Kristo niwe naama ya Ruhanga eshuurwirwe.

William Branham.

Read the full account in...
Kristo niwe naama ya Ruhanga eshuurwirwe.

Yetegyereze, Ruhanga akaba aine ekigyendererwa ky'enyabushatu omu naama nkuru egi y'omubonano. Ruhanga, omu naama Ye nkuru y'omubonano ei Yaabaire aine ensi etakabaireho, Agiinemu ekigyendererwa ky'enyabushatu. Kandi hati ekiturikwenda kuzaho, akasheeshe aka, ni, ekyo kigyendererwa ky'enyabushatu niki? Mwareeba? Hati, niinyikiriza, ahabw'okuhwera kwa Ruhanga, Ori hanu, kandi Naija kukitworeka. Hati, ku Araabe yaabaire aine ekigyendererwa eki ky'enyabushatu, nitwenda kureeba ekigyendererwa eki ky'enyabushatu niki.

Ekintu ky'okubanza kikaba kiri, ngu, Ruhanga akaba naayenda Kweshuuruurira abantu. Akaba atarikubaasa kukikora nka Yehova Ruhanga mukuru Owaabaire ashwekire akaabunga koona, obwire, n'Obutahwaho. Akaba atarikubaasa. Ni mukuru mononga kubaasa kushuuruurirwa abantu, ahabw'okuba kikaaba ekitarikwetegyerezibwa munonga. Ekiriho eki ekitakagiraga butandikiro kikaabaasize kita... ngu waaheza kuhingura ekyanga ky'omwetoorooro gwa biriyoni amagana n'amagana hamwe na zaatwiriyoni na twiriyoni z'emyaka ei ekyererezi kirikumara nikiiruka, kandi okagumizamu okataaha ahataine obugarukiro, omu Butahwaho, kandi Ekihangirwe kikuru ekyabaire kiri ebyo byona, kandi na hati nikwo kiri.

Kwonka eki Yaabaire naayenda kukora, Akaba naakunda eky'okuba Ishe, ahakuba Akaba ari Isheboona. Kandi omuringo gwonka ogu Yaabaire naabaasa kukyorekyeramu gukaba guri okuhinduka Omwana w'omuntu. Egyo niyo nshonga eyaatumire Yesu yaaguma naagira ati, “Omwana w'omuntu.” Mwareeba, tibaramanyire eki Yaabaire naagambaho, baingi omuribo. Kwonka hati nimukyetegyereza? [Abateeraine baagira bati, “Amiina.” - Omur.] Mwareeba? Akaba naayenda Kweyoreka. Ekyo kikaba kiri Ekye, kimwe aha bigyendererwa Bye bikuru eby'enyabushatu, kikaba kiri okweyoreka We wenka, okweyoreka hamwe n'abantu, okweshuuruurira omuri Kristo.

Ekya kabiri, okuba ow'okubanza omu Mubiri Gwe gw'abaikiriza, ogwo ni, Omugore We, kugira ngu Abaase kutuura omu bantu.

Hati, Akaba naabaasa kukora ekyo omuri Adamu na Haawa, kwonka ekibi kikabataanisa, n'ahabw'ekyo hati hakaba nihateekwa kubaho ogundi muhanda gw'okukigarura ogundi murundi. Oo, mugyenzi! Oo, hati, eki, eki nikigasha munonga, ahariinye, nangwa n'okukiteekateekaho kwonka. Mwareeba? Nimureeba ekigyendererwa kya Ruhanga eki kyabaire kiri? Hati ahabw'enki Atararekire Adamu na Haawa batyo? Obwo Akaba ataribaasa kworeka obwijwire Bwe, Ebimurimu omu bwijwire. Ahabw'okuba, Akaba naabaasa kuba Ishe okwo, ago n'amazima, kwonka nabwo N'Omujuni. Noogira oti, “Noomanya ota ngu Akaba ariwe?” Niwe, 'habw'okuba nkatunga obumanyi. Mwareeba? Mwareeba? N'Omujuni, kandi ekyo Akaba naateekwa kukyoreka. Mbwenu Akaba naabaasa kukikora ata? Okurabira omuri Kristo wenka. Akaba naabaasa ata kuba Omwana? Okurabira omuri Kristo wenka. Akaba naabaasa ata kuba Omutambi? Okurabira omuri Kristo wenka. Mwareeba, ebintu byona nibimariirira omu Muntu ogwo omwe, Yesu Kristo. Oo, mugyenzi!

Ku ndikukiteekateekaho, nde-ndeeba ebigombe by'amadiini nibirugaho, n'ebindi byona nibihigama, mwareeba, naareeba ekigyendererwa kya Ruhanga kikuru, naayeshuuruura We wenka. Kandi obwo, okubanza, Kweshuuruurira omuri Kristo, “obwijwire bw'Obwaruhanga obureeberwa omu omubiri.” Kandi, bwanyima, kureeta obwo “bwijwire bw'Obwaruhanga obureeberwa omu omubiri” omu bantu, kugira ngu abaase kuba ow'okubanza, omureeberezi, oyebembeire.

Ekindi, ekiro, ku muraabe mutatungire orutambi rw'amaraka orwo, nkabuurira hanu ekiro kimwe, aha “Mbohe ya Yesu Kristo.” Paulo, embohe! Mwareeba? Ruhanga yaakuhitsya aha kuba embohe Ye, obwo nooba otarikubaasa kukora ekintu kyona kureka eki Omwoyo yaakugambira kukora. Paulo, n'obwengye bwe bwingi bwona, akeegyesa... akeegyesibwa Gamalieli kuba omunyamurwa mukuru nari rabbi, ekiro kimwe. Kandi akaba naayetenga kuba ow'ahaiguru munonga. Omu by'obwengye akaba ari omushaija w'amaani, aine obushoboorozi bwingi, omushaija rugambwa omu ihanga. Kwonka akaba naateekwa kuhayo buri kimwe omuri ebyo, mwareeba, kugira ngu ahindukye ekicweka ky'Ekigambo, kworeka Yesu Kristo. Akaba naamanya eki kyabaire nikimanyisa kugamba...

Akagira ekiteekateeko ky'okuza seeri ahantu nanka, ab'eishe-emwe bamwe bakaba bamwetsire, kwonka akazibirwa Omwoyo kukora nk'oku arikwenda. Oo, kuri-kuri abantu b'omwoyo ekicweka nibabaasa kukwata ekyo! Mwareeba? Akazibirwa kukora nk'oku arikwenda. Eki yaabaire naabaasa kyonka kukora... “Omwoyo yanzibira.” Mwareeba? Akaba ari embohe ya Kristo.

Reero, ogu mufumu mukye ekiro kimwe, ou yaabaire naamanya, Paulo akaba naamanya ngu aine amaani g'okubinga egyo daimoni, kwonka akaba naabaasa kukikora Ruhanga yaakikunda. Akaguma naamukuratira buriizooba, naamuyomberera, kwonka ekiro kimwe Omwoyo yaamuha orusa. Reero yaamukabukira, omwoyo ogwabaire gumurimu. Mwareeba? Akaba naamanya eki kyabaire kiri okuba embohe.

Musa, obwengye bwe, akaba naateekwa kubufeerwa kugira ngu abone Kristo, kuba embohe. Bwanyima Ruhanga ku yaaherize kumwihamu ensi yoona, n'obumanzi bwe bwona obu yaabaire aine, reero akeemerera omu Maisho g'egyo Nyomyo y'Omuriro ekiro ekyo, akashangwa ataine bigambo. Taraabaasize na kakye, akaba nangwa atarikubaasa n'okugamba, nikwo yaagambire. Ruhanga obwo akatunga embohe. Mwareeba? Tokaagyezaho kukuratira okusheruririza kwawe. N'ahabw'ekyo kikeetagisa Ruhanga kuhamya omushaija ogu, n'okumuha amaani agarikugasha kugira ngu abaase kushuuma eifo okwo.

Reero yaagira ati, “Mukama, ngambiire Faraho eki Ogambiire, kwonka yaayanga kukikora.” Yaagira ati, “Reero twara egi, enkoni yaawe,” Ruhanga naagamba, ekyo n'Ekigambo kya Ruhanga, “za ebiso kuriya reero ogyorekyereze Burugwa-izooba, haza oyete enshohera.” Kandi enshohera zaahangwa, ahabw'okuba Akaba aine embohe ei Faraho yaabaire atarikubaasa kushashura omushaara gwona. Tihariho muntu weena owaabaire naabaasa kumuhindura na kakye. Akaba ari embohe ehweire emize omu njegyere z'Ekigambo kya Ruhanga, ekomeirwe ahari OKU NIKWO MUKAMA ARIKUGIRA kwonka.

Oo, kuri Ruhanga naabaasa Kwetungira embohe nk'ezo! Hati, obwo nibwo Arikubaasa kworeka okuba ow'okubanza Kwe, nimureeba. We, Aine omushaija, nari omuntu, otarikumanya ekintu kyona kureka Kristo. Mwatunga eki ndikumanyisa? Ni kirungi. Ekyo n'ekya kabiri. Eky'okubanza, We okweyorekyera kimwe, Ruhanga omuri Kristo. Ekya kabiri, kuba ow'okubanza, ahabw'eki, omu Kanisa Ye, nigwo Mubiri Gwe, Omugore, okuhitsya obu Arikubaasa kuba ow'okubanza Kubeeyorekyeramu. Ni kirungi.

Kandi, ekya kashatu, okugarura busya Obukama kubuhitsya omu mwanya gwabo oguhikire, obwagwire ahabw'ekibi kurabira omuri Adamu w'okubanza, kubugarura ahu Yaabaire atambura omu mabeho g'omwabazyo, n'abantu Be, naagamba nabo, naakwatanisa nabo. Mbwenu hati ekibi na rufu bikaba bibataaniise n'Okubaho Kwe n'okweyoreka Kwe kwona. Nimukyetegyereza? Omusingye gw'ensi gutakatairweho, okworeka ebyabaire Bimurimu byona, eki Yaabaire ari.

N'ahabw'ekyo, weena orikwikiririza omuri Tiriniiti hanu kuri noobaasa kweyorobya edakiika, noobaasa kureeba ngu Isheboona, Omwana, n'Omwoyo Orikwera ti Baaruhanga bashatu. N'ebimurimu bishatu bya Ruhanga ogwo omwe. Mwareeba, n'okweyoreka. Isheboona, Akaba ariwe, Akaba naayenda kuba Isheboona. Akaba ari Isheboona, Akaba ari Omwana, kandi Niwe Omwoyo Orikwera. Kandi Isheboona n'Omwoyo Orikwera n'Omwoyo ogwo omwe. Timurikukireeba? Mwakyetegyereza? Ti baaruhanga bashatu. Baadaimoni bakabagambira ebintu ebyo, kubahindura abarikuramya ebishushani. Mwareeba? Ni Ruhanga omwe oyorekirwe omu bimurimu bishatu. Kuba Isheboona, kuba Omujuni, kuba Omwana, kuba Omutambi, mwareeba, okweyoreka Kwe.

Niinyenda kugyenda mpora okumara akaanya kakye kugira ngu nangwa n'ab'ahurikiize aha rutambi rw'amaraka babaase kutunga ekyo kiteekateeko, abo abarikubaasa kwetegyereza. Kikantwarira egyo shaaha yoona, yoona, buri rimwe omu mashomo ago. Kwonka niinyesiga ngu ninkishoboorora kurungi ekirikugasha ngu nimubaasa kureeba ekingyendereire kuhikaho. Mwareeba?

Ruhanga, owaayeyorekyeire omuri Yesu Kristo, Owaabaire ari byona Isheboona, Omwana, n'Omwoyo Orikwera, “okwijura kw'Obwaruhanga obureeberwa omu mubiri.” Hati, “okwijura kwona kw'Obwaruhanga obureeberwa omu mubiri” nikutuura omu Kanisa Ye, okuba ow'okubanza omuri byona. Byona ebi Ruhanga yaabaire ari, Akabishuka omuri Kristo; kandi byona ebi Kristo yaabaire ari, bikashukwa omu Kanisa, abaikiriza. Ti kigombe ky'ediini! Ekyo nituza kukihikaho omu dakiika nkye, kandi nikiza kukiiha omu biteekateeko byawe ebiro byona, mwareeba; kukworeka ekirikureeta ekyo, ahabw'okuhwerwa Ruhanga, ku Araikirize ngu tukitungye.

Ekigyendererwa Kye ni ki hati? Kweyoreka nk'Omwana, mwareeba, mbwenu, hati, ngu Omuriwe habaase kutuuramu “okwijura kw'Obwaruhanga bwona obureeberwa omu mubiri.” Ndi, nyine ekitabo ky'Abakolosai hanu, omu maisho gangye hanu hanu. Mwareeba? Ekyo, omu Byahandiikirwe hoona, ekyo nikyo kyabaire kiri ekigyendererwa kya Ruhanga. Reero, kandi okurabira omuri aga Magara g'Omwana ogu, omusharaba Gwe, “Eshagama,” hanu nikigira ngu, “y'omusharaba Gwe,” kugira ngu Abaase Kwegarurira Omubiri We wenka, Omugore; niwe Haawa, Haawa wa kabiri. Kandi Ruhanga akakiha omu kirikushushanisa, nk'oku yaakozire Musa n'abandi boona. Ekintu nikyo kimwe eki Yaakozire omuri Adamu na Haawa, akaha ekirikushushanisa, ngu bakaba bari Kristo n'Omugore. Niwe Adamu wa kabiri; Ekanisa niyo Haawa wa kabiri.

Kandi obwire bwona Haawa wa kabiri yaaba naafungura naahakanisa Ekigambo, tarikukora ekintu nikyo kimwe nk'eki Haawa w'okubanza yaakozire? [Abateeraine baagira bati, “Amiina.” -Omur.] Yaagyezaho kugira ati, “Mpaho, kikaba kiri eky'obusingye obundi.” Kandi ekyo nituza kukihikaho omu dakiika nkye, ku Araabe yaagambire ngu kikaba kiri eky'obundi busingye. Nibubaasa buta kuba obundi busingye, kunu Atahinduka “oku abaire ari nyomwabazyo n'eriizooba arikwo ari, kandi arikwo ariguma ebiro byona”? Kwonka ekyo Ruhanga akakigyenderera kandi “yaakishereka abanyabwengye n'abarikwetegyereza, kwonka yaakishuuruurira abaana bato abaatoorainwe ira batakabaireho” abaatoorainwe ira kukyakiira.

Read the full account in...
Kristo niwe naama ya Ruhanga eshuurwirwe.

Mumanye ngu, nk'oku omubiri guba gumwe, gukagira engingo nyingi, kandi engingo ezo zoona ez'omubiri, n'obu ziraabe ziri nyingi, guba omubiri gumwe; na Kristo nikwo ari.

Ahakuba omu Mwoyo omwe twena tukabatizibwa kuba omubiri gumwe, n'obu turaabe turi Abayudaaya nari Abagriika, abahuuku nari ab'obusingye; twena tukanyweisibwa aha Mwoyo omwe.

1 Abakorinso 12:12-13