Na ku kwiluka kobe we mwine wishintililako.
Icebo cakwa Lesa e Mweo.
William Branham.Belengeni ili buku...
Na ku kwiluka kobe we mwine wishintililako.Amapinda 3:1-6,
1 We mwana wandi, wilaba amalango yandi; na mafunde yandi leka mutima obe uya linde:
2 Pantu ukutantalila kwanshiku, ne myaka ya mweo, no mutende, yakaba yakulundako kuli iwe.
3 Wileka uluse ne cishinka fikutaluke: fikake mu mukoshi obe; filembe pa cipampa ca mutima obe:
4 E fyo ukasanga ububile no kushilimuka kusuma mu menso yakwa Lesa na ya bantu.
5 Tetekela muli Shikulu nomutima obe onse; no kwiluka kobe we mwine wishintililako.
6 Uko konse wenda umwishibe, nao akatambalika inshila shobe.Owe, ndetontonkanya lilya lilembo ilyawama nganshi. Nomba ndefwaya ukusenda nge sambililo, ukufuma mu vesi 5, “No kwiluka kobe we mwine wishintililako.”
Nomba, ili lili isambililo ilyeni nganshi, ku bushiku ubo tuleikalamo, pantu ukukonkomesha, ilelo, kwaba mucine ukwabikwa pamasambililo, kabili pa kwiluka kwesu fwebene pa fintu. Bushiku bwakusambilila. Lelo tulesanga ukutila pano, ukutila iyi nsoselo iyeni-nga yambi Amalembo-yalikwata icifulo caiko, kabili tulesubila ukutila Lesa ali nokutuleka ifwe ukumona uko icifulo cibelele.
Ilelo tulatuma abana besu ku sukulu ukukwata ukwiluka. Elyo panuma ilyo bapwisha na ma sukulu ya kubelenga, ifwe tulabatuma kwi sukulu likalamba ku kwiluka kusuma ukwa kwishiba. Elyo ilyo bena bapwisha kulya, bamo abana balaba abashuka nganshi ukuya ku koleji, kabili ukuya ukupita mu koleji ukupwisha amasambililo yabo, no kwiluka kwabo ukwakwishiba, ifyo bena besa mukukwatilamo....
Inshita ishingi, ukukwata incito, imwe mulingile ukukwata nalimo ukwiluka kwe sukulu lya pa mulu, masambililo yaku koleji, atemwa nafimbipo.Nomba, Solomoni uwa mano alitwebele ukutila, “te cakwesha ukushintilila kuli kwena-ukwiluka kwesu fwebene. mwishintilila pali ifi fintu, Pantu.... Ifwe tulasunguka mulandunshi ukutila ena engasosa icintu nge ci.... pantu ni pa mulandu wa kutila, ilingi line ukwiluka kwesu ukupya kwaba ilingi line amano ya muntu, ico caba icapusana ku Cebo cakwa Lesa. Ndetontonkanya ukutila filya efyo Solomoni aleesha ukupanda amano abana bakwe-tacali ukuba abatutu, lelo tabalingile ukushintilila ku kwiluka kwabo.
Kabili ine ndetontonkanya cena kuti caba ukukoselesha ukusuma ilelo, nga ifwe twalisosele ku bana besu, kabili na kubana bakwa Lesa, ukutila, cena cili fye bwino ukukwata amasambililo, tapaba nangu cimo icakususha cilya; lelo ilyo yalya masambililo yali ayapusana ku Cebo cakwa Lesa, lyena shintilileni ku Cebo kabili lekeni amasambililo yenu yabe, mwamona. pantu Icebo.... Kabili amasambililo yakeminina, kabili yaka mupela incito isuma, kabili nalimo ukwikala kusuma pakati ka bantu abasambilila, lelo.... Cilya cili fye bwino, ico nalimo cikaba ubwafwilisho ubukalamba kuli imwe, ukumwafwilisha mufyandalama shenu, kabili ubwikashi bwenu-ukulenga ubwikashi nalimo ukuwaminako panono kuli imwe.Lelo ibukisha icintu cimo, we mwana wandi, iwe ulingile ukufwa. Te mulandu ubwingi bwa masambililo wakwata, ubwingi bwa fyantambi wingakwata ukwishiba, iwe ulingile ukukumanya imfwa, pantu calilembwa ukutila umuntu alingile ukufwa, kabili panuna ya cilya bupingushi. Kabili Lesa, ilyo.... Imfwa tayabipa nganshi; lelo ukwisa ku bupingushi e ciputulwa icabipa.
Nomba imwe kuti mwafwa, lelo panuma ya cilya bupingushi. Kabili Lesa takepushe kuli imwe, ubwingi bwa masambililo mwakwete ilyo mwali pano pesonde, ubwingi bwakwishiba ubo mwaishile kwata, nga cakutila mwalikwete Bachelor wa Art, atemwa ili yonse degree iyo imwe mwingakwata, nangula nga kapyunga. cena tacakafwaikwe kuli imwe.
Lelo cikesa fwaikwa kuli imwe, ico mwacitile pa lwakwiluka palwa Cebo cakwa Lesa. Kulya eko icifwaikwa cishila, pantu Cilya amasambililo yenu yali fye bwino, Lelo Icebo cakwa Lesa e Mweo. “Icebo candi e Mweo, kabili ukwishiba Cena e mweo.”
Kabili ena Atile,“Ukwishiba wene. Ena e Cebo.” E ico imwe kuti mwaishiba fye Wene ne Cebo, pantu Ena e Cebo. Kabili ulya e musango fye weka imwe mukeshibilamo Wene, caba ku Cebo Cakwe.Umo muntu kuti aisa no kusosa, “uyu e Lesa,” atemwa “ulya e Lesa,” atemwa “uyu e Lesa,” atemwa “ici e calungama,” kabili “cilya e calungama.” Lelo ifwe tulabwelela ku Cebo, ico caba Icine.
Kabili Icebo caba fye nga Ulutanda lwaku Kulyo-e lutanda ulwa cine. Te mulandu ni nshila nshi isonde lileelelamo, lulyo lutanda lwa ku Kulyo lwabikwa pakati ke sonde. Imwe mulabika compass yenu ku lutanda lwa ku Kulyo. Lwena lyonse lwaba pakati ke sonde. Intanda shimbi shelela mumbali pamo ne calo, lelo Ulutanda lwa ku Kulyo talutenshiwa.
Nomba, kampasi e Mupashi wa Mushilo, kabili e ... icakushintililako cenu kuti caba ulutanda lwa ku Kulyo. E ico Mupashi wa Mushilo lyonse akasontelela ku Cebo. Mupashi wa Mushilo takatale ukumutungulwila imwe ku cintu cimbi kano ku Cebo cakwa Lesa.E ico musango nshi umuntu engasuminina icisumino ilyo cena calipusana ne Cebo? kabili elyo nalyoline ukusosa ena alikwata Mupashi wa Mushilo? Mupashi wa Mushilo kuti amusontelela ukumutalusha kuli cilya. Cena cisenda Mupashi wa Mushilo ukusontelela imwe ku Cebo, pantu Ena e Cebo. Ena e Cebo. Kabili Cena kuti cacita fye.... Nge fyo icikasha muli compass yabikwa fye ukutonta ku ncende ya ku Kulyo, ulya e musango fye weka inga sontelamo. Kabili ilyo Mupashi wa Mushilo e mwine, kabili kalemba, kabili kapela wa mweo ku Cebo, musango nshi cene cinga sontelela umuntu ku cintu cimbi icashala kano Icebo?
E ico ilyo muntu asosa bena balikwata Mupashi wa Mushilo, no kusumina icintu cimo icapusana ku Cebo, cena cilangisha ukutila cilya te Mupashi wa Mushilo uwa cine uo bakwata, Mwamona. Cena kuti caba icipuku, ine tekuti ntalikishe cilya. Lelo cena tacaba Mupashi wa Mushilo wakwa Kristu. Lelo nomba, namwishiba inshita ishingi bena balasenda imipashi ya umo no mubiye, kabili e ico cilya limbi kuti casontelela-kwati mwibumba lya bantu-ku cintu cimo, lelo cena teti, cena teti cisontelele kuli Kristu. Lelo Mupashi wa Mushilo lyonse usontelela kuli Kristu, kabili Kristu e Cebo.
Ifwe tulemona ici palwalala nganshi muli Baibele, atemwa ndacita. Nalimo ine limbi kuti nalufyanya, lelo mumatontonkanyo yandi.... Lelo nshiletontonkanya ifyo. pantu ukutila, ici wishintilila ku kwiluka kobe we mwine pa fintu.... Nga iwe washintilila kukwiluka kobe we mwine, lyena iwe uli no kufuma mu nshila iyalungama. Iwe tekuti ushintilile ku kwiluka kwa muntu umbi, ilyo caisa ku mweo. Ukusanga umweo, iwe ulingile ukushintilila ku Cebo, Cilya cishinka.
Tulemona ici ukufuma mu kutendeka. Cena calilengwa ukwishibikwa palwalala nganshi kuli ifwe, ukufuma ku ntendekelo, ukutila Lesa apele ulupwa lwakwe ulwakubalilapo pe sonde Icebo Cakwe ukwikalilako. Icebo Cakwe ceka cali ica kwikalilako. Nomba, cilya tacaba ukupitila mu kulya icakulya, kabili na fimbipo, Lelo Icebo cakwe eco bali nokwikalilako umuyayaya. Kabili ilyo lyonse ilyo basungile cilya Cebo, balikele umuyayaya. Lelo iciputulwa fye icinono ica lilye shiwi lya cilya Cebo cabikilwe pambi, umunyololo onse waliputwike, kabili umutundu wa bantunse waingile mumfwa. Mwamona?
Nomba ifwe tulemona. Efa, uyo wali, ukwabula ukutwishika, ali umuntu uwa mano, uwantanshi ukufuma fye kuli Adamu, uyo wali umwana wakwa Lesa.... Kabili Efa, mucine-pa kuba muli cilye cifulo uko kushali ulubembu, takwali icifulo ca lubembu- ena mucine alingile alikwete ilyano ilyawama pafyo Lesa ali. Pantu cila cungulo ena no mulume wakwe baleenda mukantelelwe akebala, mucungulo bushiku, no kulanda icinso ne cinso na Lesa. Efyo icintu icabula amano ico muntu uyo wingenda icinso ne cinso na Lesa cila bushiku, kabili elyo kuti apilibukila ku cakwelenganya ukwa cintu cimo, ico calengele wene ukwelenganya ukutaluka ukufuma ku Cebo cakwa Lesa!
Ifwe tucili twalibakwata bena. Kabili cena caba icayanguka ukwelenganya ukufuma ku Cebo cakwa Lesa, panuma yakwikala mu Mulola wakwa Lesa, ukumona Icebo cakwa Lesa ukushimikilwa, Icebo cakwa Lesa ukulengwo kumonekela, bacakolwa na ba bembu besa ku cipailo kabili balapilibulwa no kulengwa ifibumbwa fipya muli Kristu, abantu aba mibele yabipa ukulengwa ba na mayo kabili na baume abatekanya; kabili elyo ukupilibuka ukufuma kuli cilya cintu icapalwa ico cabatungulwile kuli uyu mweo, kabili elyo ukuba uwapondamikwa ukukonkelesha umusango umo uwacisumino, ukwisaba uwalumbukwa nganshi, atemwa ukuya mu fyo bali no kwita i “bumba ilyawamisha ilya bantu.”
Cinshi, imwe mwaba mwi bumba ilyawamisha ilyo lyabapo! abana baume na bana banakashi bakwa Lesa! Cinshi, nalitemwa lilye bumba bwino ukucila ifyo ningacita... ne sha mfumu shonse na ba cilolo kabili ifintu fyonse ifyashala. Mpeni lilye bumba ilya petama ilya bantu. Nga bena tabeshibe ukuboko kwabo ukwa kulyo ukulekanya no kwa kuso kwabo, cikulu fye bena balishiba Lesa no kumutemwa Wene no kubombela Wene, kulya e kusefya ukwaku mulu kuli ine! Ee, mukwai!
Nomba, lelo tulesanga ukutila Efa balimunashishe ukwabula ubwafya kuli Satana ukufuma ku Cebo cakwa Lesa, kabili ena ashintilile pa kwiluka kwakwe umwine. pantu Satana aletele icintu cimo kuli ena ico cishali kuli wene ukwiluka ukwa cine ukwa kwa Lesa. Lelo ena alikwete icintu cimo icalandilwe kuli wene no mulwani, Satana, kabili ena alicetekele cena. Nomba tulesanga icaishilecitika pali ici. Caposele umutundu onse uwa bantu mu mfwa, pantu, mayo wa ntanshi pe sonde ashintilile ku kwiluka kwakwe umwine, ukupusana ne Cebo cakwa Lesa, no kuposela umutundu onse uwa bantu mu mfwa. Nomba, bushe mulecetekela cilya? Cilya e Cebo.
Cisuma, umwanakashi aba lyonse.... Ulukuta muli Baibele lwapashanyaniwa kumwanakashi. Kabili ulukuta ilelo kuti lwasumina umwina wa fishilano atemwa ifisumino, no kuposela ulukuta lonse mukupatulwa ukufuma kuli Lesa! Balya bantu abo abapyanisha filya fintu mu cifulo ca Cebo cakwa Lesa baba fye nga Efa. Kabili cena calicitwapo nshite shingi mpaka calibika iyi nkulo yonse ukuposwa ukufuma ku Cebo cakwa Lesa.
Kabili ilyo Icebo calengwa ukumonekela, Icebo casokololwa, bena tekuti basumine cena, pantu.... Bena tekuti bacicite cena, pantu bena balashintilila ku kwiluka kwabo abene. “Ulu lukuta lwalikulilwe pano, cena cifulo ica emba, Cena kabungwe akakalamba, cena ni membala uwa mubili ukalamba uwa bantu. Mulandu nshi ifwe teti tube kuli cilya? Ndi no kusubila muli cena.” Mwisubila mukwiluka kwenu mwebene, lelo subileni mu Cebo cakwa Shikulu.
Nomba, nomba cena calipwile mukulekelesha mumfwa ku mutundu onse, nge fyo nacisosa. Cimo cine nga nomba, ku bantu abengi abo abashintilila pa kwiluka kwabo abene, ifishilano fyabo ne fisumino, kabili na fimbipo, ukusosa Icebo cakwa Lesa tacaba conse icine, ukutila cimo ica cena caliputwamo kabili cimo tacaba. Musango nshi mwingakwata icitetekelo muli Baibele, nge ciputulwa ca yena caliputwamo kabili iciputulwa ca yena tacaba? Nga cimo ngo kubelenga kumo kuli ukwa lubana, lyena icintu conse kuti caba icalubana. Cena conse cilingile ukuba icalungama. filya fine icalungama.
Kabili yamo muli aya aye-twa ukuba ayapondamikwa, amasukulu ya Baibele, ukusambilisha ukwishiba kwa muntu, uko bena besa capamo no kwikala mu kabungwe ka bantu, no kusosa, “Nomba, lolekesheni, nge nshiku shafipeshamano... shalipwile mu nshiku sha batumwa....”
Kabili abantu abengi ukupitila muli bishop, atemwa abaume abacindama, kuti baikala kulya, no kusosa, “Cisuma, nga kuti nasuminishanya fye pamo nankwe, ukwabula ukutwishika lelo ine limbi kuti naba mu mulongo ukukonkapo pa cifulo cakwe.” Mwamona, lyena imwe mulashintilila ku kwiluka kwenu mwebene, mucifulo cakwiminina pa nkasa shenu shibili pa Cebo cakwa Lesa. Cilya e cilenga ififintu.Inshita imo akale, umo muntu.... Nali mukukansana pa musonko. Kabili batile kuli ine, batile, “Cinshi, ama trustees bobe tababa nangu cimo kano tulubi, ndemona.”Natile, “Nga nalikwete trustee mukabungwe uyo wakwete ilyano ilya pusana, kabili ena tekuti eminine-kabili nshilesakamana uyo ulelanda palwa cena-kuti alangisha amatontonkanyo yakwe umwine palwa cena, ine kuti na mufumyamo mukabungwe!” Ee, mukwai! Nangula cena cali icapusana ku cisumino candi, ndefwaya ena ukulangisha ico ena aletontonkanya ico cili icalungama. Cilya e co na mubikile palya, kumona ifyo alesosa palwa cena. Lelo ifwe twalikwata cilya.
Moneni, Yesu atile, muli Yohane Washila 10, “Impanga shandi shaliishiba ishiwi lyandi.” Ishiwi, mucine, e cebo Cakwe, ilyo Ena alelanda. “Impanga Shandi shaliishiba ishiwi lyandi. Ishiwi lyandi lyalishininkishiwa kuli shena ukuba ilya cine. Lyena lyalishininkishiwa, ukutila lyena li shiwi lyandi.” Nomba moneni, bena tababa aba kunakila ukukonka ishiwi ilili lyonse. Bena teti bacite. “Impanga shandi shaliishiba ishiwi lyandi, kabili umbi umbi shena tekuti shikonke.” Mu mashiwi yambi, shena tekuti shiluke ishiwi lya masambililo yafya bulesa ilyo lilesambilisha ukupusana ne Cebo. Impanga tashiluka cilya. nga filya kapumpe, mailo bushiku, tekuti eluke ukulila kwakwa na nkonko. Bena tabeluka, pantu ena ali ni kapumpe. Kabili cilya e cintu cimo cine ica cine, nowafyalwa cipya cipya mwana wakwa Lesa. bena beluka fye ifintu ifili fyakwa Lesa. Nomba, umo muntu atila, “Cisuma, nomba lolekesheni. Imwe kuti mwacita ici, ndetontonkanya.” “Cili, ndecetekela cena.... tacili uyu musango?” “Ndecetekela ukutila inshiku sha fipeshamano shalipita. Nshicetekela ukutila kulya e kundapwa kwa Bulesa.” “Nshacetekela ici.” Nomba, umwine mwine, uwafyalwa cipya cipya umwina kristu, cilya tacakatale ukwiminina mu matwi yakwe. Ena teluka cena nakalya. Kabili musango nshi umuntu uyo wacetekela muli Lesa, kabili kuti abelenga Baibele, no kumona ukutila Ena aba cimo cine mailo, ilelo, nomuyayaya, akatala ukusumina icintu ca musango nga filya, ine nshiluka cena.
E ico, bena tabashintilila kukwiluka kwabo abene.
Belengeni ili buku...
Na ku kwiluka kobe we mwine wishintililako.
