Aipucet Nakikanyetekaarei.
<< abongor
ekaulo >>
Aililing toma Akuj.
William Branham.Naka oitabo...
Aipucet Nakikanyetekaarei.Aso, kidumuni oni ebe ngun... Kipou da oni...Abu Ejakait kocamak oni alemun Naiwadikatai Obaibuli, Nakalaunan Naiwadikatai Obaibuli, naabala Yesu ebe abuni aiswamaun. Ido biai tikidumunia oni ngin? Kane kobuni ngin lailo kosodi apukor ka ayangaun ngin teni cuticut (Akelimonokin kanen) abongokin ngin... aitolomun cuticut kiton adeseikinet, akanykape kotoma Aipuceta, konye abu Ngesi kinyekik Nakikanyetekaarei.
Kanen do nakedaunere apukor Aipuceta, abu Edeke (koany kane), abu Ngesi kinyekik apukor karaida ber emodiojenunet loka Nakikanyetekaarei. Erai ngin naimunonitai cut naejaatar ka Edeke. Koany, kwana kilosi oni asiomun kotoma Obaibuli kotoma Aipucet Nakikanyetekaarei. Edumakinio ngin toma Apukokinio esula lo 8.Naapukoria Imerekek aipucet nakikanyetekaarei, kejai aililing toma akuj bala apak naka atutubet naka esawa.
(ido kes ngun bon nukijaar oni nuikamunitos ngin)Aso, emamei kaoni yenejeni; konye alosi eong alimokin yes apukokinioka naka ngin. Boboda kwana, mam kereka eong arai loitemerit aomisioit naka edini. Arai arai eong, mam do eong ajeni, koany. Mam eong ainakina aitoloseta nuejai abuonokin ka iboro da luinomanario ainomanar. Adau eong alimun iceboro lu diat apotu kosubitos bala itegelikina mama ejaas icetunga, konye neebunio Edeke airimun kauke kosodi aitogogong ngin ka atemar da ebe erai ngin Abeit, apolouke erai ngin Akirot naka Edeke. Epedori bo asubit bala itegelikina koipone kangol.
Kosodi kwana, cuticut kwape bala abwoia eong kotut akuare na, abu eong kadum apukokinio naabu kopuko— erai ngin naejai kotoma atutubeta auni. Ngin, abuni eong alimokin yes kanuka aingarakin naka Edeke nuka atutubet naka ngin. Kosodi konyet yes... Kaloto do ber oni nen. Enata apukokinio ngin kanu ageunia inyo... Akoto eong alimokin yen nuerai ngin. Nuiswamaunos erai ebe agirokineta ngun akanykaarei nuabu ngesi kopup egirokinete kwabo aponi kimikai aiwadik, ngun nges euta aiyeiyea ngin aijaikinit kokau kagirokineta kangun akanykaarei nuetuputupasi elomunete.
Aso, kanukinyo? Ketogongoto do oni ngin. Kanukinyo? Erai aiyeiyea namam idiotunganan ejeni. Aponi Yokana kimikai aiwadik nuikamunitos ngin— karaida ber aiwadik ejenunet loikamunit ngin. Kanukinyo? Erai kanuta. Kemamei adioswam kotoma Akuj— ti katicepak ngin kelimo aiyeiyea. Iwany kereka jo ngin kwana? Arai erai ngin naepol kwangin iburai ngin kimorikinitete naarai ejai ngin aiswamaun, konye kapak aijulun imodiobore kere yenekoto ngesi naikoniata agirokineta akanykaarei...
Kwana koany, naaponiata imalaikan kwi ikanykaarei kanu akutakin arupepen kec— abu agirokinet adiopet kojaun. Neatukokinere Isirael abu arupepe kojaun. Ne mam bobo ejaunor apak—arupepe nakawasia, agirokinet adiopet. Konye kane erai agirokineta akanykaarei itebeuna cut kituputupasi: adiopet, aarei, auni, aongon, akany, akanykape, akanykaarei, enaba ngol loitekoro. Agirokineta akanykaarei ituputupasi, mam elimoritai, aitaraun na cut adiopet, aarei, auni aongon, akany, akanykape, akanykaarei, iruturutasi. Apolouke do, mam Akuj apedori aiwadik ngun, mam Akuj epedori ajenun nuikamunitos ngin, emamei ibore ice bobo, naarai emamei ibore yen iburai aiyatakinit. Erai apak naka aiyengun. Kerai naepol noi kiton neaponere kimunonikinere Imalaikan.
Aso, kanukinyo? Karai kebucakin Satan aiting ngin, ebuni kacepak aswam amusungut naepol. Ejai ibore idiopet yenimam ngesi ejeni. Aso epedori ngesi, ka aituput da eipone edio kere loka ainakinet (Amuno eong ebe iutasi yesi aisisia) konye mam nges epedori ajenun na. Mam da ber ngin iwadikatai toma Akirot! Erai ngin aiyeiyea kaileleba! Imalaikan, nginibore kere abu kililing! Karai ti kes aijangakin nepetai da katicepak ti ngin keinaki icebore ejenunio, kwangin apotu do kesi kililingata, apotu kopalasi airam adeudeun; nginibore kere abu kopala.
Ikanykaarei— Enaba loitekoro loka Edeke. Akanykaarei cut aituputupakin. Apotu Agirokineta Akanykaarei kolimoros kairuturuta nepepe bala autasi kesi aitetemun icebore. Koany, kapak kangin, abu Yokana kogeu aiwadik, kosodi Ngesi atiar, “Sirikiwadik ngin.” Mam Yesu abu kiner nuka ngin. Mam Yokana abu kopedo aiwadik ngin. Mam Imalaikan ajenete imodiobore kanuikamunitos ngin.
Erai bo inyo ngin? Ngin nges ibore yenabala Yesu ebe karaida ber Imalaikan lukotoma Akuj mam kejenete imodiobore kanuikamunitos ngin, koany. Mam Ngesi kejeni ngin Elopet. Abala Ngesi ebe arai Edeke bon ajeni ngin, konye abu Ngesi kolimok oni ebe nakigeunia oni aanyun aanyuneta nu etakanunenete... (Aso, iyapia tope jo nenidio? Mam ace.) Koany, kigeuni oni aanyun aanyuneta nu etakanunenete, koany. Karai Satan ti kopedo abucakin aiting ngin...Arai ikoto jo ibore mutan aiswamaun- aso eraun kereka jo acamun akakirot kanu kana— arai etemonokini eong aiswamaun ibore mutan, erai nakacoa eong ainyein alimokin imodiotunganan nuikamunitos ngin. Mere ebe ebuni itunganan ngin alimor ngin, konye ebuni Satan aiirar ngin, iany? Mam ngesi epedori alemun ngin kotauka kanen, alemar bon naegolokinitor Edeke ngin kede kEmoyo Lokalaunan, kwangin erai do kiding eong ka Edeke, koany. Mam ngesi ejeni imodiobore kanuikamunitos ngin ido aitodol nailimunio jo ngin, konyet do kiirari ngesi ngin.
Ido atamit eong... Alimokini eong itunga ebe abuni eong aswam ibore mutan mutan, ido koany ajokit etubori awai nginikokoro kere naepedori ngesi adumun kanu aidol ngina, koany, aige ngin eringa eong. Konye arai kadum eong apukokinio kama ejai Edeke ido cut komam alimuni imodiobore kanuikamunitos ngin, kanen do egelara ngin.
Kiitunite, ebuni Satan aitam aituput! Ebuni ngesi aitam aituput nginibore yenebuni Ekanisa aswam. Adau ngesi aitam aswam ngin. Kidau oni aanyun ngin itorit toma kalokasurup loka Kristo; konye yen nges ibore idiopet yenimam nges epedori aituput. Mam epote ajaun iketuputok neejai na, koany, naarai mam nges ejeni ngin! Emamei eipone loepedoria ngesi ajenun ngin. Erai ngin Airiunet Nakiuniet. Mam cut ngesi ejeni imodiobore kanuikamunitosi ngin, koany. Mam nges emisiikinit ngin.
Konye ejai aiyeiyea naengopit kotoma kangin. Aibuses kojai neejai Edeke kokuju noi kakuju! Mam cut eong abuni apedor aomoom koipone loeputo apak naideuna kere naka aijaraka, naabu eong kaanyunia... Aso mam eong ajeni nunyoika... ajeni eong adoketait naetupakini kanen, konye mam eong ajeni eipone lokijulunet ngin. Mam ebuni aojakin. Kijaar eong kangin iwadikatai kane kapak naeswamaunor ngin, arai ipedori jo asesen nee, “KOPALA!! Sirikilot adepar na kanepekane.”
Mam eong arai loitemerit aomisioit naka edini— bon alimor Abeit. Konye kiitu jo, imukat yenicici yii yen duc abu eong katamite aitetem, eipone loeperio etau eiduny ka laije-ka-laije kosodi acoikina-nakotoma noi ka epute iboro kangul kere, na da abu kiswamau asipit naepol naka aitupuseta nuapotu kogeutu atupakin ngin. Eipone loebura jo aikeun akan, kosodi aitingiting itunga kosodi ajaun kamaran, ido abu nginitunganan kojaunotor kamaran kotoma akanikec. Konye iitunitosi kereka yesi neabu Ngesi koyangaria eong adokar laije kosodi atemar atiar, “Na nges Airiunet ya Nakiuniet, ido emamei idiotunganan ebuni ajenun ngin!” Iitunitosi tope yesi ngin? Mam cut aitapoeta ibironoros. Eraasi kesi cuticut Abeit.Kwana koany, iitunit kereka jo aitapoet naka atukot naka aacer? Charlie, aso konyet jo kane. Ibore ice euta aiswamaun, abu eong kalimok jo, esabiti lo ebe jo... Ejai lem irimorit ijo, konye aumokit eong arai ibu jo koany ngin. Iitunit tope jo atukot naka aitapoet naka Imalaikan neabu eong kanyounio kane alosit Arizona? Iitunit kereka jo, “Apak Ani Bo Ngin, Ikatunga?” Iitunitosi tope yesi ngin?
Koany, abu kojaun airetunet adiopet bon naepol naka agiro, ido apotu Imalaikan ikanykaarei kotakanut. Mere erai ngin abeit?— airetunet adiopet naka agiro, kotakanunete Imalaikan ikanykaarei. “Kasodi kaany Imerekek naapukoria Ngesi Aipucet Nasodit, kasodi keira bala eporoto loka agiro, kosodi ediopet kalukajarak luongon atemar atiar, 'Bia koany.'” Koany, agirokinet adiopet— Aisiirareta akanykaarei nuaponi kipucakinitete ido mam epedorio apukor aitodol apaaran nakawasia, katur kana. Iwany nuapeleikinit eong?Aso, iwanyutu konyet yesi atutubet naka esabiti naemunonitai? Ngin nges naerai ngin. Ngin nges nabu ngin korai. Abu ngin korai, mere itunganan, etunganan; abu ngin korai Imalaikan luka Ejakait. Koany, ejaasi ikajenak iuni iboiete kotoma kane, ebe esabiti nges atubor (motimot adepar esabiti nges atubor) abu eong kajai kuju noi toma omor, ayapiar Mexico, nepepe kinacan iarei luiboiete kane, adosi enyikibwony... arai etidot alemar kakeju naka edabadaka, ido abu kojaun airetunet na abu kibuc, atakani bala, abu kitamaran imor. Aso erai ngin naabeit. Mam cut eong abu kalimok ikainacan, konye apotu kesi koanyutu atiaketait. Ido abu Ngesi kotema eong atiar, “Aso, kokapakina. Kolot kide.”
Enata aijulunet naka aitapoet kangin. Iwanyutu? Aso, kanu aitejenikin yes, mam kereka Onac Sothmann edumunit etiang loebwapit ngesi. Kipou sio katamata adumun ngol kanuke. Kosodi Ngesi atemar atiar, “Aso akuare na, kanuka aanyunet mamakon, mam ngesi ebuni aiswamaun ngin. Ibusakinit jo aijaikin bon kapak kana kanuka aipejokinio naka Imalaikan kalu.” Ido abu eong kapup bala abu eong acoa komameun, iitunitosi yesi. Ido abu eong kajai too; autasi Imalaikan aponare kide. Ido nayapuniata kesi, aponi eong kadakar kuju nepepe kakesi. Iitunitosi kereka yesi ngin?— abunore kide.-----
Ido ibu kereka jo koany ebe Emalaika ediopet, abala eong kotoma kanen, kerai Emalaika lokitegelikina? Abu ngesi kosesen mamaka noi itia emodio kotoma kalucekec. Iitunitosi kereka yesi ngin? Ajaasi kesi kotoma atukot— iuni kangoliwai ido ediopet kuju. Ido ediopet loedunyasi cut kaeong kane, aimar anyoun kokediany kiton teten, ti keraun Emalaika lokikanyetekaarei. Acai ngesi noi, abu korai lokapolou noi mamaka itia luce kakesi. Kiitutu, abala eong ebe ededeunit ngesi atorobu ke koipone kangol, ido ajai eporitoi abear kide. Mere iitunitosi yesi koipone kangol? Abala eong, “Abu ngesi kekama eong kuju, abu kadaka eong kuju!” Mere iitunitosi yesi ngin?Enata kane! Ediopet ngol loejaatar ka Aipucet Nakikanyetekaarei— ibore yenabu eong kaomoomote kaijaraka kere. Amen! Aipuceta nuce kwa araasi nukapolou noi mamaka, ejena bo, konye, o, mam jo ijeni nu araun na! Irwan atipet kotoma aijar... abu eong kelipite, abu eong kamonyite mama ejai Edeke. Akaulo naka airiamun kangin najai Phoenix, imodio kotoma otunga luajaas ngina nepepe kaeong ejenete; abu eong kaper omoru. Atupuruc adiopet abu eong kanyou kasodi alosit kuju toma Sabino Canyon— emoru loepol loileleba amor kowoja. Ido abu eong kalot kuju toma nen, ajai nen isokot yenididi yenikakeje akaulo naidaunia jo apaar— kiyatak alosit kuju toma Lemmon Mountain lo da erai alosit naka akeje naka amairon akaisauni, ido ajai nen akako naadoli aidules naka iputin akaisauni kokuju kangina.
Kwangin, kokuju kotoma omoru eringa akwap kecauna, alosi kuju aitor osokot yenikakeje yenadit yen, aikokorunun amor alosi, ido abu eong kapup aingarenikinio aibelokin akan na. Ido abu eong kebelokin kasodi adokar toma amor nutiok nuewitak— oo ijoba, akwat nuka iputin kuju. Kasodi eong akukokin kwap kiding naka amor kangun. Abu eong keperik Ebaibuli lo kwap kasodi aiperikin eitabo lo kwap— iitabo yenikapapulai nukiwadika yen. Katema eong atiar, “Ejakait Edeke, anyoin bo apolou naka aitapoet kana?” Katema eong atiar, “Ejakait, arai bo apolouke nges atwanareka?” (Iitunitosi yesi abu eong kalimokinite yes ebe abu eong kaomite katicepak apolouke nges atwanareka, naarai abu icebore koduor kiton cut ngin aijangijang eong noi. Iitunitosi bo yesi ngin. Imwasi ai ejenete... iiraritotor ngin? Cut bo, yesi kere.) Ido abu eong kaomite ebe apedori ti araut apolouke akatwanare.
Kosodi konyet kotoma agola, abu eong katema atiar, “Arai ber inyo ngin, Ejakait. Inyo ber apolouke? Erai kereka akepolou ebe alosi eong atwanare? Arai erai nges ngin, mam ace; mam eong abuni alimokin ekaleka. Bon kojalak eong kalot, koany, arai kedauna akaswam.” Kasodi eong atemar atiar...Aso, arai ber inyo ngin? Konye abu Ngesi kijuk aitejenunet-iitunitosi yesi eong alimokini yes— konye mam kerai ngin, kerai aiyatakinet naka akaswam.
Oo! Idumutu tope yesi ngin, ianyut?— eboie kotoma Sabino Canyon. Papa ngol loko Kuju ejeni na— kwape cut nakabeit kwape ipotu yesi koanyuniata ngin itodolikin, apotu Imalaikan ngul kopotu kwap cut kosodete aitodiar Nginiisiiraret araut yapeya. Kanen do ijenuni jo arai ebunit ngin kama ejai Edeke arai mam. Aponi kodaunitete alimokin yes sek kede kaitapoet. Mam eong abu kapedo alimokin yes aitodol neadaunor aijaanakin, naarai aponi eong kemiki.
Kotoma Sabino Canyon, eboie kokuju kangina atupuruc ngin, ekiarit eong akakanin kuju, ido abu ekwam kokutarite akakopira namojong nakirionon kwap. Abwoi eong kanen kekiarite akakanin kuju, elipi. Katema eong atiar, “Ejakait Edeke, anyoin bo apolou kana? Mam eong apedorit amisiikin ngin, wu Ejakait. Nunyoika bo nuiburai eong aswam? Arai erai apakika nakalosit Ore, kocamak eong kalot kokuju kane kanemam cut kesi edumuniata eong. Mam eong akoto idiotunganan ajaut igworo kanen arai ajai eong anyoun. Akoto cut eong ekale aomit ebe abu eong kalot asakasak, ido mam kes epote adumun eong. Kibwa eong kaibois ace! Arai abuni eong alosit, atiar nat biai, bon kocamak eong kalot. Katicepak ebuni Yosep adumun Ekabaibuli eperi kane kacepaaran, ido kocamak ngesi kitwasam nges. Iany? Arai ejai eong alosit, kocamak eong kalot, wu Ejakait.”
Ido ajaasi akakanin eriorio awai, ido katipet noi abu icebore kodo akanika. Mam eong ajeni. Mam eong apedori atiar. Eong kereka abu kajotoor?— Mam eong ajeni. Eong abu kagelakin komoyoka?— Mam eong ajeni. Ngin kereka kerai aitapoet?— Mam eong apedori alimokin yes. Ibore kwa ajaatar apedori eong alimun erai kama ka nuabu eong... Ibore cut yipeyi bala Imalaikan kwi. Ido abu kinom akakan, kasodi eong angolikin ido kaany kerai ekileng, kejaatar da ka atingeta nuka elulu— ebus neteni; kejaatar da kanakedaran kujuke nepepe kesabu, ido atakani akuan naka ekileng bala, icebore bala eraagi luisusitai, bala epuesa, bon kerai ngol lokemilimili ne teni. Kerai da lokekwana noi, oo ikatunganan! Kasodi eong aomoom, “Mam kereka ngol erai ibore yenibus kakere?”— abu cut kilesikin akakan. Kaomoom eong, “Ibus ngol noi.” Konye abu eong katema atiar, “Eh, akuriana duc eong iboro kwa ka lu”— ekileng. Kasodi eong aomoom, “Inyobo do abuni eong aiswama ngol?”
Ido cut kapak kangipekangin abu Eporoto kigurumau aitorun nen loabu kitamaran amor! Abala, “Ngol nges Ekileng je loka Ekabaka kaje!” kasodi konyet eong alomun kotoma kangin. (Ekileng je loka Ekabaka kaje) Aso, arai ti kotemaritos kesi atiar, “Ekileng ece ['Ekileng ece' itodunit ekileng lomam ejenio— Ekej.J loka Ekabaka ece ['Ekabaka ece' itodunit ekabaka lomam ejenio— Ekej.], konye abala ngol, ”Ekileng je loka Ekabaka kaje, “ ['Ekileng je' itodunit ekileng loejenio ido 'Ekabake je' arai 'Ekabaka kaje' itodunit Ekabaka loejenio— Ekej.] ido ejai ediopet bon ”Ekabaka je,“ ido ngol nges Edeke! ido ejaatar Ngesi ka Ekileng ediopet— ngol nges AkirotoKe- -naajaria eong kanuke! Kwangin kingarakinai eong, Edeke... ayangaun anapitoKe nakalaunan nepepe ka Akirot na Nakalaunan eperi kane. Erai Akirot. Amen!
Oo, nanyoin bo lolo apaaran nakijari oni kotomake— ibore bo lolo yenepol biai. Ianyutu nakaiyeiyea ka aiyeiyea da? Nakiuniet... Abwoi kangina, neabu na kaosikinia eong, abu cut icebore kobu mamaka kosodi atemar atiar, “Sirikiyong.” Aso, mam eong abu kapup emodioporoto-asubit bala kotomaka nges abu kineria. Kalimokinit cut eong yes abeit, teni cuticut nuapotu kiswamaunos. Abu icebore kinom kosodi atemar atiar, “Sirikiyong. Na nges Airiunet ya Nakiuniet.”
Airiunet Nakiuniet— mere iitunitosi yesi ngin? Abala Ngesi, “Idautu jo ajaunor ka iketuputok luipu kanuka na, nuibu jo kotam aitetem.” Kotema atiar, “Siri da ber kitam na.” Iitunitosi yesi ngin? Imwasi ai luiitunitos aitapoet ngin? Atiar nat inyo, ejai ngin ateepun kere ido kanginiibois. Erai ngin na abu kojaun ikar bala ikanykape atuboros... ikar ikanykaarei atuboros. Araun ngin ikar ikanykaarei atuboros. Kotema atiar, “Sirikitam aitetem ngin.” Kotema atiar, “Na nges Airiunet Nakiuniet, konye kiriamun Eong kajo toma nen.” Mere erai ngin naabeit? Abala ngesi, “Sirikitam...”
Ajai eong abwoi nepepe kamukat naka imukeru yenicici nealimokinia Ngesi eong, kobala, “Aso, kiriu Airiunetekon Nasodit; ido nairiunia jo, epote agaria akerikin iloketait.” Kobala, “Konyet do kocoite Airiunetekon Nakiareit” kotema atiar, “naarai epote bon ajaun agaria nudidik.” Kotema Ngesi atiar, “Konyet do ebuni Airiunet Nakiuniet alemun ngin.”
Ido apotu kesi kere ikejaanakinak kopotu nen kosodete atemar atiar, “Onac Branham, kijeni sio ebe ipedorit jo aswam ngin. Aleluia, Onac Branham.” (Nen nges duc neekamanaror eong— nepepe kekodet loka ikejaanakinak. Amina eong itunga, ido ekotosi kesi jo aitetem nginibore kere— na, ngin.)Kasodi eong atemar atiar, “Aibo da, mam eong ajeni.” Katema eong, “Amisiikinit bo eong ailok lukecor.” Katema eong atiar, “Aso, ibore yenisodit jo aswam— eipone nges lota loiswamaere ngin. Isesenete bo yesi agaria kere eyapiete; iburai jo aijanganakin iloketait.” (Ejok bo, erai ngun kes cuticut acoasinei nuka ailok lukecor.) Kwangin katema eong atiar, “Kijangak iloketait.” Aso, koany jo neabu eong kejangakinia iloketait irwan nasodit, aso ejai agaria akerit atupakin nges konye araasi kesi lucicik. Lupo asubitos bala kwa nuekamununete kesi. Kwangin katema konyet eong atiar, “Kanen do ikapakina jo...” kasodi eong aijangakin nges akopun kinga otut ido ajaatar bo kagariait, konye asubit ngin bala emukule koloketait, ngin cut... adit ngesi noi. Kosodi konyet abwoi eong kanen ido kotema icebore atiar, “Abu eong kalimok jo mere aiswamaun ngin!” Kasodi eong ageun aimony.
Ajai auno kere iweniwena airimokin eong koipone kalo, ido ajaatar eong...ajai abwoi kanen amonyi ketulurite akakou kwap koipone kangol. Katema eong atiar, “Wu Edeke, okwe, kitimoi eong. Arai eong etunganan loebangana. Okwe Ejakait, kitimoi eong.” Ido abu eong kajaatar kauno na ka ngin, naabu eong ketingite kakanika, arai imukat yenididi yenikimukeru, yenatia bala nee eoj. Ido abu eong kajaatar...auno ngin bala atia epol ka alungurur da kwape kekabokorit— bala atutubet naka inch ediopet, bala. Kosodi apedot nakotoma amukat kana atia bala esais loka a...adit adepar idiopet-kotomonakanykape, kacepak, luka inch luka apedot. Kwabo ajai eong atamit airup imukat yenicici yen kede ausi na naapol narai esais ke inch.
Kosodi eporoto abunore ido kotema atiar, “Mam jo ipedori aisisianakin imukerun lu Pentekootin iboro lukomoyo.” Kobala, “Aso, koosik kes bonik!”Kosodi kapak kangipekangin kadaka Ngesi eong kuju. Abu Ngesi kayanga eong kuju kosodi aisiboikin eong kuju noi neajai airiamun itolosio— atakani bala ewema arai ekanisa lokapolon lokeipone ece. Kasodi eong angolikin ido ajai neadit kosubite bala asaduku— aibois naadit kalaije kanen kosiep. Ido abu eong kaany Aica ngin inerasi ka icetunganan kokujuka— Aica ngin naisesenete yesi kanen kopica. Abu kipiirior awai kamaka, koipone kangol, kosodi alosit laije neajai ewema ngol, kosodi atemar atiar, “Kiriamun eong kajo ngina.” Ido abala, “Ebuni na araun Airiunet Nakiuniet, ido mam jo ibuni alimokin imodiotunganan ngin!”
Ido ko Sabino Canyon, abala Ngesi, “Na nges Airiunet Nakiuniet.” Ido ejaas iboro iuni luepolok lueupasi nepepe kangin, ido abu idiopet kopukor lolo... arai bian, yenice yii abu kopukor lolo, kosodi ejai ibore idiopet yenimam eong apedori aijulun naarai ejai ngin kotoma angajep namam ejena. Kwape abwoia eong kanepekanen kasodi aitereikin angolikin nges cut, ido na nges Airiunet Nakiuniet ebunit. Ido Emoyo Lokalaunan loka Edeke... Oo ikatunganan! Ngin nges akirot nainakinit Akuj kere ililingi.
Naka oitabo...
Aipucet Nakikanyetekaarei.
Edukone ka Elakit.
