Apukokino a ekakwang a Yokana.
Apukokino a Yesu Kristo.
William Branham.Tosiomete alo akirot...
Apukokino a Yesu Kristo.Apukokino 1:1-3,
1 Apukokino ngina a Yesu Kristo, ngina abu Akuj inak inges akitoodikin ngiketiyiak keng ngakiro nguna ejoikinit atakanun atipei, akiteyenun alotooma akiakiar emalaika keng neni a Yokana a eketiyian keng,
2 a ngolo abu kiteyenu Akirot ka Akuj. Ka akiteyenunet ngina a Yesu Kristo, ka alotooma ngiboro daadang ngulu abu inges kingolik.
3 Erereng itunganan ngini esiomi, ka ikes ngulu irarete Akirot ngina ka akiduar a na, ido kiricakis ngiboro ngulu igiritae ne anerai adolu apaki.Erai ekakwang Yokana ekegiran ngolo ke ekitabo a lo, nai (mere elope.) Ecamanara ngikegirak a ngiemuto ebe, abu inges toyiar atyaket ngina esidion ngina ka akekiyiar alo Epeso, tar keyiai inges anapaki angina egiria inges ekitaabo lo loculat ngolo ka anam, ngolo anyaritae Patimo. Emam nyerai nguna etapito akiyiar a Yokana, nai erai apukokinio a Yesu Kristo ngina ikamunit ngaturio angikanisai nguna ebeit aponare alokingaren. Alotooma engaet ngolo angiuni enyaritae aduaretait ka erai ikec kire ngunapei.
Enyaritai ekitabo lo Apukokino a ekakwang a Yokana, nai nyiyookino ngun. Erai inges Apukokino a Yesu Kristo ngina aponi inakinae Yokana anguna a Ngikiristo alotooma ngaturio daadang. Erai inges ekitabo epei bon alotooma Ebaibul daadang ngolo igirit Yesu Elope, anguna ka atakanun keng lokegiran.
Erai ekitaabo ngolo esidion ngolo ke Ebaibul, nait elimorit akisiakinet ka asalunet ngina ka akielario a Eemut A Ngolo Ajokan.
Kowana apolou ngina ka apukokino anangajep a ngina a Ngayonanin inges na ebe, “Apokalips.” Apolou keng ebe, “Apukor.” Apukorio naga itamunitae kojokan anakisikwanikinet a ekayean ngaputosia. A ngolo eyiai epetakinit ngiboro keng ngulu adau inges ayeun neni a ngolo iswome. Erai akiwolor, akisilereun nguna sek ewaitae. Nai apukorio na, nyerai anguna ka apukorio ngina a etunganane a Kristo, nai erai APUKOKINIO NGINA A NGITICISIO KENG ALOTOOMA NGATURIO A EKANISA NGUNA KANIKAAREI NGUNA AYIAKASI EPONITO ALOKINGAREN.
Ajokis ngina ka apukokinio Kan Ekuwuam a ngolo Akuangan neni a ekanupan a ngolo a kire, nyerai ibore ngini inyogoo nooi. Tokona erai apukokino ibore ngini iitana noi aneni kon lopite ngolo nyiyenunitor iyong. Tokona nyerworo ayong nguna ka ekitabo angolo kaapukokinio ka iyong. Erworo ayong nguna ikamunito apukokinio DAADANG. Erai ibore ngini ejok noi alokanisa. Iitunito iyes alotooma Matayo 16 neni abunio Yesu kingit ngikasiomak keng akingiset na tema,
“Ebasi mono ngitunga erai lokoku a itunganan ngae?
Apotu ikes tobongokis temasi ebasi ngice ebe, irai iyong Yokana Ekebatisan: ngice ebasi Yeremia, kori epei alotooma ngikadwarak.
Ibasi nai iyes ngae ayong?
Tobongok Simone Petero tema ebe, irai iyong Kristo, Lokoku ka Akuj a ngina ayiaran.
Tobongok Yesu inges ebe, ikitererengitoi iyong Lokoku a Yona anerai emam itunganan ikitodik iyong nu, nai papa kang ngolo eyiai tooma nadis.
Ayong dang abala neni kon ebe irai iyong Petero, kidiama ataaba na adukokini ayong ekanisa kang, ka ngidorin ngulu ka akibois a ngikatwak nyipiyorete inges.”Ebasi ngulu a Roman Katolik ebe, edukokinitae ekanisa neni a Petero. Erai ngun kire nguna ka akuwuan jik. Kikoki Akuj ai edukokini ekanisa neni a itunganan ngini pa ecasit, ngini tar abu tonger Ekapolon Yesu ido kilami dang apaki ngina etiyiaa ngun-a? Nyepedori Akuj adukokin ekanisa keng nitunganan idio ngini idounitoi alotooma asecit. Ka nabo mam pa arai tar adio taaba dang ngina keperi a nen ido esibit kebu Akuj kitopoloyo ngalup ngadies anakiding a ngin. Mdere tar ikwa ngina ebakatar ngulu a Protestant, ebe edukokinitae ekanisa neni a Yesu. Arai APUKOKINIO. Tosiom iyong inges alopite a ngolo eyiakar; “Meere akuwuan ka ngaokot IKIPUKOKINI iyong nu, NAI ERAI PAPA KANG INGES IKIPUKOKINI IYONG, ido KIDIAMA ATAABA NA (APUKOKINIO) ADUKOKINI AYONG EKANISA KANG.” Edukokinitae ekanisa kidiama Napukokinio, “Neni ebookore ebe, Irworo Ekapolon ikona ta.”.
Ekokini Abele eyenuni nguna kitiya anguna ka ainakin amuronot ngina ajokan neni ka Akuj ai? Kan akiyiun abu inges kijau apukokinio ngina angaokot. Mam pa abu Kaino toriamu ekabila ka apukokino a ngin (Atabo keyiakatar inges dang akiciket) angun pa apedorit inges alemun amuronot ngina iyookino. Erai anguna ka apukokinio a ngina ebunit aneni ka Akuj inges abu yau atiaketait ido inak Abele akiyiar ngina emam nyedaun. Kwana ipedori iyong ayaar nguna ebala ekeyokon, kori nguna itatami eseminari, tar ikitatamitai iyong ka aosou, mati ikipukoki iyong Akuj ebe, Yesu inges erai Kristo ka atemar erai ngaokot ikitesegunete iyong, ido Akuj ngin inges erai ekalakunan kon, nyipedori iyong ariamun akiyiar ngina emam nyedaun. Erai apukokinio ngina ke ekuwuam itiyai ngun.
Alimunit sek ayong atemar ebe, Ekitaabo lo ngolo ka Apukokino lo erai apukokinio ngina a Yesu ka nguna itiyiae Inges alotooma ngaturio a ngikanisae a ngulu kanikaarei. Erai Apukokinio anerai apotu ngikasiomak dang ngikulepeki nyeyenut akiyookino ngina igiritai na. Aroko nyepukokina ikes sek. Iitunito iyes atemar apotu ikes potu neni a Yesu alotooma Ekitabo ngolo a Ngiticisio ka kingita Inges temasi, “Ilosi Iyong tokona akinyakakin ebuku nakan nguna a Israel a?” ido abu Inges tema, “Mam nyerai a nguna kus ayenut ngisaae kori ngapakio.” Atamete ngikiliok ngul atemar eyiakatar Yesu apukan ngina alokwap. Nai arai ebuku ngolo ke ekuwuam alosi Inges adukukun. Emam tar pa abu Inges tolimok ikes nguna etapito Akedoketait alotooma apukan, naarai aroko Papa nyepukokina Inges. Na kwana akau ka Aketwanare ka ayiarun, ka alotooma apaki na alotooma Akepis ngina ka akijaanakin ngina ka akimaima, apedo Inges asipokin anege alotooma Akepukokinio a Elope neni a Yokana apolou ka Akesir ka ayiakut Keng tooma lokanisa nguna elosikinit Inges etic.
Alotooma apukokinio naga ikilimokinit Inges iwon epite ngolo eyiakaunor ekisali ngolo a Satan. Elimorit Inges epite ngolo ebunio Inges akiting Satan, ka acakakin inges nanam ngina ka akim. Epukunit Inges asalunet ngina angikaronok angulu iwapito Satan. Ka eremokino Satan ngun.
Iyianyunitor mono iyong epite ngolo engoikinitor Satan ngikitaaboi ngiarei ngulu ke Ebaibul akilo nguluce daadang a? isitiyiae inges ngikaswomitok Ebaibul a losukul ka ngikaosok ngice ngulu ke erionget a ngolo enyaritae ebe, pseudo- scientist isitiyiae inges ikes akisiria Ekitabo ngolo ka ageun ka Ekitabo ngolo ka Apukokinio. Alotooma Ngikitaboi ngulu yiarei lu ikiriamuni iwon akisiakinet ngina a Satan ka ngirotin keng ngulu aronok ngul ka epite ngolo eyiakaunor awasia keng. Inges nai isiriaa inges Ngikitaboi ngul. Itiilit inges akipuduno kinga anguna ka akisurum inges ngileec. Ido alotooma Ngikitaboi ngulu yiarei ngul eyiai inges a nen erai ngolo ipuduno kinga ejok noi akitodol ngina ikiyenunia iwon eyiakae keng, abu Yesu tolimu nguna nguna etapito Satan ebe, “Emamukatar inges akibois adio alotooma kang ka ayong dang amamukatar akibois adio alotooma keng.” Ikatakinit Satan akitogogong ngun ka ecerot; nai emam nyepedori inges, aso itiyiae inges daadang ngun epedori anguna ka amunyar akikinyomit tooma Nakirot. Nai ngina egerio ekanisa akinup Satan ka tonup apukokinio ngina a ekuwuam ngina ka Akirot, emam nyilounete inges ngidrin ngulu alokatwak.
Kimiekinai mono ayong ewaaki akirot tooma ne alotooma akijaanakin kang a elope, erai pa kimitakis iyes. Iyenete iyes daadang atemar, ainakinet ngina eyiai tooma nakiyiar kang na erai ngina Ekujuwana. Erai ainakinet ngina epedoritor Ekuwuam ngolo Akuangan akingic ngidekesio, ka ngatameta nguna angitain a ngitunga, ka ngiboro ngice ngulu imunono ngulu erai Akuj bon eyeni ido atopukoki Inges ayong. Kerai toyiakas iyes ngaren ne neni ayiai ayong ne ido kingolikis nai iyes ngireetin a ngitunga epite ngolo eyiakaununotor apaki ngina eanyunia Satan atemar elosio akisilereun inges. Kwana, nyerworo rika ayong nguna etapito ngitunga. Erai ebe adau Satan akimidiikin nakiyiar kec anguna ka asecit, agelegelia ka edeke. Nai ebeit iyong kitee ngikecereetin. Eyeni Satan atemar elosio akisilereun inges, ka ngakiloconokineta nguna ke etyai epote loreetin a ngitunga. Ebulit Satan. Eyeni inges atemar ebe eyapi ekuwuam ngolo ka Akuj ainakin ngitunga ayenun ngiketicisio. Inges itidingitor inges acunanakin na nooi. Ngina enyaraere ngirorua ka topukunoi ngidekesio, eremokino Satan ngun. Kwana nyo yen? Emam nyerai akisiom ngatameta a ngitunga, emam nyerai ngadam, meere tar ngakukujasia. Erai APUKOKINIO kan ekuwuam ngolo akuangan. Inges bon erot ngolo apedoria ayong ayenun ngun. Eerobo ca epedorete ngatameta ka akuwan anyara idiobore dadang nai Ekuwuam ngolo Akuangan.
Kimieki nabo eketoodik ayong iyes ecerot ngolo itidingitor Satan ekitabo ngolo ka apukokinio a Yesu Kristo alotooma ekanisa. Eyeni inges atemar erai Yesu Kristo ngolopei ngol bien, nakuwuarina ka ngikaru daadang ido emam nyiloconokin. Eyeni inges akilo ngatomonikanikomwon alotooma amiat a ngikasiomitok a ngulu ke esukul ngulu itatamitae ngakiro ka Akuj a losukul. Eyeni inges atemar ebe, ikwapei nyiloconokinor Akuj alopitene keng, inges atemar nyiloco Inges alotic keng. Angun eyeni Satan atemar ekanisa ngolo esiaunan ngolo a Pentekoste ngolo eyiakatar apedor ka Akuj (Mariko 16 eyiai lotic) inges ekanisa ngolo Akire ngolo elimit Yesu atemar erai ngolo keng a Elope. Nguluce daadang erai ngikaliokok. Ido ebeit kikote neni.
Tokona totamunito nu. Kristo alotooma ekanisa ngolo a kire erai arucoret ngina ke ekitaabo a ngolo a Ngiticisio a Ngikiakia. Nai itoodiunit ekitabo ngolo ka Apukokino epite ngolo ebunio Ekuwuam ngolo itepegit Kristo alomun tooma lokanisa ido kitongorianu inges, kitarau inges ngolo jalam, ngolo itusubuna ka emamukatar apedor adio. Ipudunit inges Satan kinga, ka apukunit ngiketicisio (Akitakinit amunyar ngitunga ka Akuj ka amunaun Akirot ngina ka Akuj) paka jik akitodol apaki ngina ecakakinere inges tooma nanam ngina ka akim. Itiji inges ngun. Nyepedori inges awoikin ngun. Eyeni inges atemar ebe, erai keriamut ngitunga APUKOKINIO ngina AKIRE ngina ke EKANISA a ngolo AKIRE ka atemar ngai inges, eruwor inges ajore ngina emam nyetakani. Erai keriamut ikes apukokino ngina a kire ngina a ngikuwuamin a ngulu yarei a ngul angulu tokona itiyiaete alotooma ekanisa ngolo a Ngikiristo, ido anguna ke Ekuwuam a ngolo ka Akuj topedosi agicun ka kitepega ekuwuam ngolo ke eketidingan Kristo, emamukaun Satan agogongu alokingaren keng. Kiloun inges nabo nakuwuarina dang alopite a ngolo kolong elounia Kristo inges analongisat abu inges kilou ngakikatanakinet keng daadang nguna ka ariamun apedor aneni keng. Ee, eremokino Satan apukokino. Nai eminai iwon inges (apukokinio). Kaapei ka apukokinio ngina akire anakiyiaryok, emam ngidorin ngulu alo katwak nyikilounete iwon, nai ilounio iwon ikec.
Ayeni ayong atemar ipedorete iyes akiitun nguna sek abu ayong atolimunite alotoma akisiakinet ngina ka akirot a na ebe, ekitabo ngolo tokona ikisiomi iwon lo erai inges apukokino jik ngina a Yesu Kristo, a elope alotooma ekanisa ka alotooma ngaturio ngunace nguna eponito. Ido abu nabo ayong atolimu atema iitana Ekuwuam ngolo Akuangan ikiinaki iwon apukokino ani kemam ikipiyori iwon ariamun ngun. Ayaun ngatameta nuyarei nu iwapei ingolikini iyong atemar emam nyeyaikini kisiom ca ngina palemka akitam itaraunete ekitaabo lo ngolo akire. Eyaikini etic ngolo ke ekuwuam a ngolo akuangan. Apolou keng atemar nyepukokinio ekitabo lo neni a idiotunganan mati ekabila edio ngolo a ngitunga. Iitani idio ngini eyiakatar ngakonyen nguna ka akiduar. Iitani agogongu ngina kiiraret aneni ka Akuj. Iitani ngakicocoet nguna ekujuwaka, meere ca araut ekesisan ngolo isikwaani engaet ke engaet, tar kejuwak ngun. Nai akimunono iitanit akitatam ngina a ekuwuam kori emam nyecauni. Epite ngolo iitanitere iwon akiirar aneni ka Akuj ka akiperikin ngayokowat erai nguna engaara ka aruwor ngulu ikipotokino Lokuwuam akiirar ka ayenun.
Ikwapei adaunia sek ayong alimun, ekitabo lo (Apukokinio) erai angetakinet ngina a Ngakigiret. Iwuakinitae dang neni ecamuna alotooma Ngakigiret, nasalunet ngina a Ngakigiret. Tokona ipedori iyong eyenun apolou ngina ebookor inges ebe idio dadang ngini iirari ka esiomi inges isirerengitoi. Erai Apukokino ka Akuj inges ikiinakini iyong apedor kidiama Satan. Ka ipedori iyong aanyun apolou ngina ilamitere dang ngulu iyiatakinete ngadi nen kori elemarete idiobore a nen. Ebeit kikokis nenipei, naarai ngai epedori alemar nawai anapukokinio angina edolit a ngina ka Akuj ido topedo akiloun Satan? Erai nguna epataka. Emam nabo acepedor ngina etirono mati apukokinio ngina ka Akirot. Kingolik, alotooma engaet ngolo kiuniet iikinitai arerengu neni angulu einakinete ekitaabo logo ngatameta kec dadang. Atami ayong erai nu nguna eomitere epite ngolo kolong asiomiata ngisasedotin Akirot neni ka atukot nataparacu. Kingolik yong, emam neni lala pa apedorito akisiom angun asiomanakini nait ikes esaseradoti. Ikwapei ca araakar Akirot ka Akuj, ayiai arerengu nen. Emam pa amisitai kerai akisiom kori akiirar.
“Anerai adolu apaki” Aroko sek apaki nyedoluno. Alotooma aosou ka akingadaet ngina ka Akuj apukokino ngina eumokina na (Ata bo kerai inges ibore ngini ayenen a neni ka Akuj) pa apedorit akipuduno. Angun ikipedori iwon akisisaun ekisil atipei-apukokinio ka Akuj anguna ka adio nyamet apedori abunore alotooma anyamet ngin bon, ka alotooma akepaki ka ngina itemokino. Kingolik iyong eemut ngolo a Isarael. Abu apikokinio ka Akuj bu neni a Musa alotooma apaki keng ngina etemokino alotooma ngiemuto, ka abu bu anapaki angina ekaloikinioto ngitunga Akuj. Yesu, Elope, abu bu anakilelebio ka apaki, torai Inges apukokinio ngina ileleba ngina ka Akujuwanut. Ka alotooma anyamet na (Laodikia) ebuni apukokinio ka Akuj anapaki a ngina itemokino. Emam nyediakar, kori nyiyecun. Totamatama nu ido kiricak ikes ejok, naarai ikiyia iwon napaki ngina ka awasia tokona.
Tosiomete alo akirot... Apukokino a Yesu Kristo.
