “Kabili nshilelombela ababeka, lelo na baka Ntetekela pa mulandu wa cebo cabo.”

Owe, nga kuti fye mwacimona. Cali menshi aya onawile isonde, lelo cali menshi yamo yene ayapuswishe Nowa e lyo nakabili no kupususha isonde lyonse pa mulandu wakwa Nowa. Umfweni kwi shiwi Lyakwe, ishiwi lya ba bomfi Bakwe, ilyo lileita ku kulapila no mweo.

Mulupi Lwakwe Lwaku Kulyo Mwali Intanda Cinelubali.

“Kabili Ali ne ntanda cinelubali mu lupi Lwakwe ulwa kukulyo.” Nomba mucine natwishiba kale ukufuma mu vesi iyalenga amakumi yabili ifyo intanda cinelubali mucine shaba. “Kabili inkama ya ntanda cinelubali ni ba malaika (inkombe) aba nkuta cinelubali.” Nomba tekuti tupange cilubo pano mumusango uuli onse, ilyo aleilula cena kuli ifwe. Ishi ntanda cinelubali ni nkombe ku nshita sha nkuta cinelubali ishaleisa. Tashalumbulwa amashina. Shatantikwa fye nga cinelubali, imo kuli cila nshita. Ukufuma ku Nshita iya Efese ukuya fye mpaka kuli ino Nshita iya Laodikea cila nkombe yaletele mbila iya cine ku bantu, ukwabula ukufilwa ukucisunga ukuba Icebo cakwa Lesa kuli ilya ine nshita ya lukuta. Cila umo aikatilile kuli cena. Bali abakosa mu kunakila kwabo ku lubuuto lwa ntendekelo. Ilyo cila nshita yaletaluka ukufuma kuli Lesa, inkombe Yakwe iya cishinka yapilibwile ilya nkulo ukubwekela ku Cebo. Amaka yabo yafumine kuli Shikulu nga teifyo nga tabatalile ukusunka amabimbi. Bali aba cingililwa mu kusakamana Kwakwe, pantu takuli nangu cimo icinga bafumya mu kuboko Kwakwe, kabili takuli nangu cimo icinga bapatula ukufuma ku citemwiko cakwa Lesa, kuti cabo bulwele, ubucushi, ubwamba, insala, ulupanga, umweo atemwa imfwa. Bali mucine cine abaipela kuli Wene kabili basungilwe ku maka Yakwe. Tabaposeleko amano palwa kucushiwa ukwaishile mu nshila yabo. Ukukalipwa no kusentekwa fyali lelo ukubalengo kupelo bukata kuli Lesa ukutila bali pendelwe abalinga ukuculila Wene. Kabili mukutotela kwipusukilo Lyakwe babilime no lubuuto lwa bumi Bwakwe no kulangisha icitemwiko Cakwe, ukushipikisha, ukunakilila, ukuiteka, ukuteko mutima, bucishinka. Kabili Lesa ali batungilile ne fisungusho, ifishibilo, ne fipesha mano. Bali bapele imilandu ukuba amashilu, naba kakunkuluka wa mushilo. Bali bebawile kutubungwe kabili no kubapumya, lelo baikele abacishinka ku Cebo.

Kabili ici cakusansamusha tacaba fye ca nkombe isha nshita isha nkuta cinelubali beka. Uwacetekela onse uwa cine aba mu kuboko kwa kwa Lesa kabili kuti afumya ukufuma mucitemwiko Cakwe na maka, no kupokelela ifisuma fyonse ifyo Lesa aba ku wacetekela. Ifyo Lesa apela inkombe, kabili ifyo Apala no kubomfya inkombe, cabe cilangililo ku bacetekelabonse pa busuma Bwakwe no kusakamana ku filundwa FYONSE ifya mubili Wakwe. Ameni.

Ulupanga ulwa twila Kubili kubili.

“Na mukanwa Kakwe mwafumine ulupanga ulwatwila kubili kubili.”
Mu AbaHebere 4:12,
“Pantu Icebo cakwa Lesa ca mweo, kabili caliluma no kutwo ukucila ulupanga lonse ulwa twila kubili kubili, kabili cila tula na ku kulekanya umutima no mupashi, ne mfyufyu no bufyompo, cilingulula amatontonkanya na mapange ya mutima.”
Ukufuma mukanwa Kakwe mwafumine ulupanga ulwatwila kubili kubili ico icaba ICEBO CAKWA LESA.

Nomba Paulo atile ukuti Icebo caishile mu maka elyo namwishiwi. Icebo icashimikilwe mucine cailangishe icine. Ngolulebyasha, ulupanga uluputaula caile muli bakampingu babantu, kabili ngo mwele wakwa shing'anga utumbula caputawile amalwele no kukakulula abali muli bunkole. Ukuli konse uko balya abacetekele abantanshi baile, “baile baleshimikila Imbila nsuma (Icebo) kabili Lesa ashininkishe cilye Cebo ne fishibilo ukulakonka.” Abalwele balyundepwe, ifiwa fyalitamfiwe, kabili balandile mundimi shipya. Cilya cali Icebo mu mulimo. Cilye Cebo tacatala ukufilwa mu tunwa twa Benakristu abacetekela. Kabili muli ii nshita iya kulekelesha cili pano ica maka nganshi kabili ica pulamo ukucila lyonse muli nabwinga uwa cine uwa Cebo. Owe, aka mukuni akanono, mwe bumba ilya cepesha, ikatilileni ku Cebo, isusheni akanwa kenu no mutima na cena, kabili ubushiku bumo Lesa aka mupela ubufumu.

Icinso Cakwe Nga Kasuba.

Mu Kusokolola 21:23,
“Kabili umusumba taukabila kasuba, nangu umweshi, ukuti fibalikilepo: pantu ubukata bwakwa Lesa bwalibutisha, ne nyali ya buko Mwana wa Mpaanga.”
Uyu ni Yerusalemu Mupya. Umwana wa Mpaanga akaba muli ulyo musumba, kabili pa mulandu wa mulola Wakwe, takwakafwaikwe ulubuuto. Akasuba takakatule no kubalikila mulya, pantu Wene e Kasuba no lubuuto mulya, Umwine. Inko ishikesa muli wene shikenda mu lubuuto Lwakwe. Bushe tamuli abansansa bulyo bushiku buli pali ifwe? Yohane alimwene bulyo bushiku buleisa. Nge fyo cili, Shikulu Yesu, iseni bwangu!

Malaki 4:1-3,
1 Pantu moneni, ubushiku buleisa, ubulepya nge buku: kabili bonse aba miya, ee, na bonse aba cito bubifi, bakaba ifisoso: nobo bushiku ubuleisa buka babilimya, e fyoYehoba wa Milalo asosa, pakuti tabwakabashile umushila nangu umusambo.
2 Lelo ka katulila imwe mwe batina Ishina Lyandi Akasuba ka Bulungami akali no kundapa mu mapindo Yakako; na imwe mukafuma, no kupontaika nga bana bang'ombe abafuma umwakukakilwa.
3 Kabili mukanyataula ababifi; pantu bakabe mito mwisamba lya nyantilo sha makasa yenu mu bushiku ubo nkacita, efyo Yehoba wa Milalo asosa.

Cilya icili palya nakabili. AKASUBA ukubalika mu makayakako. Owe, amaka aya Mwana wakwa Lesa ukubalika mukati kafya kutekapo inyali fya golide cinelubali. Ulya palya naiminina, kapingula, Uyo uwa culile no kufwila ifwe. Asendele icipyu ca bupingushi ubwa Bulesa pa Mwine. Anyantile umwakukamine myangashi umwa cipyu cakwa Lesa eka fye. Kabili nge fyo tulandile kale, ku mubembu ishiwi Lyakwe lyaba nge ciunda ca cipoma atemwa ipofu ililefuluma mu mabimbi ya mfwa pa mabwe yakululamba. Lelo ku wamushilo, ishiwi Lyakwe lyaba ngo kwimba ukusuma ukwa mukuku ilyo walala mukutusha, ukwikushiwa muli Kristu. Ukubalikila pali ifwe no kusanikila ubusuma bwa citemwiko Cakwe atila, “Witina, nine Uyo Walipo, Ulipo, Uukabapo; Uwa Maka yonse. Kunse ka Ine takwaba umbi. Nine Alifa na Omega, FYONSE ifya cena.” Wena ni Cananika uwa mu Mipokapoka, Ulutanda lwa Lucelo kabili ulu Balikisha. Wena aliwamisha pa mwanda mushila ku mweo wandi. Ee, bulyo bushiku bukalamba buli mupepi no kumonekela kabili Akasuba ka Bulungami ka kabalika no kundapa mu mapindo Yakwe.

Belengeni ili buku...
Icimonwa ca pa Patmo.

Cilya namumona nawila pantanshi yakwe kwati muntu uwafwa. Elyo nao abika ukuboko kwakwe ukwa ku kulyo pali ine, ati nokuti, “Witiina! Nine Citendekelo kabili nine Wakupelekeshako.

Nine mwine wamweo. Nalifwile, nomba ndi uwamweo uwakubelelela pe. Nalikwata amaka pa mfwa na pa calo ca bafwa.

Ukusokolola 1:17-18.