Enjura egwera abahikiriire n'abatahikiriire.

William Branham.

Read the full account in...
Embibo Y’okutaikirizana.

Nkaba ninshaba omu nyanga ahu naabaire nza kushabira. Omu nyanga hakaba harimu omucuucu, kandi eihangwe rimwe nkashohora, naata Baiburi yangye aha mpimbi, reero omuyaga Gwagihuuha gwabiikuura omu Baheburaayo, eshuura ya 6. Ahaabaire nihagira ngu, omu biro by'aha mperu, oku kyabaire nikiza kuba ku turaagwe twaruga omu Mazima kandi tukeegarura bwa kabiri omu kweteisa, haba hatakiriho kitambo ahabw'ekibi, kandi n'oku amahwa n'amatojo, agaabaire gari haihi kwangwa, n'omuheru gwago kuri okwokibwa; kwonka enjura egwa kaingi, aha itaka, kuriitirira, kurihinga; kwonka amahwa n'amatojo biryayangwa, beitu engano ziryarundaanwa. Reero naateekateeka nti, “Mbwenu, kyabaho kwonka omuyaga gwahahuuha haabiikuurwa.” Mpaho, naagaruka naata Baiburi ahansi. Reero naateekateeka nti, “Mbwenu, hati naaza...” Kandi ngugu hanu omuyaga gwaija Gwagibiikuura. Ekyo kikabaho emirundi eshatu. Ntyo naateekateeka nti, “Mpaho, hati, ekyo n'eky'omutaano.”

Reero ku naabaire niinyimuka, naateekateeka nti, “Mukama, ahabw'enki Wambiikuurira Baiburi egyo kushoma ekintu ekyo, ni... ku ndikuhika ahari ekyo, ahu 'amahwa n'amatojo, agari haihi kwangwa, n'omuheru gwagwo kuri okwokibwa'?” Naateekateeka nti, “Ahabw'enki, Wambiikuurira ekyo aho?” Kandi ku naabaire nindanzya omu maisho gangye...

Hati, okworekwa oku kw'amazima kwija hatariho okukurura kutaaha omu giya yoona. Ogwo ni Ruhanga wenka. Mwareeba? Nkaimutsya amaisho naareeba ensi eyaabaire neeyetooroora omu maisho gangye, kandi naareeba ku yoona yaabaire ehingirwe. Hakaba hariho omushaija ojwaire ebirikwera, owaagyenzire naabiba engano. Bwanyima ku yaarengyeire ahu ensi eherera, haija omushaija, orikushusha kubi, kandi akaba ajwaire ekijwaro kirikwiragura, kandi naamiishiiramu embibo z'enkyenzi hoonahoona. Zombi zikamerera hamwe. Kandi ku zaamezire, zombi zaagira eiriho, ahabw'okuba enjura ekaba neeyetengwa. Kandi buri emwe ekareebeka orikushusha oti neeshaba, obwo einikire omutwe gwayo mukye eti, “Mukama, yohereza enjura, yohereza enjura.” Reero ebicu bihango byaija, enjura yaazigwaho zombi. Ku yaagwire, egyo ngano nkye yaaguruka reero yaatandika kugira eti, “Mukama asiimwe! Mukama asiimwe!” N'egyo nkyenzi nkye yaaguruka aha rubaju aho honyine, yaagira eti, “Mukama asiimwe! Mukama asiimwe!”

Reero okworekwa okwo kwashoboororwa. Enjura egwera abahikiriire n'abatahikiriire. Omwoyo niwe omwe naabaasa kushuuma omu ruteerano, kandi buri muntu Amushemerererwe: endyarya, Abakristaayo, n'abandi boona hamwe. Buzima kihikire. Kwonka niki? Bamanyirwa aha byana byabo. Mwareeba? Okwo nikwo kirikubaasa kumanywa kwonka.

N'ahabw'ekyo nimureeba ekyo hati, ahabw'okuba oburo bw'omu ishwa, nari engano z'omu ishwa n'enjuma obumwe n'obumwe bitooreza enjuma y'amazima, enjuma erikuhingwa, biri haihi kushushanira kimwe bibone kuhabisa n'Entoore. Ninteekateeka ngu tutwire omu busingye bwonyine, obu ebintu ebi bishemereire kubuurirwa n'okugambwaho.

Yetegyereze omu mushororongo gwa 41, ezo ibiri nazo nizishushana munonga, nizishushana munonga omu biro by'aha mperu kuhitsya obu Atarakikozire... Akaba atarikubaasa kwegamira ekanisa nanka kubataanisamu, tugambe, Abametsodisiti nari Ababaputisiti, nari Abapentekoote, okubataanisamu. Akagira ati, “Aryatuma baamaraika Be kubataanisamu.” Maraika naija kureeta okutaanisamu, okushoroora ahagati y'ab'amazima n'ab'ebishuba. Kandi tihariho n'omwe orikubaasa kukora ekyo kureka Maraika wa Mukama. Niwe orikuza kumanya ow'amazima n'ow'ebishuba. Ruhanga akagira ngu Aryatuma baamaraika Be omu bwire bw'aha muheru. Tibari baamaraika kurabira ahansi hanu, kureka baamaraika omu bwire bw'aha mperu, kandi baryarundaana hamwe. Nitumanya ngu obu n'obwire bw'eigyesha oburikwija hati. Hati, maraika omu mazima nikishoboororwa nka “entumwa.” Kandi nitureeba ngu hariho baamaraika mushanju b'amakanisa mushanju, kandi hati... ngaaha, omu busingye bw'ekanisa obwo.

Yetegyereze abu Yaagambire ngu n'ababibi, kandi nabwo n'eki ezo mbibo zaabaire ziri. Omwe, omubibi akaba Ariwe, Omwana wa Ruhanga, Owaashohoire naabiba Embibo. Reero omuzigu yaija enyima Ye, owaabaire ari Sitaane, kandi yaabiba embibo y'okutaikirizana, bwanyima y'okubibwa kw'Embibo nungi. Hati, banywani, ekyo kibaireho omuri buri busingye kuruga obu tugira ensi. Buzima. Okurugira kimwe omu kutandika, kikatandika ekintu nikyo kimwe.

----
Nitureeba ngu omubibi w'okubanza w'embibo y'okutaikirizana akeetwa “Sitaane,” kandi nitumanya ngu akaba ariwe, omu Kutandika 1. Hati nitureeba ngu, na hanu omu-omu Kitabo kya Matayo, eshuura ya 13, Yesu naakyeta buri kutaikirizana kwona n'Ekigambo Kye kuba “Sitaane.” Kandi omwaka ogu gwa 1965, ekintu kyona ekirikubiba okutaikirizana, okurikuhakanisa Ekigambo kya Ruhanga ekihandiikirwe, nari Kukishoboorora nk'oku orikweyendera, n'embibo y'okutaikirizana. Ruhanga tarikukiikiriza. Tarikubaasa. Tikirikubaasa kujwanga. Buzima tikirikubaasa. Ni nk'akajuma ka sinaapi; tikarikubaasa kujwanga n'ekindi kintu kyona, torikubaasa kukajwanga n'ebindi, nikiteekwa kuba ekintu ky'amazima. Embibo y'okutaikirizana!

Hati nitushanga ngu, Ruhanga ku yaabibire Embibo Ye omu Kibanja kya Edeni, nitureeba ngu ekazaara Abeeli. Kwonka Sitaane ku yaabibire embibo ye y'okutaikirizana, yaazaara Kaini. Emwe ekazaara ogwo ohikiriire; endiijo yaazaara otahikiriire. Ahabw'okuba Haawa akahurikiza ekigambo ky'okutaikirizana, kirikuhakanisa Ekigambo kya Ruhanga, kikatandikaho ekibi aho honyine, kandi nikikigumizamu okuruga obwo. Kandi titurikimaramu kyona na kakye okuhitsya obu baamaraika bariija bakashoroora ekyo kintu, na Ruhanga akatwara abaana Be omu Bukama, kandi enkyenzi ziryayokibwa. Yetegyereze egyo mizaabibu ebiri.

Yetegyereze, embibo zaabo zikakura hamwe buzima nk'oku Ruhanga yaagambire hanu nabwo omu shuura ya 13, y'eishomo ryaitu ekiro eki, eya Matayo eti, “Murekye bikure hamwe.” Hati, Kaini akaza omu nsi ya Noodi, yaayetungirayo omukazi, yaashwera; na Abeeli yaitwa, bwanyima Ruhanga yaimutsya Seezi kuza omu mwanya gwe. Reero obusingye bwatandika kukuratana, ahagati y'ekihikire n'ekigwire. Hati, nitureeba ngu bakaba beeteerana, boona hamwe, emirundi mingi, reero kyayetaagisa Ruhanga ku... Bukeeyongyera kuba bubi munonga okuhitsya obu kyayetaagiise Ruhanga kubuhwerekyereza.

Kwonka aha muheru zikarugayo okuhitsya obu ezo mbibo zombi, embibo y'okutaikirizana n'embibo ya Ruhanga, zaayorekire emitwe yaazo yonyini, kandi ekyo kikabugira omuri Yuda Iskaryota n'omuri Yesu Kristo. Ahakuba, Akaba ari Embibo ya Ruhanga, Akaba ari obukomooko bw'ebihangirwe bya Ruhanga, Akaba atari kindi kureka Ruhanga. Kandi Yuda Iskaryota akazaarwa ari omwana w'okuhwerekyerera, akaruga okuzimu, yaagaruka okuzimu. Yesu Kristo akaba ari Omwana wa Ruhanga, Ekigambo kya Ruhanga ekyorekirwe. Yuda Iskaryota, omu kutaikirizana kwe, akaba ari embibo ya Sitaane, akaija omu nsi, ahabw'okubeihabeiha; nk'oku Kaini, ishe w'okubanza, yaabaire ari omu kutandika.

Yuda akaba ari omushomi kwonka omu kanisa. Buzima akaba atari w'amazima. Omu mazima akaba ataine okwikiriza; (takaabaire naareebya Yesu na kakye). Kwonka, nimureeba, akabiba egyo mbibo y'okutaikirizana. Akateekateeka ngu akaba naabaasa kunywana ensi, mamona, kandi nabwo anywane Yesu, baitu obwire bukaba bwahweire kugira eki yaakikorera. Eshaaha y'aha muheru ku yaahikire, obu yaakora ekintu kibi eki, akatambuuka omusitaari ogurikutaanisa kugyenda omumaisho n'okugaruka enyima. Akaba naateekwa kugumizamu omu muhanda ogu yaatoiremu, nk'omubeihi. Akabiba embibo y'okutaikirizana, akagyezaho kusherura obuganzi omuri ebyo bibiina bikuru by'amadiini by'ebiro ebyo, eby'Abafarisaayo n'Abasadukaayo. Kandi yaateekateeka ngu naija kwetungira akasente, n'okukundwa abantu. Ekyo ka nikireetera abantu baingi munonga kutaaha omu kutaikirizana okwo, kugyezaho kutunga obuganzi omu bantu! Reka tutungye obuganzi ahari Ruhanga, atari aha bantu. Kwonka ekyo nikyo Yuda yaakozire obu oku kutaikirizana kubugira omuriwe.

Kandi nitumanya ngu Yesu akaba ari Kigambo, Yohaana Orikwera 1, neegira eti, “Bwa mbere na mbere hakaba hariho Kigambo; Kigambo ogwo akaba atuura na Ruhanga; kandi Kigambo akaba ari Ruhanga. Kigambo ogwo yaaba omutu, yaatuura hanu naitwe.” Kya kiri kityo, Ekigambo n'Embibo, bwanyima Embibo yaaba omuntu yaatuura naitwe.

Yuda ku araabe yaabaire ari embibo y'omuzigu kandi ey'okutaikirizana, nayo ekaba omuntu yaatuura naitwe omu muntu Yuda Iskaryota. Akaba ataine okwikiriza okuhikire, kw'amazima na kakye. Akaba aine oku yaabaire naateekateeka ngu n'okwikiriza. Hariho ekintu nk'okugira okwikiriza; kandi n'okwikiriza kw'ekikwangara. Kandi okwikiriza kw'amazima kwa Ruhanga nikwikiriza Ruhanga, kandi Ruhanga n'Ekigambo, Tikurikyongeraho ekintu kyona na kakye. Baiburi neetugambira ngu ku turikwongyeraho ekigambo kimwe, nari tukacwaho Ekigambo kimwe, omugabo gwaitu guryaihwa omu Kitabo ky'Amagara, Okushuuruurwa 22:18, eshuura ey'okumariira y'aha muheru.

Omu kutandika kwonyini, Ekitabo ky'okubanza kya Baiburi, Ruhanga akabagambira kutacwaho Ekigambo na kimwe ahari Ekyo, “buri Kigambo nikiteekwa kworoberwa,” nibateekwa kutungwa ekyo Kigambo. Yesu, ahagati y'ekyo Kitabo, akaija yaakigamba omu busingye Bwe, yaagira ati, “Omuntu tatungwa by'okurya byonka, kureka n'Ekigambo kyona eki-ekiruga omu kanwa ka Ruhanga.” Kandi omu busingye bw'okumariira bw'Okushuuruurwa, akatuhanuurira, ku “Weena oricwa Ekigambo na kimwe omuri ekyo Kitabo, nari Akakyongyeraho ekigambo na kimwe, omugabo gwe guryaihwa omu Kitabo ky'Amagara.”

N'ahabw'ekyo tiharikubaasa kubaho ekintu kyona ekitari ky'amazima, kureka Ekigambo kya Ruhanga, eky'amazima ekitafungwire! Abo ni batabani ba Ruhanga, na bahara ba Ruhanga, abatazairwe ahabw'okukunda kw'omuntu, nari okukwatana omu ngaro, nari omuringo nanka gw'okubatiza; kureka abazairwe omu Mwoyo wa Ruhanga, n'Omwoyo Orikwera, kandi n'Ekigambo Kirikweyorekyera omuribo. Orwo n'Oruzaaro rw'amazima rwa Ruhanga.

Omuzigu ayegaita aha kanisa kandi aramatira aha nyikiriza nari ekintu kyona. Kwonka ekyo ti... Ekyo n'okutaikirizana, ekintu kyona ekirikwetaasya omuri obwo bwoko bw'Amazima agahikire g'Ekigambo kya Ruhanga. Kandi nitumanya tuta? Tugira tuti, “Mpaho, bo, oine obugabe Kukishoboorora?” Ngaaha, sebo! Tihariho omuntu oine obugabe kushoboorora Ekigambo kya Ruhanga. Niwe Orikweshoboororera. Naakiraganisa, bwanyima Akikora, egyo niyo nshoboorora Yaakyo. Ku Araabe yaakiraganiise, bwanyima Akakihikiiriza, egyo niyo nshoboorora Yaakyo. Ekintu kyona ekirikuhakanisa Ekigambo kya Ruhanga n'okutaikirizana! Buzima kwo!

Hati, nk'oku naagamba, Yuda akaba ataine okwikiriza kw'amazima. Akaba aine okwikiriza kw'ekikwangara. Akaba aine o-okwikiriza oku yaabaire naateekateeka ngu ogwo akaba ari Omwana wa Ruhanga, kwonka akaba atarikumanya ngu ogwo akaba ari Omwana wa Ruhanga. Takaakikozire. Kandi omuntu orikworobyamu omu Kigambo kya Ruhanga eki ekiri Amazima, aine okwikiriza kw'ekikwangara. Omuheereza wa Ruhanga ow'amazima aramatira aha Kigambo ekyo.

Read the full account in...
Embibo Y’okutaikirizana.

Eitaka ku rihaaga enjura erigwireho kaingi, ryamera emboga ezishemereire abu rihingiirwe, Ruhanga ariha omugisha;

kwonka ku rimera amahwa n'amatojo, riba ritakiine mugasho, riri haihi n'okukyeenwa; n'omuheru gwaryo kuri okwokibwa.

Abaheburaayo 6:7-8