Eiguru erisya n'ensi ensya.

William Branham.

Read the full account in...
Eka y’ebiro by’omu maisho ya kishwera w’omu iguru n’omugore w’omu nsi.

2 Petero 3:5-7,
5 Ahakuba nibabyeyebesa nkana, nibamanya ngu hakaba hariho eiguru okuruga ira, n'ensi eyaahangirwe ekigambo kya Ruhanga okuruga omu maizi, kandi ekaguma eri ahagati yaago;
6 kandi ahabw'ekigambo kya Ruhanga ensi eyaabaire eriho ekagaruka yaashwekwa amaizi g'omwegyemure, yaamirwa;
7 kwonka eiguru n'ensi ebiriho hati, ahabw'ekigambo ekyo, bibiikiirwe omuriro, nibirindwa okuhitsya aha kiro ky'orubanja eki abantu abatatiina Ruhanga baricwekyerezibwaho.

Ka n'okuragaanisa, kwa baanabi aba n'abanyabwengye rugambwa, abeegyesa ba Baiburi, kare munonga omu biro ebya iranaira, kureeba Ekiro eki ky'ekitiinisa nikiija! Omu bicweka ebi, omwe naabaasa kuteekateeka, nari kwebemberwa, niimanyisa, kwikiriza ngu enziga yoona, y'egi nsi, neija kucwekyerezibwa, “Nimpanga Eiguru Risya n'Ensi Nsya,” mwareeba, ngu eiguru riryahwaho n'ensi eryahwaho, bicwekyerezibwe bihweho. Kwonka twashoma tutaireho omutima, tukahwerwa Omwoyo Orikwera, nitubaasa kureeba Amazima g'eki; kandi ekyo nikyo turikuzamu.

N'akaabunga konka akagyetooroire, n'ekibi ekiri omu nsi, ebiryacwekyerezibwa. Mwareeba? Hati, nitwegyereza ngu eiguru nikimanyisa “akaabunga k'ahaiguru.” Mwareeba?

Nikikora ki? Obwo kirya, amatojo aga, n'endwara, n'okufa, n'eby'obutegyeki, n'omushaija omusiisi, n'omukazi omusiisi, n'emyoyo mibi, byona biryahwaho kandi bicwekyerezibwe. Mwareeba? Nikiteekwa kukorwa omu muringo ogwo, ahabw'okuba nituza kutuura hanu honyini. Ekyo nituza kukihamya na Baiburi. Hanu honyini niho turikuza kutuura. Hati mwetegyereze, amatojo, obukooko oburikureeta endwara, endwara zoona n'ebindi, byona biryaihwaho kyarimwe. Ebi byona, okubaho kwabyo okuri omu nsi hati, entwaza y'abantu, eby'obutegyeki, ekibi, emyoyo mibi ya buri muringo esiisire ensi, hamwe n'akaabunga koona akari ahaiguru yaitu omunda hanu, kasiisirwe n'emyoyo mibi. Hati nituza kukitaahamu munonga kandi hare, omuri eki, mwareeba. Ebi byona biri omu kaabunga, nari omwanya gw'ahaiguru, hamwe ensi eriho hati. Ensi egi harimu ebintu ebyo, kwonka etahangwe ahabw'ekyo kigyendererwa. Ekibi kikagireetera kuba etyo. Mwareeba? Ekahangwa Nyamuhanga, Omuhangi. Kwonka byona... Kandi emibiri yaitu yoona, ei tutwiremu hati, ekateebwa omu itaka obu Ruhanga yaagihanga, ahabw'okuba okaihwa omu mucuucu gw'omu itaka. Yoona ekateebwa aheeru hanu. Obu Ruhanga We wenka yaagihanga, okaba ori omu biteekateeko Bye. Kandi Omuriwe, ogwo Otahwaho Mukuru, hakaba harimu ekiteekateeko, nikyo ekintu Ekimurimu. Kandi hati ekibi kikatuma eki kyabaho. Kandi Ruhanga, okuraba omu busingye obu, naateeranira hamwe ebintu Bye.

Sitaane akiri hanu. Egyo niyo nshonga erikutuma ebintu ebi byona nibibaho. Akiri hanu, n'amahe ge goona mabi gakiri hanu. Mwetegyereze, egyo niyo nshonga etumire ensi yaasiisikara munonga hati. Egyo niyo nshonga oburofa n'eby'obushema ebirikukorwa; okusheesha eshagama, entaro, eby'obutegyeki, ekibi, obushambani, n'emiringo yoona y'okusiisikara erikugyenda omu maisho, n'ahabw'okuba Sitaane ari omutegyeki w'ensi egi n'akaabunga aka. Noogira oti, “Akaabu-...?” Eego, sebo!

Byombi akaabunga n'ensi hati bisiisirwe baadaimoni abarikubaasa kuturega omu maisho ga Ruhanga. Yesu ariyo kututonganirira. Mwareeba? Omuregi yaaguma naatunga orukumu, “baakozire eki, baakozire eki, baakozire eki,” kwonka Eshagama neeguma eshwekire. Akaija kucungura ezo Ntoore ezi yaareebire zitakabaireho. Egyo niyo nshonga etumire yaasiisikara munonga ebiro ebi.

Hanu, entumwa, omuri Petero ya Kabiri hanu, eshuura 2, n'omushororongo gwa 5 hamwe na... hamwe n'omushororongo gwa 5 na 6. Eego, naahabona. Naagamba aha madaara ashatu g'ensi. Mwareeba, na-naayoreka amadaara ashatu gaayo. Mwetegyereze oku arikugashoboorora. “Ensi eya ira ekaruga omu maizi,” hati, egyo ekaba eri ensi eyaabaire eriho omwegyemure gutakabaireho. Hati, egyo eriho, ensi ya hati ei tutwiremu hati, ekeetwa “ensi.” “Ensi eya ira ekaruga omu maizi,” Okutandika 1:2. Hati kandi “n'ensi” eriho hati. Reero bwanyima, ogundi murundi, naagamba aha ndiijo, “ensi erikuza kwija,” Ensi Ensya. Ensi ishatu; amadaara ashatu g'ensi.

Kandi mureebe oku Ruhanga arikutworeka butunu puraani Ye y'obucunguzi. Oo, eki kireeteire omutima gwangye kwijura amashemererwa ku nkireebire, oku Arikutworeka butunu hanu hati puraani Ye y'obucunguzi. Hati mugyeragyeranise ebi turikureeba n'amaisho gaitu. Eki Ruhanga yaakozire kucungura ensi Ye, akakora puraani niyo emwe kucungura abantu Be, ahakuba Ruhanga otahinduka tahinduraho omu puraani Ze zoona nari ekintu kyona. Ka n'ekintu ky'ekitiinisa!

Oku Yaatwebembeire Akatwehitsya, kututuuramu, okurabira omu madaara ashatu g'embabazi; nk'oku Yaakozire ensi omu madaara ashatu, kwija omu nsi. Nk'oku Ruhanga aryaija omu nsi ahanyima yaayo kuraba omu madaara ashatu g'okushemezibwa agatarikushushana, okwo buzima nikwo Aija ahariitwe okuraba omu madaara ashatu g'embabazi. Ekyo nkakyegyesa omu kutandika; tinkahinduraga, okwiha obwo. N'Ekigambo kya Ruhanga.

-----
Mureebe, “ensi eya ira,” omwegyemure gutakabaireho; “ensi” eriho hati; hamwe n'Egyo erikwija. Hati, eidaara ry'okubanza eri Arikutureetamu... Mwareeba, puraani Ye y'obucunguzi buzima terikuhinduka omuri buri kintu. Naakoresa enkora emwe. Tahinduka. Akagira, omuri Malaki 3, “Ndi Ruhanga, kandi Timpinduka.” Oku Akikora, n'ahabw'ekyo, ku Araabe yaajunire omuntu w'okubanza ou Arajunire, okurabira omu Shagama eyaaseesirwe y'Ogwo otaine rubanja, Naateekwa kujuna oraakurateho; na buri omwe ou Araajune naateekwa kuraba omu muhanda nigwo gumwe.

Ku Araabe yaatambiire omuntu obunaku bwona omu rugyendo rw'amagara; n'obu haakuba omu biro bya Yesu, entumwa, baanabi, obunaku oburibwo bwona; ebirikwetaagisibwa nibyo bimwe ebyaba byabaho, Naateekwa kukikora ogundi murundi. Ekyo kihikire. Tahinduka. Omuntu ahinduka, obwire buhinduka, obusingye buhinduka, obunaku buhinduka, kwonka Ruhanga tahinduka. Ahikiriire. Ekyo ka kishemereire kuha amatsiko abarwaire!

Ku Araabe aratambiire omuntu, Naateekwa kugaruka kukikora ebirikwetaagisibwa nibyo bimwe byaba byabaho. Ku araabe, arajunire omuntu, Naateekwa kugaruka kukikora omu mbeera nk'ei yaakikoreimu omurundi gw'okubanza. Ku Araabe araijwize omuntu Omwoyo Orikwera, Naateekwa kugaruka kukikora omu mbeera nk'ei yaakikoreimu omurundi gw'okubanza. Ku Araabe yaarazoire omuntu okuruga omu kituuro, Naateekwa kukikora omurundi gwa kabiri, na buri murundi, aha ngyenderwaho niyo emwe.

Tahinduka. Oo, ekyo ka nikimpa amatsiko! Niki? T'omu bigunjano by'ebiteekateeko by'abantu, ekintu eki ebibiina by'abantu biteeraniire hamwe; kureka omu Kigambo Kye ekitahinduka. Noogira oti, “Ago n'Amazima?” Akagira ati, “Ka buri kigambo ky'omuntu kibe ekishuba, kwonka Ekyangye kibe Amazima.” “Ahakuba eiguru n'ensi biryahwaho, kwonka Ekigambo Kyangye tikiriremwa.” “Ebyahandiikirwe byona bihandiikisibwa Omwoyo, n'ahabw'ekyo ni birungi kandi biine omugasho gw'okwegyesa.” Kandi mwijukye, ngu, “Ebyahandiikirwe byona biryahikiirira,” buri kanyuguta kabyo koona.

-----
Omu Nsi Ensya n'Eiguru Erisya, terigaruka kushwekwa omwirima ogundi murundi, Ensi Ensya egi ku eriija. Daimoni aryabohwa... Sitaane, tabohirwe hati; n'omuregi. Kwonka omu Nsi Ensya, aryabohwa kandi anagwe omu Nyanja y'Omuriro, omu Muriro ogurikwera ogu.

Reero, omu Nsi Ensya egi, ka tugireebe ahabw'edakiika nkye hati. Omu Nsi Ensya egi, eiguru tiririgaruka kwiragura bundi; ngaaha, ekyo kikareetwa omukyeeno, mwareeba. Tiririgaruka kugira omwirima ahabw'okushwekwa ebicu by'ekiniga. Emiyaga terigaruka kugiteera nka batyo. Ngaaha. Omuyaga tigurigaruka kuhenda emiti, n'okusheenya amaju, n'okunaga hansi ebintu. Emirabyo n'ekiniga tibirigaruka kuruga ahari Sitaane bikaza aheeru okwo, bikaita omuntu orikugyenda omu ruguuto, nari kwotsya ekyombeko. Mwareeba? Ngaaha, tikirigaruka kubaho bundi. Tiharigaruka kubaho emiyaga y'amaani erikusheenyagura, nari eihunga n'eshata, haza ngu esheenye amaju, kandi eite abaana bato, n'ebindi. Ahaa, tibirigaruka kubaho bundi. Kugyezaho kuhwerekyereza, tibiribayo. Sitaane anagirwe aheeru.

-----
Nangwa n'ebintu ebi, Sitaane, abasiisi, bahweireho, Obutahwaho; obutarigaruka kubaho bundi. Byona... Mwareeba, Sitaane tarikubaasa kuhanga. Ku araabe naabaasa, obwo ni Ruhanga. Mwareeba? Naabaasa kukiikamisa kwonka ekyo ekyahangirwe. Mwareeba? Kandi okukiikamisa kwona nikwija, kukiikamisa, kuryaihwaho kyarimwe. Kandi okufa n'okukiikamisa amagara; kandi okukiikamisa ku kuryaihwaho, haryaba hatakiriho okufa bundi. Emyaka ya bukuru n'akamanyiso k'okufa; n'ahabw'ekyo emyaka ya bukuru ku eriihwaho, amagara garyaija. Obumanyiso by'okukiikamya n'ebindi byona bihweireho. Amahwa n'amatojo n'akabonero k'ekibi, “ensi eryakyeenwa nago,” mbwenu goona gaihirweho. Okurwara kukaija, ahabw'ekyo; kuryaihwaho. Okufa kuryaihwaho. Okusheesha eshagama kuryaihwaho.

Tihariho ekiriza aha itaka eryo kureka oburikwera, Abacungwirwe. Oo, mugyenzi! Yee. Oo, niinyehurira kurungi munonga. Ruhanga, n'ebihangirwe Bye; n'ebi Yaahangire omu byahangirwe ebi bicungwirwe Eshagama Ye Yonyini. Byashemezibwa okurabira omu muhanda gw'okushemeza Kwe Kwonyini; omuhanda Gwe gw'okwita obukooko oburikureeta endwara, omuhanda gw'okwita ekibi!

Nk'okwita obukooko oburi omu kintu, omuringo gw'okwita obukooko oburi omu kintu ogurikukirayo oburungi ogu turatungire n'omuriro. Noobaasa kukwata ekintu kyona okyozye n'eifuro n'emibazi yoona ei bagamba, nabwo nikiba kitakashemeire. Kwonka okyotsye rimwe!

Mbwenu Omuriro gwa Ruhanga ku guraite obukooko oburi omu nsi n'Emibazi; Yaaherize kutwara Omugore We, orikubaasa kutaaha omu Iguru Nawe, ebi byona byaba biriyo nibibaho. Reero agarukye omu nsi ogundi murundi, Eiguru Erisya n'Ensi Ensya. Obwire oburikufuka bw'obutiiti tiburikubaasa kugikora kubi. Obwire oburikwotsya bw'ekyanda tiburikubaasa kugikora kubi. Ensi y'omushyeenyi eryarabya nk'ekimuri kya rooza. Ekibi n'abasiisi byona biryaba bihweireho.

Ruhanga, n'ebihangirwe Bye n'okuhanga Kwe, bitwire hamwe omu kukwatanisa okuhikire. Nk'oku eiguru n'ensi biri iba n'omukazi, nikwo na Kristo n'Ekanisa bari, kandi boona nibabuganira omuri puraani emwe mpango y'ekitiinisa y'okujunwa kandi bareeterwe kimwe omu kifuba kya Ruhanga ogundi murundi. Mwakireeba?

Kandi, omu Nsi Ensya, hariyo Orurembo Rusya. Oo, mugyenzi! Hati muhurikize mutaireho omutima. Eki mutakyebwa. Ngu, Yesu akagira, omu kitabo kya Yohaana14, ngu Aryaza kutebeekanisa. “Emitima yaanyu etarishoberwa.” Ku Yaabaire naagyenda, “Nyine enshonga erikuntwara. Mukaikiriza Ruhanga,” Yaagumizamu, “Naanye muunyikirize.” Bakaba batarikubaasa kureeba ngu ni Ruhanga. Yaagira ati, “Mwikiiririze omuri Ruhanga, hati naanye Muunyikirize. Kandi Ninza kubatebeekanisiza Omwanya. Omu nju ya Tata harimu emyanya mingi; omu nju ya Tata harimu ebikaari bingi.” Kristo ariyo, naayombeka Yerusaalemu Orusya oru hati. Hati muhurikize mutaireho omutima. Muteetenganya. Eki, muta-mutakifeerwa. Kristo ari omu Iguru, eriizooba, naatebeekanisa Yerusaalemu Orusya.

Nk'oku Ruhanga yaahangire ensi omu biro mukaaga, yaakora ensi omu biro mukaaga, nari emyaka enkumi mukaaga. Nk'oku Yaagambire, “Mutaryebwa ekigambo eki,” nitushoma omu Byahandiikirwe, “emyaka rukumi n'ekiro kimwe.” Kandi Kristo akagyenda kandi ariyo naaatebeekanisa Ekikaari, ekitwire nikyombekwa okumara emyaka mingi, mingi enkumi n'enkumi, naatebeekanisa Omwanya. “Kandi ku Ndaabe ninza kubashemereza Omwanya, Ndyagaruka aha, Mbatware; kugira ngu okwo ei Ndi, naimwe mube niyo mwatuura.” Mureebe Omucunguzi n'Abacungwirwe!

Read the full account in...
Eka y’ebiro by’omu maisho ya kishwera w’omu iguru n’omugore w’omu nsi.

Bwanyima naareeba eiguru erisya n'ensi ensya; ahakuba eiguru ery'okubanza n'ensi ey'okubanza bikaba bihweireho, n'enyanja etakiriho.

(Nyowe Yohaana) naareeba orurembo orurikwera Yerusaleemu orusya, nirushuuma okuruga ahari Ruhanga, ruteekateekirwe nk'omugore ocumiirwe iba;

Okushuuruurwa 21:1-2