Oruzaaro rw’Enjoka.

William Branham.

Read the full account in...
Obusingye bw'Ekanisa ya Efeso.

Okushuuruurwa 2:7,
“...Orikusingura Ndyamwikiriza kurya aha Muti Gw'Amagara, Oguri omuri paradiiso ya Ruhanga.”

Eki n'ekihembo ky'omu biro by'omu maisho aha basinguzi boona b'omu busingye bwona. Enzamba y'aha muheru y'okweta kuza aha rugamba ku eriheza kuteerwa, eby'okurwanisa byaitu byatairwe ahansi, obwo nitwija kuhuumurira omuri paradiiso ya Ruhanga kandi omugabo gwaitu guryaba Omuti Gw'Amagara, ebiro n'ebiro.

“Omuti Gw'Amagara.” Okwo t'okushushaniriza kurungi? Kigambirwe emirundi eshatu omu Kitabo ky'Okutandika kandi n'emirundi eshatu omu Kitabo ky'Okushuuruurwa. Omu myanya yoona mukaaga nigwo muti gumwe kandi gukaba nigushushanisa ekintu ekyo kimwe buzima.

Baitu Omuti Gw'Amagara niki? Mbwenu, eky'okubanza kya byona, twine kumanya omuti ogwo ahabwagwo eki gwemerereire. Omu kitabo ky'Okubara 24:6, nk'oku Balamu yaashoboroire Abaisraeli, akagira ngu bakaba bari emiti “y'enkaka ezi MUKAMA yaabyaire.” Emiti omu Byahandiikirwe byona neemanyisa abantu, nk'omuri Zaaburi 1. N'ahabw'ekyo Omuti Gw'Amagara niguteekwa kuba Omuntu w'Amagara, kandi ogwo ni Yesu.

Hati omu Kibanja kya Edeni hakaba harimu emiti ebiri eyemereire ahagati yaakyo. Gumwe gukaba guri Omuti Gw'Amagara, ogundi gukaba guri Omuti gw'Okumanya Oburungi n'Obubi. Omuntu akaba ari ow'okubaho ahabw'Omuti Gw'Amagara; kwonka akaba atashemereire kukwata aha muti ogundi kitari ekyo akaba naafa. Kwonka omuntu akarya ahari ogwo muti, kandi ku yaaguriireho, rufu yaamutaahamu ahabw'ekibi kye, atyo yaataana na Ruhanga.

Hati Omuti ogwo ogwabaire guri omuri Edeni, ogwo Muti ogwabaire guri enshuro y'amagara, akaba ari Yesu. Omuri Yohaana eshuura ya mukaaga okuhitsya aha ya munaana, Yesu naayeyoreka nk'enshuro y'amagara agatahwaho. Akeeyeta Omugaati ogwarugire omu iguru. Yaagamba aha kwehayo Kwe kandi ngu omuntu ku Yaakumuryaho takaafa. Akarangirira ku Yaabaire naamanya Abrahamu, kandi ngu Abrahamu atakabaireho, Akaba ARIHO. Akahanuura ku We Wenka yaabaire naija kubaha amaizi g'amagara kandi ngu omuntu origanywaho tarikwija kugira eiriho bundi, kwonka ngu aryatunga amagara agatahwaho. Akeeyoreka nka MBAHO OMUKURU. Niwe Mugaati Gw'Amagara, Eiziba Ry'Amagara, Ogwo Otahwaho, OMUTI GW'AMAGARA. Akaba ariyo okwo omuri Edeni ahagati y'ekibanja nk'oku Arikwija kuba ari ahagati ya paradiiso ya Ruhanga.

Abamwe baine ekiteekateeko ngu egyo miti ebiri omu kibanja ekaba eri nk'emiti endiijo yoona ei Ruhanga yaabaire atairemu. Kwonka abeegi abataireho omutima nibamanya ngu eki tikwo kiri. Yohaana omubatizi obu yaagamba n'eiraka rihango ngu empango eteirwe aha kitsintsi ky'emiti yoona, akaba atarikugamba aha miti y'obutoosha, kureka akaba naagamba aha mateeka g'eby'omwoyo. Hati omuri 1 Yohaana 5:11, nihagira hati, “Kandi oku nikwo KUHAMYA okwo, ngu Ruhanga akatuha amagara agatahwaho, kandi amagara ago gari omu Mwana We.” Omuri Yohaana 5:40, Yesu akagira ati, “Kwonka mwanga kwija Ahariinye, ngu muheebwe amagara.” Ekigambo kya Ruhanga, oku kihandiikirwe, nikyoreka butunu ku AMAGARA, AMAGARA AGATAHWAHO, gari omu Mwana. Tigari ahandi hoona. 1 Yohaana 5:12, “Omuntu oine ogwo Mwana niwe aine AMAGARA; otaine Mwana wa Ruhanga TAINE Magara.” Hati obu ebihandiikirwe bitarikubaasa kuhinduka, okucuubwaho, nari okwongyerwaho n'ahabw'ekyo ebihandiikirwe nibihamya ku AMAGARA GARI OMU MWANA. Obu eki kiri kityo, OMUTI OGURI OMU KIBANJA NAATEEKWA KUBA ARI YESU.

Kare. Omuti Gw'Amagara ku araabe ari omuntu, n'Omuti gw'Okumanya Oburungi n'Obubi NAGWO n'omuntu. Tikirikubaasa kuba okundi. N'ahabw'ekyo Ogwo Ohikiriire akaba ayemereire aha rubaju rw'Ogwo Mubi rwagati okwo omu Kibanja kya Edeni. Ezekieli 28:13 a “Iwe (Sitaane), okaba ori omuri Edeni, ekibanja kya Ruhanga.”

Hanu niho turikutungira okushuuruurirwa okw'amazima “kw'oruzaaro rw'Enjoka.” Buzima aha niho ekyabaireho omuri Edeni kiri. Ekigambo nikigira ngu Haawa akategwa enjoka. Omu bwijwire, Haawa akashendashendwa enjoka. Omu kitabo ky'Okutandika 3:1 nihagira hati, “Kandi enjoka ekaba eri enyabwengye okukira enyamaishwa zoona ezi MUKAMA RUHANGA yaahangire.” Enyamaishwa egi ekaba eri haihi kushushana n'omuntu (kwonka ekaba eri enyamaishwa kashushu) ahabw'okuba ekaba neebaasa kuteesa n'okugamba n'abantu. Ekaba eri ekihangirwe ekyabaire kigyenda bwemi nk'omuntu, omu kushushana kwayo ekaba eri ahagati y'empundu n'omuntu, kwonka eri haihi munonga n'omuntu. Ekaba eri haihi kushushanira kimwe n'omuntu kuhitsya obu entanga yaayo yaajwangaine n'ey'omukazi kikamureetera kutwara enda. Eki ku kyabaireho, Ruhanga yaakyeena enjoka. Ruhanga yaahindura buri igufa ery'omu mubiri gw'enjoka etyo yaatandika kwekurura ahansi nk'enjoka z'obutoosha. Sayansa neebaasa kugyezaho kyona eki erikubaasa, kwonka terikubaasa kuzoora akakwate akaabuzireho. Ruhanga niwe yaakikozire. Omuntu n'omunyabwengye naabaasa kureeba obuzaare obu omuntu aine n'enyamaishwa kandi agyezeho kubworeka naarabira omu “kuhinduka kw'ekintu mporampora kikarugwamu ekindi bwanyima y'obwire buraingwa.” Tihariho ekirikwetwa “okuhinduka kw'ekintu mporampora kikarugwamu ekindi bwanyima y'obwire buraingwa.” Kwonka omuntu n'enyamaishwa bikajwangana. Egyo n'emwe aha naama za Ruhanga eyaabaire etwire esherekirwe, kwonka hati eshuurwirwe. Kikabaho okwo rwagati ya Edeni obu Haawa yaayanga Amagara akaakiira Okufa.

Yetegyereze oku Ruhanga yaabagambiire omu kibanja kya Edeni. Okutandika 3:15, “Kandi Ndyata obuzigu ahagati yaawe n'ogu mukazi, n'ahagati y'oruzaaro rwawe n'Orwe; orwe Ruryakuteera omutwe, naiwe Oryaruteera ekitsintsiino.” Ku turaikirize Ekigambo kya Ruhanga ngu omukazi akaba aine Oruzaaro, n'enjoka nayo buzima neeteekwa kuba yaabaire eine oruzaaro. Oruzaaro rw'omukazi ku ruraabe rwabaire ruri omwana w'omwojo owaazairwe hatariho omukazi kumanyana n'omushaija omu by'omubonano, n'oruzaaro rw'enjoka narwo nikwo ruraabe omu muringo nigwo gumwe, omwojo ondiijo naateekwa kuzaarwa hatariho omukazi kumanyana n'omushaija omu by'omubonano. Tihariho mwegi n'omwe otarikumanya ku Oruzaaro rw'omukazi yaabaire ari Kristo Owaizire ahabw'amaani ga Ruhanga, hatariho omukazi kumanyana n'omushaija omu by'omubonano. Kandi nikimanywa kurungi ku ekyo ekyahanwirweho eky'okuhutaaza omutwe gw'enjoka omu mazima bukaba buri obunabi oburikukwata aha ki Kristo yaabaire naija kuhikiiriza aha musharaba ahari Sitaane. Aho aha musharaba Kristo akaba naija kuhutaaza omutwe gwa Sitaane, na Sitaane nawe akaba naija kuhutaaza ekitsintsiino kya Mukama.

Ekicweka ky'Ebyahandiikirwe eki n'okushuuruurirwa okurikworeka oku oruzaaro rw'enjoka rwabibirwe omu nsi, nk'oku twine ebyagambirwe Luka 1:26-35, omu kirikworekwa oku Oruzaaro rw'omukazi rwayorekirwe omu mubiri hatariho omushaija kumanyana n'omukazi omu by'omubonano. “Omu kwezi kwa mukaaga maraika Gaburieli akatumwa Ruhanga omuri tauni ya Galilaaya erikwetwa Nazareesi, aha mwishiki oshugaine, owaabaire naagambwa obugyenyi omushaija orikwetwa Yosefu, ow'omu nju ya Daudi; eiziina ry'omwishiki ogwo akaba ari Mariamu. Gaburieli yaija ah'ari, yaamugambira ati: Shemererwa, iwe orikukundwa munonga! Mukama ari naiwe. We yaayekanga munonga ahaw'ekigambo ekyo, naateekateeka okuramutsya okwo oku kuri. Maraika yaamuhuumuriza naagira ati: Otatiina, Mariamu, ahabw'okuba otungire obuganzi ahari Ruhanga. Reeba oryagira enda, ozaare omwana w'Omwojo, kandi oryamweta Eiziina YESU. Aryaba mukuru, aryayetwa Omwana wa Rukiraboona; kandi Mukama Ruhanga Aryamuta aha kitebe ky'obugabe bwa Ishenkuru Daudi, ategyekye enju ya Yakobo ebiro byona, kandi obukama Bwe tiburihwaho. Mariamu yaabuuza maraika ati: Ekyo kiryabaasika kita, ka ntaine mushaija? Maraika yaamugarukamu ati: Omwoyo Orikwera aryakwizira, n'amaani ga Rukira-boona garyakusangira; Omwana Orizaarwa nikyo aryeterwa Orikwera, Omwana wa Ruhanga.”
Nk'oku Oruzaaro rw'omukazi yaabaire ari Ruhanga buzima Arikwezaarira omu mubiri gw'omuntu, n'oruzaaro rw'enjoka nigw'omuhanda gwonyini ogu Sitaane yaashangire arikubaasa kweyiguriraho orwigi kutaaha omu bantu. Kikaba kitarikubaasika Sitaane (ahakuba n'EKIHANGIRWE ky'omwoyo kwonka) okwezaarira omu muntu omu muringo ogu Ruhanga Yaayezaariiremu, n'ahabw'ekyo okushoboorora okuri omu kitabo ky'Okutandika nikutugambira oku Sitaane yaareetsire embibo ye n'oku yaabyaire embibo ye omu ruganda rw'abantu. Garuka oijukye ngu Sitaane naayetwa “enjoka.” N'oruzaaro rwe nari eki yaabyaire omu bantu nikyo turikugambaho.

Adamu ku yaabaire atakamanyire omukazi we Haawa, enjoka ekamumutangaho. Kandi ogwo owaazairwemu ni Kaini. Kaini akaba ari (owaazairwe, owaakomookire) aha “Mubi.” 1 Yohaana 3:12. Omwoyo Orikwera omuri Yohaana akaba atarikubaasa kweta Adamu “Omubi Ogwo” omu mwanya gumwe (ahakuba ekyo nikyo yaakubaire ari kuri yaabaire ari ishe wa Kaini) reero omu mwanya ogundi akeeta Adamu “Omwana wa Ruhanga” eki yaabaire ari omu buhangwa. Luka 3:38. Kaini akahika yaagira engyesho nk'eza ishe, owaareetsire okufa, kandi omwitsi. Okugambisa obugomi kwa Kaini ahari Ruhanga obu yaabugana Ow'obushoboorozi bwona omu Kutandika 4:5, 9, 13-14 nikyorekyera kimwe oku emitwarize ye etari y'obuntu, omu Byahandiikirwe byona tihariho ahu turikushanga okwehanga nk'oku ahu Sitaane yaarabugaine Ruhanga. “Kwonka tiyaasiima Kaini n'ebi yaatoija. Kaini yaagira ekiniga kingi, yairirimba aha maisho. Mukama yaabuuza Kaini ati: Abeeli murumuna waawe arahi? Kaini yaagarukamu ati: Tindikuhamanya. Niinye murinzi wa murumuna wangye? Kaini yaagira MUKAMA ati: Ekifubiro eki wampa ni kihango, tikirikubaasa kwemerwa. Reeba, eri izooba wancwa aha itaka, kandi tinkireebwa omu maisho Gaawe; ndyaguma ndi empungi n'ekizengyerezi omu nsi; kandi orindeeba weena aryanyita.”

Yetegyereze kurungi oku Ruhanga arikushoboorora aha kuzaarwa kwa Kaini, Abeeli na Seezi. Okutandika 4:1, “Bwanyima Adamu yaamanya Haawa omukazi we, yaagira enda, yaazara Kaini; yaagira ati: Ntungire omwana w'omwojo ahabw'okuhwerwa Mukama. Yaagaruka, yaazara Abeeli omurumuna.” Okutandika 4:25 “Adamu yaagaruka yaamanya omukazi we, yaazaara omwana w'omwojo, yamweta Seezi.” Adamu akamanya omukazi we emirundi EBIRI kwonka Baiburi neetworeka ku hazairwemu abaana BASHATU b'Aboojo. Obu Baiburi eri Ekigambo kya Ruhanga ekihikire, aha tihariho nshobi kwihaho n'Ebyahandiikirwe ebirikutumurikira. Adamu ku araabe yamanyire Haawa emirundi EBIRI kwonka hakazaarwamu aboojo BASHATU, noomanyira KIMWE ngu OMWE omuri abo bashatu AKABA ATARI mutabani wa Adamu. Ruhanga akahandiikisa ebi omu muringo ogu kugira ngu agire eki yaatworeka. Amazima g'eki gari ngu Haawa akaba aine abaana b'aboojo BABIRI omunda ye (empasha) atwekirwe ABASHAIJA BABIRI. Akaba atweire enda y'empasha, obwo enda ya Kaini yaagitwaire atakatwaire eya Abeeli.

Read the full account in...
Obusingye bw'Ekanisa ya Efeso.

Also see... Oruzaaro rw’Enjoka.

Ekyo nikyo kimanyisa abaana ba Ruhanga n'abaana ba Sitaane; weena otakora eby'okuhikiirira ti wa Ruhanga, n'obu yaakuba otakunda mwene ishe.

Okukundana n'okwangana Ahakuba obu nibwo butumwa obu mwahuriire okwiha iranaira, ngu tukundane,

turekye kuba nka Kaini owaabaire ari ow'Omubi, akaita omurumuna. Mbwenu akamwitira ki? Ahabw'okuba emicwe ye ekaba eri mibi, kandi ey'omurumuna ekaba eri ey'ohikiriire.

1 Yohaana 3:10-12