Ruhanga Ahabw’okuba Omutungi W’embabazi.

William Branham.

Read the full account in...
Ruhanga Ahabw’okuba Omutungi W’embabazi.

Mbaire nimbuurira Sande ehweire aha Baefeso, oku Ekitabo kya Yoshua kiri Abaefeso b'Endagaano eya Ira, kandi oku kiri Ekitabo ky'obucunguzi. Kandi obucunguzi bwine ebicweka bibiri bitarikushushana: “kuruga omu” “n'okutaaha omu.” Okubanza, nooteekwa kurugamu. Abantu bamwe benda kutaahamu n'ensi; kwonka nooteekwa kuruga omu nsi, kugira ngu otaahe omuri Kristo. Nooteekwa kuruga omu butaikiriza, kugira ngu otaahe omu kwikiriza. Tiharikubaasa kubaho ekintu na kimwe omu muhanda gwawe. Kugira okwikiriza kwonyini buzima, nooteekwa kurekyera kimwe enyima, buri kintu ekirikuhakanisa Ekigambo kya Ruhanga, kugira ngu otaahe omu kwikiriza. Kandi ekyo kikaba kiri Ekitabo ky'Abaefeso ky'omu Ndagaano eya Ira, Yoshua. Ahu, Musa yaabaire naajwekyera ebiragiro, ebyabaire bitakaabaasa kujuna omuntu weena; kwonka embabazi zikaba nizibaasa, kandi hanu Yoshua n'ekigambo kimwe nka Yesu, “Yehova-omujuni.” Reero hati, nitureeba ngu twahika aha Baefeso endiijo, Abaefeso endiijo hati. Ahu, ngu, omu bigombe byaitu by'amadiini g'obwengye bw'obuntu n'ebindi, n'entebeekanisa zaitu zoona z'obwegyese zihikire ahari Yorudani yaazo-yaazo, n'ahabw'ekyo nituteekwa ku-kugira Abaefeso ogundi murundi. Nituteekwa kugira okuruga, “kuruga omu” kandi “n'okutaaha omu,” ahabw'Okutwarwa.

Hati twaza kushoma ekiro eki omu shuura ya 2 y'Abaefeso. Naaba ningamba ebyo kugira ngu mubiikuure aha-aha mwanya ogwo, nari ngu muze ahari egyo shuura. Imwe, kandi naimwe akabahindura abahuriire, obu mwabaire mufeereire omu bibi n'omu by'okushiisha byanyu, Ebi mwabaire mugyenderamu ira nimukuratira emitwarize y'ensi egi, kandi n'okukuratira omukama w'obushoboorozi bw'omu mwanya gw'ahaiguru, nigwo mwoyo ogurikukorera hati omu batarikuhurira. Kandi naitwe twena tukaba tubarimu, nitukuratira okurigira okubi kw'emibiri yaitu, nitukora ebi emibiri yaitu n'ebiteekateeko byaitu byetenga; kandi ahabw'obuhangwa bwaitu tukaba turi ab'okugirirwa ekiniga nk'abandi boona. Kwonka Ruhanga ahabw'okuba omutungi w'embabazi, omu kukunda kwe kwingi oku yaatukunzire, N'obu twabaire turi abafu omu by'okushiisha byaitu, Akatuhindura abahuriire hamwe Nawe, nimmanyisa, akatuhindura abahuriire hamwe na Kristo, (mukajunwa ahabw'embabazi), Niinyenda kwiha aho bikye, nari ekicweka ky'ogwo mushororongo, “kwonka Ruhanga,” Ruhanga Ahabw'okuba Omutungi w'Embabazi.

Niinyenda ngu mureebe hanu ahu nabi, entumwa, nimmanyisa, Paulo, ou-ou, oku yaagambire eki, oku ngu, “Imwe Akabahindura abahuriire, abaabaire muri abafu. Imwe Akabahindura abahuriire, abaabaire muri abafu, mufeereire omu bibi n'omu by'okushiisha byanyu; nimukuratira ebintu by'ensi, ebi omubiri gwetenga, kandi nimukora ebi ebiteekateeko byetenga. Akaba...” N'enki ekyareetsireho okuhindurwa oku, mwareeba? Kandi n'enki ekyakureetsireho, “okwiha obwire obwo obu mwabaire muri abafu,” mukahindurwa abahuriire? Kuhindurwa abahuriire nikimanyisa “kuheebwa amagara.” Hakabaho okuhindurwa, kuruga omu kufa kuza omu Magara. Tihariho kindi, tihariho ekindi kintu ekyakubaasa kuba aha muntu weena, kikuru kityo, nk'okumuhindura akaruga omu kufa akataaha omu Magara. Omuntu, ku yaakuba naafa, omubiri gwe, haza akaakizibwa omubiri, ekyo kikaaba ekintu kikuru, kwonka tihariho ekirikukira obukuru nk'obu arikuba afiire omu mwoyo haza Ruhanga akamuhindura ohuriire akagira Amagara.

“Imwe rimwe, ira, mukaba muri abafu.” Mukaba mufiire. Nangwa na baingi hanu ekiro eki, obunaku bumwe, nimubaasa kureeba enyima mumanya ku mwabaire mufiire. Kwonka hati ahabw'enki mutari abafu ekiro eki, nk'oku mwabaire muri obunaku obwo? Mushemereire kuba batsyo, ahabw'okuba mukaba muri abasiisi, “kwonka Ruhanga Ahabw'okuba omutungi w'embabazi.” Nikyo-nikyo ekyo, “Ruhanga Owaabaire ari omutungi.” Ebintu ebi byona ebi twabaire turi, “kwonka Ruhanga”! Ekyo nikyo kyareetsireho okuhindurwa aho honyini, “Ruhanga Ahabw'okuba omutungi w'embabazi”! Oo, nshemereirwe munonga ahabw'ekyo, ngu We ahabw'okuba omutungi w'embabazi. Kuri Ari omutungi w'empiiha kwonka, kuri Ari omutungi w'ebintu kwonka, haza Abitungire, kwonka ekintu ekirikukirayo obukuru n'okuba omutungi w'embabazi. Oo, ekyo ka n'ekigambo kikuru, oku ngu rimwe tukaba turi abafu.

Kandi tukaba nitubuurira ekiro kiri oku embibo erikuteekwa kufa. Kandi buri kintu ekiri ahari egyo nsigo y'amagara tikirikuteekwa kufa kwonka, kureka n'okujunda. Ku eraabe etajunzire, terikubaasa kuba ehuriire. Kandi okujunda ni, “okuhweraho kimwe; neeba ehweireho.” Kandi okuhitsya obu turaahikye ahu ebigyendererwa byaitu n'okuteekateeka kwaitu birikuhweraho kimwe kandi bikajunda bikatuhwamu, obwo nibwo embibo y'amagara erikubaasa kutandika kuba ehuriire. Hati-hati nitubaasa, nimbaasa kutaasyamu enyegyesa nkye hanu, ku ntari... Ku oraabe otarikugiikiriza, tikiine nshonga. Ekyo ni kirungi. Nyowe ningiikiriza. Niinyikiriza ngu-ngu omuntu, ku azaarwa omu nsi omu, ngu ku orikuba ori omwereere muto, ozairwe omu nsi, tokubaasize kuba hanu kutari okumanya ebintu bitakabaireho kwa Ruhanga, ahabw'okuba Tagira bugarukiro kandi Naamanya ebintu byona. Mbwenu omwereere muto ogwo ku azaarwa omu nsi, haba harimu ekintu omu mwereere ogwo. Ku araabe ari ow'okwija kutunga Amagara, nihaba harimu ekintu kikye omunda omwo, omuri ogwo mwana obwire obwo, eki ahikaho, juba nari bwanyima. Egyo mbibo nkye neeba emurimu. Hati ku oraatware... Ebyahandiikirwe nibikigamba butunu.

Hati ku oraabe oine Amagara Agatahwaho ekiro eki, ku turaabe twine Amagara Agatahwaho, obwo nikwo tutuura turi, ahabw'okuba hariho omuringo gumwe gwonka gw'Amagara Agatahwaho. Nikwo tutuura turi. Kandi enshonga ahabw'enki turi tutyo, n'ahabw'okuba turi ekicweka kya Ruhanga. Kandi Ruhanga nikyo kintu kyonka Ekitahwaho. Kandi nk'oku Melekizedeki yaayakiire kimwe kya ikumi kuruga hari Abrahamu, kandi kikabarirwa omwijukuruza we, Leevi, owaabaire akiri omunda ya Abrahamu; akaha kimwe kya ikumi, ahakuba akaba akiri omunda ya Abrahamu obu yaabugana Melekizedeki. Niinyenda kubuurira ahari ekyo omu mwanya ogundi, akasheeshe kamwe. Melekizedeki Ogu N'Oha? Hati mwetegyereze ekyo. Kare munonga, Ruhanga akaba naamanya omwojo ogu orizaarwa. Akaba naamanya byona. Hati turi ekicweka kya Ruhanga. Nikyo otuura ori. Torikukiijuka, ahabw'okuba okaba ori akacweka omuri Ruhanga kwonka. Okaba ori omu kuteekateeka Kwe kwonka. Eiziina ryawe ryo ryonka, ku riraabe rirabaire mu Kitabo ky'Amagara, rikahandiikwamu ensi etakahangirwe. Akamanya eki oriba.

Ningamba eki kwonka, ti kujwanga enyegyesa, kureka okugigorora, kugira ngu tubaase kuruga omuri obu butiini n'obwoba. Torikumanya eki ori. Timurikwija kuba, kureka hati muri abaana ba Ruhanga. Mwareeba, mutuura muri abaana ba Ruhanga. Mwareeba? Ahakuba obu Ruhanga yaabaire akwine omu kuteekateeka Kwe omu kutandika, nooteekwa kuba, ekicweka kyawe kimwe, Amagara gaawe agari omuriiwe hati, nigateekwa kuba gaabaire gari na Ruhanga okwo ira ryona. Mbwenu, We ku, obu Yaabaire atakabaire n'omuntu hanu omu nsi, hatakabaireho ekintu kyona, kureka Ruhanga, okaba ori kimwe aha bicweka Bye. Akamanya eziina ryawe eri oryetwa. Yaamanya erangi y'eishokye eri origira. Yaamanya ebirikubaho byona. Ekintu kyonka ekyabaireho n'obu iwe, ahabw'okuba omusiisi...

Baingi omuriimwe nimubaasa-nimubaasa kwikirizana naanye aha kiteekateeko eki. Obu waabaire ori omwojo muto, nari omwishiki muto, okaba ogyendagyenda aho kandi hakaba habaho ebintu bimwe ebyabaire biba, ebyabaire bitateganisa abandi baana, kikaba kireebeka oti hakaba hariho ekintu omuriiwe ekyabaire kigamba munonga. Aho hakaba hariho Ruhanga, kunu waabaire ori omusiisi. Ekyo nimukiijuka? [Abateeraine baagira bati, “Amiina.” -Omur.] Buzima. Hati ekyo kikaba kiri ki? Egyo ekaba eri egyo mbibo nkye y'Amagara omuriiwe obwire obwo.

Ku haarabireho akaire, waahurira Engiri. Obundi okaza aha kanisa, waakwata eki na kiriya, kandi waaruga omu kigombe ky'ediini waaza omu kindi. Kwonka eizooba rimwe, iwe ahabw'okuba waabaire ori ekicweka kya Ruhanga, okaba nooteekwa kuba ekicweka ky'Ekigambo. Reero ku waahuriire Ekigambo, waamanya ei waarugire, waamanya ngu ago nigo Mazima. Okaba oriwe obwire bwona, embibo ekaba eri omuriiwe obwire bwona. Ekigambo kikareeba Ekigambo ekyabaire kiri omuriiwe, ekyabaire kiriho ensi etakabaireho, kikareeba Ekigambo reero Waakiijaho.

Nk'ekitebyo kyangye kikye ky'empungu, oku ako kaana k'empungu kaayaatwirwe enkoko. Kandi ako kaana k'empungu kakaba kagyenda n'enkoko, kwonka ko, enkoko ku yaabaire eyeta, kakaba kateetegyereza okweta kwayo. Kwonka-kwonka obukoko buto obwo, eby'okurya ebi bwabaire burya omu kibuga ky'ekiju, ebyo kakakaba katabyetegyereza, oku bwabaire bubirya. Kwonka omuriko hakaba harimu ekintu, ekyabaire nikireebeka kiri eky'omutaano n'oku obwo bukoko bwabaire buri, ahabw'okuba okuruga omu kutandika kakaba kari empungu. Nikwo kiri. Eizooba rimwe nyina ekaija neekasherura, reero, ku kaahuriire okugamba munonga kw'empungu, kukaba kutarikushushana n'okugamba kw'enkoko.

Kandi okwo nikwo kiri aha mwikiriza weena ozairwe obwa kabiri. Noobaasa kuhurira enyegyesa y'eby'ediini yoona ei orikwenda kuhurira, n'okutaikirizana kwona okutairweho abantu; kwonka ekyo Kigambo ku kishuuruurwa aho, obwo habaho ekintu ekyahama, Okyorobera. “Naimwe obu mwabaire mufeereire omu kibi (ago magara) Akabahindura abahuriire.” Nihateekwa kuba hariho Amagara agu turikuhindurirwamu abahuriire, okubanza. Ruhanga, ahabw'okumanya ira ebintu bitakabaireho Kwe, akamanya byona. Kandi tukatooranwa ira tutakabaireho kuba batabani na bahara ba Ruhanga. “Naimwe obu mwabaire mufeereire omu kibi n'omu by'okushiisha byanyu, ebi twena twabaire tugyenderamu ira, Akatuhindura abahuriire.” Reeba Paulo, obu Paulo yaabaire ari omukugu mukuru omu by'ediini. Kwonka ku yaabugaine ekyo Kigambo amaisho n'amaisho, Yesu, kikamuhindura ohuriire. Yaaba Ohuriire ahonaaho, ahabw'okuba akaba yaatoorainwe kuba atyo. E... Akaba ari ekicweka ky'Ekigambo; reero Ekigambo ku kyareebire Ekigambo, bukaba buri obuhangwa bwe. Okweta kw'enkoko kwona, omu makanisa agarikukuratira emigyenzo, kukaba busha ahariwe; akaba aherize kureeba Ekigambo. Kikaba kiri ekicweka kye. Akaba ari empungu. Akaba atari nkoko; akaba ari omu kibuga ky'ekiju nazo kwonka. Kwonka akaba ari empungu, okubanza kwa byona.
----

Obwire bumwe noobaasa kugambira abantu aha nguuto z'omu rurembo, obagambire ebya Mukama, bakushekyerere bwere. Mpaho, tushemereire kukikora, oku biri kwona. Kwonka hurikiza, “Tihariho orikubaasa kwija Ahariinye Tata yaaba atabandize kumwiriza haihi.” Ruhanga naateekwa kumwiriza haihi. Nihateekwa kubaho Amagara. “Kandi abu Yampaire boona, baryaija Ahariinye.” Akataho omuhanda ahari abo abarikwenda kucungurwa. Yaataho omuhanda ahari abo abarikwenda kutambirwa. Reero kandi ahabw'okuba Yaakozire eki, Nikimuhindura omutungi w'embabazi, nk'oku Atuura ari omutungi w'embabazi. Nikiteekwa kuba ngu, ku orikwanga Eki, tihariho ekirikuba kitsigaire kureka Orubanja, ahabw'okuba ekibi nikiteekwa kucwerwa orubanja. Faraho, ku yaagiire omu-omu nyanja, nk'orikutooreza, akateekateeka ngu nawe naabaasa kugizamu nka Musa. Musa n'eihe rye, na Faraho n'eihe rye, bombi bakaabaire bashemereire kuhwerekyerera omu nyanja, nikwo kyabaire nikireeba. Kwonka Ruhanga, omutungi w'embabazi, akateeraho Abaheburaayo omuhanda gw'okuhungiramu, (ahabw'enki?) ahabw'okuba bakaba bari aha bujunaanizibwa bwabo, bakaba bakuratiire Ekigambo ekyabagambiirwe.

Hati ogwo nigwo muhanda gwonka gw'okutungiramu embabazi, n'okukuratira obuhabuzi obu Ruhanga atuhaire kugyenderamu. Ogwo nigwo muhanda gwonka ogu Arikubaasa kworekyeramu embabazi, n'obu tukora ebi Yaatugambiire kukora. Nk'okuhakana kukye okuherize kubaho enshumi nkye ehingwire, n'omuheereza owanjunaine ngu nkaba niinyegyesa Enyegyesa y'entumwa omu biro ebi. Ninteekateeka ngu nkigambireho ekiro kimwe nari bibiri ebihingwire, nari obwire obundi, oku yaagizire ati, “Noogyezaho kutaasyamu, omu busingye obu, Enyegyesa y'entumwa.” Yaagira ati, “Obusingye bw'entumwa bukagarukira omu bwire bw'entumwa.” Ntyo naamubuuza nti, “Mbwenu, noikiriza Ekigambo?” Yaagarukamu ati, “Eego.” Naagira nti, “Okushuuruurwa 22:18 nihagira, ngu, 'Weena oricwaho Ekigambo kimwe ahari Eki, nari Akakyongyeraho ekigambo kimwe,' ti bigambo bibiri; Ekigambo kimwe, kucwaho Ekigambo kimwe.” Yaagira ati, “Ekyo ninkiikiriza.” Naagira nti, “Kyaba kiri kityo nimbaasa kukugambira ahu obusingye bw'entumwa bwatandikiire, obu Emigisha y'entumwa eheebwa Ekanisa; hati naiwe ngambira ahu Ruhanga yaagihiire omu Kanisa, orikujuriza Ekigambo. Tokaabaasa kukikora; tikiriho.” Naagira nti, “Hati oijukye, ngu Petero, aha izooba rya Pentekoote, niwe owa-owaayanjwire obusingye bw'entumwa. Kandi akabagambira boona ati, 'Mweteise, mubatizibwe omu Iziina rya Yesu Kristo mubone kusaasirwa ebibi byanyu, kandi nimwija kuheebwa ekiconco ky'Omwoyo Orikwera. Ahakuba okuraganisibwa oku n'okwanyu n'okw'abaana baanyu, n'okwa boona abari hare, omuntu weena oryetwa Mukama Ruhanga waitu.'”

Hati ku oraabe nooyenda kuhurikiza okugamba kw'enkoko zimwe z'ebigombe by'amadiini, n'okutuura omu bintu by'ensi aheeru enyima okwo, obwo nikyoreka ngu hariho ekishobire. Ahabw'okuba, Ekyo n'Ekigambo. “Weena orikwenda, aije.” Mbwenu ku oraabe nooyenda, oshemereire kwija. Kwonka ku oraabe otarikwenda, obwo ori omu mbeera y'obusaasi. Kwonka ku oraabe nooyenda kwija, ija okuratire engyenderwaho ya Ruhanga! Kandi Taremwa kuhikiiriza eki Yaaraganiise. Nkaba ndi omuto, kwonka hati ndi omugurusi, Tinkamureebaga naaremwa omu Kigambo Kye. Ahabw'okuba, byona Naabaasa kubikora kureka okuremwa. Tabaasa kuremwa. Ruhanga tabaasa. Tikirikubaasika Ruhanga kuremwa, haza akaguma ari Ruhanga.

Read the full account in...
Ruhanga Ahabw’okuba Omutungi W’embabazi.

Ahakuba oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.

Mumanye ngu Ruhanga taratumire Mwana we omu nsi kugicwera orubanja, kureka ngu ensi ejunwe ahabwe.

Orikumwikiriza, tarikucwerwa rubanja; kwonka otarikumwikiriza, aherize kurucwerwa, ahabw'okuba taikiriize iziina ry'Omwana wa Ruhanga omwe nyamunegyere.

Yohaana 3:16-18