Ifunde ilya kufyalana ilya Lesa.

Belengeni ili buku...
  Inshita ya Lukuta lwa Pergamo.

William Branham.

Ifi efyo ndeesha ukulanda kuli imwe. Ifunde ilya kufyalana lyakutila icilengwa conse cilingile ukuleta umusango wa ciko, nangu ukulingana no Kutendeka 1:11, “Kabili Lesa atile, pe sonde napameshe icani, imbuto ya iko shiponye nseke, imiti yafisabo itwale fisabo mu musango ya iko, umuli inseke sha iko, pe sonde: elyo cali ifyo.” Umusango onse uwa bumi uwali mu mbuto bwaishileba mu cilimwa kabili mpaka na mucisabo. Ifunde limo line lyaba na ku lukuta ilelo. Umusango wa mbuto onse uwatendeke ulukuta uli no kwisa kabili uli no kuba nge mbuto ya ntendekelo pantu ni mbuto imo ine. Muli shino nshiku shakulekelesha Ulukuta lwa cine ulwa kwa Nabwinga (imbuto yakwa Kristu) luli no kwisa kwi libwe lya pa Mutwe, kabili akaba ulukuta ulwapulamo, uluko ulwapulamo, ilyo alepalamina kuli Wene. Abo ababa muli nabwinga bali no kuba abapalana sana nga Ena icakutila bakaba na mu cipasho Cakwe cine. Ici cili pa mulandu wa kuti benga mpaana pamo Nankwe. Bakaba umo. Bakaba ukumoneka kwine ukwa Cebo icakwa Lesa wa mweo. Ifilonganino teti fimeshe ici (imbuto iya lubana). Baka mesha ifisumino fyabo kabili ne fishilano, ukusankanya pamo ne Cebo. Uku kusankanya kuleleta icintu casankana.

Umwana wantanshi (Adamu) ali Icebo cakwa Lesa imbuto iyalandwa. Apelwe nabwinga ku kuifyala umwine. E mulandu wine nabwinga apelwe kuli wene, ku kuifyala umwine; ku kufyala umwana wa kwa Lesa naumbi. Lelo aliwile. Awile pa mulandu wa kusankanya. Amulengele ena ukufwa.

Umwana wa cibili (Yesu), nao Imbuto iya Cebo cakwa Lesa iyalandwa apelwe nabwinga nge fyo cali kuli Adamu. Lelo ilyo Ena talamuupa, na ena aliwile. Ena, nga filya umukashi wakwa Adamu, abikilwe ku kweshiwa nga cakutila ali no kucetekela Icebo cakwa Lesa no kuba no mweo, nangu ukutwishika Icebo no kufwa. Alitwishike. Alifumine ku Cebo. Alifwile.

Ukufuma ku kali bumba akanono aka mbuto ya cine iya Cebo, Lesa akapela Kristu nabwinga uwatemwikwa. Ni nacisungu uwa Cebo Cakwe. Ni nacisungu pantu taishiba ifisumino ifya pangwa no muntu atemwa ifishilano. Nakabili na mukupitila mu filundwa ifyakwa nabwinga fikafikilishiwa fyonse ifyalailwe na Lesa ku kumonekela muli nacisungu.

Icebo ica bulayo caishile kuli nacisungu Maliya. Lelo Icebo ca bulayo ali ni Ena, Umwine, ku kulengwa ukumoneka. Lesa alimoneke. Ena, Umwine, alibombele ilya nshita kabili afikilishe Icebo Cakwe umwine ica bulayo muli nacisungu. Cali ni malaika uwamuletele mbila. Lelo imbila yakwa malaika yali Icebo cakwa Lesa. Esaya 9:6. Alifikilishe pali ilye nshita fyonse ifyalembelwe pali Wene pantu alisumine Icebo Cakwe kuli ena.

Ifilundwa fyakwa nabwinga nacisungu baka Mutemwa, kabili bakakwata amaka Yakwe, pantu Wene e mutwe wabo, kabili na maka yonse Yakwe. Baba aba kunakila Wene nge fyo ifilundwa fya mibili yesu fyaba ifya kunakila imitwe yesu.

Moneni ukumfwana kwa kwa Tata kabili no Mwana. Yesu tatalile ukucita icintu icili conse mpaka intanshi calangishiwe kuli Wene na Tata. Yohane 5:19. Uku kumfwana kuli nomba ukubapo pakati ka kwa Shibwinga na nabwinga Wakwe. Alamulangisha Icebo Cakwe ica bumi. Alacipokelela. Ena tacitwishika nangu limo. E ico, tapali nangu cimo icinga mucena, ne mfwa ine tekuti. Pantu imbuto nga yabyalwa, amenshi yali no kuibusha nakabili. Iyi pano inkama ya ici. Icebo cili muli nabwinga (nge fyo cali muli Maliya). Nabwinga alikwata amano ya kwa Kristu pantu alishiba ifyo Afwayo kucitwa ne Cebo. Abomba ifyo ba mweba mu Cebo mwi shina Lyakwe pantu nakwata “efyo asosa Shikulu.” Elyo Icebo cilaletwa ku bumi ku Mupashi kabili cilesa mukufikilishiwa. Kwati fye ni mbuto iyo ibyelwe no kutapilishiwa, ilesa mukusombolwa ukutuntulu, ukubombo mulimo waiko.

Balya ababa muli nabwinga bacita fye ubufwayo Bwakwe. Tapali nangu umo uwingabalenga ukucita cimbi. Bena balikwata 'efyo asosa Shikulu' nga te ifyo bekala tondolo. Bena balishiba ukuti cilingile ukuba Lesa muli bena ukucite milimo, ukufikilisha Icebo Cakwe umwine. Tapwile imilimo Yakwe yonse ilyo Ali muli bukapyunga bwakwe pe sonde e ico nomba Alebombela mukati kabili ukupitila muli nabwinga. Alishibe co, pantu tayali ni nshita kuli Ena ukucita ifintu fimo ifyo Alingile ukucita nomba. Lelo ali no kufikilisha nomba ukupitila muli nabwinga ulya mulimo uo Ashile pa mulandu wa ino nshita.

Nomba lekeni twiminine nga filya Yoshua na Karebu. Impanga yesu iya bulayo ileisa mukumonekela nga filya iyabo yacitile. Nomba Yoshua cipilibula “Yehoba-Kapususha,” kabili e mininako intungulushi ya nshita ya mpela iyo ili no kwisa ku lukuta nga filya Paulo aishile nge ntungulushi ya ntendekelo. Kareb e mininako balya abaikele bu cishinka na Yoshua.

Belengeni ili buku...
  Inshita ya Lukuta lwa Pergamo.

Ima iwe Sioni, akubengeshima nga kasuba pantu nalwisa ulubuuto lobe, ubucindami bwakwa Yawe bulebengeshimina pali iwe.

Pantu mona imfifi ikafimba pano isonde, ne kumbi ilyafiitisha likafimba abantu bonse, lelo iwe ulubuuto lwakwa Yawe lukalakubengeshimina, Yawe umucindami iwe eukalaba nobe, no bukata bwakwe bukaba pali iwe.

Esaya 60:1-2