Aiyeiyea naka Teriniti.

William Branham.

Naka oitabo...
Apukokinio naka Yesu Kristo.

Apukokinio 1:5,
5. Ido kama ejai Yesu Kristo, Ekajenan Lomunot, Ekiyai loka Ikatwak, Ekayaiton da loka Ikabakan Iuka Akwapin. Mama ejai Ngol Lokimina oni, lokilacuni da kotoma adiakanaretawok kanuka Aokotoke,

Apukokinio 1:8,
8. Ebala Ejakait Edeke ebe, “Arai Eong Alupa ka Omega, Loejai, ido Lokejai, ido Loebuni, Lokapedor kere.”

Aso do aitejenuneta nu kere, 'Ngol Loejai', ka 'Ngol Lokejai',ka 'Ngol Loebunit', ka 'Ekajenan Lomunot', ka 'Ekiyai Loka Ikatwak', ka 'Ekayaiton loka Ikabakan luka Akwapin', ka 'Alupa ka Omega,' ka 'Lokapedor kere', eraas kere ikiroria Iuka adoketa ka aitejenuneta nuka EDIOPOET IDO ETUNGANAN NGOPENGOL, Loerai Ejakait Yesu Kristo, Lokilongari oni adiakanaretawok kotoma AokotoKeng, kelopet.

Emoyo loka Edeke kaneejai Yokana itijenunit koipone kangol tetere aitereun Eidekeone Loikiara loka Yesu Kristo ka apukor da Eidekeone kwape EDEKE EDIOPET. Ejai lolo apaar naepol noi. Ebalai ebe ejaas Idekesio iuni, itia ediopet. Apukokinio na kwape abu Yesu Elopet koinakinia Yokana, itetenit apaar ngin. Mam erai ebe ejaas Idekesio iuni, konye Edeke ediopet loejaasi ka iyapesin iuni. Ejai Edeke EDIOPET loejaas ka aitejenuneta auni, Papa, Okoku, ka Emoyo Lokalaunan. Apukokinio na naka apedor nges naajaatar ekanisa losek, ido ibusakinit kinyakakinai kapak na nakawaisia koupas nepepe keipone loka aibatis kakip lokabeit.

Aso kwana ikesisiak luka acoa naka akiro nuka edini lukatinen kwana mam epote acamanar kaeong naarai nu kes nuaponi kiwadikai apupetait nakapolon naka Ikristayon. “Aisisianakin ngin (naikamunit Teriniti) ejai cut otau ido aidules naka Aitutuket Namojong. Ejai koipone kangopekangol da cut toma otau ka aidules da naka Aitutuket Nakitetet. Itepegit noi Aitutuket Nakitetet kwape itepegitor Aitutuket Namojong da aomisioit na ebe ejaasi Idekesio luipu adepar ediopet. Konye ca kisisianakini Aitutuket Nakitetet kaica naeriana ebe Papa erai Edeke, Okoku da erai Edeke, Emoyo Lokalaunan da erai Edeke, kosodi ebe luuni lu MAM eraasi atakanunueta auni nuka Etunganan kangopengol, konye erai itunga iuni ebwoete kotoma ajena nakabeit neejai nginidiopet ka yenice. Kanen kajaunos ka aisisianakin ngin nakapolon naka itunga iuni konye Edeke ediopet”.

Elimoritosi boboda kesi ebe, “Edeke, kwa ebalar Ebaibuli, mam erai etunganan ediopet bon, konye erai Ngesi itunga iuni kotoma Edeke ediopet. Ngin nges aiyeiyea nakapolon naka Teriniti.”

Abeit teni erai. Biai epedoriata itunga iuni ajaut toma Edeke ediopet? Mam bon erai ebe emamei Ebaibuli kanuka ngun, konye itoduunit da amamus airwananar naecobe. Itunga iuni luetakanete, karaida keputos kojautene, eraunete idekesio iuni, araimam einere nges etoolio akepolou cut.

Kopupok ber ijo akiro nu bobo, “Arai eong Alupa ka Omega, Ageunet ka Esange, inera kwanata Ejakait, Loejai, ido Lokejai, ido Loebuni, Lokapedor kere.” Erai lo Edeke. Mam lo erai enabi, etunganan. Erai lo Edeke. Ido mam erai apukokinio naka Idekesio iuni, konye naka Edeke EDIOPET, Lokapedor kere.

Mam kes eyuunitos Idekesio iuni kotoma ageunet naka ekanisa. Mam ijo ipedori adumun eipone kaiyuun kangin kokiding na ikiyakia. Arai akaulo naka atur naka ikiyakia nges konyet kelomunia aomisioit na naitetemio aitetem ido koraun akirot nak'epeget noi ka aisisianakinet nakapolon k'Airiamun nako Nicaea. Asisianakinet naka Eidekeone abu koyau atiaketa aarei ko Nicaea. Ido kotoma atiakaku kangin apotu kotakanut iwaitin iarei lu elamara noi. Ediopet abu kolot kitebeikin toma aiyuun ngin ebe ejaas idekesio luipu, aiyuun Idekesio iuni, ido luce apotu koloto toma Oidiopeone loka Edeke. Eebo karaida kebu ngin koyangaik apak atakanun, konye abu kiswamaun kija da kangin lolo. Konye Apukokinio kotoma Yokana kanuka Emoyo neejaas ikanisan arai ebe, “Arai Eong Ejakait Yesu Kristo, ido Eong nges arai KERE. Emamei bobo Edeke ecie.” Ido abu Ngesi kibwaik AipuceteKe Apukokinio na.

Koomoom nu: Ingai bo kerai Papake ka Yesu? Ebala Matayo 1:18 ebe “Kotakan ngesi ejai akoik naka Emoyo Lokalaunan.” Konye kereka Yesu, Elopet, abala ebe Edeke nges PapaKe. Edeke Papa ka Edeke Emoyo Lokalaunan, kwape etapitor oni alimununo amaeta nu, itarauni Papa kede Emoyo EDIOPET. Kaitebeikin eraas kesi, arai mam apolouke ajaas do Yesu ka Lukapapa iarei. Konye kojenik ebe abala Yesu ebe Ngesi ka Papake araasi Ediopet - mere iarei. Itoduni ngin Edeke EDIOPET.

Kwape eraar na nakabeit kotoma akiro nukolosek ka nuiwadikatai Obaibuli da, eumokinitosi do itunga aibo nekeponiata iuni. Abu koraun aisisianakinet naabu korau apetetait k'Airiamun nako Nicaea okaru 325 A.D. Teriniti na (akirot naemamei cut kotoma kanu Iwadikatai Obaibuli) arai naetobwoitai kane ajaas idekesio luepu luko Rome. Ajaas Iromayon ka idekesio luepu luelipenenete kesi mamakec. Elipenenete bobo da kesi ne ejaasi lukapapaakec aitaraunit kes kwape ikapurok. Kerai bon adoketait naka ainakin ikiroria lukitetiak neejaasi idekesio lusek, kwangin kija ka lukalaunak kanu aitaraun bala naerai naka Ebaibuli. Aso, aibois na Jupiter, Venice, Mars, kicieda, kija ka Paulo, Petero, Fatima, Christopher, kiceda. Mam kes apotu kopedosi aitolot ediinikec lo kapiirit kede Edekeediopet bon, aso apotu kotiakatiakata Nges aitaraun iuni, kosodete aitaraun lukalaunak ikapurok kwape sek etaraunitotor lukapapaakec ikapurokokec.

Ageun kapak kangin akurwoki itunga amisiikin ebe ejai Edeke ediopet bon kede iofisin arai aitodianareta auni. Ejenete ebe ejai Edeke ediopet kwape ebalatar Nuiwadikatai Obaibuli, konye ejai kesi aitam aitaraun nges aitetemet ngin na itegelikina ebe esubit Edeke bala abunget naka emusabibu; itunga iuni luemorete Eidekeone erian. Konye kailerer kere ebala kane kotoma Apukokinio ebe Yesu nges “Ngol Loejai,” “Ngol Lokejai” ka “Ngol Loebuni”. “Nges Loerai Alupa ka Omega,” apolouke ebe erai Ngesi “Anyukuta Nasodit kiton Nakawasia” arai LOERAI NGUN KERE. Ngesi erai nginibore kere - Lokapedor kere. Nges erai Aturot naka Saron, Apecel naka Aditot, Acerit Naemwekimweki naka Atupuruc, Atenut Nakadoliton, Papa, Okoku, ka Emoyo Lokalaunan. Ngesi erai Edeke, Edeke Lokapedor kere. EDEKE EDIOPET.

1 Tim. 3:16 ebala ebe,
“Ido komamei abuonokin, epol noi aiyeiyea naka ayongit Edeke: Abu kitodiar kotoma akuan, Kitojokai kotoma Omoyo, Apotu imalaikan koanyut Nges, Aponi kolimonokinai kotoma atekerin, Aponi kiyuunai kotoma akwapin, Kodakarai kuju toma aibuses.”
Nu kes nuebala Ebaibuli. Mam elimunit imodiobore yenikamunit losodit arai lokiareit karaida lokiuniet kane. Ebala ebe abu Edeke kitodiar kotoma akuan. Edeke Ediopet. EDEKE ngol EDIOPET abu kitodiar kotoma akuan. Ebusakinit ti ngun kitetenata ngin. Abu Edeke kobu kotoma asima naka itunganan. Mam ngin abu kitarau nges EDEKE ECIE. KERAI NGOL EDEKE, EDEKE JEPEJE. Kerai apukokinio aparasia kangun, ido erai apukokinio kwana. Edeke Ediopet.

Kabongosi ber oni kau kotoma Obaibuli ido kaanyutu ebe kerai Ngesi inyo kotoma ageunet kwape ejaar apukokinio naabu Ngesi kijaik kanuikamunitos Nges Elopet. Abu lokapolon Yawe kotakanikin Isirael kotoma opir loka akim. Kwape Emalaika loka Aitutuket abu Ngesi kiboienene kotoma opir ngol loka akim ido kingarenikinite Isirael kanginipaaran. Koyekalu abu kolimo abunoreKe kede kedou loapol. Kosodi do kapaaran adiopet abu Ngesi kitodiar kotoma akuan nauruni abekot naetemokinitai kanuKe. Edeke ngol Loedukurit kuju naka idukurun luka Isirael kwana abu konapak Elopet ewema loka akuan ido kidukur kwape etunganan kotunga. Konye kerai Ngesi EDEKE JEPEJE.

Isisianakini Ebaibuli ebe AJAI EDEKE TOMA KRISTO. AKUAN kerai Yesu. KotomaKe eboie aileleba kere naka Eidekeone, KAKUAN. Emamei ibore yenepedori araut yenecai adepar ngun. Aiyeiyea, eebo. Konye abeit alopet - mam epedori ailerereun adepar nen. Aso arai mam Nges kerai itunga iuni kapak kangin, mam da Nges epedori araut iuni kwana. EDEKE EDIOPET: Ido Edeke lopelo nges abu koraun akuan.

Abala Yesu ebe, “Abuni kama ejai Edeke ido alosi (abongor) neejaiEdeke.” Yokana 16:27-28. Nuapotu cut teni kiswamaunos kes ngun. Abu kiwiror kakwap koipone lo atwanare, aidaio, ajarun ka adokarike. Kosodi Paul airiamun kaNges korot kaloabei Damasiko ido kiner neejai Paul kobala ebe “Saul, Saul, kanukinyo kireitor ijo Eong?” Kotema Paul atiar, “Ijo Ingai, Ejakait?” Kotema Ngesi, “Arai Eong Yesu.” Arai Ngesi epir loka akim, aica naitumudukani. Kebu Ngesi kibelokin abongor, cut kwape abalar Nges ebe abuni aswam. Abongor toma ojautene losek ajai Ngesi eroko kenapakina eidukuru loka akuan. Ngol nges cut eipone loabu Yokana koanyunia ngin. Yok.l:18, “Emamei itunganan yeneanyunit Edeke kapakio kere; Okoku loteluna, loejai atorob naka Papa, Ngol nges etejenuni” Koany neabalar Yokana ebe EJAI Yesu. Ejai Ngesi TOMA atorob naka Papa.

Luka 2:11 ebala ebe:
“Naarai auruun lolo kanukus Eketajaran Nges Kristo Ejakait kotoma ore loka Daudi.”
Aponi kouruunai Nges korai Kristo, ido akaulo naka apaarasia akanykauni neakepere aponi komaikinai Nges Yesu, kwape da abu emalaika kolimokinitor kes. Aponi kauruun eong karai Branham. Nedounere eong apotu kesi koinakis eong ekiror William. Kerai Ngesi KRISTO konye aponi koinakinai Ngesi ekiror kane kotunga. Eidukuru ngol lokokinga lo apedorete itunga asesen anyaritai Yesu. Kerai Ngesi Ejakait loka Aibuses, Loerai Lokapedor kere itodiara kotoma akuan. Nges erai Edeke Papa, Okoku, ka Emoyo Lokalaunan. Ngesi Loerai ngun kere.

Naka oitabo... Apukokinio naka Yesu Kristo.

Asiomio eitabo...   Edekeone Itetemunitai.

Kiira, ijo Isirael: EJAKAIT Ewokodeke erai EJAKAIT ediopet:

Ikisila 6:4