Kristo niwe naama.

From...  Kristo niwe naama ya Ruhanga eshuurwirwe.

William Branham.

Mukundane, okukira ebindi byona. Mukundane. Muta... N'obu sitaane yaakugyezeho kugamba ki! Hati mwena muri ekibiina kimwe kihango munonga kirungi hati, kwonka mwijukye okurabura kwangye, mwareeba, Sitaane tarikwija kwikiriza ngu kigume kityo. Ngaaha, sebo. Naija kurasha buri kimwe, n'obu kiraabe nikyetaagisa kureetamu omuntu kuhika aha kigyendererwa kye. Naija kureetamu orikukyema nari otarikwikiriza, kandi amushutamise ahansi, kandi atume yaateerana naimwe omu bucureera n'ebindi, bwanyima naija kuta omu muntu ogwo ekintu ekirikushushana obutwa, reero akitandikiise omu kanisa. Mutarigwera orubaju rwakyo. Mutarigira akakwate n'ekindi kintu kyona. Mugumizemu nimukundana omu burungi n'embabazi omwe na mugyenzi we. Ogwo mushaija mumushabire, kugira ngu nawe abaase kujunwa, nari ogwo mukazi, ou ari weena, mubashabire kusha. Kandi omwe akwatanise na mugyenzi we.

Kandi mugume na paasita waanyu. Nimureeba, niwe muriisa w'entaama, mbwenu mumuhe ekitiinisa. Naija kubeebembera abarabyemu, kandi, 'habw'okuba akateekwaho Ruhanga kukora atyo.

Hati ekyo nimukiijuka? [Abateeraine baagira bati, “Amiina.” -Omur.] Omuzigu aryaija. Kandi ku ariija, buri omwe aramatire ahari mugyenzi we. Reero ogwo ou sitaane arikukozesa nk'omuzigu naija kushohora agyende nari ataahemu kandi abe omwe omuriimwe. Nikyo ekyo kyonka.

Mutarireeta eby'enganda omuriimwe, nari-nari kugamba kandi mukeehindura ab'enganda. Turi bamwe. Tinkagira nti, “Omukono gwa bumosho, nkwi - nkwiniire ekiniga kingi munonga, naaza kukwihaho 'habw'okuba tori mukono gwa buryo.” N'omukono gwangye gwa bumosho. Niinyenda ngu gugumeho. Nangwa n'enshonga nkye y'orukumu rwangye, niinyenda ngu egumeho, buri kacweka kakye koona k'omubiri gwangye kagume omu mwanya gwako gwonyini. Kandi Ruhanga naayenda ngu itwe, nk'omubiri gw'abaikiriza, tugume hamwe buzima omwe na mugyenzi we, buri omwe agume na mugyenzi we buzima.

Kandi hati ekyo mukiine aha ntambi z'amaraka. Ekiturikwikiriza mukiine aha ntambi z'amaraka. Eby'engyesho omu kanisa mubiine aha ntambi z'amaraka, oku tutwaza omu kanisa ya Ruhanga, oku tushemereire kuteeranira hamwe reero tukashutama hamwe omu myanya y'omu Iguru. Otaguma omuka. Ruhanga yaaba ari omu mutima gwawe, haihi nikikugumira kurinda obu ezo nyigi ziraigurwe seeri kuri, kutaahamu okateerana n'ab'eishe-emwe bagyenzi baawe. Ku oraabe otari otyo, otarikwehuriramu otyo, reero ninkugambira, obu n'obwire obu oshemereire kutandika kushaba.

Habw'okuba, turi omu biro by'aha muheru, obu Baiburi etungwire... nimmanyisa neetwehanangiriza ku-ku, “Nk'oku murikureeba ngu ekyo kiro kiri haihi kuhika,” kukundana na rukundo y'Abakristaayo na rukundo y'Obwaruhanga, “kuteeranira hamwe omu myanya y'omu Iguru na-na-na Kristo Yesu,” kandi mukundane. “Ku muriguma nimukundana, nibwo abantu boona baribamanya ku muri abeegi Bangye.” Ekyo kihikire. Mugumire kimwe hamwe.

Ow'eishe-emwe ku araabe, nooteekateeka ngu ashobizeho kakye, nari ow'eishe-emwekazi, ogire oti, “Mukama, otariikiriza na kakye omuzi ogurikushaariira gukamera omuriinye, 'habw'okuba nikiza-nikiza kumukwataho, reero kiihire kimwe Kristo omu magara gangye.” Ezo asidi z'obutwa bw'eitima, n'eihari, na rwango, niziija kukwihaho Omwoyo Orikwera. Niziija Kumubinga omuri tabirinaakuru hanu. Niziija kwita Omwoyo wa Ruhanga, nari Zimubinge aruge hanu, kishaashe paasita waawe. Niziija kukora buri kimwe. Mwareeba? Ekyo mutakikora.

Mweyongyere kuba bamwe munonga. Musyoreyo ru... Mukwate engabo, nk'oku ow'eishe-emwe ahaire obujurizi, omuheereza hanu ekiro kiri, aha ky'okukwata engabo, naakireeba omu kworekwa. Oku... Ekyo nikikujweka eby'okurwanisa byona bya Ruhanga. Bijware, jwara bihame, buri omwe ayeyongyere kwirira haihi na mugyenzi we. Mukundane, oku biraabe kwona. Mugambe ebirungi omwe ahari mugyenzi we, mugambe ebirungi omwe ahari mugyenzi we, reero Ruhanga naija kubaha omugisha.

From...  Kristo niwe naama ya Ruhanga eshuurwirwe.

Ei Omujuni w'abanyamahanga ariruga Imuka, oyakye; ahakuba omushana gwawe gwizire, N'ekitiinisa kya MUKAMA kukujwereire.

Ahakuba, reeba, omwirima guryashweka ensi, Omwirima ndindindi gushwekye amahanga; Kwonka MUKAMA aryakuturukiraho, N'ekitiinisa kye kikureebekyereho.

Isaaya 60:1-2