Ukusokolola kwa kwa Yohane Washila.
Yohane Pa Patmo.
William Branham.Belengeni ili buku...
Ukusokolola Kwakwa Yesu Kristu.Ukusokolola 1:1-3,
1 Ukusokolola kwa kwa Yesu Kristu, uko Lesa amupele, ku kulanga ababomfi Bakwe ifintu ifili no kupona bwangu; kabili Akulangile pa kutuma malaika Wakwe ku mubomfi Wakwe Yohane:
2 Uwali nte ku Cebo cakwa Lesa, na ku bunte bwakwa Yesu Kristu, ubwa fyonse ifyo amwene.
3 Alishuka uubelenga, na bomfwa ifyebo fya kusesema uku, no kubake fyalembwamo: pantu inshita ili mupepi.Kalemba (te mwine) wa ili buku ni Yohane Washila umulungami. Bakalemba we lyashi lya kale balisumina ukuti aikele inshita yakwe iya kulekelesha iya bumi bwakwe mu Efese, nangu cibe pa nshita ya kulemba kwa ili buku ali pacishi ca Patmo. Te lyashi lya bumi bwa kwa Yohane, lelo caba Ukusokolola kwa kwa Yesu Kristu mu nshita sha kuntanshi isha lukuta. Mu vesi ya citatu ileitwa ubusesemo kabili neci mucine efyo lyaba.
Ili buku ilingi line liitwa Ukusokolola kwa kwa Yohane Washila, lelo ico cilubo. Lyaba Ukusokolola kwa kwa Yesu Kristu ukwapelwe kuli Yohane ku Benakristu ba nshita shonse. Ili e buku fye lyeka limo mu Baibele yonse ilyo ilya lembwa na Yesu Umwine, ukupitila mukumonekela umwine kuli kalemba.
Lyaba e buku lyakulekelesha ilya mu Baibele, lelo lilanda ifya ntendekelo ne mpela iya nshita sha Mbila nsuma.
Nomba ishiwi lya ci Greek ilya kusokolola ni “apocalypse” ico cipilibula “ukufimbula”. Uku kufimbula kwalondololwa bwino bwino mu cilangililo ca ubasa ifimpashanya ukufimbula umulimo wakwe uwa cimpashanya, ukucilangisha ku uletamba. Cena Caba ukufimbula, ukusokolola ico icali kale icafiswa. Nomba ukufimbula takwaba fye ukusokolola kwa Buntu bwakwa Kristu, lelo kwena kwaba UKUSOKOLOLA KWA MILIMO YAKWE IYA KUNTANSHI MU NSHITA SHA NKUTA CINELUBALI ISHIKESA.
Ubukankala bwa busokololo ku Mupashi ku wacetekela uwa cine tekuti kube ukwabula ukukomailapo nganshi. Ubusokololo bupilibula ifingi kuli imwe ukucila ifyo mutontonkanya. Nomba nshilelanda pali ili Buku lya Kusokolola na imwe. Ndelanda pa busokololo BONSE. Bwaliba ubukankala nganshi ku lukuta. Bushe muleibukisha muli Mateo 16 uko Yesu aipwishe abasambi ili lipusho,
13 Bushe abantu batila Ine ne Mwana wa Muntu nine ani?
14 Nabo batile, bambi batila Nimwe Yohane Kabatisha: bambi batila, ni Eliya; kabili bambi batila, ni Yeremia, atemwa umo uwa bakasesema.
15 Atile kuli bene, Lelo imwe mutila nine ani?
16 Na Simone Petro pa kwasuka ati, Nimwe Kristu, Umwana wakwa Lesa wamweo.
17 Kabili Yesu alimwaswike no kutila kuli wene, Walipalwa, we Simone mwana Yona; pa kuti umubili nomulopa tafya kusokolwelele, lelo ni Tata Wa mu mulu.
18 Na ine ndekweba nati, niwe Petro, kabili pa cilibwe ici epo nkakulo lukuta Lwandi; ne mpongolo sha ku Mbo tashakalwanshe.Ba Roman Catholics batila ukuti ulukuta lwa kulilwa pali Petro. Nomba cilya ca buntunse nganshi. Musango nshi Lesa engakulila ulukuta pa muntu ushaikatana ica kuti alikene Shikulu Yesu no kutipa ilyo alecite ci? Lesa tekuti akule ulukuta Lwakwe pa muntu onse uwafyalwa mu lubembu. Kabili tacali icilibwe cimo icaikele palya kwati fye Lesa aliimbile umushili pali cilye cifulo. Kabili tacali nge fyo ba Protestant basosa, ukuti ulukuta lwa kulwa pali Yesu. Cali BUSOKOLOLO. Belengeni umusango calembelwamo: “Umubili no mulopa tafya KUSOKOLWELE, LELO TATA EU CISOKOLWELE, kabili PALI ICI CILIBWE (UKUSOKOLOLA) NKAKULA ULUKUTA LWANDI:” Ulukuta lwa kulwa pa Busokololo, pali “Efyo Asosa Shikulu”.
Musango nshi uo Abele aishibe ifyo ali no kucita pa kutila enga pela ilambo ilyalinga kuli Lesa? Ku citetekelo apokelele ubusokololo bwa mulopa. Kaini tapokelele ubusokololo bwa musango uyu (nangu cibe alikwete ifunde) e ico alifililwe ukupele lambo ilyalinga. Cali ubusokololo ukufuma kuli Lesa ukwapangile ubupusano no kupela Abele umweo wamuyayaya. Nomba kuti wasenda ifyo ba pastor basosa, atemwa ifyo seminary isambilisha, kabili nangu cinga sambilishiwa kuli iwe na maka, mpaka Lesa asokolola kuli imwe ukuti Yesu ni Kristu, kabili no kutila caba mulopa uumusamba, kCaba kusokolola kabili nokutila Lesa ni Kapususha wenu, tamwakatale ukukwata umweo wa muyayaya. wa buMupashi ekubomba.
Nomba na cisoso kutila ili Buku lya Kusokolola lyaba kusokolola kwa kwa Yesu kabili nefyo alecita mu nkuta kuli isho inshita cinelubali. Caba kusokolola pantu abasambi, abene, tabaishibe ifi fishinka ifyalembwa. Cali tacilasokolwelwa kuli bene. Muleibukisha ukuti balishile kuli Yesu mwi Buku lya Milimo ya Batumwa no ku Mwipusha, “Bushe ni mu nshita ino ine mulebwesesho bufumu kuli Israele?” Lelo Atile kuli bene, “Te cenu ukwishibe nshita nangu imyaka.” Balya abaume bali bacili baletontonkanya pali Yesu ukukwata ubufumu bwa pano nse. Lelo cali bufumu bwa bumupashi ubo Ali no kwisa kula. Nakabili te kuti Abebe palwa cifulo Cakwe muli cena, pantu Tata ali tala busokolwela kuli Wene. Lelo panuma ya mfwa Yakwe no kubuka, kabili pali iyi ine nshita muli bukapyunga Bwakwe bwa kupapatila, Ali uwalinga ukutantika muno muli ubu busokololo Bwakwe kuli Yohane ifyo ubukata Bwakwe no mulola mu lukuta fyali no kupilibula no kucita.
Muli ubu busokololo Aletweba ifyo impela yakwa kasebanya yaba. Aletweba ifyo Ali no kubombela pali kasebanya no ku muposela muli bemba wa mulilo. Alesokolola impela yaba bifi abakonka Satana. Kabili Satana alipata cilya.
Bushe mwalitala ukumona ifyo Satana apata ama buku yabili aya mu Baibele ukucila yonse ayashala? Ukupitila muli bakasambilila wafya bulesa aba cikuku na baishibisha ifya science ena lyonse alalwisha Ibuku lya Kutendeka ne Buku lya Kusokolola. Muli yonse aya ama buku yabili tulesanga intendekelo yakwa Satana, inshila shakwe ishabipisha nokonaulwa kwakwe. E mulandu wine aya lwishisha. Alipata ukuletwa palwalala, kabili muli aya ama buku aliletwa palwalala pafyo aba filya fine fye. Yesu atile palwakwa Satana, “Muli Ine takwete kantu nangu kamo, kabili nshikwete kantu muli ena.” Kasebanya afwaya ukushininkisha cilya mu musango umbi; lelo teti acicite, e ico alacita conse ico enga cita ku konaula isubilo mu Cebo. Lelo ilyo ulukuta lwakana ukucetekela Satana no kucetekela ubusokololo bwa Mupashi ubwa Cebo, impongolo sha ku mbo te kuti shilucimfye lwena.
Lekeni fye mbikepo icebo apa ukufuma muli buka pyunga bwandi, nga tamusakamene. Imwe bonse mwalishiba ukuti ici ca bupe mu bumi bwandi cabe cakupapusha. Cabe cabupe ica kutila Mupashi wa Mushilo ulalingulula amalwele, kabili namatontonkanyo ya mitima ya bantu, kabili ne fintu na fimbi ifya fiswa ifyo Lesa fye eka ewingeshiba elyo kabili nokufisokolwela kuli ine. Ndekabila nga mwaliminine na ine nokumona ifinso fya bantu ilyo Satana aishiba ukutila ali nokuletwa palwalala. Nomba, te bantu abo ndelandapo. Ni ulya Satana uwaikatilila mu bumi bwabo ukupitila mu lubembu, uwakukana sakamana, no bulwele. Lelo mulingile ukumona ifinso fyabo. Satana aleshiba alaletwa palwalala, kabili nemimonekele iya ibela nganshi ilesa pa finso fya bantu. Satana alomfwo mwenso. Aleshiba ukuti Umupashi wakwa Lesa uli mupepi no kuleka abantu beshibe pa milimo yakwe. Ulya emulandu wine apatila nganshi uku kulongana. Ilyo amashina yaitwa na malwele yasokololwa, Satana alapata cena. Nomba ici ni cinshi? Tacaba ukubelenga amano, tacaba uku buka, nangula cena ukuba ubuloshi. Caba UKUSOKOLOLA ku Mupashi wa Mushilo. Iyo e nshila fye yeka ninge shibilamo ifi. Mucine amano aya buntunse yaka ciita icili conse lelo Mupashi wa Mushilo.
Lekeni mulangishe umulandu umbi cinshi ico Satana apatila ili Buku ilya Kusokolola kwa kwa Yesu Kristu mulukuta. Aliishiba ukutila Yesu Kristu aba cimo cine mailo, nelelo, no muyayaya, kabili Wene tapilibuka. Alishiba cilya nafimbi ifingi ukucila impendwa ya makumi pabula yaba kasambilisha ba fya bulesa. Aliishiba ukuti apo Lesa abo ushipilibuka mu cifyalilwa Cakwe, kanshi Wene aba fye ushipilibuka na mu nshila Shakwe. E ico Satana aliishiba mukushininkisha ukuti ulukuta ulwa ntendekelo pa Pentecost na maka yakwa Lesa (Marko Ikumi Limo na mutanda mumulimo) e Lukuta lwa Cine ulo Yesu alanda ukuba Ulwakwe lwine. Nga te ifyo lwa bufi. Lulingile ukuba.
Nomba ibukisheni ici. Kristu mu Lukuta lwa Cine ekutwalilila kwe Buku lya Milimo ya Batumwa. Lelo Ibuku lya Kusokolola lilangisha ifyo umupashi wa munkanyakristu wali no kwisa mukati ka lukuta no kulubifya, ukululenga ukuba ulwacifulefule, ulwa mimonekele no kukana kwata amaka. Ilalangisha Satana palwalala, ukusokolola imilimo yakwe (ukwesha ukonaula abantu bakwa Lesa no kususha kwa Cebo cakwa Lesa) mpaka ilya ine fye inshita ilyo akaposwa muli bemba wa mulilo. Alalwisha cilya. Tekuti aciminine. Alishiba ukutila nga bantu bapokelela UBUSOKOLOLO UBWA CINE ubwa LUKUTA LWA CINE kabili nefyo lwaba, ifyo lwimininako kabili ukutila KUTI LWABOMBA IMILIMO IKALAMBA, lukaba ifita ifishimoneka. Nga bapokelela ubusokololo bwa cine ubwa mipashi ibili mukati ka mibombele ya lukuta lwa Bwinakristu, kabili ku Mupashi wakwa Lesa lwalingulula no kukanya umupashi wamu kanyakristu, Satana takakwate amaka kuntanshi kuli lwena. Akaba mucine cine uwa cimfiwa ilelo nga fintu Kristu akenye amapange Yakwe yonse ku kukwata amaka pali Wene mu matololo. Ee, Satana alipata ubusokololo. Lelo twalibutemwa. No busokololo bwacine mu bumi bwesu, impongolo sha ku mbo tekuti shitucimfye, lelo tukashicimfya shena.
Mwalaibukisha ukuti nacilanda pa kutendeka kwa iyi mbila ukutila ili Buku ilyo tulesoma e kusokolola kwine ukwakwa Yesu, Umwine, mu lukuta no mulimo Wakwe mu nshita sha kuntanshi. Elyo nacilanda ukutila cisenda Mupashi wa Mushilo ukutupela ubusokololo nga te ifyo tukafilwa ukucumfwa cena. Ukuleta aya matontonkanyo yabili capamo muli no kumona ukuti tacakasende fye ukusoma ukwaseka nokutontonkanya ukulenga ili Buku ukuba ilituntulu. Cili nokusenda ukubomba kwa Mupashi wa Mushilo. Ico cilepilibula ili buku tekuti lisokolwele ku uuli onse lelo ibumba ilya ibela ilya bantu. Cikasenda umo uwakwata ukumona kwabu kasesema. Cikafwaikwa ishuko lyakumfwa ukufuma kuli Lesa. Cikafwaikwa ukufundwa kwa kupapusha, tekasambililafye uku pashanya vesi na vesi, nangu ico cingaba icisuma. Lelo inkama ifwaikwa ukusambilisha kwa Mupashi nga teifyo tekuti yumfwike bwino. Ifyo tulefwaika ukumfwa ukufuma kuli Lesa no kuipelesha fwebene ukuba abanakila ku Mupashi ku kuumfwa no kwishiba.
Nge fyo nsosele kale, ili Buku (Ukusokolola) e kupwishisha kwa Malembo. Kabili lyena lyaba ilya bikwa filya fine fye mumitantikile ya Malembo; ku mpela. Nomba kuti mwaishiba umulandu lisosela ukuti uuli onse uyo ubelenga atemwa nangu ukumfwa lyena alipalwa. Caba busokololo bwakwa Lesa ubo bukamupela amaka pali kasebanya. Kabili kuti mwamona umulandu abo abakalundako nangu ukufumyako kuli lyena bali no kutipwa. Cilingile cabe fyo, pantu nani uwinga lunda atemwa ukufumyako ukufuma ku busokololo ubwa pwililika ubwakwa Lesa no kucimfya umulwani? Cabe caanguka fye. Takwaba nangu cimo ico icakwata amaka ayapulamo ngo busokololo bwa Cebo. Mwamona, mu vesi ya citatu ipalo lilepelwa kuli abo abaleposako amano kuli ili Buku. Ndetontonkanya ici cilesontelela ku lutambi lwa mu Cipingo ca Kale ulwa bashimapepo ukubelenga Icebo ku lukuta ulucelo. Mulemona, abengi tabaishibe ukubelenga e ico shimapepo alebabelengela. Cikulu fye cali Icebo, ipalo epo lyali palya. Tacali mulandu nga cali belengelwe nangu ukumfwika.
“Inshita ili mupepi.” Inshita tayali mupepi lilya. Mu mano kabili mu mibombele yakwa Lesa ubu busokololo ubwa pulamo (nangu bwali shibikwe bonse kuli Lesa) tekuti bwise pali ilya nshita. E ico tulesambililapo ifunde_ubusokololo bwakwa Lesa ku nshita ili yonse kuti bwaisa muli ilya ine inshita epela, kabili pa nshita iyalinga. Lolekesheni kwi lyashi lyakwa Israele. Ubusokololo bwakwa Lesa kuli Mose bwaishile fye panshita iyalinga iye lyashi lya kale, kabili sana sana bwaishile no kucilapo ilyo abantu balilile kuli Lesa. Yesu, Umwine, aishile pa mwisulo wa nshita, Wene pakuba Ukusokolola ukwapwililika ukwa mutwe wa Bulesa. Kabili muli ino nshita (Laodikea) ubusokololo bwa kwa Lesa bukesa pa nshita yakwe iyalinga. Tabwakafilwe, nangula ukukanaba ubwa fikapo. Tontonkanyeni pali ici no kuciposako nganshi amano, pantu twaba mu nshita yaku mpela ilelo.
Belengeni ili buku...
Ukusokolola Kwakwa Yesu Kristu.
