Ebalasit lokakwangan.

William Branham.

Naka oitabo...
Aipucet Nasodit.

Aso, kotoma osula kalo lo 5, abilio naka Aipuceta kanu. Aso, Eitabo lo loipucitai-k'Aipuceta Nukanykaarei... Nasodit ber kikoto oni asiomun Aipucet Nasodit. Atiibong naatubor, (kanu aiyatakin aipetupetun ngin ber bobo) kidumuni oni ebe naangolekinio Yokana kosodi aanyun Eitabo ngol eringa ejai akanin nuka Elope Logeunet- -Edeke. Iitunitosi tope yesi biai kitooliorere nges?-kerai Adam. Abu ngesi kojal Eitabo loka Aijar kanuka aijen naka Satan kosodi atwaniar airumeteke. Abu ngesi kotwania nginibore, ido amamei erot kanuka alakunio.

Kosodi konyet do Edeke, iswamatai kotoma aput naka etunganan, abunore kwap kosodi araun Ekalakunan mamawok tetere alakun oni. Kosodi kwana kidumuni oni ebe kotoma apaarasia nuatuboros, iboro lu luemunonitai erai luebeit apukokin oni kotoma apaarasia nukawasia.

Aso kidumuni da oni kotoma kana ebe nape apupunio Yokana alimoret na kanuka Ekalakunan loerai Epajan abunore iingaren kosodi aitejenar aKeburan, amamei itunganan yenabu kepedo aiswamaun ngin. Amamei itunganan kotoma Akuj, amamei itunganan kakwap, amamei itunganan kokwap kakwap-amamei idiotunganan yenebusakinit ber da angolikin Eitabo. Koomoom bere ijo ngin! Amamei itunganan cut ebusakinit ber da angolikin nges. Kogeuni bo do Yokana aimony.

Ajeni ngesi ngin kere... Amamei do bobo amodiorereng cut naka alakunio. Abuni nginibore aibiror ido katipet kidumuni oni akeimony epalari katipet, naarai abu ediopet komakio kolimo ngin. Abu ediopet komakio kotema atiar, “Yokana, sirikimony, naarai epiko Engatuny loka ateker naka Yuda.” Kotoma akiro ace, “epiko ido ekamaa.”

Naebelekinor Yokana, abu koany Imerekek elomuni. Iburai kerai yenimodumoduna ka aokot ido kisiebesiebetete ka aimusungit da. Adaun aiar-Imerekek yenikearitai, ido teni bo cut keringa imodumoduna aokot. Karai ijo kisiebitor imerekek kosodi aiar nges“ eipone loajaar Imerekek ngin karaida biai, aponi kisiebesiebai atiakatiak komusalaba, akwaras kotoma osiep, isumalin kotoma akanin ka akeje, kosodi ikukwa koreet. Ajai Ngesi toma ojautene loarono noi. Ido abu Imerekek yen kobu kosodi alosit neajai Ngol loeboie kOicolong loetingit Aiwadikaet kere naka Apedorosio nuka Alakunio; kwabo elosi Imerekek kosodi alemun Eitabo kakan naka Ngol kaloeboie k'Oicolong kosodi alemun ka apukor da Aipuceta kosodi apukor Eitabo. Konyet do naeswamaunor ngin, kidumuni oni ebe ibusakinit kejai icebore yenapol yenabu kiswamaun kotoma Akuj, naarai imakio ka imakio kwi akaisaarei ka luongon, lukajarak kwi ka nginibore kotoma akuj apotu kogeutu aiworo, “Ibusakinit,” bobo da kane kopotu Imalaikan kosodete abukun atanyia nuka ailipasinei nuka lukalaunak. Lukalaunak kwi lukokwap ketem apotu kiworosi noi, “Ibusakinit Ijo, Oo Imerekek, naarai kilaku Ijo sio, bobo da kwana kituluo Ijo sio ikabakan ka isasedotin, ido kiponi sio airum kakwap.” Otukwi, ikatunganan! Ido ekoni ngin nen naapukoria Ngesi Eitabo ngol.

Koanyutu yesi kotenan erai Eitabo lo loetemonokinitai kosodete aiwadik eringa epesikina apetetait naka akwap. Eitabo lo- ebaibuli kerai kaitebeikin lokeponi kiwadikai eringa epesikina apetetait naka akwap. Ido Kristo loerai Imerekek ngin, aponi koarai eringa epesikina apetetait naka akwap. Ido atutubeta nuka Ateran Keng- aponi ikecekiroria kibwaikinai toma Oitabo loka Aijar ioka Imerekek eringa epesikina apetetait naka akwap, konye erai ngesi loaponi ber kipucakinai. Ido eutai kwana do nges apukor-luajaasi ikecekiroria toma nen, kere nuikamunitos ngol. Ibore bo lolo yenepol biai! Kosodi Yokana, nakeanyunia ngesi ngin ebala ngesi ebe, “Nginibore kotoma Akuj, nginibore kokwap kakwap, nginibore kere abu kiira ngesi etemari atiar, 'Amen, arerengusio ka ayongio.'” Ajaatar do teni teni cut ngesi ka ailel naapol, naarai ebusakinit Imerekek.

Kosodi kwana do, ejai Imerekek ebwoi kopekwana akuar naka lolo kwape kilomaria oni toma osula lo lo 6- Ejaatar Ngesi kEitabo kotoma akaniKe ido euta ageun apukor nges. Ido otukwi, ti lolo eong kajaunotor cuticut... ido amuno eong ebe eraasi itunga lukomoyo. Ti eong lolo eswamaunit aibucaret naerono noi kanuka ngin karai kemam erai bala osawan 12:00 lolo naabunio Emoyo Lokalaunan toma agola kosodi aiteten eong kotoma obore ice yenajai eong auta aiwadikaikin tetere alimun.

Ajai eong auta alemun ngin kotoma akiro numojong. Amameatar eong kidiobore yen ekamunit ngin. Mam eong ajeni atiar inyo erai Aipucet Nakiyareit mam cut idiobore, konye bo kijaar eong kakiro numojong nuka icebore yenenerit eong nukeng kokar idis luatuboros kasodi aiwadik nges, ido abu do eong katukonok akirot na kosodi Dr. Smith ka ikesisianakinak luipu lukapolok luejenasi luabu eong katukonok, ido kesi kere eyuunitosi ngin, kwangin abu do eong kewadik ngin. Etemonokino eong ti atemar atiar, “Eebo, abuni do kwana eong aisisia ngin kabwoetait kangin.” Ido kanen bala kosawan 12.00 paaran abu Emoyo Lokalaunan kobukun kwap cut toma agola, ido abu ibore ii kere cut kopukokin eong ido arai nges ngin kanen, nuka Aipucet kana Nasodit eutai apukor.

Acamunit cut eong kwape abwoia eong kane akuar naka lolo ebe erai na Abeit naka Akiro Nukajokak naabuni eong aitodikin yes akuar naka lolo. Ajeni cut eong ebe erai. Naarai arai itepegit apukokinio Akirot, mam bo do ngin erai apukokinio. Kosodi kereka ijenete yesi, ejaas iceboro luepedorete asubite bala eraas teni teni cut lukabeit, kwabo komam erai nakabeit. Esubit bala erai, konye komam erai.

Kwana do kidumuni oni Imerekek kede Eitabo je, kopekwana. Kosodi kwana do kotoma osula lo 6 kisiomuni oni:

Kasodi kaany naapukoria Imerekek adiopet naka aipuceta akanykaarei, keira da ediopet ka lukajarak luongon inera bala eporoto loka agiro ebe, Bia [koanyj].
Kaany, ido koany, ebalasit lokakwangan, kejai ekebwaneniton da akabwa; koinakinai aboko, koloma da aipikor, ido ipikori.

Aso, ngin nges Aipucet Nasodit. Ngin naebeit oni aitam kojai asianut naka Edeke aitetemun nges akuar nakalolo. Kanajokan kakere cut- ido ajeni eong ebe etunganan loetami aitetemun ngin ejai itorit alupok nuepagal, arai mam ijo ijeni nuiuta ijo aswam. Kwangin arai kebu mamaka kanu apukokinio, kalimokini eong yes kwangin. Karai kajaatar eong kangin kitorunite aomiteka bon elope, ejai bo do ber eong alimokin yes ngin eringa eong kegeuna einer nuikamunitos ngin. Mam eong ti atitingik cut einer iboro kwa kangul naedolunio toma owai lo loka Nuiwadikatai Obaibuli. Amuno eong ijenete yesi ngun nuenera eong kanuikamunitos kwana. Ijeni ijo, mam ijo ipedori einer iboro ebe ebeit ibore mutan koperi kalailo eringa ngin kiswamauna. Mam ijo ipedori alimun ngin kiton kito naiperikinio icebore nges laingol. Iwanyutu? Isiomete (imisiikis) kereka yesi; ipupete tope yesi imodiobore?

Kwana do, Eitabo loka-Aipuceta-akanykaarei-loenunukitai ejai kwana Imerekek alacakin. Kidolokini do oni aibois ngin akuar naka lolo. Kingarak Edeke oni. Kwape ejakare aibil ka alacakin da Aipuceta, nukaiyeiyea nuka Eitabo kangol epote apukor. Aso, koany ijo erai lo Eitabo loipucitai. Nat kwana, kiyuunit oni ngin, oni mam? Kiyuunit oni ebe erai ngesi Eitabo loipucitai. Aso, mam cut oni kipou kajenete na sek, konye erai! Ipucitai nges kAipuceta Akanykaarei; nges atemar, kokau naka Eitabo, ipucitai Eitabo lo kAipuceta Akanykaarei.

Karai oni kenerasi nuikamunitos eipone keitabo kwa kalo, ti esubit bala ainamakin acaapa airiikin nges -acaapan akanykaarei. Konye mam erai eitabo lokeipone kalo, erai anunuket. Kanen do naeterorere anunuket, adiopet ngin; konyet do eperi cut kotoma anunuket nges nakiyareit, ido cut kanepekane elimorit ibore yenerai ngesi- konye erai ngesi nakaiyeiyea. Konyeca kinganyingany oni tomake, konye kiitutu, ipucitai Eitabo lo, ido erai Eitabo lo eitabo loka aiyeiyea naka apukokinio. Erai apukokinio naka Yesu Kristo- Eitabo loka apukokinio. Bobo da kwana ijenete yesi ameun anatar atur, enganyingany etunganan ka aitam da alomar toma kangin. Kiswama oni kere!

-----
Ne do alemunia Imerekek Eitabo kosodi aibil Aipucet ngin Nasodit, abu Edeke kiner kama kOicolong Keng Lomam Edaun alimor nukerai Aipucet ngin naeponio apukor. Konye nakibwaikinere ngin iingaren kaYokana, kerai ngin nakejai koipone lo ejenunet. Nakeanyunia Yokana ngin, keringa erai nakaiyeiyea. Kanukinyo? Mam da ber kepukoritai kanepekanen cut. Mam epedorio apukor aitodol nuabala Ngesi kane kapak nakawasia. Konye abu ngin kobu koipone lo ejenunet.

Nakegirokinia ngin... Kiitunite, eporoto loireta noi loka agiro erai Eporoto loka Edeke. Nges nuebala Ebaibuli- eires loka agiro. Aomitos kesi ebe kerai agiro, kwabo kerai ngol Edeke. Abu Ngesi komisiik ngin naarai aponi kopukokinai ngin mamake. Kerai ngin agiro. Koany, abu Aipucet Nasodit kopukor... Aipucet Nasodit, naapukorere nges koipone lokerai ejenunet, abu kiretu! Aso idobodo naepukorere nges koiponeke loerai lo teni teni?

-----
Koany. Mam Kristo eanyunio bobo ameun kapak kangin kanen. Konye bo ibwanenit Ngesi ebalasit loekwang; kwangin arai do ibwanenit ekesa lo ebalasit lokakwangan, erai do bon ngesi eketuputon loka Kristo. Ibu kereka ijo kodum ngin? Koany, ekebwaneniton ngol loka ebalasit ngol lokakwangan mam ejaatar kemodiokiror. Diat itwasamai ngesi iitejenuneta iarei arai iuni, konye mam nges ejaatar kemodiokiror. Konye Kristo ejaatar ka Ekiror! Nges bo inyo? Akirot naka Edeke! “Kageunet ajai Akirot, ajai Akirot mama ejai Edeke, korai Akirot Edeke.” Ido araun Akirot akuan.

Emameatar ekebwanenon lo kekiror, kwabo Kristo enyaritai Akirot naka Edeke. Ngin nges Ngesi. Enyaritai Nges kwangin. Aso ejaatar Ngesi Kekiror lomam idiotunganan ejeni, konye bo enyaritai Ngesi Akirot naka Edeke. Mam ekesa lo enyaritai imodiobore, konye ibwanenit ngesi ebalasit lokakwangan.

Mam ekebwanenon lo ejaatar kimalia luka akekabwa. Ibu ton ijo koany? Kejai ngesi akabwa, konye emamei imodiobore yenelimunitai kanuikamunitos idis imalia; kwangin iburai do erai nges loitukuriani aitukurian bon. Erai ngin nakabeit. Diat ejaatar ngesi kagiro naiyatakina kwabo komamei eimilia, konye idumuni ijo ebe kejaatar Kristo ka kere eimilia kede kagiro; naarai elomuni kakitukuKe ekileng loekwana kowaitin kere, ido inomi Ngesi atekerin, kwabo ekesa lo mam epedori ainom idiobore, konye ejai ngesi eboliai ewai loka lokesoswai. Euta ngesi alomar ibwanenit ebalasit lokakwangan, alosit kinga aipikor.

Kejaatar Kristo kekileng loekwana, ido koany! Elomunit ngol kama kakitukuKe- Akirot Nakajaran! Ngin nges Akirot naka Edeke epukokinitai mama ejaasi ibulesiniKe, bala neatemaria Ngesi Musa atiar: “Kolot kobwo kangina ido korio ebela ngol kokinga kangina kosodi anyarar icuc,” ido apotu icuc kojaunos. Cut bo! Nualimuni Ngesi kere, abu Ngesi kiswama, ido abu kilelebikin. Erai Ngesi Akirot Nakajaran. Edeke ka AkirotoKe nges Etunganan ngopengol ediopet. Edeke nges Akirot!

Ingai bo do ekebwaneniton lo loengopit loka atur kanasodit kanaka ekanisa? Ingai bo ngesi? Kaomoomata ber oni ngin. Ingai bo ekebwaneniton lo loengopit loegeuni akerit kotoma atur nasodit naka ekanisa kosodi akerit cut alomar toma Nemam Edaun, elosi cut kiton awasia.

Elomuni Aipucet Nakiareit kosodi alomar alosit cut kiton awasia. Elomuni Aipucet Nakiuniet kosodi aiyatakin alosit cut kiton awasia. Nakiwongonet, Nakikanyet, Nakikanyetekape, Nakikanyetekaarei; nginidiopet kakesi engetakin cut kokinga kane kawasia.

Aso, kotoma apak-nakawasia, Iitabon lu lulem ajaasi enunukitai, apak na kere nepepe kanukaiyeiyea nu kotomakec, ebilio. Konyet do kolomuni nakaiyeiyea tetere aanyun ibore yen erai ngin. Konye cuticut egearitosi kesi alomun katur nasodit naka ekanisa naarai abu atur nasodit naka ekanisa kodum Aisiiraret, kwa kana.

Abu ekebwaneniton ebalasit lokakwangan koloma kinga. Ingai bo ngesi? Egogong ngesi kotoma agogonguke naka aipikor. Erai ngesi etunganan loepol kotoma agogonguke naka aipikor. Ikotosi yesi eong alimokin yesi loerai ngesi? Erai ngesi lokasurup loka Kristo. Erai ngol nges cuticut loerai ngesi! Aso, naarai, koany ijo, arai erai lokasurup loka Kristo... Abala Yesu ebe apote luarei araut lueyapianara noi aitodol na tikitapaaria Luseuna obe, Ateran, karai ngin ti kopedor- lokasurup loka Kristo! Erai emoyo lokasurup loka Kristo.

Naka oitabo... Aipucet Nasodit.

Abu kaany eitabo lokiwadikatai iwaitin kere, kotoma akan naka ŋol kaloiboie koicoloŋ, ipucakinitai aipuceta akanykaarei.

Abu kaany da emalaika loegogoŋ elimokini keporoto loepol ebe, “Iŋai bo ibusakinit apukor eitabo, ka aibil da aipucetake?”

Kwabo emamei ituŋanan kotoma akuj, karaida kakwap, karaida kokwap kakwap, yenepedori apukor eitabo ŋol karaida asesen tomake.

Abu kamony noi, naarai mam edumuna yenibusakinit apukor eitabo, karaida asesen tomake.

Apukokinio 5:1-4