Oitabo loka Apukokinio.
Apukokinio naka Yokana Lokalaunan.
William Branham.Naka oitabo...
Apukokinio naka Yesu Kristo.Apukokinio 1:1-3,
1 Apukokinio naka Yesu Kristo naabu Edeke koinak Nges aitodikin iKebulesin nuibusakinit adoikin atipet, kitejen kanuka aijukar eKemalaika mama ejai Yokana ekebulesit,
2 Lokitejenuni Akirot naka Edeke, ka ajenanut naka Yesu Kristo, kere nuabu koany.
3 Isirerengitoi ngin yenesiomi, ka ngul da luepupete akiro nuka adwarasit kana, ka luericete da nuiwadikatai kotomakeng; naarai eapie apak.Ekegirigiran (mere lokewadikan eitabo) loka eitabo kalo nges Yokana lokalaunan loka Edeke. Ikajenak akiro nukolosek ecamunitosi ebe abu ngesi kojar atutubet nakawasia naka aijarake kotoma Epeso, karaida kapak naka aiwadik eitabo lo ajai ngesi apujan nako Patumo - Mam erai nuikamunitosi aijar naka Yokana, konye erai ngesi Apukokinio naka Yesu Kristo kotoma aturio nuka ekanisa nukoingaren. Kotoma okokoro lokiuniet enyaritai nges adwarasit ido kaitebeikin ngin nges ngesi.
Etapit duc anyarit eitabo lo ebe Apukokinio naka Yokana Lokalaunan, konye man ngin etubit. Erai ngesi Apukokinio naka Yesu Kristo einakinitai Yokana kanuka Ikristayon luka aturio kere. Erai nges bon eitabo kotoma Obaibuli kere loerai Yesu Elopet iwadikat, koipone lo aitakanikin koitunganane mama ejai ekegirigiran.
Erai eitabo lo lokawasia loka Ebaibuli, konye inera ageunet ka esange loka apakio nuka alimonokin Akiro Nukajokak. Aso akirot naka Ayonanin kanuka apukokinio nges “apocalypse” apolouke ebe “alemar aimukoret”. Alemar aimukoret na erai naitetemitai ejok kotoma aituput ka ekageran aputosia elemari aimukoret kaswamuke naka aput, isideleleuni ngin mama ejai yeneseseni. Erai alemario naka aimukoret, apukor ngun nusek ebwaitai. Aso do kereka alemario naka aimukoret mam bon erai apukokinio naka Etunganane loka Kristo, konye erai APUKOKINIO NAKA ASWAMISIOKE NUKOINGAREN KOTOMA ATURIO NUKANYKAAREI NUKA EKANISA NUEPOTE.
Apolou naka apukokinio kotoma Omoyo mama ejai ikeyuunan yenikabeit mam cut epedorio aikesiar adepar. Erai apukokinio ibore yeniketiai loepol mamakon aticepak adepar neiwomit ijo. Mam kereka kwana eong enera nuka Eitabo loka Apukokinio ka ijo. Enera eong nuikamunitos ngin KERE naerai apukokinio. Erai ibore yenikapolou nakagogong mama ejai ekanisa. Iitunit ijo kotoma Matayo 16 neabu Yesu kingisia ikesisiak aingiset na;
Ebalas itunga Okoku loka Etunganan ebe erai ingai?
Kobalas ebe, Ebalas ice ebe Yokana Lokebatisan, ice Eliya, ice Yeremia arai ediopet konabin.
Kotema kes atiar, Ido bo yes kibalas ebe arai Eong ingai?
Kobongok Simon Petero kobala ebe, Irai Ijo Kristo, Okoku loka Edeke lokajaran.
Kobongok Yesu kotema nges atiar, Kisirerengitoi jo, Simon okoku loka Yona! Naarai mam akuan ka aokot kipukokinito ijo ngun, dimarai PapaKa loejai toma akuj.
Eong da kalimokini jo ebe irai ijo Petero, adukokini Ekakanisa toma atiida na,ikirigin da luka okatwak mam ipikorete.Ebalas Itulikin (Roman Catholics) ebe edukokinitai ekanisa ne ejai Petero. Kingolia ijo ngun kaitebeikin eraas nuka akuan. Biai tikepedoria Edeke adukokin ekanisa neejai etunganan loekoni nen iriangirianga toni da aigir Ejakait Yesu ido kikeno naeswamaa ngun? Mam Edeke epedori adukokin EkanisaKe neejai imodiotunganan yeneuritai kotoma adiakar. Ido mam kerai amoru adio keperi kangina kosubite bala kebu Edeke kitalau akwap kaiboisit kangin. Mam da erai kwa ebalatar lua Protestant, ebe edukokinitai ekanisa neejai Yesu. Konye kerai toma APUKOKINIO. Kosiom koipone kalo iwadikatere: “Akuan ka aokot mam KIPUKOKINITO ijo ngun, KONYE PAPAKA NGES KIPUKOK NGUN, ido TOMA ATIIDA NA (APUKOKIINIO) ABUNI ADUKOKIN EKAKANISA.” Edukokinitai ekanisa toma Apukokinio, neejai “Inera kwanata Ejakait.”
Biai bo kejenunia Abel nukebeit aswam tetere ainakin Edeke asubanit nakotenan? Kanuka aiyuun abu ngesi kodum apukokinio naka aokot. Mam Kain abu kodum apukokinio naekoni nen (karaida kejaatar kaicorakinet) aso mam abu kopedo ainakin asubanit naebusakinit. Kerai apukokinio nakebuni kama eja Edeke nges eswamauni aitegelikinet ido abu koinak Abel aijar namam edaun. Kwana aticepak iyangari ijo nuebala ecokon, arai naisisianakinio koseminari, ido karaida kisisianakin ijo kangajep naka ojiljimikiro, toni kito ne kipukokinia ijo Edeke ebe Yesu nges erai Kristo, ido ebe erai aokot kes kitesegarete jo, ido da ebe Edeke nges Eketajaranikon, mam ijo nepecep da ijaunotor ka aijar namam edaun. Erai apukokinio naka Omoyo nges iswamai ngun.
Aso abu eong kabala ebe Eitabo lo loka Apukokinio erai apukokinio naka Yesu ka nuiswamai Ngesi kotoma okanisa kapak naka aturio kangun nukanykaarei. Erai apukokinio naarai ikesisiak ber da, ikulepek, mam kejenete nukabeit nu nuiwadikatai. Mam ber sek keponi kopukokinitete kes. Iitunit ijo ebe apotu kesi kopotu neejai Yesu kotoma Oitabo loka Aswamisio kosodete aingit Nges “Ibuni keraka ijo kapak kana ainyakakin Israel Ajakanut?” Ido, kotema Ngesi, “Mam erai nakus ajenun apakio karaida ikar.” Aroko itunga ngul eomitos nuka Yesu ajaut ka ajakanut naka akwap. Konye arai ajakanut nakOmoyo nges alosi Ngesi adukun. Mam da Nges apedori alimokin kes nuekamunitos aKedoketait kotoma kangin, naarai mam ber Papa apukokinit Nges. Konye kwana akaulo naka atwanareKe ka ajarun, ido cut kapak napena kotoma aijaanakiniKe kwape ekapuron, apedo Ngesi aisideleleun kane kotoma ApukokiniKe neejai Yokana nuepote Aibusesuke nepepe ka ajautuke toma okanisa araun ka aswam.
Kotoma apukokinio kana elimokinit Ngesi oni esange loka Satan. Inerit Ngesi eipone loebunio Ngesi aiswamaanar ka Satan kosodi acakakin ngesi toma angolol naka akim. Epukorit Ngesi esange loka ikaronok kangul kaluetupitos Satan. Ido engara Satan ngun.
Icoikinitor lem ijo aanyun eipone lo engarar Satan iitabon iarei luka Ebaibuli adepar luce kere? Kotoma ikesisiak acoa naka akiro nuka edini luedacete akiro aidac ka ngul da Iuka ejose luisisiatos ejok ejautene loka iboro (pseudoscientists) ejai ngesi duc esurokit Eitabo loka Ageun ka Eitabo loka apukokinio. Kotoma oitabon lu kere iarei kidumakini ageunet naka Satan, irotinike lukaronok ka amudiarioke. Kanukangun nges esuronokinia ngesi kes. Engara ngesi aitoduunio, ido kotoma oitabon kangul iwelunitai nges kaitebeikin kwape ejaar. Abala Yesu kanuikamunitos Satan, “Emamei ngesi atutubet kotomaKang ido Eong da emamei atutubet kotomake.” Ekoto Satan ebe ti kitogogong ebe mam erai kwangin; konye mam epedori, kanukangun iswamai do ngesi kere nuepedori amudiar amunokin Akirot. Konye kegir ekanisa aiyuun Satan kosodi aiyuun apukokinio naka Emoyo, kanuikamunitos Akirot, mam ikirigin Iuka okatwak ipikorete nges.
Kocamakinai ber ketolomik akirot ne kotoma aijaanakinika arai mam ijo ipodokinit. Ijenete yes kere ebe ainakinet na naejai toma aijaraka erai naitetemio komoyo. Erai ngesi ainakinet naepedoritor Emoyo Lokalaunan angicununa adekasinei, ka aomisio nuka itauon luka itunga, nepepe kiboro ice luibwaitai luerai Edeke bon epedori ajenun kosodi konyet apukokin eong. Karai bala ti kobwoete ijo ka eong kosodi ijo aanyun ireetin luka itunga neejenunia Satan ebe ebeit do ailepun nges. Aso, mam kereka erai itunga enera eong nukec. Erai ngin ebe ejaatar Satan ka neitingit kotoma aijarakec kanuka aronis, amamus apodokinit, ka adek. Konye karai ti jo koany ireetinikec. Ejeni Satan ebe eponio ngesi aiwelun, ido epote aijulanakineta nuitegelikina okwenye loka itunga. Ekuriana Satan. Ejeni ngesi ebe eapiei Emoyo loka Edeke ainakin itunga ajenun nuka aswamisioke. Ngun nges engarar ngesi airiamununeta nu noi. Naenyaraere ikiroria ka apukonor adekasinei, engara Satan ngun. Inyobo do kwana yen? Mam erai aisiom aomisio, mam da erai aijukakin aomisio neejai yenice kotoma aomisio, mam da erai ecudet. Erai ngesi APUKOKINIO kanuka Emoyo Lokalaunan. Ngol nges bon eipone lo apedoria eong ajenun ngun. Konye bo aomisio nueraasi nuka akuan emaikinete ngun idiobore kere kilema Emoyo Lokalaunan.
Mere eong ketodik ijo iciebore yen einakinit Satan ereit Eitabo loka Apukokinio naka Yesu Kristo kotoma okanisa. Ejeni ngesi ebe Yesu Kristo nges Ngopengol bian, ka lolo, ka ikar kere, ido mam ijulanakin. Ejeni nges ngun noi adepar akaisakany kaongon kane akwatat naka ikesisiak luka acoa naka akiro nuka edini. Ejeni ngesi ebe kwape mam Edeke ijulanakinor kotoma ojauteneKe kwape kwangin mam Nges ijulanakin korotiniKe da. Kanukangun ejeni Satan komamei abuonokin ebe ekanisa logeunet ko Pentekosit loejaatar kede agogong naka Edeke (Marako itomon kakany kape kotoma aswamisioit) nges erai ekanisa Lokabeit loitejenarit Yesu kwape LoKeng. Luce kere erai aingal. Ibusakinit korai.
Aso kiitu nuta. Kristo kotoma Okanisa Lokabeit erai aiyatakinit naka Eitabo loka Aswamisio. Konye Eitabo loka Apukokinio itoduunit eipone loabunio emoyo lokasurup loka kristo alomun toma okanisa ka amunaar nges, aitaraun loejalam, loerai loka aput komamei agogong. Isideleleuni Satan, apukorit aswamisioke (amudiario naka itunga luka Edeke naetamitai ka aitaraunio naka Akirot naka Edeke namam ebeit amunokin) aitodol cut toma apak naecakakinere ngesi toma angolol naka akim. Itijiei ngesi ngun. Mam ngesi epedori atitingikin ngun. Ejeni ngesi ebe arai kedumutu itunga APUKOKINIO NAKABEIT naikamunit EKANISA LOKABEIT ido ikoni ngesi ai, nunyoika nu ebwoia ngesi ido ebe EPEDORI NGESI ASWAM ASWAMISIO NGUN NUKAPOLOK ADEPAR, eraun ngesi ajore namam ipikorio. Arai kedumutu kesi apukokinio nakabeit naka imoyon ngul luarei luejaas toma oiswamae loka ekanisa loka Ikristayon, ido kanuka Emoyo loka Edeke kotiakutu ka abwoikin emoyo lokasurup loka kristo, emameun Satan agogong kakonye kekanisa kangol. Eraun do ngesi loipikoritai cut lolo kwape neabwoikinia Kristo kanginigogonguke kere kotoma amoding neatamitor ebe ti adumun apedor ayaite Nges. Eebo ereit Satan apukokinio. Konye kimina oni ngin. Nepepe ka apukokinio nakabeit kotoma aijarawok mam cut ikirigin luka okatwak kiipikorete oni, konye kipikori oni kes.
Ipedori ijo aiitun ebe kageunet naka akirot kana abu eong kalimunite ebe eitabo lo lokisisiai oni erai cut kaitebeikin apukorio naka Yesu, Elopet, kotoma okanisa ka aswamuKe kotoma aturio nukoingaren. Kasodi eong alimun ebe eyangaikini Emoyo Lokalaunan ainakin oni apukokinio arai man kikurwokini oni adumun. Kimorikikin do aomisio nu nuarei nepepe, iwanyuni ijo ebe mam bon eyangaikini aisisia ka aomoom da nataai tetere aitaraun Eitabo lo ibore ilopet. Eyangaikini aswamisioit naka Emoyo Lokalaunan. Apolouke ebe mam eitabo lo epedorio apukokin neejai imodiotunganan kilema atukot naka itunga naitegelikina. Eyangaikini itunganan yenejaasi ka aikweny naka enabione. Ipudakin apedorit aiiranar kaneejai Edeke. Ipudakin aitutoorio naebuni kokuju, kwabo mere bon ekesisian aitiirian ekokoro ka ekokoro, karaida ejok ngin. Konye aiyeiyea ipuda aisisianakin naka Emoyo arai mam, mam ecauni. Eipone lokipudar oni akiirar kaneejai Edeke kasodete oni ikulepek apukor ido araun lukijalakina neejai Emoyo apupun ka ajenun.
Kwape sek abalar eong, Eitabo lo (Apukokinio) nges angetakinet naka Nuiwadikatai Obaibuli. Ibwaikinitai da aiboisit naebeit cut kotoma ainapeta nuka Nuiwadikatai toma Obaibuli, angeset. Aso ipedori do jo ajenun nuebalar ngesi ebe imodiotunganan yenesiomi karaida ber akiirar nges isirerengitai. Erai apukokinio naka Edeke nges einakini ijo apedor naka aipikor Satan. Ido ipedori da ijo aanyun kanukinyo eraatar ngul luiyatakinete karaida luelemarete kamakeng luikenitai. Ibusakinit koraun kwangin, naarai ingai tope epedori aiyatakin arai alemar awai kaneejai apukokinio naitekoro naka Edeke kosodi aipikor lokasurup? Ikoni nen epatana. Emamei ibore yenejaas ka agogong naikoni nen ipikorit itia apukokinio naka Akirot. Koany, kotoma okokoro lokiuniet elimoritai arereng neejaas ngul luitoikinete akiikec Oitabo lo. Aomit eong ebe inera na nuka einono loka Aitutuket Namojong loasiomanakiniata isasedotin Akirot neejai atukot tupuruc. Iany ijo, luipu mam apedorete aisiom aso ajai do esasedoti asiomanakin kes. Bon ebe kerai Akirot, ajai arereng nen. Mam akiro arai kesiomunitai nges arai kiiraritai.
“Ayapuu apak.” Mam ber sek apak ayapuunit. Kotoma acoa ka aidarit naka Edeke apukokinio na naka apedor (karaida kejena kaileleba kama ka Edeke) mam abu kobu aitodol kwana. Kwangin katipet kisisiauni oni ekisil - apukokinio naka Edeke kanuka nginitur epedori abunore kotoma atur kangin bon, ido kotoma apak naitemokinitai. Koany akiro nueswamas kolosek nuka Isirael. Apukokinio naka Edeke mama ejai Musa abu kobu kapak bon naetemokinitai, bobo da noi kaitemonokinet abu kobu nape amonyiata itunga neejai Edeke. Yesu, Elopet abu kobu kotoma apak naabeit, Nges loerai Apukokinio naileleba naka Eidekeone. Ido kotoma atur kana (naka Laodikia) ebuni apukokinio naka Edeke kotoma apakike naebeit. Mam nges igetar, karaida abunore koroko kedolo apak. Koomoom nu ido kopupok ejok naarai kijai oni toma apak nakawasia lolo.
Naka oitabo... Apukokinio naka Yesu Kristo.
Edukone ka Elakit.
