Naayeta Omugore wa Kristo kurugayo.

William Branham.

Read the full account in...
Ruhanga w’obusingye obu obubi.

Hati, eishomo ryangye akasheeshe aka, ni: Ruhanga w'Obusingye Obu Obubi. Nk'oku twashoma omu Byahandiikirwe, “ruhanga w'ensi egi, w'obusingye obu obubi.” Hati, Obutumwa obu nibworeka ebibi by'obusingye obu obubi, kandi bushorongire n'obunabi bw'obusingye obu obubi. Kandi niinyikiriza ngu buri... ngu Baiburi eine eky'okugarukamu kyona ahabwa buri busingye, kikahandiikwa kare omuri Baiburi, ahabw'omwikiriza w'obusingye obwo. Niinyikiriza ngu buri kintu ekiturikwetenga kihandiikirwe hanu Hanu, nikyetenga kushoboororwa Omwoyo Orikwera kwonka. Tindikwikiriza ngu omuntu weena omu nsi aine obugabe bw'okushoboorora Ekigambo nk'oku arikweyendera. Ruhanga tarikwetenga omuntu weena kushoboorora Ekigambo Kye. Niwe Orikweshoboororera. Akagira ngu Aryakikora, kandi Akikora.

Nk'oku ngambire emirundi mingi. Akagira ati, “Omwishiki oshugaine aryagira enda,” Akagamba ekyo kurabira omu kanwa ka nabi, kandi akagira enda. Tihaine omuntu weena oshemereire kushoboorora ekyo. Omu kutandika, Akagira ati, “Habeho omushana,” kandi gwabaho. Tihaine omuntu weena oshemereire Kukishoboorora. Akagira ati, “Omu biro by'aha muheru, Aryashuka Omwoyo We aha bantu boona,” kandi Yaakikora. Tikirikwetenga ow'Okukishoboorora weena. Akagira ati, “Omu biro by'aha muheru, ebintu ebi,” ebiturikureeba nibibaho hati, biryaba biri hanu. Tikirikwetenga okushoboororwa na kakye. Kikaheza kushoboororwa. Mwareeba?

Hati, mwetegyereze mutaireho omutima hati obwo turiyo nitwega Ekigambo. Ruhanga w'Obusingye Obu Obubi, obu tutwiremu hati. Nikibaasa kureebeka nk'eky'omutaano, ekintu ky'omutaano munonga, omu busingye obu bw'embabazi, obu, “Ruhanga arikwihayo abantu ahabw'Eiziina Rye,” ogwo n'Omugore We, omu busingye obu obubi obushemereire kwetwa obusingye obusiisikaire. Obusingye bwonyini obu “Ruhanga arikweteramu abantu ahabw'Eiziiina Rye,” ahabw'embabazi, kurugayo, kandi nibwetwa obusingye obubi. Hati, nituza kukihamya nitukoresa Baiburi ku obu nibwo busingye obu Yaabaire naagambaho. Ekyo n'ekintu ky'omutaano munonga kukiteekateekaho, ngu omu busingye obubi nk'obu, ngu Ruhanga naabaasa kuba naayeta Omugore We.

Mwayetegyereize, Akagira ati, “abantu,” atari “ekanisa.” Ahabw'enki? Kandi nabwo, Neeyetwa Ekanisa, kwonka Akaba naaza kweta “abantu.” Hati, ekanisa n'okuteeranira hamwe kw'abantu abatarikushushana, kwonka Ruhanga naayeta Omwe hanu. Taragizire ati, “Ndyayeta Abametsodisiti, Ababaputisiti, Abapentekoote.” Akagira ngu Aryayeta abantu. Ahabw'enshonga eha? Eiziina Rye. Mwareeba, abantu; omwe kuruga omu Bametsodisiti, omwe kuruga omu Babaputisiti, omwe kuruga omu Baluteeri, omwe kuruga omu Bakatoriki. Mwareeba? Kwonka Naayeta, kitari ekibiina ky'ekanisa, kureka “abantu habw'Eiziina Rye,” abarikwakiira Eiziina Rye, abagambirwe obugyenyi omu Iziina Rye, nibaza aha bugyenyi kuhingirwa ahari Kristo, kuba ekicweka Kye, okurabira omu kutooranwa ira batakabaireho. Nk'omushaija orikutoorana omukazi ohikire omu magara, naaba yaatoorainwe kuba ekicweka ky'omubiri gwe. N'ahabw'ekyo, ekyo nikimanyisa ngu, Omugore wa Kristo naija kuba, kandi nikyo ari hati, okwiha ira akatooranwa Ruhanga kuba ekicweka ky'Omubiri ogwo. Mwareeba? Oo, Ebyahandiikirwe biijwiremu eby'obuguzi bwingi, biijwiremu obwoki!

Yetegyereze, kitari eki omuntu nanka agambire, eki omuntu nanka ayetsire; kureka n'abo abu Ruhanga yaatooraine omusingye gw'ensi gutakatairweho, kandi naayeta abantu aba omu biro by'aha muheru; kitari kibiina ky'ediini. “Abantu ahabw'Eiziina Rye.” Kandi obusingye obu obubi nibwo Arikukikora, obusingye obu bwonyine bw'okuhabisa.

Saabiiti ehweire, omuri Matayo 24, nibwo bwabaire buri obusingye oburikukirirayo kimwe kuhabisa omu busingye bwona. Obusingye bwona bw'okuhabisa, okuruga omu kibanja kya Edeni, n'okugumizamu, tihakabahoga obusingye oburikuhabisa munonga nk'obusingye obu. “Baanabi b'ebishuba baryaimuka kandi baryakora obumanyiso n'eby'okutangaaza, babone kuhabisa n'Entoore kyaba nikibaasika.” Mwareeba? Hati, amakanisa agarikufuka, ag'emikoro, agagangaire, n'ebindi, ag'enyegyesa ezigunzirwe abantu, ago tigarikubaasa; Entoore tizirikubaasa na kakye kuta omutima ahari ago. Kwonka n'ag'ahaiguru aho gari haihi kushushana n'ekintu ky'amazima. Kwihaho Ekigambo kimwe kyonka nikyo orikuteekwa kukora. Kikaraganisibwa obusingye obu; obwire bukuru munonga! Bakristaayo 'mwe, hoonahoona ahu muri, mwerinde obwire obututwiremu! Muhandiikye, kandi mushome, kandi muhurikize kurungi.

Ruhanga naayetera ki abantu omu busingye obu obubi, ahabw'Eiziina Rye? Enshonga erikutuma yaamweta, n'Okumugyeza, Omugore We. N'oku... Omugore ku araaheze kushuuruurwa, agyeziibwe, ahamiibwe, akahamibwa ahari Sitaane. Nk'oku kyabaire omu kutandika, nikwo kiriba aha muheru.

Nk'oku embibo etandika omu itaka, ekakura neerabira omu beekorezi, amagara gaayo, kwonka ehereeruka eri embibo niyo emwe nk'oku yaabaire eri obu yaaza omu itaka. Kandi omuringo nigwo gumwe ogu embibo y'okuhabisa yaagwire omu itaka, omuri Edeni, nigwo muringo ogu erihereerukiramu omu biro by'aha muheru. Nk'oku Engiri yaabaire eri obu yaagwa omu kigombe ky'ediini ahari Niika, Rooma, neehereerukira omu kibiina ky'ediini ky'omutindo gw'ahaiguru. Nk'oku Embibo y'Ekanisa yaagwire enyima okwo, n'obumanyiso, n'eby'okutangaaza, hamwe na Kristo ohuriire omuribo, neehereerukira omu bwire bw'aha muheru ahansi y'obuheereza bwa Malaki 4, n'okugarura ogundi omurundi Okwikiriza okwabandize okwahairwe rimwe kikahwa.

Nitureeba hati, obusingye obu obubi, n'okworeka Sitaane, ngu Omugore tari nka Haawa, ngu Tari omukazi w'omuringo ogwo. Kandi Naija kugyezibwa n'Ekigambo Kye, Omugore, nk'oku omugore wa Adamu yaagyeziibwe n'Ekigambo. Kandi omugore wa Adamu akaikiriza buri kacweka k'Ekigambo, koona, kwonka yaabuzabuzibwa aha kuraganisibwa kumwe, ngu, “Tahinduka, oku abaire ari nyomwabazyo n'eriizooba nikwo ari, kandi nikwo ariguma ebiro byona,” eriizooba; kwonka yaaremerwa aha kuraganisibwa kumwe, obu yaayohibwa omuzigu, maisho n'amaisho. Kandi hati, abantu abeetsirwe ahabw'Eiziina Rye, hatariho kubanganisa, n'Omugore We. N'ow'okugaruka kubugana n'ekintu nikyo kimwe; gatari amazima g'ekigombe ky'ediini nari ekintu nanka, kureka buri Kigambo!

Ahabw'okuba, omu kutandika kwa Baiburi, omuntu akaheebwa Ekigambo kya Ruhanga kumubeisaho. Ekigambo kimwe, ekyashoboroirwe kubi n'o -omuntu orikwetwa Sitaane, omu muntu w'omuringo gw'enyamaishwa erikwetwa enjoka. Sitaane, omu muntu ogu, akaba naabaasa kugamba na Haawa, kandi yaamushoboororera kubi Ekigambo, reero yaahaba. Mwareeba, nikiteekwa kuba buri Kigambo.

Ahagati ya Baiburi, Yesu akaija yaagira ati, “Omuntu tatungwa by'okurya byonka, kureka n'Ekigambo kyona,” obu Yaayohibwa Sitaane. Hati, Ruhanga naatugambira hanu omu biro by'aha muheru, ngu, “ruhanga w'ensi egi naija kwimuka omu biro by'aha muheru.” “Kandi omuntu weena Orikyongyeraho ekigambo kimwe, nari Akakiihaho Ekigambo kimwe, omugabo gwe guryaihwa omu Kitabo ky'Amagara.” Ruhanga atugirire embabazi! Turekye kutambura n'emyekuniko, ebifuba biri omu maisho, emitwe ahaiguru, nk'abarikumanya byona, ahabw'okuba naitwe rimwe tukaba turi abatarikuhurira. Ka twije n'okwebundaaza aha kitebe ky'Obukama ky'embabazi, twine embabazi, n'okusaasira, kandi n'okuteekateeka ahari Ruhanga omu mitima yaitu.

Eky'okutangaaza hati, ahanyima y'emyaka rukumi na magana mwenda y'okubuurira Engiri, kwonka hati yo, egyo n'entwaza y'ensi, esiisikaire munonga okukira omu bwire obu, obu Yaabaire ari hanu. Entwaza y'ensi esiisikaire munonga. Ensi eri haihi kuhika aha kumariira kukuru. Ekyo nimukimanya. Mukama naahikiiriza Ekigambo Kye embaju zoona.

Okushuuruurwa 18:4-5,
4 Kandi naahurira eiraka erindi niriruga omu iguru nirigira riti: mururugyemu, imwe bantu bangye 'mwe, mutakaakwatanisa narwo omu bibi byarwo, mukaheebwa ekifubiro ky'ebirikwija kurubonabonesa;
5 Ahakuba ebibi byarwo bituumire byahika ahaiguru munonga, kandi Ruhanga aijukire eby'okushiisha byarwo.

----
Ka n'okurabura! Ekyo buzima nikigarura ekanisa enyima omu Kushuuruurwa 3:14, omu busingye bwa Laodikea, okutakuratira biragiro; obw'obunyadiini munonga, kwonka obutarikukuratira biragiro. “Iwe, ahabw'okuba noogira oti, 'Turi abatungi, titwine eki tukyenire,' kunu torikumanya ku ojwaire busha, enshoberwa, empumi, kandi torikukimanya.” Buzima kishorongire n'Ebyahandiikirwe by'obusingye obu, tikiri ky'Ebyahandiikirwe by'obusingye bwa Danieli, tikiri eky'abo omu iziina rya... obusingye bwa Noa, kureka omu busingye obu obubi, obw'aha muheru.

Yetegyereze hanu, “Ojwaire busha.” Ekyo ka kitaahemu munonga munonga. Nimmanya ngu nimbaasa kuhakanisibwa munonga aha kiteekateeko eki, kwonka kihikire ahu Omukristaayo haihi atarikubaasa kuruga omu nju ye haza atahikire omu maisho g'obusingye obu obubi, obw'abakazi abajwaire kubi.

Bakazi 'mwe, naaza kugamba eki, kandi niinyenda ngu muhurikize. Kandi, abashaija n'abakazi, eki nimubaasa kukihakanisa, kwonka nimpurira nyebembeirwe kukigamba. Mubaire nimumanya ngu, omukazi weena orikwejweka busha batyo ebiteekateeko bye tibiri omu buteeka? Nimumanya ngu, ni maraaya, yaaba naakiikiriza nari atarikukiikiriza, nari atarikukiteekateeka atyo? N'obu omukazi ogwo yaakubaasa kwemerera aimukize omukono gwe ahaiguru omu maisho ga Ruhanga kandi akarahira ngu takakwatwagaho omushaija ondiijo weena kureka iba, kandi ago nigabaasa kuba amazima gonyine, kwonka nabwo ni maraaya. Yesu akagira ati, “Orikureeba omukazi akamwetenga biri aherize kumushambanaho.” Kandi omukazi ogwo naabaasa kuba...

Mwareeba, omukazi “ajwaire busha,” Baiburi nikwo erikugira, “kandi tarikukimanya.” Omwoyo ogurikumusangira kukora ebintu nk'ebyo n'omwoyo mubi, ogw'obwamaraaya. Obuhangwa bwe obw'aheeru, ekyemerero kye, omubiri gwe, naabaasa kuba ari oshemeire. Naabaasa kutashambana na kakye, kandi naabaasa kurahira omu maisho ga Ruhanga kandi gabe amazima, ngu takakikoraga, kwonka omwoyo gwe n'omwoyo gw'obwamaraaya. Ruhanga w'ensi egi wa fashoni amwitiire kimwe amaisho; ayejwekire nka maraaya kandi yaaza aheeru okwo.

----
Omuntu ow'aheeru n'omuntu ow'omubiri orikutegyekwa n'ebihurikizo mukaaga... nari ebihurikizo bitaano, nimmanyisa. Omuntu ow'omunda n'omuntu ow'omwoyo orikutegyekwa n'ebihurikizo bitaano; eiraka ry'omunda, n'okukunda, n'ebindi. Omuntu ow'aheeru; okureeba, okuroza, okuhuririra omu mubiri, okunuukiriza, okuhurira. Kwonka munda y'omwoyo ogwo harimu amagara, kandi nigategyekwa n'ekintu kimwe, okusharamu kwawe. Noobaasa kwakiira eki sitaane arikugamba nari kwikiriza eki Ruhanga arikugamba. Kandi ekyo nikiija kushuuruura ni mwoyo ki ogurimu. Ku araabe ari Omwoyo wa Ruhanga, naija kurya ebintu bya Ruhanga, kandi Tarikwija kurya aha kintu kyona eky'ensi. Yesu akagira ati, “Ku muraakunde ensi nari ebintu bye'nsi, n'ahabw'okuba okukunda kwa Ruhanga tikukataahaga omuri eki kicweka ky'omunda.” Sitaane akakubeiha. “Kandi omuntu tatungwa by'okurya byonka, kureka n'ekigambo kyona ekiruga omu kanwa ka Ruhanga.”

Yetegyereze hati, nitureeba ngu omukazi ogu “ajwaire busha,” naayetogonyora kandi abunwize. Kandi ensi neereebeka eri omu busingye oburikukirayo kuba bubi oburabaireho. Tihariho obusingye na bumwe oburabaireho ahu abakazi baaratwaize batyo, tiburiho kureka obu ensi yaabaire eri haihi kucwekyerezibwa n'omwegyemure. Kandi Yesu akakigambaho. Nituza kukihikaho omu kaanya kakye.

Ruhanga aremirwe kutegyeka, nari Ariyo naikiriza ekindi kintu kutegyeka? Niinyebuuza. Eky'okugarukamu ekihikire aha kibuuzo eki ni, omu kuteekateeka kwangye, hariho emyoyo ebiri erikuhakanisana omu nsi ebiro ebi, erikukora. Hati, tiharikubaasa kubaho erikukira ahari ebiri, abategyeki babiri. Kandi Omwe n'Omwoyo Orikwera orikukora; ogundi n'omwoyo gwa sitaane, kandi, ogurikuhabisa, omu biro ebi eby'aha muheru. Hati, ebiteekateeko byangye naaza kubita aha musingye ogu gwonyine ahabw'ebyatsigara aha ishomo, Obutumwa bwaitu... obwatsigara.

Egyo myoyo ebiri. Omwe ahariyo, n'Omwoyo Orikwera wa Ruhanga; ogundi, n'omwoyo gwa sitaane, ogurikukorera omu buhabe. Abantu b'ensi hati nibatooranaho. Omwoyo Orikwera ari hanu naayeta Omugore wa Kristo kurugayo. Naakikora okurabira omu kuhamya Ekigamba Kye Ekyamuraganisiibwe, ahabw'obusingye obu, naayoreka ngu Ni Kristo. Orukumu ku ruraabe rushemereire kuba nirugyenda omu busingye obu, orukumu niruza kugyenda. Ekigyere ku kiraabe kishemereire kutambura omu busingye obu, ekigyere nikiza kutambura. Eriisho ku riraabe rishemereire kureeba omu busingye obu, eriisho niriza kureeba. Mwareeba?

Omwoyo wa Ruhanga, nk'oku Arikuba naakura kuhika omu kishushani ekihikire kya Ruhanga, nibwo Busingye obu tutwiremu hati. Omwoyo Orikwera ari hanu naahamya Obutumwa bw'obwire. Kandi Omwoyo Orikwera naakora eki, kugira ngu abantu abarikwikiriza Ruhanga baije kwetwa kuruga omu katabanguko aka. Omwoyo mubi wa Sitaane ari hanu naayeeta ekanisa ye omu buhabe, nka buriijo, ahabw'okukiikamya Ekigambo kya Ruhanga, nk'oku yaakozire omu kutandika. Mwareeba? Nikigarukira kimwe enyima honyine omu bwire obwo bw'embibo ogundi murundi, kuruga omuri Edeni, ngugu hanu ogundi murundi.

Read the full account in...
Ruhanga w’obusingye obu obubi.

Bwanyima y'ebyo naareeba maraika ondiijo naashuuma okuruga omu iguru, aine obushoboorozi bwingi. Ensi yaajwerwa omushana gw'ekitiinisa kye.

Yaagamba n'eiraka rihango ati: Orurembo orukuru Babulooni rugwire, rugwire! Ruhindukire obutaaho bwa baadaimoni, n'obweshereko bw'emyoyo yoona emibi, n'obw'amahungu goona amabi agarikunugwa;

Okushuuruurwa 18:1-2