"Urwu rudo rwakakwana".

William Branham.

Verenga zvizere nyaya...
Seri Kwechidzitiro Chenguva.

Mamwe mangwanani ndakanga ndakarara pamubhedha wangu. Ndakanga ndichangomuka kubva kuhope, zvino ndakaisa maoko angu kuseri kwemusoro wangu uye ndokuzorora nemusoro wangu uri papiro. Zvino ndakatanga kufunga kuti zvichazova zvakadii kune rimwe divi.
“Zvino ndakacherechedza kuti ndakanga ndatorarama chikamu chinopfuura chepakati chehupenyu hwangu kana ndanga ndiri ndazorarama kusvika ndakura sevanhu vangu, uye ndaida kuitira Ishe zvakawanda ndisati ndasiya hupenyu huno”.
Ndakanzwa Inzwi richiti: “Uchangotanga! Ingoramba uchishingaira muhondo! Ingoramba uchishingaira!” Pandainge ndakarara ipapo ndichifungisisa mashoko acho, ndakafunga kuti ndangoita zvekufungidzira kuti ini ndanzwa Inzwi. Zvakare Inzwi rakati: “Ingoramba uchishingaira muhondo! Ramba uchienda! Ramba uchienda!”

Ndichiri kusangotenda, ndakafunga kuti kuda ndini ndataura mashoko acho pachangu. Zvino ndakaisa miromo yangu pakati pemazino angu uye ndokuisa ruoko rwangu pamuromo wangu ndokuteerera.
Inzwi rakataura zvakare: “Ingoramba uchishingaira! Kana ukangoziva chete zviri kumagumo kwenzira!”
Ndakaita sendinonzwa mumhanzi uye nemashoko erwiyo, rwekare rwunozivikanwa: “Ndasuwa kumusha uye ndaneta, uye ndoda kuona Jesu, Ndoda kunzwa mabhero aya epachiteshe chezvikepe achirira. Zvinoisa chiedza mugwara rangu uye zvodzinga kutya kose. Ishe, itai kuti nditarire seri kwechidzitiro chenguva!” Zvino Inzwi rakabvunza: “Ungada here kungoona seri kwechidzitiro?”
Ndakapindura: “Zvingandibatsira zvakanyanya!”

Zvakaitika handikwanisi kutaura. Kuti ndakanga ndiri mumutumbi kana kunze, kana kuti kwaiva kushandurwa, handizivi, asi zvakanga zvakasiyana nezviratidzo zvandakambova nazvo. Ndaikwanisa kuona nzvimbo yandakatorwa kuenda kwairi uye ndaikwanisa kuzviona pachangu ndakarara kumashure uko pamubhedha wangu. Ndakati: “Ichi chinhu chinoshamisa!”
Kwaiva nemhomho huru yevanhu uye vakauya vachimhanya kuzondikwazisa, vachidanidzira: “O, hama yedu yakakosha!” Kwakatanga kuuya madzimai echidiki, pakuonekwa vaiita sekunge vari kumakore achangodarika makumi maviri, zvino pavaindimbundira vaiti: “Hama yedu yakakosha!” Varume vechidiki, vari mukubwinya kwehujaya, vaine maziso aivaima senyeredzi pahusiku hune rima, vaine mazino akachena semaparera, vakandimbundira, vachiti, “Hama yedu yakakosha.”

Zvino ndakacherechedza kuti neniwo, zvakare, ndakanga ndava mudiki zvakare. Ndakazvitarisa ipapo zvino ndokutendeuka ndokutarira shure kumutumbi wangu wakare wakarara pamubhedha nemaoko angu ari seri kwemusoro wangu. Ndakati: “Izvi handizvinzwisise!”
Pandakatanga kuda kuedza kunzwisisa nzvimbo yandaive ndiri, ndakatanga kucherechedza kuti kwaive kusina zuro kana mangwana ikoko. Hapana aitaridzika kuneta. Apo boka guru remadzimai echidiki akanakisa andati ndamboona vaindimbundira, ndakaona kuti kwaive nerudo rukuru rwakandikurira uye pasina kukwezva kwepanyama semumaitiro evanhu.
Ndakacherechedza kuti madzimai echidiki ose aya vaiva nebvudzi ravo rakasvika muchiuno chavo uye marokwe avo aidzika zasi kusvika kutsoka dzavo.

Mushure mezvizvi, Hope, mudzimai wangu wekutanga, akandimbundira, akati: “Hama yangu yakakosha!” Zvino mumwe mudzimai akandimbundira uye Hope ndokutendeuka ndokumbundira mudzimai wechidiki uyu. Ndakati: “Izvi handizvinzwisise. Ichi chimwe chinhu chakasiyana zvachose kubva kurudo rwedu rwevanhu. Handichadi kudzokera kumutumbi wekare uyo uri pamubhedha.”
Zvino Inzwi rakataura kwandiri: “Izvi ndizvo zvawakaparidza kuti Mweya Mutsvene chii! Urwu rudo rwakakwana. Hapana chinogona kupinda Kuno chisina irworwo!”

Tevere ndakazotorwa ndikagariswa panzvimbo yakakwirira. Kwose ndaiva ndakatenderedzwa neboka guru revarume nemadzimai vari mukubwinya kwehudiki. Vaidanidzira, nemufaro: “O, hama yedu yakakosha, tiri kufara zvakanyanya kukuonai kuno!”
Ndakafunga: “Handisi kurota, nokuti ndiri kuona vanhu ava uye ndinoona mutumbi wangu uvete kumashure uko pamubhedha.”
Inzwi rakataura kwandiri: “Unoziva zvakanyorwa muBhaibheri kuti vaporofita vaiunganidzwa nevanhu vavo.” Ndakati: “Hongu ndozvirangarira izvozvo muMagwaro, asi hakuna vekwaBranham vakawanda kudai.”

Inzwi rakapindura: “Ava havasi vekwaBranham. Ava vanhu vawakatendeutsa, avo vawakatungamirira kunaShe. Vamwe vemadzimai ava vaunofunga kuti ndevechidiki uye vakanaka vaive vadarika makore makumi mapfumbamwe okuberekwa pawakavatungamirira kunaShe. Ndicho chikonzero vari kudanidzira, 'Hama yangu yakakosha!'”
Zvino mhomho yakadanidzira pamwe chete: “Dai wanga usina kuenda neVhangeri, tingadai tisiri pano!”
Ndakabvunza: “O, Jesu aripi? Ndinoda kuMuona!” Vanhu vakapindura: “Ari nechepamusoro zvishoma. Rimwe zuva Achauya kwauri. Wakatumwa semutungamiri, zvino kana Mwari auya, Achakutonga maringe nedzidziso yako.”
Ndakabvunza: “Ko Pauro naPetro vachamira here pakutongwa uku zvakare?”
Mhinduro yaiti: “Hongu!”

Ndakati, “Ndakaparidza zvavakaparidza. Handina kutsauka kubva kwaZviri nenzira ipi zvayo. Pavakabhabhatidza muZita raJesu, ndakadarowo zvakare; Pavakadzidzisa ruBhabhatidzo muMweya Mutsvene, ndakadarowo zvakare. Chipi chavakadzidzisa, ndakadzidzisawo, zvakare.”
“Tinozviziva izvozvo,” vanhu vakadanidzira, “uye tinoziva kuti tichadzokera panyika newe imwe nguva. Jesu achauya uye agokutonga maringe neShoko rawakaparidza kwatiri. Zvino iwe uchatiisa kwaAri, uye tose pamwe chete tichaenda panyika kunogara nekusingaperi.”
Ndakabvunza: “Ndinofanira kudzokera here panyika, zvino?”
Vakapindura: “Hongu, asi ingoramba uchishingaira!”

Pandakatanga kufamba kubva panzvimbo iyi yakanaka, ine mufaro, sekukwanisa kuona kwaiita maziso angu, vanhu vaiuya nekwandiri kuti vandimbundire, vachidanidzira: “Hama yangu yakakosha!”
Chiriporipotyo ndakanga ndadzoka pamubhedha zvakare. Ndakati: “O, Mwari, ndibatsirei! Musandirega ndichirerutsa paShoko. Ndiitei kuti ndigare paShoko chaipo. Handina basa kuti ani zvake anoitei, Ishe, regai ndishingairire kuenda kunzvimbo iyoyo yakanaka, ine mufaro!”
Ndanyatsogutsikana kudarika nguva dzose muhupenyu hwangu kuti zvinotora rudo rwakakwana kuti upinde munzvimbo iyoyo. Kwakanga kusina godo, kusina kuneta, kusina hurwere, kusina kukwegura, kusina rufu. Kuine bedzi runako nemufaro zvepamusoro chete. Chero chipi chaunoita, isa zvimwe zvose parutivi kusvikira wawana rudo rwakakwana! Svika pekuti unoda munhu wese, kunyangwe muvengi wose. Zvisinei kuti ndege haina kugadzikana, mheni iri kupenya, kana pfuti dzemuvengi dziri pauri, zvinhu izvi hazvina basa: wana rudo rwakakwana!

Kana usina kuponeswa, gamuchira Jesu Kristu seMuponesi wako iko zvino! Kana wanga usina kubhabhatidzwa mumvura, bhabhatidzwa iko zvino! Kana wanga usina kugamuchira ruBhabhatidzo rweMweya Mutsvene, rwugamuchire iko zvino! Shingairira kusvika parudo rwakakwana runozokuendesa kunzvimbo iya yakanaka uye yemufaro seri kwechidzitiro chenguva!

W. Branham.

Verenga zvizere nyaya... Seri Kwechidzitiro Chenguva.

(PDF Chirungu)   The Rejected King.

Sezvo munhu akatemerwa kufa kamwe chete uye shure kwaizvozvo agotongwa,

saizvozvowo Kristu akabayirwa kamwe chete kuti atakure zvivi zvavanhu vazhinji; uye achazoonekwa kechipiri, asingatakuri zvivi, asi kuti auyise ruponeso kuna avo vakamumirira.

VaHebheru 9:27,28