Okushuuruurwa kwa Yohaana Orikwera.
Ekitabo ky'Okushuuruurwa.
William Branham.Read the full account in...
Okushuuruurwa kwa Yesu Kristo.Okushuuruurwa 1:1-3,
1. Ebyashuurwirwe Yesu Kristo, ebi Ruhanga yaamuhaire kworeka abahuuku Be ebyabaire nibyenda kubaho juba, Nawe akatuma maraika We kubimanyisa omuhuuku We Yohaana,
2. Owaahamize ebi yaareebire byona eby'Ekigambo kya Ruhanga n'eby'okuhamya oku Yesu Kristo yaahamize.
3. Orikushoma ebigambo by'obunabi obu aine omugisha, kandi baine omugisha abarikubihurira, bakata omutima aha bihandiikirwemu; ahabw'okuba obunaku buri haihi.Omuhandiiki (atari ou bikomookireho) ow'ekitabo eki ni Yohaana orikwera wa Ruhanga. Ab'ebyafaayo nibaikirizana ngu akatuuraho omuri Efeso ekicweka ky'aha muheru ky'amagara ge, n'obu omu bwire bw'okuhandiika ekitabo eki yaabaire ari aha Kirwa kya Patumo. Ti byafaayo by'amagara ga Yohaana, kureka n'Okushuuruurwa kwa Yesu Kristo omu busingye bw'ekanisa obwabaire nibuza kwija. Omu mushororongo gwa 3 nikyetwa eky'obunabi kandi ekyo buzima nikwo kiri.
Ekitabo eki buriijo kikira kwetwa Okushuuruurwa kwa Yohaana Orikwera, kwonka ekyo tikihikire. N'Okushuuruurwa kwa Yesu Kristo okwahairwe Yohaana ahabw'Abakristaayo b'obusingye bwona. Nikyo kitabo kyonka omuri Baiburi yoona eki Yesu Wenka yaayehandiikiire, We wenka naarabira omu kweyoreka omuhandiiki.
N'ekitabo eky'aha muheru gwa Baiburi, beitu nikigamba okutandika kandi n'omuheru gw'obwire bw'Engiri.
Hati okushuuruurwa omu Rugriika ni “apocalypse” ekirikumanyisa “okushwekuura.” Okushwekuura oku nikushoboororwa gye omu ky'okureeberaho ky'omusharuzi w'ebishushani by'ebiti, amabaare n'ebindi naashwekuura omurimo gwe gw'ebishushani ebibaizirwe, naabyoreka abareebi. N'okwihaho ekishwekyeso, naashuuruura ekibaire kishwekire. Hati okushwekuura oku ti kushuuruurwa kw'Omuntu Kristo kwonka, kureka N'OKUSHUURUURWA KW'EMIRIMO YE Y'OMU MAISHO OMU BUSINGYE MUSHANJU BW'EKANISA OBWABAIRE NIBWIJA.
Obukuru bw'okushuuruurirwa n'Omwoyo aha mwikiriza w'amazima tiburikubaasa kuhamisirizibwa ekirenga. Okushuuruurirwa nikukuru munonga ahariiwe obundi kukira iwe oku orikwetegyereza. Hati tindikugamba aha Kitabo ky'Okushuuruurwa eki hamwe naiwe. Ningamba aha kushuuruurirwa KWONA. Nikukuru munonga aha kanisa. Nimwijuka omuri Matayo 16 ahu Yesu yaabuurize abeegi Be ekibuuzo eki ati,
“Beitu abantu nibagira ngu Nyowe Omwana w'Omuntu Ndi oha? Baamugira bati: Abamwe nibagira ngu, Ori Yohaana Omubatizi, abandi ngu, Ori Eliya, kandi abandi ngu, Ori Yeremia nari omwe ahari baanabi. Yaababuuza ati: Mbwenu shi imwe, mugira ngu Mba oha? Simooni Petero yaagarukamu ati: Ori Kristo, Omwana wa Ruhanga ohuriire. Yesu yaamugarukamu ati: Oine omugisha, Simooni mwene Yona; ahabw'okuba omubiri n'eshagama tibyo byakushuuruurira ekyo, kureka Tata Ori omu iguru. Kandi ninkugambira nti: Ori Petero, Naanye ndyayombeka ekanisa Yangye aha rukiri oru, n'amarembo g'okuzimu tigarigibaasa.” Matayo 16:13-18
Abakatoriki aba Rooma bagira ngu ekanisa eyombekirwe ahari Petero. Hati omu mazima egyo n'enshoboorora y'obuntu. Ruhanga akaabaasize ata kwombeka ekanisa aha muntu otahamire owaayehakaine Mukama Yesu kandi akakyeena obwo ariyo naayehakana? Ruhanga tarikubaasa kwombeka ekanisa Ye aha muntu weena ozaariirwe omu kibi. Kandi rukaba rutari rukiri oruri aho orikushusha oti omwanya ogwo Ruhanga akaba agweriize. Kandi tikiri nk'oku Abapurotesitante bagira, ngu ekanisa eyombekirwe ahari Yesu. Kukaba kuri OKUSHUURUURIRWA. Kishome omu muringo ogu kihandiikirwemu: “Omubiri n'eshagama tibyo BYAKISHUURUURA, KUREKA TATA NIWE YAAKISHUURUURA, kandi AHA RUKIRI ORU (OKUSHUURUURIRWA) NIHO NDYOMBEKA EKANISA YANGYE.” Ekanisa eyombekirwe aha Kushuuruurirwa, ahari “Oku nikwo Mukama Arikugira.”
Abeeli akamanya ata eky'okukora kugira ngu aheyo ekitambo ekihikire ahari Ruhanga? Ahabw'okwikiriza akatunga okushuuruurirwa kw'eshagama. Kaini taratungire okushuuruurirwa nk'okwo (n'obu araabe yaabaire aine ekiragiro) n'ahabw'ekyo tarabaasize kuhayo ekitambo ekihikire. Kukaba kuri okushuuruurirwa kuruga ahari Ruhanga okwataireho omutaano kandi kukaha Abeeli amagara agatahwaho. Hati noobaasa kutwara eki omuriisa arikugamba, nari eki seminario erikwegyesa, kandi n'obu waakukyegyesibwa n'abagambi barungi, Ruhanga ku Araabe atakikushuururiire ngu Yesu ni Kristo, kandi ngu n'eshagama erikukushemeza, kandi ngu Ruhanga n'Omujuni waawe, toritunga amagara agatahwaho. N'okushuuruurirwa kw'Omwoyo okurikukikora.
Hati ngizire nti Ekitabo ky'Okushuuruurwa eki n'okushuuruurwa kwa Yesu kandi n'eki Arikukora omu makanisa ahabw'obusingye mushanju obwo. N'okushuuruurirwa ahabw'okuba abeegi, bo bonka, bakaba batarikumanya amazima aga agahandiikirwe. Enyimaho gakaba gatakabashuururiirwe. Nimwijuka ngu bakaija ahari Yesu omu Kitabo ky'Ebyakozirwe baamubuuza bati, “Obu nibwo bunaku obu orikwenda kugaruriramu obugabe bwa Israeli?” Yaabagarukamu ati, “Ti kyanyu kumanya ebiro nari obunaku.” Abo bashaija bakaba nibakiteekateekyera omuri Yesu kugira obugabe omu nsi. Kwonka bukaba buri obugabe bw'omwoyo obu Yaabaire naaza kwombeka. Nangwa Akaba atarikubaasa kubagambira omwanya Gwe omuri obwo bugabe, ahakuba Ishe akaba Atakakimushuururiire. Kwonka bwanyima y'okufa Kwe n'okuzooka, kandi n'omuri obu bwire omu buheereza Bwe bw'okutonganirira, Naabaasa kworeka hanu omuri oku kweshuuruurira Yohaana Kwe eki ekitiinisa Kye kandi n'okubaho Kwe omu kanisa birikumanyisa kandi n'okukora.
Omuri oku kushuuruurirwa Naatugambira omuheru gwa sitaane oku guri. Naatugambira eki arikwija kukorera sitaane kandi n'okumunaga omu nyanja y'omuriro. Naashuuruura omuheru gw'ababi abakurata Sitaane. Kandi ekyo Sitaane akyanga.
Oreetegyereize oku Sitaane ayanga ebitabo bibiri bya Baiburi okukira ebindi byona? Kurabira omu batendekirwe eby'ediini abarikworobyamu hamwe n'abanyasayansa abateegyesiibwe gye obutoosha Sitaane ataahirira Ekitabo ky'Okutandika n'Ekitabo ky'Okushuuruurwa. Omuri ebi bitabo bibiri nitushangamu obukomooko bwa Sitaane, emihanda ye mibi kandi n'okuhwerekyerera kwe. Ekyo nikyo kirikutuma yaabitaahirira. Naayanga okumushwekuura, kandi omu bitabo ebyo ashwekwirwe buzima kwo eki ari. Yesu akagamba ahari Sitaane ati; “Taine mugabo Omuriinye kandi Naanye tingwine omuriwe.” Sitaane akaayenzire kworeka ekyo okundi; kwonka tarikubaasa, n'ahabw'ekyo naakora kyona eki arikubaasa kuhwerekyereza obwesigye omu Kigambo. Kwonka ekanisa ku eyanga kwikiriza Sitaane kandi ekaikiriza okushuuruurirwa kw'Omwoyo omu Kigambo, amarembo g'okuzimu tigakaagisingura.
Reka ngire eki naagamba hanu ekirikuruga omu buheereza bwangye, ku muraabe mutarikufayo. Mwena nimumanya ngu ekiconco eki ekiri omu magara gangye kirengire eby'obuhangwa. N'ekiconco eki Omwoyo Orikwera arikukoresa kubaasa kucaaka endwara, hamwe n'ebiteekateeko by'omu mitima y'abantu, kandi n'ebintu ebindi ebisherekirwe ebi Ruhanga wenka arikubaasa kumanya reero Akabinshuuruurira. Nkaayenzire ngu mwemerere naanye haza mureebe ahamaisho g'abantu Sitaane yaamanya ku yaaza kushuuruurwa. Hati, ti bantu abu ndikugambaho. Ni ngu Sitaane aramatiire omu magara gaabo kurabira omu kibi, obutafayo, kandi n'endwara. Kwonka kuri nooreeba ahamaisho gaabo. Sitaane naamanya ngu yaaza kushuuruurwa, kandi empinduka ezikizireyo kuba ez'omutaano ziija ahamaisho g'abantu. Sitaane aine obwoba. Naamanya ngu Omwoyo wa Ruhanga ari haihi kumanyisa abantu emirimo ye. Nikyo kituma yaayanga enteerane ezi munonga. Amaziina ku garikwetwa kandi endwara zikashuuruurwa, Sitaane akyanga. Hati eki niki? Oku ti kushoma ebiteekateeko by'abantu, nari omugyereko ogurikwiha ekiteekateeko omu muntu gukakita omu ndiijo muntu, n'obu bwakuba oburogo. N'OKUSHUURUURIRWA ahabw'Omwoyo Orikwera. Ogwo nigwo muhanda gw'onka ogu nkimanyiramu. N'ekya bumazima ebiteekateeko by'obuntu nibikyeta ekintu ekindi kyona kwonka tibikyeta Omwoyo Orikwera.
Ka nkworekye enshonga endiijo erikutuma Sitaane yaayanga Ekitabo eki eky'Okushuuruurwa kwa Yesu Kristo omu kanisa. Naamanya ngu Yesu Kristo tahinduka oku abaire ari nyomwabazyo, n'eriizooba nikwo ari, kandi nikwo ariguma ebiro byona, kandi Tahinduka. Ekyo naakimanya kukirira hare obucweka makumi mwenda ahari igana bw'abanyadiini abatendekirwe. Naamanya ngu nk'oku Ruhanga Ari otahinduka omu mbeera Ye, nikwo Ari otahinduka n'omu mitwarize Ye. Omu buryo obwo Sitaane naamanyira kimwe ngu ekanisa eyaabandize ahari Pentekoote eine amaani ga Ruhanga (Mako 16 omu bikorwa) niyo Kanisa y'Amazima ei Yesu arikweta Eye. Ezindi zoona n'ez'ebishuba. Nikiteekwa kuba kityo.
Hati ijuka eki. Kristo omu Kanisa ey'Amazima n'okugumizamu kw'Ekitabo ky'Ebyakozirwe. Kwonka Ekitabo ky'Okushuuruurwa nikyoreka nk'oku omwoyo gwa antikristo gwabaire niguza kwija omu kanisa gukagishiisha, gukagihindura kooyakooya, ey'emikoro kandi etaine maani. Nikishuuruura Sitaane, kirikushuuruura emirimo ye (kugyezaho kuhwerekyereza abantu ba Ruhanga kandi n'okwiha obwesigye omu Kigambo kya Ruhanga) okuhikira kimwe omu bwire obu arinagwa omu nyanja y'omuriro. Ekyo naakirwanisa. Tarikubaasa kukyemera. Naamanya ngu abantu ku baakutunga OKUSHUURUURIRWA KW'AMAZIMA kw'EKANISA y'AMAZIMA n'eki eri, eki erikwikiriza kandi ngu NEEBAASA KUKORA EMIRIMO MIKURU, neija kuba eihe eritarikubaasa kusingurwa. Ku baakutunga okushuuruurirwa kw'amazima kw'emyoyo ebiri erikukorera omu kanisa y'Enkristaayo, kandi ahabw'Omwoyo wa Ruhanga bakataanisa omu myoyo kandi bakazibira omwoyo gwa antikristo, Sitaane naija kuhwa amaani omu maisho gaayo. Ebiro ebi Sitaane naija kusingurwa buzima nk'obu Yesu yaayangira buri kugyezaho kwe kwona kw'okugira ngu Amutegyekye omu ihamba. Eego, Sitaane ayanga okushuuruurirwa. Kwonka itwe nitukukunda. Twaba twine okushuuruurirwa kw'amazima omu magara gaitu, amarembo g'okuzimu tigarikubaasa kutusingura, kwonka itwe turyagasingura.
Noija kwijuka ku ngambire aha kutandika kw'obutumwa obu nti Ekitabo eki ekiturikwega n'Okushuuruurwa kwa Yesu buzima, We wenka, omu kanisa kandi n'omurimo Gwe omu busingye obw'omu maisho. Kandi ngambire nti nikyetaagisa Omwoyo Orikwera kutuha okushuuruurirwa kitari ekyo nitwija kuremwa kukutunga. Waabuganisa ebiteekateeko ebi bibiri noija kureeba ngu tikirikwija kwetaagisa okwega kwa buriijo kwonka n'okuteekateeka kutuma Ekitabo eki kyaba ekihuriire. Nikiza kwetaagisa okukora kw'Omwoyo Orikwera. Ekyo nikimanyisa ngu Ekitabo eki tikirikubaasa kushuuruurirwa ondiijo weena kureka abantu b'omutaano. Nikiza kwetaagisa ogwo oine okwetegyereza kwa nabi. Nikiza kwetaagisa okubaasa kuhurira kuruga ahari Ruhanga. Nikiza kwetaagisa okuhabura okurengire eby'obuhangwa, atari omwegi orikugyeragyeranisa omushororongo n'ogundi, n'obu ekyo kiraabe kiri kirungi. Kwonka enaama eyetenga okwegyesa kw'Omwoyo kitari ekyo tekaashobooroka. Ka nitwetenga kuhurira kuruga ahari Ruhanga tutyo tukeeyanika omu maisho Ge reero tukeehayo aha Mwoyo kuhurira n'okumanya.
Nk'oku naaheza kugamba, Ekitabo eki (Okushuuruurwa) n'okumariirira kw'Ebyahandiikirwe. Kandi kitairwe n'omu mwanya oguhikire buzima omu Byahandiikirwe ebitarikubanganisibwaho; aha muheru. Hati noobaasa kumanya ahabw'enki kirikugamba ngu weena orikukishoma nari orikukihurira aine omugisha. N'okushuuruurirwa kwa Ruhanga okurikwija kukuha obushoboorozi ahari sitaane. Kandi noobaasa kureeba ahabw'enki abo abaryongyeraho nari bakakicwaho barikyeenwa. Nikiteekwa kuba kityo, ahakuba n'oha orikubaasa kwongyera nari kucwa aha kushuuruurirwa okuhikire kwa Ruhanga haza akasingura omuzigu? Kyanguhi kityo. Tihariho kintu ekiine amaani agarikusingura nk'okushuuruurirwa Ekigambo. Waareeba, omu mushororongo gwa kashatu omugisha guraganisiibwe abo abata omutima aha Kitabo eki bamaririire. Ninteekateeka ngu eki nikigamba aha mugyenzo gw'abanyamurwa omu Ndagaano eya Ira nibashomera abantu Ekigambo omu kasheeshe. Nooreeba, baingi bakaba batamanya kushoma, n'ahabw'ekyo omunyamurwa akaba abashomera. Obwire bwona obu kyabaire kiba kiri Ekigambo, omugisha gukaba gubaho. Ti nshonga yaaba kyabaire kishomwa nari kihurirwa.
“Obunaku buri haihi.” Obunaku bukaba butari haihi enyimaho. Omu bwengye n'omu kutegyeka kwa Ruhanga okushuuruurirwa oku okukuru munonga (n'obu Ruhanga arikukumanyira kimwe) kukaba kutarikubaasa kwija obwire obwo. N'ahabw'ekyo ahonaaho nitwega engyenderwaho - okushuuruuurirwa kwa Ruhanga ahabwa buri busingye kwija omu busingye obwo bwonka, kandi omu bwire obutairweho. Reeba ebyafaayo bya Israeli. Okushuuruurirwa kwa Ruhanga ahari Musa kukaija omu bwire bwonka obwabaire butairweho omu byafaayo, kandi nangwa namunonga kukaija abantu ku baatakiire Ruhanga. Yesu, We wenka, akaija omu bwire obuhikire, Ariwe Kushuuruurwa kwona kw'Obwaruhanga. Kandi omu busingye obu (obwa Laodikia) okushuuruurwa kwa Ruhanga kuryaija omu bunaku bwakwo. Tikuriremwa kwija n'obu kwakuba kwija obunaku butakahikire. Teekateeka ahari eki kandi okiteho omutima ohamize, ahakuba turi omu biro by'aha muheru.
Read the full account in...
Okushuuruurwa kwa Yesu Kristo.
Obushwere n’Okushenda.
